Hakagalasiye 1
1
Mbapira Kwawakagalasiye
1-2Paghulusi ghomupostoli, nawayendhange wahe awa ni di nawo. Ghupostoli wange, mbadi na kughutumera kwawanu. Karo me mbadi munu gha ni paka mo. Ene Jesus Kristusi naNyambi Wihe oyu gha mu tumunine mwawafu.
Kwawambunga dhomuGalasiye
3Thin̂eke nothiraro thaNyambi ghoWihetu, no thaHekudyetu Jesus Kristusi, thi kare nenu, 4oyu gha kutapire thinda kumaharwero ghetu eshi, gha tu shuture pano pakaye kwawanyambi hombango no gha rikanyithe kemo yihima yaNyambi ghoWihetu. 5Di kare difumanekero kwaNyambi kuroruheya! Amen.
Mbadiko karo mbudhi dhodhiwa dhimweya
6Eyi ne yina ni tetura eshi, muna thighi Nyambi oyu gha mwitha pathin̂eke thaKristusi no yokutumbura mbudhi dhadhonadho. 7Mbadiko mbudhi dhadhonadho! Ene pohadi hanu hamweya awa hana kuvutura mbudhi dhaKristusi. Awa ne wo hana kumupaka muthivunganyi. 8Keho ngambi ha kara yofotji ghopapetu, ngambi muengeli ghokushuruka mudiwiru, gha mu yuvithe mbudhi dhi dha dhira kurikanya nombudhi dhi twa yuvitha twe — n̂utwa dhaNyambi, mbo dhina mu wana! 9Atwe ne kare‐kare twa yighambire, ho na kuyihukuruka me karo pano: Eshi ngeshi ghumweya, ha mu yuvitha mbudhi dhi dha dhira kurikanya no dhi mwa wana — n̂utwa dhaNyambi mbo dhina mu wana!
10Eyi na kuyighamba me yi ne, kushenga na kukushenga kwawanu ndi, endi kwaNyambi? Ame ne nane kuyereka na kuyereka ni wane dikuto kwawanu ndi? Ene ngeshi ngo ni shane shime dikuto kwawanu, ngo mbadi yame mukareri waKristusi.
Ngepi di gha karire Paghulusi mupostoli
11Eyi, mwa kona kuyidimuka thiwana, mwayendhange: Mbudhi dhi na yuvitha, mbadi dha tunda kwamunu. 12Name karo mbadi na dhi wana kwamunu, endi ni dhi kuhonge kwamunu. Ene Jesus Kristusi, yo gha dhi ni pire muyihokora.
13Amwe ne mwa yuva kare yoghuyi wange, apa na kundamine kuyihonga yoThijuda. Na kutha‐kuthire ngirishe dhaNyambi no na yerekire eshi, ni dhi hanyaghure po. 14Keho muyihonga yaWajuda, na pitererire hange mumoyo wange. Yoyishi na karire mughutoghoro ghoghuthuta, oghu na wanine muyithimwetwedha yawakerekandongo wange.
15Ene Nyambi gha ni pongwerire kuKwendi, kughutho ghomushamurukero wange. No gha nithire muthin̂eke thendi. Apa gha ni rikanyithire mughuhunga wendi, 16pa kunihokwera Mwanendi eshi ni yuvithe hahayidena, mbudhi dhokuKwendi. Ene mbadi na yendire wangu kwawanu eshi, ni ka shane dighano. 17Ngambi kuJerusalema, kwawa ha karire hapostoli kughutho wange, mbadi na yendire ko. Ame ne kuArabiya na tambire. Katunda ko, ho na hukire kuDamaskusi.
18Munyima dhomyaka dhihatu, po na yendire kuJerusalema ni ka kudimuke naKefasi. No na ka karire kukwendi yivike yihatu. 19Hapostoli thingithawo, mbadi na kuwanine nawo, shimengwa Jakobusi ghomina Fumu.
20Eyi na kumutjangera, kadi yambango — Nyambi ne yomushupi wange.
21Munyima ha ni yendi kwange kuSiriye no kuSilisiye. 22Mbunga dhaKristusi dhoMujudeya, oku mbadi dha ni dimuka shime. 23Kuyuva vene ha yuvangire eshi: “Murume yu gha tu kutha‐kuthire pakare, kuyuvitha ghana kuyuvitha matawero agha gha shanine kuhanyaghura mumayuwa ghaya.” 24Ene wo Nyambi ha fumanekire mudina dyange.
Currently Selected:
Hakagalasiye 1: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
