Marko 14
14
Yesu sv̀ng shvtlv́m vrashì we
Mat. 26:1-5; Luk. 22:1-2
1Shvle Bóy nv̀ng Zidòngsér V́mbóy vzv̀ng vníni taq, shvrúngshú vjìrì nv̀ng dvrá svrarìí Yesu sv̀ng mvyø̀:ní tvp dá:ngí shvtlv́m mvtú láòe. 2“Íwe, Bóy nila taq nø laq mø̀í. Bashàrì vhaq vjángshì long we màshá,” wa àngmaq vrashìe.
Yesu sv̀ng ngórdorcìí ma:tnò we
Mat. 26:6-13; Luk. 7:36-38; Yoh. 12:1-8
3Yesu nø Betani mvrìng yv́ng mvnggvng vcaq yà:ngì pè Simon chø̀m taq v́mpà vm dvgvp, svmaré tiqmè nø, gvzà vpǿ we nardú ngórdorcì vjø̀ng zvng we lóngshú chúngcè tiqchv̀ng lá:ngò nø̀ gòng ráì. Lóngshú chúng chv̀ng à:ngí pú:ngò nø̀, Yesu vgo taq vdø:ròe.
4Íwe, weyv́ng vl rì tiqmaq nø wedø wàò lòng sv̀ng shv̀mná rí sórí, “Ngórdorcì welòng pàwá dvsǿ:mò má? 5Pàwá wani welòng nø vshø̀myá dinari#14:5 Vshø̀myá dinari nø tiqnǿng zìbè íe. mvdv̀m taq nvm dá:ngí, dvshà vsv̀ngrì kaq zí vdu we!” wa vbønshìe. Wervt àngmaqí wemè sv̀ng her wa nga:nòe.
6Íwe Yesuí, “Vwa laq wàò. À:ngí Ngà sv̀ng bv̀nlì shvlá tiqlòng èwv́ngang ke pàwá èzershìnø̀nge? 7Dvshà vsv̀ngrì nø nàmaq nv̀ng kadvgvp gø vle. Nàmaqí àngmaq sv̀ng dvbvng mèyǿnø̀ng nìnø kadvgvp gø dvbvng dv̀ng íe. Ínìgø, Ngà nø nàmaq nv̀ng tiqdø nv̀nnv̀n v̀llv́m mvǿngà. #Drd. 15:11 8À:ngí wá lú:nò dv́ngte wà bǿà. Ngà sv̀ng mèkǿm vzv̀ng kaq Ngà góng taq yøtìí nàdør we nø Ngà sv̀ng kǿmlv́m dvpvt dvgø̀ò we íe. 9Ngàí jø̀ngjǿng vla:tnìni, móng døngtáng taq Dvbùshv̀ngkà kayv́ng høq dvshvng bǿò nìnø weyv́ng høq, svmaré yamè sv̀ng dvdvm rǿnlvm rvt, à:ngí wà bǿà we yalòng sv̀ng dvshvng dá:ròe,” a:lòe.
Yesu sv̀ng nvmlv́m Yuda búngá:mì we
Mat. 26:14-16; Luk. 22:3-6
10Coqcv́n Tiqcé Vnípè kèní Ishvkarot Yuda nø, Yesu kaq nvmlv́m shvrúngshú vjìrì yv́ng dìá:mì. 11Yudaí shø̀:nò kàrì tá bǿà nìnø, àngmaq dvbùá:mì nø̀ àng sv̀ng gv̀msùng zílv́m dv́naòe. Wekvt Yudaí nø, Yesu kaq àngmaq sv̀ng tvle lúnlv́m yuqyà we rvtø̀ láòe.
Shvle Bóy v́mrà láò we
Mat. 26:17-19; Luk. 22:7-13
12Shvle Bóy núngpà shvrúnglv́m vyv̀ngcè sha:tnò we, Zidòngsér V́mbóy nv̀mlat ni taq, Àng coqcv́nrìí Àng sv̀ng, “Shvle Bóy v́mpà v́mlv́m rvt, nøngmaqí Nà dvpvt kayv́ngø dvgø̀lv́m èshòng má?” wa rø:tnòe.
13Wekvt À:ngí coqcv́n vnípè dvzá:rò nø̀, “Wamà sv̀ng èdìv́mshì. Chúng taq tì baqshì we vsv̀ng tiqpè nàhǿm bǿshòe. Àng mèpvng ècv̀n bǿshò. 14Àng gòngvm we chø̀m àngkàngpè sv̀ng, ‘“Ngà coqcv́nrì nv̀ng tiqdø Shvle Bóy v́mpà v́mlv́m, Ngà dvpvt zaqlè dǿng kayv́ng íe?” wa Svrapè røtne,’ èvlshò. #Mak. 11:3 15Wekvt dvzøm dvzi dvgǿshaq í we mvdv̀m dvtv̀ng taq te we tiqdǿng à:ngí nàní lvngà sv̀ng dètanvtshìe. Nøngmaq dvpvt weyv́ngø dègø̀ dáshò,” a:lòe.
16Wekvt coqcv́n wepèní búngá:mì nø̀, wamà sv̀ng gòngá:mì nìnø, Yesuí àngní sv̀ng vl dárà døni yv̀ng bǿà nø̀, Shvle Bóy v́mpà dvgø̀òe.
