I Jean 2
2
Christ te môwedi asô n’anyô
1Anami agô mbumu éaNzambé nanôtendéa mabégô mema gômbe nôsangeenda mabégô mabévani. Okô môma abômiô gôéénda ébégô ébévani, tôndé na môsungéyi andé vavo na Téta Nzambé. Môsungéne te Jésus‐Christ asabômukuni. 2Amuene Jésus‐Christ amadeekedu na Nzambé gôéwa gômbe ébévee éasô n’anyô ésingéô kokoo. Kaka éne éasô n’anyô étévo ivô te na éne éoma muetso.
3Okô tôkenea mitôma na mige miaNzambé vane tôtubéda mbe tôsabômu Nzambé. 4Okô môma avovo mbe: Me tsabômu Nzambé, na angô asakenea mane matôma Nzambé, môma nône te môpati. Mane mapie masaba gôndé angô. 5Géé, gôndé ône akenea mane matôma Nzambé, angô te môma ootéa ényôngéô Nzambé na môtémedi wetso. Na vane tômenya mbe tôndé môvo na Nzambé. 6One avovo mbe: Me te môvo na Nzambé, adigéké gamabaka Jésus.
Môtôma atsatsee
7Omami amôtéma, vanôtendéa me, tsanôtôma gô mane matsatsee. Te gô môtôma ômadingani ômatômu anye v’ebandô. Môtômee ôdôô ambeego ômadingani te ébégô émamananye éôkô. 8Eébéyée nane, te môtôma atsatsee ônôtendéa me. Môtômee ôdôô ôndé ti apie veenanô angô gôndé Christ na gôndé anye. Endé te nane évitsie énôtôga na gévede sapie gétana.
9One avovo mbe: Me te môma andé gô gévede, na angô andé na bôvingô asanyôngéô môkedi, agébaka gô évitsi. 10One anyôngéô môkedi andé gô gévede na gôndé angô gôsaba gésima ta na gévo géngapôngéda môkedi gôéénda mabégô mabévani. 11Ivô ône andé na bôvingô na môkedi agébaka gô évitsi. Ananga gô évitsi asamenya gôkeangô. Gôébégô évitsie émakoa angô aka môsi pogu.
12Nanôtendéa anami anéngé gôénôbangôéda mbe ébévee éanyô émasingéô kokoo te gô éne émayanzéa Jésus‐Christ wa n’anyô. 13Nanôtendéa anye tétee gôébégô nôsabômu ône amapanga v’ebandô. Nanôtendéa anye minzambu gôébégô nômadiia gô ébadie émagenyanye n’one môbévani.
14Nanôtendéa anéngé, gôébégô nôsabômu Tétasô n’anyô. Nanôtendéa anye tétee gôébégô nôsabômu ône amapanga v’ebandô. Nanôtendéa anye minzambu gôébégô nôndé na ngudi. Nôndé gôékenea Mane Mamavovo Nzambé gô mitéma mianyô. N’anye nômadiia gô ébadi émagenyanye n’one môbévani.
15Nômbianyôngéô mane matsengene na éne éndé wangô. One anyôngéô mane matsengene asanyôngéô Téta Nzambé. 16Eetso éatsengene te mane mabévani manyima môtéma na tsôvé diôkô môma yamane meenanô na miso, na nyemo éokiti atsengene. Metso mane masaviga gôndé Téta Nzambé, maviga te gô tsengene. 17Tsengene éôta te ôtaga. Na metso matsengene manyôngéô môma moota te ôtaga. Ivô ône eenda mane manyôngéô Nzambé andé na monyo agékôdéé.
Môvingi aChrist
18Anami, ékôdéô éka gôpégôpé. Nômamana éôkô mbe Môéndi aPégôani te Môvingi aChrist angaviga. Tambô Eendi aPégôani ayekani, Avingi aChrist amani étsutsuga. T’ebandô tôsabômu mbe ékôdéô éka gôpégôpé. 19Omeaa asibaké avo n’asô n’anyô t’ebandô amanôtôga gôndé we. Mbe amabaka avô n’asô n’anyô ahngô mbe andéké asô n’anyô. Ivô ahngô ahmanôtôga môvo na môvo anguene gôndé wa n’anyô gôémenyanganô mbe angô asaba wasô n’anyô.
20Géé ti gôndé anye, nômeengéô na Gédidi SaNzambé géne gémapika Christ gôndé anye. T’ebandô anye muetso nôsabômu mane mapie. 21Me nanôtendéa kaka mbe nôsamenya mane mapie, te gôébégô anye nômamenya. Anye nôsabômu mbe gô mane mapie gôsakusa ébégô éoboe ta n’evo.
22?Môpatine indaa? Môpatine te ône avovo mbe: Jésus kaka Christ. Môma nône te Môéndi aPégôani Môvingine aChrist akina muetso kukepo Téta Nzambé na Muanedi Jésus. 23Ekegea te nane. One akina Muana ANzambé Jésus, akina dôta na Téta Nzambé. One asinga Muana asinga na Téta.
24T’ebandô bakani ne gékenéa gô mitéma mianyô gô meekédume mamapanga mamookô anye v’ebandô. Okô mbe mane mamookô anye mbeego mandéké gô mitéma mianyô tambô anye nôndéké môvo na Muana na Téta. 25Nôeni éne émavanga Christ gôétôétsa te monyo amôbô na môbô.
26Nanôtendéa mabégô mema te gôndé ane abuta ébôméda anye. 27Géé ti gôndé anye, Christ amapika anye na Gédidi sedi. Gédidi sedi gémeengéa gô mitéma mianyô na nôsabuta môma gôénôékéda. Ekegea te nane. Gédidi SaNzambé génôékéda metso. Mane meekéda sangô te mapie kaka mooboe. T’ebandô bakani na vitoo na Christ na nôngagobeda meekédume maGédidi sedi.
28Te nane anami. Bakani na vitoo na Christ gômbe tôsangakotomo na tsoyi va mbene edi nyoo ôngavigangô mbe tôngaba tômayôa na gényônga. 29Nôsabômu mbe Christ te Kumu éetsimama. Na vane nôsabômu dôta mbe ône eenda étsimama andé muana aNzambé ag’ôbôtu.
Currently Selected:
I Jean 2: TSV
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Gabon (Bible Society in Gabon) 1983
