1 Hakorinte 9
9
Mangcamu no yirughana yamupostoli
1Ame ne mbadi muhoro nidi ndi? Mbadi nomupostoli ndi? Mbadi na monine Jesusi ghoHekudyetu ndi? Amwe mwa hatera kwaFumu ne, mbadi mwambuyo dhothirughana thange ndi? 2Ngambi kenge di na dhira kukara kwawamweya nomupostoli. Kukwenu ne nomupostoli. Karo mwe mwa hatera kwaFumu, mwa thitamba thoghupostoli wange.
3Makughamweno ghange kwamupanguri ne ghano: 4Atwe ne mbadi twa kara nomuragho ghoyiparitha ndi? 5Mbadi twa kara nongcamu dhokushimba mukamadi ghomutawi muruyendo, thika hapostoli hamweya no hayendha Fumu naKefasi ndi? 6Endi yame keho naBarnabasi, atwe twa pira ngcamu dhokudhira kutenda yirughana yetu ndi? 7Yidye yu gha dhira kukarera muyirughana yendi yira mukayita? No dye yu gha tapeka dipya dyovinyu, ene mbadi ghana kudya mbuyo dhamo? Ngambi yidye yu ghokukoneka mutanga, gha dhire kunwa manhwe ghomutanga?
8Eyi na kuninga me, mbadi yina hokokanga kehe pano. Endi muragho ne mbadi wa ghamba nagho kemo ndi? 9Mumuragho waMosesi yapwa kutjanga eshi: “Puru ghokuhanyaghura mbuto, wa mu ghanga kanwa kendi.” Eyi ghana kutokotera Nyambi ne mapuru ndi? 10Endi kukwetu ghana kuyininga? Yashemwa yi, kukwetu ha yitjangera. Mukakudima gha kone kudima nomakurupero. Namukakupura, gha tende popamakurupero ghoyiwana yendi. 11Ngeshi twe twa mu kunine dimbuto dyomudhimu ne, tuna mwipura yinu yoyingi eshi, tu pokore mumwenu yiparitha yorungu ndi? 12Ngeshi mwa tapa ngcamu dhi kwawamweya, mbadi muna wedherera ngcamu dhetu shime ndi?
Ene twe, mbadi twa rughanitha ngcamu dhi. Karo twe twa kughamwena muyoyihe twathinda eshi, thi dhire kutushinga thimweya mundhira dhokuyuvitha mbudhi dhaKristusi. 13Mbadi mwa dimuka eshi, oyu ghokukarera yotembeli, gha para yotembeli. Noyu gha karera thinyaku ne, mbadi gha yerana kumuyambo ghothinyaku ndi? 14Kemo dyo gha yirikanyithire Nyambi eshi, awa ha yuvitha mbudhi ha kone kuwana yipara yawo pamayuvithero ghombudhi.
15Ene me mbadi na rughanitha pothimweya thopayinu yi. Nombadi na kutjanga noyighayara eshi, ngo yi kone kukara nange kemo. Ghuhunga ne ngo ni fe vene! No mbadiko yu mbo gha ni tumbura dikuto. 16Ngeshi ha ni yuvitha mbudhi, ethi ne mbadi thinu thokunipa dikuto me. Ame na kuyuvitha mbudhi, yoyishi ni kone ndani kuyuvitha! Ene mawe, ngeshi na kuyitenda yi! 17Ngeshi ha ni yitendi kumahimeno ghange, na kona kuthuma yiruwera. Ene mbadi na kuyitenda nomahimeno ghange, ethi ne thirughana thi gha nipa. 18Kupi ne yiruwera yange keho? Yiruwera yange ne yino eshi: “Ame nomuyaghuri ghombudhi ne nyara‐nyara na yuvithanga mbudhi. No mbadi na rughanitha nomahimeno ghange pakuyuvitha no pakuyakunuka miragho dhomayuvithero ghombudhi.”
19Ngambi kenge di na kara horo no kuhatera temba kwamunu ghumweya, na kutendire nothinda ni kare mukareri wawaheya. Eshi Kristusi gha wane hanu hohengi. 20KwaWajuda na karire yira noMujuda, ni shwe Hajuda. Kwawa ha kara kwishi dhomuragho, na kutapire name kumuragho — ngambi kenge di na dhirire nothinda kukara kwishi dhomuragho — ni shwe wa ha kara kwishi dhomuragho. 21Kwawakakupira muragho, na karire name thika di yu gha pira muragho — ngambi kenge di na pira muragho waNyambi. Ene na karire nomuragho waKristusi — eshi ni shwe wa hapira muragho. 22Kwawakashu, name na kashire eshi ni shwe hakashu. Kwawaheya, na karire yoyihe yira mukughamwena hamweya. 23Yoyihe yino, na yitenderanga pamurandu ghombudhi. Eshi ni hatere name kumbuyo.
24Mbadi mwa dimuka eshi, kehe mukashu mushupi yu ghana hatera kuyitjira, ngambi waheya hana kutjira, ene yofotji ghana kuwana ndjambi dhendi ndi? Mu dhondoke kenge‐yo eshi namwe mu kone kuwana ndjambi dhenu. 25Wahe wa ha hatera kumutangu ha shwena hathinda ku kehe yinu. Awo hana kutenda yi eshi, ha tambure thikoroni thokupwa wangu. Ene twe, twakakudhira kutunda po. 26Name na kudhondoka yira yu ghana kudhira kutamangera. Ame na kupumura yira mukamakonye yu ghana kudhira kupumura munyara‐nyara. 27Ene me na kudeghura yirama yange no kuyirawera. Eshi ni dhire kupaka ghumweya mumaghukukutu ho mbo ni kare nothinda nothimango.
Currently Selected:
1 Hakorinte 9: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
