Tite 2
2
Meekédu masapenganani
1Géé éwe Tite, ikéda te mane masapengana n’amuene Nzambé. 2Beenda peeye yamôgôô mbe: Digaani ékenge, n’esima éamisôba, n’eodo. Beenda ahngô mbe: Sipani gô nzéa éaJésus étôkeani édué. Na bakani n’etondo na ôbibo. 3Obeenda peeye yageto te mônongovo. Beenda ahngô mbe: Digaani pitsi yetso gô mônongo ageto amatsimamani. Beenda ahngô mbe: Nômbiakea nôgiangana. Nômbiadigaa g’ôvéga amaduku. Buedi mbe agetoe ane oongô akaô ndongi yamisôba. 4Ndongiye te gôéékéda tômbôye mbe: Nyôngéôni omée wanyô n’etondo. Nyôngéôni anee wanyô na gényônga. 5Agetoe anye angeekéda tômbôye gôéba n’esima éamisôba na mitéma mimagôgéani. Angeekéda ahngô gôékenea yeba yaô na géômbé saô n’ekenge. Na gôégobeda omée waô kabaga atsuavéda Mane Mamavovo Nzambé.
6Na gôndé minzambu te mônongovo. Beenda ahngô mbe: Bakani n’esima éamisôba. 7Ewe Tite, ôtévéda ahngô gô mônongoe woo gayanza mônzambu mabégô mamisôba. Odigaa na môtéma ômasumani gôéékéda mabégô mavôni mandéké n’ewe. 8Ikéda na mavovia mamatsimamani na gébé n’oési. Gô étsimamee éoo, adudeoe woo angasanéa na tsoyi gébé na ébégô évo gôégôeséda.
9Beenda avéga mbe: Gobedani kooko yanyô. Indaani metso manyôngéô ahngô. Nômbiagoméa ahngô. 10Beenda avéga mbe: Nômbieesua ta na sôma gévo. Ivô éôtéa ényepa mbe atubéda kooko yaô mônongoe waô amôsôba na amavôma buta mbe meekédu maMooboyi asô n’anyô Nzambé makumédu.
11Menya mbe Nzambé amatsutsuéda ngeba yedi gôéoboo oma muetso. 12Ngebaye yedi dine ditubéda we ganyôngéô Nzambé mbe tôviié ngima môdigédi asagô na tsôvé yetso yava tsina. Na ganyôngéô angô mbe tôdigéé na mavôma gô tsengene na ésima éamisôba ésapengana n’ene ényôngéô amuene. 13Ngeba yedi ditôékéda gôédigaa kuanakue gôéenéa gévigéô sanyee ôvôni agényônga ôtôténdédani. Nyee ône ôvôni ôngatsutsuga ôbébayi ôtubéda ôndômba aMooboyi asô n’anyô Jésus‐Christ, angô te Nzambéne éasô n’anyô épôni ésaba na gégoni. 14Amaadeekeda amuene gôéwa gôndé wa n’anyô, gôéyuua we gô mabégô metso mabévani na gôégôgéda we mbe tôngaba omedi, asi évambevo n’edi. Na mbe tôngaba na gényônga na môvinéné gôéénda mane mamisôba.
15Oôkiô Tite, mane te mane mangeekédewe. Ikéda n’enyangee éoo éetso gôékasôgéda na gôésemba ane ookôni. Ombiasinga mbe deti yoma digôyungéda môtémee.
Currently Selected:
Tite 2: TSV
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Gabon (Bible Society in Gabon) 1983