Kàngpè kàgvp
Mat. 26:20-30; Luk. 22:14-23; Yoh. 13:21-26
17Dørø̀m høqa:tnà dvgvp, Yesu nv̀ng coqcv́n Tiqcé Vnípè tuq ráì. 18Àngmaq nø shvbóy taq rung nø̀ v́mpà vm dvgvp, Yesuí, “Ngàí jø̀ngjǿng vla:tnìni, Ngà nv̀ng tiqdø á:mì we nàmaq taqkèní tiqpèí Ngà sv̀ng ènvmvm bønge,” a:lòe. #Shz. 41:9 19Wekvt coqcv́nrì nøt dvshàá:mì nø̀, tiqgǿ nø tiqgǿí Àng sv̀ng, “Ngà nø mvǿng we mø̀í má?” wa røt lú:ngà.
20Wekvt Yesuí, “Coqcv́n Tiqcé vnípè kèní, Ngà nv̀ng tiqdø kung tiqgø̀m taq zidòng zønv́mshì pè mv̀ng íe. 21Vsv̀ng Àngcèpè nø Shànshér Kàru taq Àng dang vru yà:ngà døni shí rà longe. Íwe, Vsv̀ng Àngcèpè sv̀ng nvmá:mò pè mv̀ng nø mvhøt longe. Wepè mvgv̀l yà:ngò nìnø, àng dvpvt té shvla we!” a:lòe.
22Àngmaq vm dvgvp, Yesuí zidòng lùò nø̀, Gvray kaq oqà wa dá:ngí vmø:tnò nø̀ àngmaq sv̀ng zíò sórí, “Èlùv́mnø̀ng nø̀ èv́mnø̀ng. Yalòng nø Ngà góng íe,” a:lòe. #Bng. 24:8; Zek. 9:11; 1Kr. 11:23-25 23Vrá À:ngí bìmtì gwìn lùò nø̀, Gvray kaq oqà wa dá:ngí àngmaq sv̀ng zíò nø̀, àngmaq shvngbe gwìn chv̀ng kèní aqe.
24À:ngí àngmaq sv̀ng, “Bìmtì yalòng nø vsv̀ng mvme gǿ dvpvt shòrò nø̀ kàgvp shvdø:ngò we Ngà shvwi íe. 25Ngàí jø̀ngjǿng vla:tnìni, Gvray móngdàn taq bìmtì àngshv́r aqlv́m àngni weni mvhøqò dv́ngte, Ngà nø bìmtì mvaqlv́m íe,” a:lòe.
26Àngmaq nø shvring zàywà tiqgø̀m wa dá:ngí, Zanlún Pung sv̀ng búngá:mì.
Piterí ma lú:ngò dang dvtáò we
Mat. 26:30-35; Luk. 22:31-34,39
27Yesuí àngmaq sv̀ng, “Shànshér Kàru taq, ‘Vyv̀ng roqshúpè sv̀ng Ngàí shvt bǿngò kvt, vyv̀ngrì nø bv̀ng vkangvme,’ wa vru yà:ngà dø tiqdvchá, nàmaq shvngbe Ngà yv́ngkèní èrv́lshìv́mnø̀nge. #Zek. 13:7 28Ínìgø, Ngà zun long mèpvng, Ngà nø nàmaq vzv̀ngzv̀ng Galili rvgaq sv̀ng døng dange,” a:lòe. #Mak. 16:7
29Piterí, “Shvngbe rv́lshìvm nìgø, ngà nø mvrv́lshø̀ng,” a:lòe.
30Wekvt Yesuí, “Ngàí jø̀ngjǿng vlvtnøng, dèyaq ni, dv̀nggú vnírí shini mvgì dvgvp, nàí Ngà sv̀ng vshø̀mkvt èmang lóngàe,” a:lòe. #Yoh. 13:38
31Íwe Piter nø vtvngshaq kaqshì nø̀, “Ngà nø Nà nv̀ng tiqdø shí vdu nìgø, ngàí Nà sv̀ng kadø ínìgø mvmang long,” wae. Dvgárì shvngbe gø wedøni shø̀ne. #Yoh. 11:16
Getsemani Kùlwàng yv́ng Yesu vjúrøt we
Mat. 26:36-46; Luk. 22:39-46
32Àngmaq nø Getsemani tǿò zàng sv̀ng tuq ráì kvt, Yesuí Àng coqcv́nrì sv̀ng, “Ngàí vjúrøtnv́mò dvgvp, yayv́ng èrúng ránø̀ng,” a:lòe. #Yoh. 18:1 33À:ngí Piter, Yaku nv̀ng Yohan sv̀ng shø:lò nø̀ di ke, Àng nø gvzà nøt dvshà lú:ngì. 34À:ngí àngmaq sv̀ng, “Ngà nø shìlv́m høq ni gvzà nøt yòre. Nàmaq yayv́ng èv̀l dánø̀ng nø̀, pán vshat èca dánø̀ng,” a:lòe. #Yoh. 12:27
35Àng nø vzv̀ng kaq tiqramcè di dá:ngí, vbatø̀m sv̀ng kǿngkupshì sórí rvtø̀ welòng nø Àng yv́ngkèní shvlé daq nìnø laq vlevm, wa nø̀ yadø júrø:tnòe. 36“Abba,#14:36 “Abba” nø Aramik kà í nø̀ “Vpè” wa kà íe. Vpèá, Nàí nø pà gø wá èngu:tnòe. Dvshàlv́m gwìn yachv̀ng Ngà yv́ngkèní èlóngangà. Ínìgø, Ngà nøt dø laq mø̀í. Nà nøt dø wa laq í daq,” wae. #Mak. 10:38
37Àng vtv́ng ráì nø̀ àngmaq yøp da we sv̀ng yv̀ng bǿà nìnø, Piter sv̀ng, “Simoné, nà èyøpme ó? Tiqnaricè gø pán vshat ca mèjòr má? 38Dvløtlv́m yv́ngsv̀ng màjálv́m rvt, pán vshat ècanø̀ng sórí vjú èrøtnø̀ng. Pvlàcè nø mvyǿ we, góngsha nø shaq cv̀me,” a:lòe.
