Rukwaro Romiposalemi 5
5
Ndapero dhamuhunga pamuyambo ghomathikuthiku
1Kwamwimbithi: nomishiya. Mupisalemi waDavita.
2Hekudyange, tegherere kuman̂ando ghange,
yuve edi na kutothima.
3Dhegheterere kuyikugherera yomaghamweno ghange,
ghoFumu Nyambi wange,
yoyishi kukoye na kukumbera.
4Hekudyange, pamurughura,
tegherere kudiywi dyange.
Pamurughura kughutho ghokuhokoka
me kukoye no pakukutaterera.
5Yoyishi kadi yowe Nyambi
ghokukudhekera ghuyi,
kukoye mbadiko dyango dyoghupata.
6Hakadihuna, mbadi ha kona kuhenyena kukoye.
Ho wa dhimba hakakutenda ghuyi wahe,
7no ghuna kufinyaghukitha hakambango wahe.
Hayipaghi nawakayishewe,
gha mana kuwashinga Fumu.
8Ene me paghukuru ghoghundambo ghoruhakitho roye,
na kona kwingena mundhugho dhoye
no kutongamena mutembeli ghoye ghokupongoka,
nodikuto di dyakufumanena.
9GhoFumu, yoyishi nawan̂ore dhange na kara,
ni honge me yoyihunga.
No ghu ni ghamwene mukutenda mahimeno ghoye.
10Mbadiko thoghushemwa thi hana kughamba,
mayowero ghaghumweya vene hana kushana.
Nomarudimi ghomotu,
hana kuwithera munu mumbira.
11GhoNyambi, kuyinu yi, wape murandu
pamurandu ghomaghano ghawo,
wa thighe mudiyowa‐yowa,
yoyishi yowe hana kughombekedha.
12Shambererithe ne wahe,
awa hana kushana mondo kukoye,
ha yumbaghuke roruhe.
Awa ha haka Dina dyoye,
ghuna kuwakunga no hana kukushogherera.
13GhoFumu, muhunga ghuna kumuthigha mughuwa.
Paghuhunga ghoye,
ghuna kumukunga kumitara dhodhihe.
Currently Selected:
Rukwaro Romiposalemi 5: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
