II Timothée 4
4
1Me Paul natôma éwe Timothée, ébégô édué évôni. Nagôtôma éangô va mbene aNzambé na va mbene aJésus‐Christ, môtsundédine ane adôngani n’ane amawani. Nagôtôma gômbe génikéô saChrist na ôkumue wedi génganeegedu. 2Môtômee te mbe: Ikédaka Mane Mamavovo Nzambé. Nigôa mangô na gébaki gô ndéô yetso. Ndéône ényepeyee, ésanyepeyee, suméaka ikéda gôékoa oma matasa maô. Semba ahngô. Kasôgéda ahngô. Ikéda ahngô na môvinéné ôvôni. 3Menya mbe ndéône éwesea, éne éngakina oma éôkô meekédu mapie. Matô maô manganyôngéô éôkô mabégô masapengana na tsôvé yayôtô yaô. Angakénga gôéévôa eekédi ayekani ngu na vangadenga ahngô môékédi anigôa mane manyôngéô matô maô éôkô. 4Asangatambéa matô maô gô mabégô mapie. Angagéngôga gô matangôtangô masaba na tsoongo. 5Ivô éwe, Timothée, sipaka. Ombiasinga mbe matasa moo mayungédu n’omee ane. Bibéda gô maguga. Yanza mayanza moo mamôékédi aTsangô Eamôsôba. Kôdéda gésaô soo ngu na v’ekôdédô.
6Géé gôndé me, ndéône ébuéyi, éne éngadeekedu me ga ôgondoku. Ndéône yami ébuéyi gôéwa. 7Me namani égenya ébadi étôgenyani. Me namani étsiga v’ekôdeô éatsaéne étôkea pita. Me tsatsuma ône ameetsa me môtémee paga. 8Ene ényangiô gô ébadi éndé gôévéngéa me deo noo gô mbene anzéa. Eangô te gépôkôdô setsimama géngaatédu me na Kumu Jésus môtsundédine asapenganani. Asangaatéda sangô memuene môtévo, te na muetso ane andé gôéenéa na gényônga génikéô sedi.
Ndongi gôndé Timothée
9Gényôga gôéviga na gôndé me pitsi yedi. 10Gôébégô Démas amatsika me. Angô amootéa ényôngéô mabégô matsengene, te gamakeangô na gô Thessalonique. Crescens dôta amakea na gô Galatie. Na Tite amakea na gô Dalmatie. 11One andé n’ami éva te Luc amuene. Oviga na Marc, angô asabômu éwedéa me gô gésaô saNzambé. 12Namatôma Tychique na gô Ephèse. 13Vangavigewe ôtsua me ngoyine éami épipani ématsika me gô eba aCarpus gô môsenge aTroas. Otsua me dôta migandamie miami, nootéa ényôngéô te mine mimavutégu kongogo.
14Alexandre, môgubane, amatubéda me mabégô mayekani madagani. Amuene Kumu Nzambé angamôétsa éne éndé kuanakue n’edi. 15Ewe Timothée, baka n’ekena gôndé angô, gôébégô angô eenda mavovia masô n’oo pégôani.
16Vamanigôa me kukane éamapanga ébégôe éami gô eba amisoso, gôsibé ta na môma môvo gôésungéa me. Muetso amatsika me. Naduka Nzambé mbe: Ombiétsa ahngô ôési gô éne. 17Ivô Kumu Nzambé amabaka n’ami gôéoodeda me. Ameetsa me ngudi gôénigôa na vede mabégô medi. Mangô mookanô na muetso asaba Ajuif. Namayuu ga môma awatô gô mônya agémbungu. 18Kumu Nzambé angayuua me gô maguga metso gôéengéda me gétabé n’ekenge g’ôkumu edi ag’ôba. Ondômbee na ôkumakee wetso ôbaké môbô na môbô gôndé angô. Amen.
Kômbôye yamôyusumédu
19Kômbôa gô inami Priscille na Aquilas, na ebee wetso Onésiphore. 20Eraste amasanéa gô Corinthe. Namatsika Trophime gô Milet te gômabeeakangô beeaga. 21Gényôga ébuéa égô ndéône éasodi madeo ésibuéa.
Ane agôkômbôani te Eubulus, na Pudens, na Linus, na Claudia n’ana aTétee n’oo muetso agô mbumu éaNzambé.
22Te mbe Kumu Jésus abaké n’ewe. Na mbe mate maNzambé mabaké gô mitéma mianyô muetso.
Currently Selected:
II Timothée 4: TSV
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Gabon (Bible Society in Gabon) 1983