39Vrá tiqkvt Àng dìá:mì nø̀, to røt bǿà kà dø tiqdvchá júrø:tnòe. 40Vrá tiqkvt Àng vtv́ng ráì nìgø, àngmaq yøpyǿí vnùngkéò rvt, yøp da we yv̀ng bǿà. Àng sv̀ng kadøwa kà vtv̀nglv́m gø àngmaqí mvsháo.
41Vshø̀m kvt wakvt vtv́ng ráì nø̀, “Nàmaq nø akvt høq ènarshìnø̀ng nø̀ yøp èmvnshìnø̀ng má? Vrvmá:mì. Kú, mvrà vl rì wur sv̀ng Vsv̀ng Àngcèpè tvlelv́m rvtø̀ tuq ráì. 42Èbúngnø̀ng, so dìì. Ku, Ngà sv̀ng ènvmvm pè nø tuq ráì,” a:lòe. #Yoh. 14:31
Yesu sv̀ng tvpma:tnà we
Mat. 26:47-58; Luk. 22:47-55; Yoh. 18:2-18
43Yesu wedø shø̀n la:ngí Tiqcé Vnípè taq vbá pè Yuda ngamwa tuq ráì. Shvrúngshú vjìrì, dvrá svrarì nv̀ng shaqré shaqtvngrìí dvzá:rò we vsv̀ng loksok tiqmvdò gø shv̀m nv̀ng dèdǿmrì lá:ngò sórí àng nv̀ng tiqdø dì ráì.
44Yesu sv̀ng nvmá:mò pèí àngmaq sv̀ng, “Ngàí vbòng dakngò pè nø Yesu íe. Àng sv̀ng ètvpnø̀ng nø̀ shvlá dv̀ngwa èshøl bǿnø̀ng,” wa mvshv́lpvrá zí dá:rà. 45Yuda tuq ráì weó, Yesu yv́ng chàng vnvpshì ráì nø̀, “Rabiá,” a:lò sórí vbùòe.#14:45 Vbùke lòng nø Yuda vtóng taq pàmvrà wa we íe. 46Wekvt àngmaqí Àng sv̀ng kvp dvkvp zø̀:mò nø̀ ta:pmòe. 47Íwe, shvnvng yv́ng rip we tiqpèí àng shv̀m rut shà:lò nø̀ shvrúngshú vgopèò vshuqpè vnà tiqpa tøq vja cv́nga bǿà.
48Wekvt Yesuí àngmaq sv̀ng, “Ngà nø tølvm vsv̀ng ǿngà rvtnø̀, nàmaq nø shv̀m nv̀ng dèdǿmrì èlv́ngnø̀ng sórí Ngà sv̀ng tvplv́m èdì ráshà ó? 49Ngà nø ni vrv̀m Noqngø̀m Tø̀ngnø wáng vdòngø nàmaq nv̀ng tiqdø vl nø̀ shvngøtnò ke, pàwá mètvpshà má? Íwe, yalòng nø̀ Shànshér Kàru vhømlv́m dvpvt íe,” a:lòe. 50Wekvt coqcv́nrì shvngbeí Àng sv̀ng ca là:ngò nø̀ vtshìá:mì.
51Gùchàngré tiqpè nø̀ vzi shv́nàng laqtun tiqdù:ngí rvbeshì nø̀, Yesu mèpvng cà:nòe. Àng sv̀ng gø àngmaqí ta:pmò nìnø, 52àng vzi shv́nàng laqtun dùng vchutná:mì nø̀ góngsér vtshìá:mì.
Shvrúngshú vgopè mv́rdv̀ng Yesu koò we
Mat. 26:59-68; Luk. 22:63-71; Yoh. 18:19-24
53Wekvt àngmaqí Yesu sv̀ng shvrúngshú vgopè chø̀m sv̀ng shøl bǿà. Shvrúngshú vjìrì, shaqré shaqtvngrì nv̀ng dvrá svrarì shvngbe weyv́ng dvkǿmshìe. 54Piterí nø Yesu mèpvng cvmaq vsar ram kèní cà:nò nø̀, shvrúngshú vgopè chø̀m gùrpuq yv́ng vsóngshúrì nv̀ng tiqdø rung sórí svmi lǿmshìe.
