Jakobusi 4
4
Makoghawero ghokuruhakitho rokaye no kudihuna
1Kupi ya tunda nane yita no mvo, mukatji kenu? Shemwa mbadi mwa dimuka eshi, muyikununeka yoyirumbera yenu yoyimango kehe pano ya tunda ndi? 2Amwe ne mwa hima kuwana yinu. Ene mbadi muna kuyiwana. Namwe mwa hima kupagha. Ame karo mwa kara nonya kuyinu yaghumweya. Keho mwe mbadi muna kuyiwana, ndani muna kutenda mvo nawo. Ene mbadi muna kuyiwana mwe, yoyishi mbadi muna kuraperera. 3Ngeshi ha mu raperera, mbadi ya kuwana. Yoyishi mwerwa mukuraperera. Karo amwe ne mwa hima kushambereritha yirumbera yomakununekero ghenu. 4Mbadi muna yidimuka mwe mwakakudhira kutawa eshi, ghundambo no kaye ne wa kara ghukore naNyambi? Oyu gha hima kukara mundambo ghokaye, gha kunegha thinda eshi aye ne munyathi waNyambi. 5Endi amwe kughayara muna kughayara eshi, Yitjanga ne nyara‐nyara ya ninga eshi, Nyambi yu gha tungeka mupepo mumwetu ne mbadi gha hima eshi ghu kare wendi thinda ndi? 6Ene n̂eke dhi ghana kutapa dha piterera thikuma thikuma. Yodigho ghana kuninga Ye eshi:
“Nyambi, gha dhimba hakadihuna,
ene hakakukumbirupitha gha wapa n̂eke.”
7Mukutape keho ne kwaNyambi. No mu yakunuke kwashadipinyi. Naye mbo ghana mu thighi. 8Mu henye kwaNyambi. Naye mbo ghana mu henyena. Mwayiharuri mwe, mu yoghe nyara dhenu, no mu kushukithe mitjima dhenu, mwakadifurumeko mwe. 9Mukudhekere yinyanda yenu, mu tokote no mu dire! Mu pirure yishamberera yenu muyitokota no yinyamuna yenu muyindhivi. 10Mukufupipithe kughutho waFumu, Aye ne mbo ghana mu nuneka.
Mbadi mwa kona kughamba ghuyi
11Mwayendhange, mwa kughamberanga ghuyi. Oyu ghokughamba ghuyi kwamuyendhendi, ngambi kutetera ndhango muyendhendi, ghana ghamba ghuyi kumuragho no kutetera muragho. Ene ngeshi, ho tetera muragho mbadi ghuna kutenda pathina muragho, yowe mupanguri wawo vene. 12Keho pa kara Mutapi muragho yofotji no Mupanguri yofotji. Aye ne yoYu gha kara nongcamu dhokughamwena no kudhimitha. Owe ne yowe dye, ghokukona kupangura muyendhoye?
Makutapero ghokwaNyambi
13Mwiye ne keho, amwe mwa ninganga eshi: “Dyarero ngambi peghundha, twa kuyenda kwawa ya no kumbara dhongandji, ho mbo tu ka kare mo rure romwaka ghofotji. Atwe mbo tuna ka ghurithera mo no kuwanena mo shosho.” 14Amwe mwa dhira kudimuka eshi, ngepi di mbo yikara yipara yenu yokupeghundha, yamwe mwamupuyu no mume oghu ghuna kuhokoka popo no kukavuka karo. 15Ghuhunga, mwa kona kughamba mwe eshi: “Ngeshi ha yihimi Fumu, mbo tuna para no mbo tuna tendi thiya.” 16Ene pano muna yikudimukera mwathinda no muna kununeka noghukuru ghoyighamba yenu. Makununekero ghokenge yo ne gha nyara‐nyara. 17Ngeshi oyu gha dimuka kutenda thinu thothihunga, ene aye mbadi ghana kuthitenda, ghana harura.
Currently Selected:
Jakobusi 4: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
