Yihokora 11
11
Hatunonga hawadi
1Ko kunipa kambu ko kuninga yira mutagha. Muengeli ghemanine no gha ningire eshi: “Wimane no yedhekere tembeli waNyambi, no thinyaku nawa ha kanderera mo. 2Ene ditete dyokughutho ghotembeli di thighe, wa di yedhekera. Yoyishi dyapwa kutapa kwawahayidena. No mbana dhingura mbara dhokupongoka, mutughonda makumi mane notuwadi. 3Ame mbona tapa kwawatunonga twange hawadi mba yaghure mayuwa diyovi dyofotji no mathere mawadi nomakumi kwoko nodyofotji. Ho mbapwe kuyenga nomaketji.”
4Awo ne wo hayitondo yiwadi yondhwe no yikora yiwadi eyi yemana pamuve kughutho waNyambi. 5Ngeshi kuwapetha ghumweya, mbo ghuna shwagha mudiro mutunwa twawo. No mbo ghuna mini hakan̂ore dhawo. Karo ngeshi ghumweya ha shana kuwapetha, ghana kupwa kupagha pamuhingo ghogho. 6Ha kara nongcamu dhokunyandekitha diwiru kate kumayuwa ghoyipumba yawo, mbadi gha kona kuroka mvura. No ha kara nongcamu dhokuthitununa meyu gha kare manyinga. Ha kara karo noyinyandekitha yoyihe yokunyandekitha hakakaye thika di hana haka.
7Apa mba rikanyitha yinongona yawo, mbo thina shwagha thishereka mumuve no kurundurura yita kate kuwitha no kupagha wahe. 8Mwimba dhawo mbo dhina rundumana mumukara ghombara dhishokuru. Edhi ha ta mumupepo eshi, Sodoma noEgiptena. Omu ha pamarerire karo Hekudyetu. 9Nawanu awa mba shwagha mumako no mumandimi no mumarudhi, mbana kengerera mwimba dhawo mayuwa mahatu nodihenda eshi ha dhi pake muyipiro. 10Hakakaye mbana shamberera thikuma kuyifa yawa hawadi. No mbana kutumena‐tumena maghushwi. Yoyishi haporofeta hawadi wa, ha pethire kaye. 11Munyima dhomayuwa mahatu gha nodihenda, kokushwagha mupepo ghoghuyumi mwaNyambi wingene mumwawo. Awo ne kokwimana. Ene hanu wa ha wa monine, ha tutukwire thikuma. 12Ko kuyuva kwawo diywi dyodikuru edi dya shwaghire mudiwiru ghuninga eshi: “Mwiye kuno!” Nawo kokudhina kudiwiru mumavuyi. Nawan̂ore dhawo ha wa monine. 13Munako dhi, kokwiya makin̂eno ghomakuru ghomuve. Ha di yondoka dihenda dyombara, no ha fire hanu mayovi kwoko nohawadi kumakin̂eno ghomuve. Hamweya ha yapire ghukugha Nyambi muthishe. No ha tapire makughero kwaNyambi ghomuwiru.
14Dihudhi dyoghuwadi, dina pu. Ene mone, dyoghuhatu ne dina kokera.
Torombita ghoghukwoko noghuwadi
15Namuengeli ghoghukwoko noghuwadi, ha fudhu torombita wendi. Ha mu kara maywi ghomakuru mudiwiru ghokuninga eshi: “Ghutungi ghokaye ne ghuna kara ghugavo waHekudyetu naKristusi wendi. Aye ghana kuraghura yira Fumu kuroruhe nororuheya.” 16Nawanyami makumi mawadi nohane, awa ha hungumanine pamapuna ghawo kughutho waNyambi, ha kuvamine no ha kandererire Nyambi. 17Ha ningire eshi:
“Tuna kukurumera ghoFumu Nyambi
ghomukangcamu dhodhihe.
Owe wa kara thika di wa karire.
Oyu ghana kwiya yira fumu ghomupongoki.
18Marudhi ghana nyeghenya.
Ene yinyeghenya yawo yina kumu.
Nako dhokupangura hafu,
no ndjambi dhokutapa kwawaporofeta no
kwawakakupongoka no kwawa ha kukutekera
Dina dyoye, hakuru nawanuke.
Nako ne dhi neya dhokushinya wa ha shinya kaye.”
19Ko kuyandhuruka tembeli waNyambi mudiwiru. Dimbangu dyoghundambo ha di monine mutembeli wendi. Ko kukara mwethero no mavuma no mudikitero no makin̂eno ghomuve no mbwe dhodhikuru.
Currently Selected:
Yihokora 11: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