55Yesu sv̀ng dvshílv́m rvt shvrúngshú vjìrì nv̀ng Shaqré Lìpòngmè vsv̀ngrì shvngbeí nø Àng sv̀ng vtùlv́m shvkse láòe. Íwe tiqpv̀n gø lá mvlú:nò. 56Àng sv̀ng vtùò vsv̀ng mvme nø̀ mvdìng we shvkse wáshì nìgø, àngmaq shvkse kà màrá.
57Wekvt vrá vsv̀ng tiqmaq búng lú:ngì nø̀ Àng sv̀ng vtùlv́m mvdìng we shvkse wáshì nø̀, 58“‘Vsv̀ng wu:rí wà yà:ngà we Shànshér Tø̀ngnø yachø̀m sv̀ng Ngàí catnò nø̀, vsv̀ng wu:rí màwáshaq tiqchø̀m vshø̀mni vdòng Ngàí wàlv́m íe,’ wa yapè shø̀n kà nøngmaqí táìe,” a:lòe. #Yoh. 2:19 59Wedø shø̀n nìgø, àngmaq shvkse kà nø̀ màrá.
60Wekvt shvrúngshú vgopè nø̀ shvngbe dvhø̀ø rip lú:ngì nø̀ Yesu sv̀ng, “Yadv́ng gǿí Nà sv̀ng nàchaq we shvkse kàrì nø kadø íe? Tiqkà gø mènàtv́nshà má?” wa rø:tnòe. 61Ínìgø, Yesu nø̀ dø màwá vl nø̀ tiqkà gø màtv́nshì. Wekvt shvrúngshú vgopèí vrá tiqkvt Àng sv̀ng, “Ìshøt vl we Gvray Àngcèpè, Kristu nø Nà èí má?” wa rø:tnòe. #Mak. 15:5; Esa. 53:7
62Wekvt Yesuí, “Ngà ni ǿngàe. Vsv̀ng Àngcèpè nø̀ Jórnònggùn vl Pè vbàngpa yv́ng rung we nv̀ng, muqlàng rvmøtrì taq zúnshì sórí di daq we sv̀ng nàmaqí èyv̀ng lóngnø̀nge,” a:lòe. #Dan. 7:13
63Wekvt shvrúngshú vgopè nø àng bèlaq hweq ringshì sórí, “Yamvdv̀mø kapà shvkse ràe má? 64Nàmaqí gø Gvray kaq shvyǿm kà yalòng ètá bǿshà. Kadø dèdvmnø̀nge?” wa rø:tnòe.
Àngmaq shvngbeí, “Àng nø shí vpǿ we mvrà vle,” wa nø̀ kàciq ra:tnòe. #Yoh. 19:7 65Wekvt tiqmaqí Yesu sv̀ng tø:lí vpíò nø̀, Àng mv́r wa:mò dá:ngí wur dvpuqí vdi:pmò nø̀ Àng sv̀ng, “Ló kàdètu:tnò,” wa dvcøòe. Vsóngshúrìí gø Àng sv̀ng vdi:pmò nø̀ shøl bǿà.
Piterí maò we
Mat. 26:69-75; Luk. 22:56-62; Yoh. 18:15-18,25-27
66Piter nø̀ pvnglàm, gùrpuq yv́ng vl dvgvp, shvrúngshú vgopè vshuq svmasvré tiqmè dì ráì weí, 67Piter svmi lǿmshì we sv̀ng yv̀ng bǿà nìnø, àng sv̀ng dvjaqò sórí, “Nà gø Nazaret pè Yesu nv̀ng tiqdø levlvpni!” a:lòe.
68Íwe àng mashì sórí, “Nàí pà èshø̀:nò má mvshángò, cíng gø mvcíngò,” a:lò dá:ngí gùrpuq vngám lap gòngchit sv̀ng búngá:mì. Wekvt nø̀ dv̀nggú gì daqì.
69Dvzømshú mèí vrá tiqkvt àng sv̀ng yv̀ng bǿà nø̀ gùrhøm rip rì sv̀ng, “Yapè gø àngmaq nv̀ng tiqmvdò íe,” a:lòe. 70Íwe vrá tiqkvt àng mashìe.
Kadv́ngte màlé dvgvp, weyv́ng vl rìí gø Piter sv̀ng, “Jø̀ngjǿng nà nø àngmaq nv̀ng tiqmvdò lèí nìnø! Pàwá wani nà nø̀ Galili vsv̀ng ni èíe,” a:lòe.
71Àng nø, “Nàmaqí èshø̀nnø̀ng we yapè sv̀ng mvshángò,” wa mvtv́nkàí dvgv́mshìe.
72Wela:ngí ni dv̀nggú vnírí wa rí gì daqì. Wekvt Yesuí àng sv̀ng, “Dv̀nggú vnírí gø shini mvgì dvgvp, nàí Ngà sv̀ng vshø̀m kvt èmang lóngàe,” vl dárà kà sv̀ng Piterí dvdvm rǿn daqà nø̀ ung ung dvdǿrshì ngøe. #Mak. 14:30
Currently Selected:
Marko 14: GSM
Highlight
Copy
Compare
Share
Want to have your highlights saved across all your devices? Sign up or sign in
© 2025 Rvcv́ngcè Kàru Gomidi Kristu Shvngø̀mré. All Rights Reserved.
