Gétsutsuéô 19
19
1Va mbenene vane, namookô ôgie akangégangé ômavovo géômbé gévoni gô ngongo. Omavovo mbe: Tôkumédékéni Nzambé#19:1 Gô yôgi yetso mbe, Aléluya. gô géôbogeoge géndé n’edi na g’ôkumakee, n’ondômbee wedi. 2Mitsundumie miedi mindéké misapenganani. Angô Nzambé ameetsa tsôgôô gôndé gétôa gévôni sagésasô gémabévéda tsinane nyetso na gésasô sedi. Nzambé amamôsiséda gôébégô amayôha ayanzi aNzambé. 3Na géômbége gémoomba évovo mbe: Tôkumédéni Nzambé. Môtute agésotosoto samôsenge ôvôni ôngabutima môbô na môbô. 4Vane nzima dibaé yapayi na payi dinayi na éôma énayi évégumani ahmasiba mabongo maô gôéneegeda Nzambé andé digaa gô gédigaa sokumaka. Ahmaabéa mbe: Amen. Tôkumédéni Nzambé.
Môambô ayômba dingabaa Môpaga Endombo
5Ogi ômavovo gô gédigaa sokumaka mbe: Kumédani Nzambé asô, anye n’asi g’ôba muetso, n’anye muetso nômôena éhdita, payi n’anengé. 6Na me Jean namookô ôgi agéômbé gévôni ômavovo na nzongodi éndé ga ngubu na ga midumu mikungani. Namookô angô ômavovo mbe: Tôkumédéni Nzambé, angô Kumu épôni éndé gôétôma. 7Tôtsôkékéni. Tôenéni gényônga. Tôkumédéni ôndômbedi. Ndéône ébuéyi éne éayômba dingabaa Môpaga Endombo. Môgetone angabaaôni amani ékôkéga. 8N’angô eetsô ôtômu mbe: Aataka gédénga soo samôkanda obébayi ootéa amôsôba ôsaba n’evindo. Menyani mbe môkandee ône te ésima na mayanza mamisôba masi mbumu éaNzambé.
9Môsi g’ôba amatôma me mbe: Otenda te édué. Tenda mbe: Tsôkéakani anye nôkôviô gô môambô ayômba yaMôpaga. Na môsi g’ôba amoomba évovo mbe: Ogie ône te ône apie ômavovo amuene Nzambé. 10Namagudama gô makôdô mamôsi g’ôba gôémôneegeda. Ivô angô amasemba me mbe: Ombiayeega éénda nane. Me te môyanzi gandé éwe na gandé ana aTéta n’oo. Anye muetso nôndé na mabégô mapie mamatsutsua Jésus. Nôneegeda te Nzambé.
Mabégô mapie mamatsutsua Jésus te mangô mameetsa ngudi n’eodo gôndé apandôédi amatasa maNzambé.
Mômane andé digaa gô nyama éavembo
11Vane nameena ôba ômakukua na cheval éavembo émakusa. One amadigaa gô nyama nene, inedi te Mavôma na évo ina, Môma Apie. Angô atsundéda gépénganédé. Na agenya kuka yetso gétsaé. 12Miso medi moobébayi ga soto. Gô môtsé amaata épôkôdô éyekani éokumaka. Gôndé angô gômatendu ina ésoongôa môma émenya buétsé te amuene. 13Amaata môkanda ômeenô gô nzina. Inedi te Ogi ANzambé. 14Migôde miaNzambé mimaviga g’ôba gôémôaanda. Mimabaka digaa gô chevaleye yavembo na mimaata mikanda miamisôba miavembo misaba n’evindo. 15Gô mônya ône atetu mbe, Ogi ANzambé, gômakusa ébaga éamengô. Na éangô angabeta tsengeye yetso. Angatôma yangô na môtunga amuahnga ôsaba na ngeba. Na angapinya miônda gô gétsanga sopisa ôbabaka aNzambé, Kumu otômue wetso. 16Inedi ématendu gô ngoyi edi na gô môtandedi. Ina ématendu te mbe: Kumu akumu yetso na Môtômi aatômie muetso.
17Me Jean nameena môsi g’ôba andé môtie gô kômbéne. Amaadôngana n’ogi angudi na gôndé nyoeye yetso dipepa gô ngongo. Angô mbe: Vigani nôvikôkangana muetso gôéaa môyakô ôkônza Nzambé, Kumu épôni. 18Vigani nôviaa yôtô yakumu yatsenge yetso na yôtô yaatômi amigode na yamigodemie. Nôviaa dôta na môsoyi anyama na yôtôye yane adigaa gô yangô. Nôviaa na dine yoma muetso, avéga na ane asaba avéga, na payi na anéngé.
19Nameena Gényamanyama na atômi atsengeye yetso yava tsina na migode miaô ahmakôkangana tungu épo gôégenya ébadi n’one andé digaa gô chevalene éavembo na géômbé sedi samigode. 20Gényamanyamage gématsôpu. Na môékédi adiboe dôta, ône amayanza étsutsuku va miso maGényamanyamage, ahmatsopu (Bangôani mbe te gô étsutsukue éedi amabôméda omee amasinga éetsô ndémbone éaGényamanyamage na amaneegeda gégoni sedi.) Gényamanyamage na môékédine adiboe amagungyu adônga na gô mungu asoto gôkusa mbônga éangôté éndé na tsokida. 21Akaô muetso ahmayôhu na ébaga émakusa gô mônya one andé digaa gô chevale. Nyoeye yetso dimanguta gômaa yangô nzumbuye.
Currently Selected:
Gétsutsuéô 19: TSV
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Gabon (Bible Society in Gabon) 1983
