II Timothée 3
3
Ndéône éamôyusumédu
1Ewe Timothée, ômbiabômu mbe gô pitsi yamôyusumédu gôngaba ndéô didagani. 2Engaba te nane. Oma angaba na guma n’onzôô okiti, na nyemo na bôpeeo. Angeenza Nzambé na asangagobeda iyee yaô na tétee yaô. Angaba na bôkôsô. Asangaditéda Nzambé na mabégô medi. 3Mitéma miaô mingaba ga mataé. Asangeena akaô ngeba. Akea agiangana na matsuavi. Angaba oma akéé na dibaga. Angadudu mane mamisôba. 4Angaba asi gévééa na buembe. Asangasinga ndongi. Angakaaô na bôpeeo. Angootéa ényôngéô migangu miatsengene na asanganyôngéô mane mamuene Nzambé. 5Gô ndéôye dine, oma angagésangana gô gésôga ti eembe andé gôégobeda Nzambé tambô asavamba na ngudi yedi. Kina évamba n’omee amônongoe ône. 6Avo va gatse aô angeengéa na waada na gô yebaye gôévooto ageto asaba n’ekena na andé na mitéma mimayôa na mabégô mabévani agémbana gô nzéa diyekani gô mane mabutahngô. 7Agetoe ane ookô meekédume moma muetso génigôgéô ta na ébégô évo na géôngôé émenya mane mapandôéda we mapie gandéké Nzambé. 8Gameenda Jannès na Jambrès pégôani na Moïse, te gangeenda omee adua pégôani gô mabégôme mane maNzambé mapie. Angô te oma amatasa mamagéngôgani. Gô mabégô manzéa éaJésus étôkéani édué eenda te makanégéda. 9Ivô ngudiye yaô dingaba te g’ôkana apitsi na vane oma angamenya mônongoe waô gamamenyanganô mônongoe amôgôôe abaé ane, Jannès na Jambrès.
Ndongi yamôyusumédu
10Géé éwe Timothée, ôndé gôéyeta gô matambé mami évo, évo. Osabômu meekédu mami, na mônongoe wami, na môvinéné ami, na ôsabômu gandé me gétsumé Nzambé paga, na ôbibôe wami na étondoe éami na gakea me gépongé gô nzéa éaJésus. 11Osabômu dôta gékuanô na maguga mamatubédu me. Omeena mônongo amaguga mamatubédu me gô Antioche na gô Iconium na gô Lystre. Ah mônongo agékuanô gémakuanô me. Osabômu mbe Kumu Nzambé amakuséda me gô mangô metso. 12Endé te nane. Muetso anyôngéô édigaa na égobeda Nzambé gô vitoone éndé wa n’anyô na Jésus‐Christ, angeena gékuanô. 13Ivô oma abévani na abôki amangônzô angakea gésikamé gô mabégô mabévani. Abôméda akaô na angabôméda te n’anguene. 14Géé éwe Timothée, sipéda môtémoo gô mane mameeka éwe masatsumewe paga. Osabômu mônongoe amôékédine woo. 15Bandôa g’ôanéngée woo ômeekédu Matendeo MaNzambé na te mangô mandé na ngudi gôétsa éodo évôni. Eodoe éne ébuéda môma gô géobogeo gédiiangô veetsangô Jésus‐Christ môtémedi wetso gémôtsumé paga. 16Matendeo metso maNzambé mamatendu te gamavumbéa Nzambé modie wedi gôétévéda oma. Mangô mandéké ngu gôétsigéda môma gô mabégô mapie na gôékoa matasa moma amabômuni, na gôétsimaméda ébévee éamôma, na gôétévéda angô wene mônongo amonyo ômatsimamani. 17Gô mangô môma aNzambé angaba amabôngamani na angaba na ngudi na asangabutadô sôma gôémangôa mayanzame metso mamisôba.
Currently Selected:
II Timothée 3: TSV
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Gabon (Bible Society in Gabon) 1983