Marko 14
14
Yesu sv̀ng shvtlv́m vrashì we
Mat. 26:1-5; Luk. 22:1-2
1Shvle Bóy nv̀ng Zidòngsér V́mbóy vzv̀ng vníni taq, shvrúngshú vjìrì nv̀ng dvrá svrarìí Yesu sv̀ng mvyø̀:ní tvp dá:ngí shvtlv́m mvtú láòe. 2“Íwe, Bóy nila taq nø laq mø̀í. Bashàrì vhaq vjángshì long we màshá,” wa àngmaq vrashìe.
Yesu sv̀ng ngórdorcìí ma:tnò we
Mat. 26:6-13; Luk. 7:36-38; Yoh. 12:1-8
3Yesu nø Betani mvrìng yv́ng mvnggvng vcaq yà:ngì pè Simon chø̀m taq v́mpà vm dvgvp, svmaré tiqmè nø, gvzà vpǿ we nardú ngórdorcì vjø̀ng zvng we lóngshú chúngcè tiqchv̀ng lá:ngò nø̀ gòng ráì. Lóngshú chúng chv̀ng à:ngí pú:ngò nø̀, Yesu vgo taq vdø:ròe.
4Íwe, weyv́ng vl rì tiqmaq nø wedø wàò lòng sv̀ng shv̀mná rí sórí, “Ngórdorcì welòng pàwá dvsǿ:mò má? 5Pàwá wani welòng nø vshø̀myá dinari#14:5 Vshø̀myá dinari nø tiqnǿng zìbè íe. mvdv̀m taq nvm dá:ngí, dvshà vsv̀ngrì kaq zí vdu we!” wa vbønshìe. Wervt àngmaqí wemè sv̀ng her wa nga:nòe.
6Íwe Yesuí, “Vwa laq wàò. À:ngí Ngà sv̀ng bv̀nlì shvlá tiqlòng èwv́ngang ke pàwá èzershìnø̀nge? 7Dvshà vsv̀ngrì nø nàmaq nv̀ng kadvgvp gø vle. Nàmaqí àngmaq sv̀ng dvbvng mèyǿnø̀ng nìnø kadvgvp gø dvbvng dv̀ng íe. Ínìgø, Ngà nø nàmaq nv̀ng tiqdø nv̀nnv̀n v̀llv́m mvǿngà. #Drd. 15:11 8À:ngí wá lú:nò dv́ngte wà bǿà. Ngà sv̀ng mèkǿm vzv̀ng kaq Ngà góng taq yøtìí nàdør we nø Ngà sv̀ng kǿmlv́m dvpvt dvgø̀ò we íe. 9Ngàí jø̀ngjǿng vla:tnìni, móng døngtáng taq Dvbùshv̀ngkà kayv́ng høq dvshvng bǿò nìnø weyv́ng høq, svmaré yamè sv̀ng dvdvm rǿnlvm rvt, à:ngí wà bǿà we yalòng sv̀ng dvshvng dá:ròe,” a:lòe.
Yesu sv̀ng nvmlv́m Yuda búngá:mì we
Mat. 26:14-16; Luk. 22:3-6
10Coqcv́n Tiqcé Vnípè kèní Ishvkarot Yuda nø, Yesu kaq nvmlv́m shvrúngshú vjìrì yv́ng dìá:mì. 11Yudaí shø̀:nò kàrì tá bǿà nìnø, àngmaq dvbùá:mì nø̀ àng sv̀ng gv̀msùng zílv́m dv́naòe. Wekvt Yudaí nø, Yesu kaq àngmaq sv̀ng tvle lúnlv́m yuqyà we rvtø̀ láòe.
Shvle Bóy v́mrà láò we
Mat. 26:17-19; Luk. 22:7-13
12Shvle Bóy núngpà shvrúnglv́m vyv̀ngcè sha:tnò we, Zidòngsér V́mbóy nv̀mlat ni taq, Àng coqcv́nrìí Àng sv̀ng, “Shvle Bóy v́mpà v́mlv́m rvt, nøngmaqí Nà dvpvt kayv́ngø dvgø̀lv́m èshòng má?” wa rø:tnòe.
13Wekvt À:ngí coqcv́n vnípè dvzá:rò nø̀, “Wamà sv̀ng èdìv́mshì. Chúng taq tì baqshì we vsv̀ng tiqpè nàhǿm bǿshòe. Àng mèpvng ècv̀n bǿshò. 14Àng gòngvm we chø̀m àngkàngpè sv̀ng, ‘“Ngà coqcv́nrì nv̀ng tiqdø Shvle Bóy v́mpà v́mlv́m, Ngà dvpvt zaqlè dǿng kayv́ng íe?” wa Svrapè røtne,’ èvlshò. #Mak. 11:3 15Wekvt dvzøm dvzi dvgǿshaq í we mvdv̀m dvtv̀ng taq te we tiqdǿng à:ngí nàní lvngà sv̀ng dètanvtshìe. Nøngmaq dvpvt weyv́ngø dègø̀ dáshò,” a:lòe.
