1 Hakorinte 7
7
Dighano dyokumayekero
1Ame kuhutha na kumuhuthera kuyinu yi mwa ni tjangerire. Eshi, ghuhunga murume ngo mbadi gha kona kukundama kwamukamadi. 2Ene pamurandu ghorungu, gha kara murume yomuhe namunu wendi. No kehe mukamadi nakatughuru wendi ghoshemwa. 3Murume gha neghedhe thirughana thendi thoyiyeka kwamukamadi. Mukamadi naye karo kemo kwamurume. 4Mukamadi gha pira ngcamu kuyirama yendi thinda, shimengwa katughuru. Katughuru naye karo kemo gha pira ngcamu kuyirama yendi thinda, shimengwa mukamadi. 5Mwa shwena kukupirukera. Shimengwa nomakuyuvero ghomunako dhi mwa kutapa mumandapero. Munyima ndani po sho mu kupakerere. Maghana sho gha mu hongaghure Shatani mughukashu wenu ghoyidhidhimeka.
6Eyi na kuyighambera yino ne kumakuhangano, kadi kumarawero. 7Ghuhunga di na kughayara, hanu wahe ngo ha kara yira yame. Ene kehe yu gha wana thitapa thathonatho kwaNyambi. Ghumweya thi, naghumweya thatho.
8Kwawadhike nawadidhi, na kuninga eshi: Ghuhunga kukwawo kukara ghudhike yira yame. 9Ene ngeshi mbadi hana kukukongora muyipara yawo, ha kona kuyeka ngenyu. Yoyishi hasha kuyeka, kadi yira wa kwan̂a kuyirumbera.
10Hakakukuyeka, mbadi na kuwaraghura me, kadi yame, ene Fumu. Eshi mukamadi mbadi gha kona kuyakunuka kwamunu wendi. 11Ngeshi ha yakunuka, gha kare ghudhike ngambi gha kushemwithane namunu wendi. Murume naye kemo, mbadi gha kona kuyakunuka kwamukamadi wendi.
12Kwawamwe yame — yame na kughamba, kadi Fumu. Ngeshi murume ha kara namukamadi ghokupira matawero, naye ha yi haka eshi tu pare pofotji, gha mu shwena. 13Ngeshi mukamadi ha kara namurume ghokupira matawero aye ku gha tawa, ha yi haka eshi tu pare pofotji, gha mu shwena naye. 14Murume ghokupira matawero, gha mu tambura Nyambi pamakunungero namukamadi ghomatawero. Namukamadi ghokupira matawero, gha mu tambura Nyambi pamurume ghomatawero. Yoyishi, maghana sha kare hanenu hahayidena. Pano ne hana Nyambi. 15Ngeshi mukakupira matawero ghana himi shemwa kumwagha, gha mwaghe ngenyu. Mu yinu yi mbadi yapwa kughanga kwamurume ghokutawa ngambi mukamadi. Nyambi ne gha mwitha eshi mu pare muthiraro. 16Yoyishi ngepi ghuna yi dimuka we mukamadi eshi, mbo ghuna ghamwena murume? Ngambi yowe murume, ngepi ghuna yi dimuka eshi mbo ghuna ghamwena mukamadi?
Yipara yamukriste mumbunga
17Kehe yu gha kare muyikara yi gha mupa Nyambi. Gha kona kukara thika di gha karire pakutanga, apa gha mwithire Nyambi. Kemo na kuyitjanga karo kumambunga ghomahe. 18Ngeshi munu ha mu ken̂a kare pa gha mwithire Nyambi, mbadi gha kona kuyereka kudhimitha thidimukitho thendi thomaken̂eno. Ngeshi ghumweya gha karire ghupumuru pa ha mwithire, mbadi gha kona kukuken̂itha. 19Mbadi yina kuninga eshi ghumweya ne ha mu ken̂a endi mbadi ha mu ken̂a. Shimengwa yu gha koneka miragho dhaNyambi. 20Mumbunga kehe yu, gha kona kukara muyipara yendi yokare, thika di gha mwitha Nyambi. 21Ngeshi wa karire ghomupika pa gha kwithire Nyambi, mbadi wa kona kuyitokotera. Ene ngeshi wa wana nako dhomashutwero, tende nowe mahimeno ghoye. 22Mupika yu ghapwa kwitha kwaNyambi ne, gha mu komonona kare Fumu. Murume naye karo kemo oyu gha karera Fumu no gha mwitha, gha kare mupika Kristusi. 23Amwe ha mu ghurire, no paro dhapwire kuruwera. Mwa kara shime mwapika wawanu. 24Mwayendhange kehe yu gha kone kukarera Nyambi muyikara yendi yoyihe yi gha karitha, kughutho ghokumwitha Nyambi.
