1 Hakorinte 11
11
1Mu kuthe thitamenedhi thange, thika me thaKristusi.
Fuma dhohutji wamukamadi
2Ame na tumera thikuma kuyoyihe apa mwa ni ghayaranga, no thika di mwa kwata yihonga yange yi na mu hongire. 3Ene na haka thikuma mu dimuke, eshi Kristusi ne mutwi wakehe murume, namurume mutwi wamukamadi, Nyambi ne mutwi waKristusi. 4Kehe murume yu ghana kurapera ngambi kupumba nohutji wendi kumutwi, ghana shamuna Kristusi. 5Ene kehe mukamadi ghokurapera ngambi kupumba kupira nothishupeka kumutwi wendi, ghana shamuna katughuru wendi nomutwi wendi, Yoyishi yira mutwi wendi hana kurura. 6Ngeshi ha dhiri kufika mukamadi mutwi wendi, gha kone ndani kukurura huki dhendi. Ene ngeshi ghuyi kwamukamadi kuteta endi kukurura huki dhendi, gha fike ne mutwi wendi. 7Murume ne mbadi gha kona kufika mutwi wendi. Yoyishi aye gha kara thishwi noghuwa waNyambi. Mukamadi ne ghuwa wakatughuru. 8Murume mbadi gha tunda mwamukamadi, mukamadi, ne mwamurume gha tunda. 9Karo murume mbadi ha mumbera pamurandu wamukamadi, mukamadi ne pamurandu wamurume. 10Yodigho mukamadi gha kara nothidimukitho thongcamu dhamurume pamutwi wendi, pamurandu wawaengeli. 11Shemwa Fumu gha yirikanyithire eshi, mukamadi mbadi gha kona kupira murume namurume mbadi gha kona kupira mukamadi. 12Yoyishi thika di gha tunda mukamadi mwamurume, namurume karo pathirughana thamukamadi. Ene yoyiheya ya tunda mwaNyambi.
13Mu kupangure pan̂anyi‐n̂anyi mwathinda: Eyi ne ya roghera kwamukamadi ghokupira ndjendja pamutwi wendi muyikarera no kurapera kwaNyambi ndi? 14Yinu yoyiheya yi, kwamurume ne mbadiko fuma kundjendja. 15Ene kwamukamadi, shemwa fuma. Ndjendja ne ha dhi mupa yira thikuvuva. 16Ene ngeshi ha kanana ghumweya kuyinu yi — atwe ne mbadiko fuma dhimweya dhomuyikarera nawambunga dhaNyambi temba.
Rupu rokuyenda kumurarero
17Oku shime ha ni tapa miragho, poyidi yinu yimweya eyi na kudhira kukukugha. Ayo ne yino eshi, apa muna kongananga pofotjie mwa tendanga thuyi thikuma, kupiterera ghuhunga. 18Eyi yina kunighowitha me ne yino eshi, thika di na yiyuva, thinyenganyi thi ngeshi ku muna kupakerera pofotji mu kare yira mbunga, yino na yitawa name kamanana. 19Pa kone kukara karo ndjwi dhimweya pakatji kenu, yipwe kudimukera eshi yidye gha kona kuwitha mayerekero. 20Ngeshi ha mu kupakerera pofotji yira mbunga, mbadi muna kudya shime kumakuyarekero ghaFumu. 21Yoyishi pamayarekero ghomumbunga, gha kona ndani kehe yu nothidyera thendi popo, maghana sho hafe hamweya kundhara no hamweya ne pakunwa thikuma. 22Mbadi mwa kara shemwa nomayugho ghokukona kudyera no ghokunwena ndi? Endi mwa pira dikuto mwe kumbunga dhaNyambi. No muna haka eshi mu mbirupithe hahepwe ndi? Nye keho sho ni ghambe nenu? Na kona kumukugha ndi? Kuyinu yokenge yo mbokapwe, mbadi na kona kumukugha!
Matungekero ghomurarero
23Na tumburire kwaFumu yi na mu reterire namwe karo. Fumu Jesusi, mughuthiku ghu ha mu tapire, gha tumburire ghuroto, 24no munyima dhokutumera Nyambi, Gha ghuyondorire no ghuninga eshi: “Eyi ne yirama yange eyi na kumutapera. Mbo mu yitende yi kumavurukero ghange.” 25Kemo karo munyima dhomurarero Gha tumburire thinwitho no ghuninga eshi: “Thinwitho thino ne thoghundambo ghoghupya, ethi thina pu kungangera pamanyinga ghange. Mbo mu yitende kehe pano kumavurukero ghange oku muna kunwena mo.”
26Roruhe oku muna kudya ghuroto ghuno no kunwitha thinwitho thi, muna kuyuvitha yifa yaFumu kate mbo gha keye karo.
Kupira fuma kumurarero
27Kehe yu ghokudya ghuroto ghu no kunwitha thinwitho thaFumu nodishamu, mbo ghana kara nomurandu kuyirama no kumanyinga ghaFumu. 28Ene kehe yu gha kudimuke thinda kughutho ghokudya ghuroto ghu no kunwa muthinwitho thi. 29Yoyishi oyu ghokudya no kunwa oku mbadi ghana kudimukitha thinda eshi, eyi ne yirama yaFumu, ghana kutetera ndhango thinda. 30Yodigho mukatji kenu, mwa yara hakashu nawakakukorwa no hengi hafa mumwenu. 31Ngeshi ngo twa kwipudhurire twathinda thiwana kughutho, ngo mbadi mbo ha tu tetera. 32Ene pan̂anyi‐n̂anyi, tuna kupwa kutetera kwaFumu no kutuhumbitha eshi, mbo ha dhire kututetera pofotji nokaye.
33Yodigho, mwayendha, ngeshi ku muna kongana eshi mu dye pofotji, mu kutaterere. 34Ngeshi hafu ndhara ghumweya ghopapenu, ghuhunga gha kone kudya kudighumbo. Eshi mu dhire kukutetera ndhango mwathinda, oku muna kongana pofotji. Yinu yimweya mbo na na yiroghitha apa mbo niya ko.
Currently Selected:
1 Hakorinte 11: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