16Wekvt coqcv́n wepèní búngá:mì nø̀, wamà sv̀ng gòngá:mì nìnø, Yesuí àngní sv̀ng vl dárà døni yv̀ng bǿà nø̀, Shvle Bóy v́mpà dvgø̀òe.
Kàngpè kàgvp
Mat. 26:20-30; Luk. 22:14-23; Yoh. 13:21-26
17Dørø̀m høqa:tnà dvgvp, Yesu nv̀ng coqcv́n Tiqcé Vnípè tuq ráì. 18Àngmaq nø shvbóy taq rung nø̀ v́mpà vm dvgvp, Yesuí, “Ngàí jø̀ngjǿng vla:tnìni, Ngà nv̀ng tiqdø á:mì we nàmaq taqkèní tiqpèí Ngà sv̀ng ènvmvm bønge,” a:lòe. #Shz. 41:9 19Wekvt coqcv́nrì nøt dvshàá:mì nø̀, tiqgǿ nø tiqgǿí Àng sv̀ng, “Ngà nø mvǿng we mø̀í má?” wa røt lú:ngà.
20Wekvt Yesuí, “Coqcv́n Tiqcé vnípè kèní, Ngà nv̀ng tiqdø kung tiqgø̀m taq zidòng zønv́mshì pè mv̀ng íe. 21Vsv̀ng Àngcèpè nø Shànshér Kàru taq Àng dang vru yà:ngà døni shí rà longe. Íwe, Vsv̀ng Àngcèpè sv̀ng nvmá:mò pè mv̀ng nø mvhøt longe. Wepè mvgv̀l yà:ngò nìnø, àng dvpvt té shvla we!” a:lòe.
22Àngmaq vm dvgvp, Yesuí zidòng lùò nø̀, Gvray kaq oqà wa dá:ngí vmø:tnò nø̀ àngmaq sv̀ng zíò sórí, “Èlùv́mnø̀ng nø̀ èv́mnø̀ng. Yalòng nø Ngà góng íe,” a:lòe. #Bng. 24:8; Zek. 9:11; 1Kr. 11:23-25 23Vrá À:ngí bìmtì gwìn lùò nø̀, Gvray kaq oqà wa dá:ngí àngmaq sv̀ng zíò nø̀, àngmaq shvngbe gwìn chv̀ng kèní aqe.
24À:ngí àngmaq sv̀ng, “Bìmtì yalòng nø vsv̀ng mvme gǿ dvpvt shòrò nø̀ kàgvp shvdø:ngò we Ngà shvwi íe. 25Ngàí jø̀ngjǿng vla:tnìni, Gvray móngdàn taq bìmtì àngshv́r aqlv́m àngni weni mvhøqò dv́ngte, Ngà nø bìmtì mvaqlv́m íe,” a:lòe.
26Àngmaq nø shvring zàywà tiqgø̀m wa dá:ngí, Zanlún Pung sv̀ng búngá:mì.
Piterí ma lú:ngò dang dvtáò we
Mat. 26:30-35; Luk. 22:31-34,39
27Yesuí àngmaq sv̀ng, “Shànshér Kàru taq, ‘Vyv̀ng roqshúpè sv̀ng Ngàí shvt bǿngò kvt, vyv̀ngrì nø bv̀ng vkangvme,’ wa vru yà:ngà dø tiqdvchá, nàmaq shvngbe Ngà yv́ngkèní èrv́lshìv́mnø̀nge. #Zek. 13:7 28Ínìgø, Ngà zun long mèpvng, Ngà nø nàmaq vzv̀ngzv̀ng Galili rvgaq sv̀ng døng dange,” a:lòe. #Mak. 16:7
29Piterí, “Shvngbe rv́lshìvm nìgø, ngà nø mvrv́lshø̀ng,” a:lòe.
30Wekvt Yesuí, “Ngàí jø̀ngjǿng vlvtnøng, dèyaq ni, dv̀nggú vnírí shini mvgì dvgvp, nàí Ngà sv̀ng vshø̀mkvt èmang lóngàe,” a:lòe. #Yoh. 13:38
31Íwe Piter nø vtvngshaq kaqshì nø̀, “Ngà nø Nà nv̀ng tiqdø shí vdu nìgø, ngàí Nà sv̀ng kadø ínìgø mvmang long,” wae. Dvgárì shvngbe gø wedøni shø̀ne. #Yoh. 11:16
Getsemani Kùlwàng yv́ng Yesu vjúrøt we
Mat. 26:36-46; Luk. 22:39-46
32Àngmaq nø Getsemani tǿò zàng sv̀ng tuq ráì kvt, Yesuí Àng coqcv́nrì sv̀ng, “Ngàí vjúrøtnv́mò dvgvp, yayv́ng èrúng ránø̀ng,” a:lòe. #Yoh. 18:1 33À:ngí Piter, Yaku nv̀ng Yohan sv̀ng shø:lò nø̀ di ke, Àng nø gvzà nøt dvshà lú:ngì. 34À:ngí àngmaq sv̀ng, “Ngà nø shìlv́m høq ni gvzà nøt yòre. Nàmaq yayv́ng èv̀l dánø̀ng nø̀, pán vshat èca dánø̀ng,” a:lòe. #Yoh. 12:27
35Àng nø vzv̀ng kaq tiqramcè di dá:ngí, vbatø̀m sv̀ng kǿngkupshì sórí rvtø̀ welòng nø Àng yv́ngkèní shvlé daq nìnø laq vlevm, wa nø̀ yadø júrø:tnòe. 36“Abba,#14:36 “Abba” nø Aramik kà í nø̀ “Vpè” wa kà íe. Vpèá, Nàí nø pà gø wá èngu:tnòe. Dvshàlv́m gwìn yachv̀ng Ngà yv́ngkèní èlóngangà. Ínìgø, Ngà nøt dø laq mø̀í. Nà nøt dø wa laq í daq,” wae. #Mak. 10:38
37Àng vtv́ng ráì nø̀ àngmaq yøp da we sv̀ng yv̀ng bǿà nìnø, Piter sv̀ng, “Simoné, nà èyøpme ó? Tiqnaricè gø pán vshat ca mèjòr má? 38Dvløtlv́m yv́ngsv̀ng màjálv́m rvt, pán vshat ècanø̀ng sórí vjú èrøtnø̀ng. Pvlàcè nø mvyǿ we, góngsha nø shaq cv̀me,” a:lòe.
