Gétsutsuéô 21
21
Wene ôba amanza na nyene tsina éamanza
1Me Jean nameena dôta wene ôba amanza na nyene tsina éamanza. Oba amapanga ômabakani na tsinane éamapanga émabakani émanôtôgaka na miubumie mietso mimanôtôga. 2Nameena môsenge aNzambé, te Jérusalemene éamanza, éne émasutuméa g’ôba émabaka va kôbangô aNzambé. Emasutuméa ényepani ganyepa muéba akea gôéwanyédu na mômi edi. 3Namookô ôgi angudi ôvovo gô gédigaa sokumaka Omavovo mbe: Bandôa n’atsatsee gédigaa saNzambé géndéké va gatse oma. Amuene angadigaa n’ahngô. Na omee dôta ahngaba aNzambé. Nzambé amuene angeenanô n’oma na amuene angaba Nzambé aô. 4Nzambé angakôbôa ahngô keba yetso yagô miso maô. Owa ôsangabadô. Na miéngé misangabadô. Na mindônga na pievia édimbani te yetso. Mane mambeego metso mamadimbana.
5One andé digaa gô gédigaa sokumaka amavovo mbe: Bandôa deo noo me neenda éôma éetso te éawene mônongo. Vane ôgie ômatôma me mbe: Tendaka nani. Gôébégô mavovia mami mandé mapie na moongôa môma eetsa môtémedi. 6Na ôgie ômoomba évovo mbe: Eetso édimbani. Me navovoni te Alpha na Oméga, événdégéô mbe, v’ebandô ametso te me, na v’ekôdéô ametso te me. Me te mapangame. Me te môyusumédue. One ookô sôé nangamôétsa meba magéenza magô gétôka géétsa monyo. 7One amadiiani gô ébadi émagenyuni angadiia gôndé me ébégô édué. Me te Nzambé edi, angô dôta te muanami amôtéma. 8Géé gôndé asi mitéma mideedani, n’ane asa sipani, n’oma asagô na ayôhani, n’asi matasame meengéa gô gésasô na makusa gô gésasô, na eendi amaganga, na aneegedi ambumba yegoni, na asi diboe, gétunguge saô te gô mungu asoto géyôa na mbônga ébévani, sangô te ôwa amôbaé.
Jérusalemene éamanza
9Môvo va gatse asi g’ôba tsambué amasimbéda ébungue tsambué émayôa na panda yevunga tsambué yamôyusumédue, amabambéa me Jean mbe: Vigaka. Nagôtubéda muéba ôbayiô na Môpaga Endombo. 10Gédidi SaNzambé gémeengéa pepe gôndé me. Na môsi g’ôba amatsua me na gô étsakaméô éamôkôdi ôtongoni. Amatubéda me môsenge aNzambé ôéndô mbe Jérusalem. Te ône ômabaka g’ôba va kôbangô aNzambé na ômasuma na gô tsina. 11Omatana n’obébayi ôtubéda ôndômba aNzambé. Môsengee ône ômakadima n’obébayi gandé étaé osunu ôvôni ééndô mbe, jaspe, te éne éndé na vee ga géenô. 12Na môsengee ômasetu gô kôbangô na môgômba amataé. Gô Môgômbee gômabaka nzima adiômbaa na diômbaa dibaé dimakeneo na nzima asi g’ôba na asi g’ôba abaé. Gô dikukéye dine gômatendu nzima amina na mina mabaé mamoongo masi Israël. 13Gômaba na gésa na gésa diômbaa ditato. Gésa gétsiga kômbéne diômbaa ditatô. Gô gésa gékea kômbéne diômbaa ditatô. Na gésa na gésa diômbaa ditatô ditatô. 14Môgômbee amôsengee ône ômadigédu gô ngongo obôgee ômasaaô na nzima adibobo na dibobo dibaé. Gô yangô gômatendu nzima amina na mina mabaé maane amasevouni na amatômukuni n’amuene Môpaga Endombo.
15Môsi g’ôba amavovoni amasumbéda péndé éokana émakônzu na dodo gôébongo ôkana amôsengee, na dikukéye na môgômbee. 16Môsengee ômasaaô ésa éetso énayi te ôkana ôvo. Na étongoe na évogee te mônongovo. Môsi g’ôba amabongo ôkana amôsengee na péndéne éedi. Okana gô kilomètre te mitônisa mibaé na mikama mibaé miakilomètre gô étongoe. N’evôgee te mônongovo. Na gô ngongo na gô tsina te mônongovo. 17Môsi g’ôba dôta amakanéga môgômbee na angô ômatongo na gô ngongo te nzima tsambué yamètre na mètre dibaé g’ôkana ôsabômu oma muetso. 18Môgômbee ône ômasaaô na mataé mosunu ôvôni meendô mbe, jaspe. Môsengee dôta ômasaaô na dodo ômootéa n’obébayi ga géenô. 19Dibobo yagô tsina dimadigédu môgômba dimanyepedu na mataé masuadô mosunu ôvôni. Mamabaka mbe étaé éamapanga te jaspe, éne éamôbaé te saphir, éne éamôtatô te agate, na éamônayi te émeraude. 20Na étaé éamôtayi te onyx, na éamôtôba te sardoine, na éatsambué chyrolithe, na éagénana te béryl, na éne éamôtenamônayi te topaze na éne éanzima te chrysoprase. Ene éanzima n’evo te turquoise, na éne éamôyusumédu te amethyste. 21Nzima adikuké na dikuké dibaé te mavo mataé meendô mbe perle. Okuké n’okuké ômabaka perle épo épo. Nzéane éamôsengee ône te dodo étévo n’obébayi ga géenô.
22Me tsiene eba aNzambé gô môsengee ône gôébégô amuene Kumu Nzambé, angô Kumu angudi yetso na dôta Môpaga Endombo ahndéké wangô na gôsaba tsôvé eeba aNzambé. 23Môsengee ône ôsaba na tsôvé éakômbéne na ngondene gôéétsa angô gévede, te ôbébayi ôtubéda ôndômba amuene Nzambé ôtanédani na Môpagee te dambine. 24Asi tsengeye yetso yava tsina ahngananga te gô gévedege sedi. Atômi agô tsina angaviga atsua ôkitie waô gôédeekeda angô gô môsengee ône. 25Dikuké yamôsengee dingaba na vôô gô môsae wetso na disangakukégu gôébégô gône gôsangabadô pitsi n’evitsi éedi. 26Na dikitiye yetso na dikumaka yetso yatsengeye yetso dingadeekedu te gô môsengee ône. 27Ivô gô môsengee ône gôsangeengéa ta na sôma gévo sevindô, ta na môma môvo andé n’esima éasagô na éadiboe. Ane angeengéani te ane andé na mine maô mamatendu gô miganda miamonyo, te migandamie mikeneo na Môpagee.
Currently Selected:
Gétsutsuéô 21: TSV
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Gabon (Bible Society in Gabon) 1983
