Rukwaro Romiposalemi 22
22
Owe wa ni yuvererire ndapero dhange
1Kwamwimbithi: kumaneghedhero gha “Mara ghomumakyathiku.” Mupisalemi waDavita.
2Nyambi wange, Nyambi wange,
nye ghuna ni mwagherera kemo,
no kukara kokayenda,
pakukukumbera maghamweno me?
3Nyambi wange, mutenyamwiru na kwitha,
owe ne kupira no mahuthero,
no ghuthiku karo kemo,
ame ne mbadi na kuturumutha.
4Owe ne ghoMupongoki sha,
oyu gha tunga muturungu‐rungu tomembo
ghomakughero, ghaIsragheli!
5Papoye, po ha kuruperire hawihetu.
Ha kukuruperire, shemwa ho wa wa ghamwenine.
6Kukoye ha kughererire maghamweno
nawo ha pwire kushutura,
paPoye ha tjimaperire no mbadi ha fire honyi.
7Ame ne kadi nomunu, nodivinyo vene.
Hanu kuna kunisherera, diko ne dina ni nyatha.
8Pakunimona waheya, kunisherera vene,
kunitopwerera marudimi
no kupunga‐punga mitwi ghuninga eshi:
9“Eyi ne yi kare kwaFumu keho!
Gha mu ghamwene ne, gha mu shuture ne,
ngeshi ngo gha mu haka thikuma.”
10Yame wa monithire diyuwa pakutanga,
no na turumutherire mumuyidi wanawe,
mundjewa‐ndjewa.
11Yowe wa ni korera,
kutunda kumushamurukero wange,
no yowe Nyambi wange,
kutunda kumatangero ghomoyo wange.
12Mbadi wa kona kukara kayenda nange,
yoyishi yinyanda ne yina kokera
na mukakunighamwena ne mbadiko.
13Mbunga dhawakanyinya, dhina ni dhingera,
hana nimanena,
yira ngombe dhokushwagha muBasani.
14Thika nyime dhokuruka no kuvumaghera,
dyo hana kuniyanhwera tunwa twawo,
ghu ni mbandukera.
15Ame ne napu kumwagha, yira meyu ghokunotora
nomaghuru ghange ghomahe, kwangaya ghadi
mutjima wange ghuna ghenyumuka yira dinongo.
16Ame ne nothimango vene yira ghudho,
rudimi rwange runa kakatera mururakara,
no ghuna ni rangeka yira nafu.
17Awo ne hana ni dhingi yira no mbwa,
kambunga kawapaghi ka, kana ni wera.
Moko ghange no maghuru, ghana pu kughanga.
18Apa no nidi, yishokora‐shokora vene,
pakunimona wo ne kushamberera.
19Yivata yange kutapera hana kuyikutapera
no kutendera fungu‐fungu pamwaye wange.
20Hekudyange We, — wa henyena kokayenda ne.
Ni ghamwene wangu, pithoye keho ghodivetu‐vetu dyongcamu dhange!
21Ni ghamwene kudimende,
no shwaghithe moyo wange, mungcamu dhawambwa.
22Ni ghamwene kukanwa konyime
no kumanyigha ghawayiyama.
Ghuna ni yuverera ghoFumu!
23Name, mbo na yuvitha fuma,
dhoDina dyoye kwawakakutawa,
no mbo na kukughu, mumakonganeno ghomakuru.
24Mu mu kughe Fumu, mwakakumukarera!
Namwe mwanahoka waJakopu, mu mu kutekere!
Mwanahoka waIsragheli mwe,
mu mu neghedhe makutekero ghendi!
25Yoyishi mbadi ghana nyatha yinyanda
yawakakupira maghamweno,
no kuyimbirupitha temba.
Naye Fumu mbadi ghana kudhira kumuthotera,
ene ghana kumuyuverera, yokumaghamweno ghendi.
26Dimbo dyange dyomakughero, dyombongarero
dhishokuru, kuKwendi dya tunda.
No medhero ghange, mbo na gha tendi
ghushemwa, kwawa ha mu karera.
27Munyima hahepwe, mbana wana yokudya
nawa ha shana Fumu, mbo hana mu kughu.
Tawe eshi mbo ha pare rure mundjewa‐ndjewa.
28Hakakaye waheya, mbo hana yi kuyongo
no mbo hana piruka kwaFumu.
Mako ghomahe mbo ghana mudimuka yira fumu,
29yoyshi, ghufumu ne waNyambi,
Yo mukakurawera mako.
30Ngambinga hatungi hopakaye mbana di nendi,
no kumudimuka yira fumu.
Nawafu wahe wa ha yongaritha moyo dhawo,
mbo hana tongamena kughutho Wendi.
31Hanahoka mbo hana mu karera,
no mbo hana thimwetwedha kwawanahoka wawo,
yokwaFumu.
32Awa ne, wo mbo ha nongonona yitenda
yomaghamweno ghendi, kwawa mba shamuruka,
eshi yo gha yi tendire.
Currently Selected:
Rukwaro Romiposalemi 22: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