39Vrá tiqkvt Àng dìá:mì nø̀, to røt bǿà kà dø tiqdvchá júrø:tnòe. 40Vrá tiqkvt Àng vtv́ng ráì nìgø, àngmaq yøpyǿí vnùngkéò rvt, yøp da we yv̀ng bǿà. Àng sv̀ng kadøwa kà vtv̀nglv́m gø àngmaqí mvsháo.
41Vshø̀m kvt wakvt vtv́ng ráì nø̀, “Nàmaq nø akvt høq ènarshìnø̀ng nø̀ yøp èmvnshìnø̀ng má? Vrvmá:mì. Kú, mvrà vl rì wur sv̀ng Vsv̀ng Àngcèpè tvlelv́m rvtø̀ tuq ráì. 42Èbúngnø̀ng, so dìì. Ku, Ngà sv̀ng ènvmvm pè nø tuq ráì,” a:lòe. #Yoh. 14:31
Yesu sv̀ng tvpma:tnà we
Mat. 26:47-58; Luk. 22:47-55; Yoh. 18:2-18
43Yesu wedø shø̀n la:ngí Tiqcé Vnípè taq vbá pè Yuda ngamwa tuq ráì. Shvrúngshú vjìrì, dvrá svrarì nv̀ng shaqré shaqtvngrìí dvzá:rò we vsv̀ng loksok tiqmvdò gø shv̀m nv̀ng dèdǿmrì lá:ngò sórí àng nv̀ng tiqdø dì ráì.
44Yesu sv̀ng nvmá:mò pèí àngmaq sv̀ng, “Ngàí vbòng dakngò pè nø Yesu íe. Àng sv̀ng ètvpnø̀ng nø̀ shvlá dv̀ngwa èshøl bǿnø̀ng,” wa mvshv́lpvrá zí dá:rà. 45Yuda tuq ráì weó, Yesu yv́ng chàng vnvpshì ráì nø̀, “Rabiá,” a:lò sórí vbùòe.#14:45 Vbùke lòng nø Yuda vtóng taq pàmvrà wa we íe. 46Wekvt àngmaqí Àng sv̀ng kvp dvkvp zø̀:mò nø̀ ta:pmòe. 47Íwe, shvnvng yv́ng rip we tiqpèí àng shv̀m rut shà:lò nø̀ shvrúngshú vgopèò vshuqpè vnà tiqpa tøq vja cv́nga bǿà.
48Wekvt Yesuí àngmaq sv̀ng, “Ngà nø tølvm vsv̀ng ǿngà rvtnø̀, nàmaq nø shv̀m nv̀ng dèdǿmrì èlv́ngnø̀ng sórí Ngà sv̀ng tvplv́m èdì ráshà ó? 49Ngà nø ni vrv̀m Noqngø̀m Tø̀ngnø wáng vdòngø nàmaq nv̀ng tiqdø vl nø̀ shvngøtnò ke, pàwá mètvpshà má? Íwe, yalòng nø̀ Shànshér Kàru vhømlv́m dvpvt íe,” a:lòe. 50Wekvt coqcv́nrì shvngbeí Àng sv̀ng ca là:ngò nø̀ vtshìá:mì.
51Gùchàngré tiqpè nø̀ vzi shv́nàng laqtun tiqdù:ngí rvbeshì nø̀, Yesu mèpvng cà:nòe. Àng sv̀ng gø àngmaqí ta:pmò nìnø, 52àng vzi shv́nàng laqtun dùng vchutná:mì nø̀ góngsér vtshìá:mì.
Shvrúngshú vgopè mv́rdv̀ng Yesu koò we
Mat. 26:59-68; Luk. 22:63-71; Yoh. 18:19-24
53Wekvt àngmaqí Yesu sv̀ng shvrúngshú vgopè chø̀m sv̀ng shøl bǿà. Shvrúngshú vjìrì, shaqré shaqtvngrì nv̀ng dvrá svrarì shvngbe weyv́ng dvkǿmshìe. 54Piterí nø Yesu mèpvng cvmaq vsar ram kèní cà:nò nø̀, shvrúngshú vgopè chø̀m gùrpuq yv́ng vsóngshúrì nv̀ng tiqdø rung sórí svmi lǿmshìe.
55Yesu sv̀ng dvshílv́m rvt shvrúngshú vjìrì nv̀ng Shaqré Lìpòngmè vsv̀ngrì shvngbeí nø Àng sv̀ng vtùlv́m shvkse láòe. Íwe tiqpv̀n gø lá mvlú:nò. 56Àng sv̀ng vtùò vsv̀ng mvme nø̀ mvdìng we shvkse wáshì nìgø, àngmaq shvkse kà màrá.
57Wekvt vrá vsv̀ng tiqmaq búng lú:ngì nø̀ Àng sv̀ng vtùlv́m mvdìng we shvkse wáshì nø̀, 58“‘Vsv̀ng wu:rí wà yà:ngà we Shànshér Tø̀ngnø yachø̀m sv̀ng Ngàí catnò nø̀, vsv̀ng wu:rí màwáshaq tiqchø̀m vshø̀mni vdòng Ngàí wàlv́m íe,’ wa yapè shø̀n kà nøngmaqí táìe,” a:lòe. #Yoh. 2:19 59Wedø shø̀n nìgø, àngmaq shvkse kà nø̀ màrá.
60Wekvt shvrúngshú vgopè nø̀ shvngbe dvhø̀ø rip lú:ngì nø̀ Yesu sv̀ng, “Yadv́ng gǿí Nà sv̀ng nàchaq we shvkse kàrì nø kadø íe? Tiqkà gø mènàtv́nshà má?” wa rø:tnòe. 61Ínìgø, Yesu nø̀ dø màwá vl nø̀ tiqkà gø màtv́nshì. Wekvt shvrúngshú vgopèí vrá tiqkvt Àng sv̀ng, “Ìshøt vl we Gvray Àngcèpè, Kristu nø Nà èí má?” wa rø:tnòe. #Mak. 15:5; Esa. 53:7
62Wekvt Yesuí, “Ngà ni ǿngàe. Vsv̀ng Àngcèpè nø̀ Jórnònggùn vl Pè vbàngpa yv́ng rung we nv̀ng, muqlàng rvmøtrì taq zúnshì sórí di daq we sv̀ng nàmaqí èyv̀ng lóngnø̀nge,” a:lòe. #Dan. 7:13
63Wekvt shvrúngshú vgopè nø àng bèlaq hweq ringshì sórí, “Yamvdv̀mø kapà shvkse ràe má? 64Nàmaqí gø Gvray kaq shvyǿm kà yalòng ètá bǿshà. Kadø dèdvmnø̀nge?” wa rø:tnòe.
Àngmaq shvngbeí, “Àng nø shí vpǿ we mvrà vle,” wa nø̀ kàciq ra:tnòe. #Yoh. 19:7 65Wekvt tiqmaqí Yesu sv̀ng tø:lí vpíò nø̀, Àng mv́r wa:mò dá:ngí wur dvpuqí vdi:pmò nø̀ Àng sv̀ng, “Ló kàdètu:tnò,” wa dvcøòe. Vsóngshúrìí gø Àng sv̀ng vdi:pmò nø̀ shøl bǿà.
Piterí maò we
Mat. 26:69-75; Luk. 22:56-62; Yoh. 18:15-18,25-27
66Piter nø̀ pvnglàm, gùrpuq yv́ng vl dvgvp, shvrúngshú vgopè vshuq svmasvré tiqmè dì ráì weí, 67Piter svmi lǿmshì we sv̀ng yv̀ng bǿà nìnø, àng sv̀ng dvjaqò sórí, “Nà gø Nazaret pè Yesu nv̀ng tiqdø levlvpni!” a:lòe.
68Íwe àng mashì sórí, “Nàí pà èshø̀:nò má mvshángò, cíng gø mvcíngò,” a:lò dá:ngí gùrpuq vngám lap gòngchit sv̀ng búngá:mì. Wekvt nø̀ dv̀nggú gì daqì.
69Dvzømshú mèí vrá tiqkvt àng sv̀ng yv̀ng bǿà nø̀ gùrhøm rip rì sv̀ng, “Yapè gø àngmaq nv̀ng tiqmvdò íe,” a:lòe. 70Íwe vrá tiqkvt àng mashìe.
Kadv́ngte màlé dvgvp, weyv́ng vl rìí gø Piter sv̀ng, “Jø̀ngjǿng nà nø àngmaq nv̀ng tiqmvdò lèí nìnø! Pàwá wani nà nø̀ Galili vsv̀ng ni èíe,” a:lòe.
71Àng nø, “Nàmaqí èshø̀nnø̀ng we yapè sv̀ng mvshángò,” wa mvtv́nkàí dvgv́mshìe.
72Wela:ngí ni dv̀nggú vnírí wa rí gì daqì. Wekvt Yesuí àng sv̀ng, “Dv̀nggú vnírí gø shini mvgì dvgvp, nàí Ngà sv̀ng vshø̀m kvt èmang lóngàe,” vl dárà kà sv̀ng Piterí dvdvm rǿn daqà nø̀ ung ung dvdǿrshì ngøe. #Mak. 14:30
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
© 2025 Rvcv́ngcè Kàru Gomidi Kristu Shvngø̀mré. All Rights Reserved.