Hadhike nawadidhi
25Kwawadhike, mbadi gha wa ni rawera Fumu. Ene na kutapa yighayara yange yira munu yu gha kurupera pathin̂eke thaFumu.
26Ame na kuninga eshi, pamurandu ghoyinyanda, ghuhunga munu gha kare thika di gha kara. 27Ngeshi wa yeka, wa mwagha. Ngeshi ghomudhike, wa shana mukamadi. 28Ene ngeshi ghuna yeka, mbadi ghuna tendi ghuyi. No ngeshi mushengeteya, ha yeka mbadi ghana tendi ghuyi. Keho ne hanu hokengeyo, mbadi na wana ghukukutu mumoyo wawo. Ame ne na haka kumughamwena.
29Eyi na kuyighambera mwayendhange, yoyishi nako ne dhifupi. Yoyi, kutunda pan̂anyi‐n̂anyi, hakakuyeka mbo hana para yira hadhike. 30No hakakutokota, yira mbadi hana kutokota, hakakushamberera, yira mbadi hana kushamberera. Hakakughura yira mbadi hana kumuna. 31Shemwa, awa ha rughanitha yinu yokaye kemo, ha kona kupara yira mbadiko thi thi wa di. Yoyishi, thika di twa kadimuka kaye kano, kutunda kana kutunda po.
32Ame na haka eshi mwa kudhekera. Murume ghokuyeka, gha kone ndani kutokomena yinu yaFumu eshi, ngepi di gha kona kuhaka Fumu. 33Murume ghokuyeka gha thotera karo kuyinu yokaye. Eshi ngepi di sho gha kone kuhaka mundambo wendi. 34No mathotero gha kutjaka. No karo kwamukamadi ghomudhike no kwamushengeteya ha kutapa kuyinu yaFumu eshi, yirama nomudhimu. Ene mukamadi ghokuyeka, gha thotera yinu yokaye eshi, ngepi di sho gha hake munu wendi.
35Yino kuna kuyighambera me kumahimeno ghange. Mbadi na haka eshi, mu kare mumaghukukutu. Na haka eshi, mu pare mudikuto no mumakupakerero ghomakutupwero ghokwaFumu.
36Ene ngeshi munu mbadi gha twetha kurughanitha ghumbuyama wendi, oku ghana piterera ghushengeteya wendi no yikare kemo, mu thighe gha tende ethi ghana haka. Mbadi ghana kuharura. Wa thighe ha yeke. 37Ene ngeshi yu ghana kudimuka eshi, mbadi gha kona kuyeka, no kadi yu ha thineneka, aye ne gha kara nongcamu kumahimeno ghendi thinda no gha ghayara thinda eshi mbadi gha kona kuyeka. Gha tenda ghuhunga thikuma. 38Yodigho, kehe yu ghokuyeka mbandeke dhendi, ghana tendi ghuhunga. Keho ne yu ghokudhira kuyeka, ghana tendi ghuhunga thikuma.
39Mukamadi ghapwa kughanga kwamurume, oku shime ha para. Ngeshi ku ghana fu, gha kona kenhe yu ghana haka kuyeka. Ene yu gha kara nomatawero. 40Keho muyighayara yange, mukafiyaghudhi yu gha dhira kuyeka. Name na kughayara eshi, na kara karo noMupepo waNyambi.
Currently Selected:
1 Hakorinte 7: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
