Hébreux 12
12
Nzambé te Tétee asô n’anyô
1Wa n’anyô tôndéké tôtandaméô na oma ayekani atôbononi. Tambô tôkinédi magumba metso maditéda wa n’anyô gôékea. Tôkina na mabégô metso mabévani matôdipô tsina na tsina kabaga tôkea. Tôtômbé makôdôme gôékea na môkasa, gôédiia gô nzéane ématôtévuni. 2Tôboneni misome masô n’anyô na nzôô na gôndé Jésus. Bandôa v’ebandô ngu na v’ekôdéô, mitéma miasô n’anyô mindéké te gôndé angô gébé na buétsé. Jésus amasinga mbe oma abôkédé angô va gésumu sowa na amawa te vangô. Owa ava gésumu sowa, te ôwa atsoyi. Tambô Jésus asitanganédé tsoyi nene, ivô amaténdéda gô gényôngage gémakeneo gôndé angô va mbene owa. Deo noo andé digaa g’ôba gô géeyo gémôgôô sagédigaa saNzambé sokumaka.
3Gôndé anye, nômbiadôdigaa gô tsina amaguga, n’anye nôgôgini, nômabiadigaadô nane. Ivô kôngédani Jésus gamasipangô gô gékuanô gévôni gémakuanô angô n’oma abévani. 4Gôébégô anye, gô ébadi égenyanye na mane mabévani, madeo nôsiyôhu na mangô gamayôhu angô. 5?Mabégô mamavovo Nzambé gôétôkasôgéda, anye nômeeba mangô‐a? Ogi aNzambé gôndé wa n’anyô anedi te mbe:
Muanami, gésisédéô géétsiô éwe na Kumu, kaka sayeese.
Ombiena tsoyi vasembu éwe na Kumu,
6Okô Kumu asiséda éwe, menya mbe agônyôngéô.
Okô agôbômôa, menya mbe agômemi mbe: Oô te muanami.
7Bibédani magugame meenanye gabibéda môma gésisédéô satétedi. Endé te nane. Magugame mane matôtubéda mbe gôndé Nzambé, wa n’anyô tôsaba agenda, tôndé anedi na tôéekédu n’edi. ?Va mbumu oma gôndéké muana asangasisédu na tétedi‐a? Aé, gôsaba. 8Okô éwe ôsasisédu na Nzambé gasisédu anee muetso, tambô éwe kaka muana apie, éwe ôsaba na Tétee. 9Tasani geenda tétee yasô n’anyô yava tsina. Atôsiséda na tôgobeda ahngô. Géé ti na Tétene éasô éag’ôba, buedi mbe tôasugédéni gôémôgobeda na tôngadônga. 10Tétee yasô n’anyô yava tsina atôsiséda gô éne étasa ahngô gôétôékéda gô pesu éandéô étôdigaa va tsina. Ivô Nzambé atôsiséda gôétônyepeda gômbe tôngaba n’etsimama évo n’edi éngadigaa wa n’anyô n’edi. 11Gô ndéô ésisédu môma, adéa na pievia éagésisédéô sedi gémenye mbe te ébégô éamôsôba. Tambô va mbene, ône amoongu ndongi gô gésisédéô gémeetsô angô, angadiia mamisôba te gô môdigédie wedi agétabé.
Ndongi na géevédéô
12Tômbani mogome manyô magôgini. Pupédani mabongome manyô magenyini. 13Oombakani ékea gô nzéaye dindé na deedéké gômbe makôdôme manyô meekonzo masangakobo, ivô mbe mangadôngédu.
14Gényôngani gôédigaa na gétabé n’oma muetso na gôéba na môdigédi ônyôngéô Nzambé. Okô nôsidigaa ganyôngéô Nzambé, akanyô mbe asangeena Kumu Jésus gô mônongoe wanyô. 15Wemani anyene n’anyene mbe gôsaba môma anika ngima gôénôtôga gô mate maNzambé. Wemani kabaga va gatse anyô gôba môma agono na mabunza mandôé makandani na mabévéda oma ayekani na môyobo. Pigaga gô môtéma amôma te môyobo. 16Wemani kabaga gôdenganô va gatse anyô môsi gésasô. Wemani kabaga gôdenganô môma agono na Esaü asiditédé ôvangee aNzambé. Amakaba ôpayie wedi gô gépede samôyakô gakabô sôma sabobo. 17Va mbenene vane Esaü amaduka tétedi mate, ivô asimeetsô. Esaü asibédô na ngudi gôénikéa ényepeda éne émabévangô vamakabangô ôpayie wedi, buéyé gamabutangô ôpayi gône adéa.
18Anye asi pitsi yedi nôsaba gamabaka akanyô oma aIsraël. Ahmawesea na gô môkôdi ôtetu mbe Sinaï, ômeenanô na miso na ômabandô na mogo. Gô môkôdie ône gômakusa mungu asoto, na gômakusa évitsi éabangata na gékunga. 19Gômookanô na nzongodi éagémbômba na ôgi ômavovoni. Ogie ône ômadaga. Gô gomo ômookô oma aIsraël amagondo mbe: Kookoyewe ôgie ône, ôsoombadô évovo. 20Ebégôe émadagéô ahngô te gômatôma ôgie mbe: Ti ône abanda môkôdie ôdôô, béyé mbe môma, béyé mbe nyama, angatuma na mataé gôéyôhu. 21Gômadaga gétsutsukuge géne, Moïse amavovo mbe: Me natatéa na gomo.
22Géé anye nôndé nômawesea na gô môkôdie ôtetu mbe Zion. Na nômawesea na gô môsenge aNzambé Kumu amonyo, te Jérusalem ag’ôba. Gône gôndéké mitônisa na mitônisa miasi g’ôba avigédu na Nzambé gôétsôkéa anye. 23Anye nômamana éengéa na gényônga gô mbumu éana akuua aNzambé. Mina maô meetso mamamana étendu gô môsenge ag’ôba. Anye nôndé nômawesea na gôndé Nzambé, môtsundédine oma muetso, na môtsundédine edidie éoma amatsimamédu gébé n’oési va mbeego. 24Nômawesea dôta na gôndé Jésus, angô môsungéyine evamba éamôbaé. Nômawesea gô nzina yedi dimaagani. Yangô dindé na nyene tsangô, kaka éne ébévani émabaka na nzinaye yAbel.
25Bakani n’ekena gôégobeda ône avovo n’anye. Oma aIsraël amakina ôgie ône ava tsina ômeevéda ahngô éne émavovo Nzambé. N’ahngô asiôngôé ébusuga tsôgôône émeetsô ahngô. Eembe ti n’one atôôkô avovo ôgi ag’ôba. Okô tômôgéngôgéyi magotome masô n’anyô ?tôngabusuga ôpisedi nayee? 26Gôndé oma aIsraël ôgi aNzambé ômatatéda totone, géé gôndé wa n’anyô amatôvangéa mbe: Nangoomba étatéda nyene kuka, kaka tsina étévo, ivô te tsinane n’obee. 27Vavovo angô mbe: Nangoomba nyene kuka, tômenya mbe mane mamakanôni metso mangatatédu na mangadimbana, na éne éngasanéani te éne éngasipani.
28Tôkumédéni Nzambé na yôgiye yasô n’anyô gôébégô wa n’anyô tôngeengéa g’ôkumu amôbô na môbô. Na tôkumédéni Nzambé na gésoo sasô n’anyô gôéyanza éne ényôngéô angô gôémôgobeda na gomo. 29Menyani mbe Nzambé éasô te soto géyôédani.
Currently Selected:
Hébreux 12: TSV
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Gabon (Bible Society in Gabon) 1983
