Gétsutsuéô 14
14
Embô étôa ane amoobouni
1Vane me Jean namabono. Nameena Môpaga Endombo va ngongo amôkôdi ôtetu mbe Sion. Vamadenganô n’edi môkama amitônisa na nzima dinayi na mitônisa minayi mioma mimatendu gô diôsô yaô inedi na ina aTétedi. 2Me Jean namookô ôgi ômaviga g’ôba na nzongodi épôni ga ngubu, ga môdumu ôdumédani. Ogie ône dôta ômavovo na gényônga ga ôgi angombi égôbuni. 3Mitônisamie mioma mine mimatema va mbene eoma énayi évégumani, na va mbene apeeye. Na ahmatôa imbô éamanza madeo ésitôôni. Gôsibé môma oongôa éétôa buétsé te ahngô mitônisamie mioma mine mimoobouni mimanôtôga gô tsina. 4Yôtô yaô disigésangané n’ageto ahmadeekeda yangô na gôndé Nzambé. Ahmakea nzéepo na Môpagee na gô tunguye yetso dimakeangô. Te ahngô ahmapanga éobouni va gatse omee gôédeekedu na gôndé Nzambé na Môpagee. 5Gôndé ahngô madeo gôsiôkanô éoboe. Ahsaba n’oési ta n’ovo.
Asi g’ôba atatô
6Vane me Jean nameena môsi g’ôba môvo amaveea gô ngongo ngongo. Amabaka na Tsangô Eamôsôba éamabégô mamôbô na môbô masakôdéakani gôébeenda oma agô tsina. Tsangône te gôndé asi tsengeye yetso na asi mongo metso na asi yôgi yetso na oma muetso. 7Amavovo na ôgi agô ngongo mbe: Gobedani Nzambé na gomo. Tubédani angô géneega géwanya n’okumakee ôndé n’edi. Nôeni, ndéône ébuéyi éne éngatsundédangô oma. Negeedani ône amakana ôba na tsina na mbéyi na tungu yetso dibunduga meba.
8Môsi g’ôba amôbaé amavigédu na Nzambé gôéaanda môkedi va ngima, ameenda mbe: Môsenge ôvôni aBabylone ômapanzô, ômapanzô. Môsengee ône ômeetsa gébungu sedi samaduku na gôndé oma muetso gô tsenge mbe ahnganyua. Madukume mane te ésima éedi éetso ébévani éengéa gô gésasô na ékusa te gô gésasô.
9Môsi g’ôba amôtatô amaanda akedi va ngima na amavovo n’ogi agô ngongo mbe: Anye nôneegeda Gényamanyama na gégonige sedi gémapakôni na nômasinga éétsô ndémbô n’edi gô panza na g’ogogo. 10Anye nônganyua gébungu géyôa n’opisa aNzambé ôsigésu na sôma gôésusua ôbagee. Anye muetso nômasinga Gényamanyama na gégonige sedi nôngabisa gô soto géyôa na mbônga ébévani, géndé va mbene asi g’ôba ayanzie aNzambé na Môpaga. 11Sotoge géne gébisongoneda omee na môtutu wedi ôbutima môbô na môbô géemé. Nôsangadunda na pitsi n’omanda te bisongono, anye nômaneegeda Gényamanyama na gégonige sedi na nômasinga éétsô ndémbô étubéda inee éedi.
12Nôeni ébandôe ésipa asi mbumu éaNzambé na bôkédé, te ane ahgobeda mitôma na mige miedi na ahsanôtôga gôndé Jésus ône ameetsangô mitémamie gébé na buétsé.
13Vane me Jean namookô ôgi ômaviga g’ôba ômatôma me mbe: Tendaka édué. Na ômavovo mbe: Gényônga gôndé ane ahwa pitsi yedi gô éyanza éaKumu. Gédidi SaNzambé gémaabéa mbe: Ii, te na gô pie. Angadunda gô éyanzee éaô édagani. Na mane maô mamisôba mangakea n’ahngô géômbé.
Mane mamagaabô gô tsina mamani éombo
14Me Jean namoomba ébono. Nameena ôbôngé avembo. Gô ôbôngé ône gômabaka sôma gémagono na môma digaa. Amaata gô môtsé gépôkôdô sokumaka gémakônzu na dodo. Amasumbéda g’ôgogo môsagôe amengô. 15Môvo môsi g’ôba amakusa gô eba aNzambé na amaamugana na gôndé ône amabaka digaa g’ôbôngé mbe: Tsôpaka môsagôe woo. Oeni, ndéône éekitsa mane mamagaabôkôni ébuéyi. Mabégô metso mameenanô va tsina mamani édeeda. 16Vane ône amadigaa g’ôbôngé amoota gô tsinane nyetso na môsagôe wedi gôékitsa mane mamagaabôkôni.
17Môvo môsi g’ôba amakusa gô eba aNzambé ôndé g’ôba na angô dôta amasumbéda môsagô amengô.
18Na muene môsi g’ôba dôta amaviga gô gévumbéô sadigondoku. Angô amabaka n’otômu asoto. Amaamugana na gôndé môkedi amasumbédaka môsagôe amengô. Angô mbe: Kitsa na môsagôe woo miôndamie#14:18 Miôndamie mine mitetu gô suada mbe, grappes de la vigne. miameba maduegi mindé gô tsinane nyetso. Miangô mimani éombo. 19Môsi g’ôba ône amakea akitsa na môsagôe wedi miônda miomboni miagô tsinane nyetso. Ahmamikuya gô gétsanga sopisa aNzambé gôékuséda mebame. 20Miôndamie mimapinyô gô gétsangage v’etumba amôsenge. Gô gétsangage géne gômakusa nzina ti ga mbéyi. Mbéne éanzina ématongo gatongo môtôô agô tsina ôkeo nzima apitsi.#14:20 G’ôgi asuada te 300 kilomètres. Mbéne éanzina éne ématiba gô ôkana ga gétie samôma.
Currently Selected:
Gétsutsuéô 14: TSV
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Gabon (Bible Society in Gabon) 1983
