Luka 6

Yesu nø Narni Àngkàng í we

Mat. 12:1-8; Mak. 2:23-28

1Narni tiqni taq Yesu nø zong rvmárì dangdang léshì ke, Àng coqcv́nrì nø zongshí tiqmaq rvtnvm nø̀, wur taq vzø:pmò nø̀ vme. 2Wekvt Parisirì tiqmaqí, “Narni taq wá mvdaq pv̀n nàmaqí pàwá èwànø̀ng má?” a:lòe.

3Yesuí, “Dawi nv̀ng àng lamboqrì svríshì lú:ngì kvt, Dawií kadø wà yà:ngà we mèrø dv́rnø̀ng má? #1Sm. 21:1-6 4Àng nø Gvray chø̀m sv̀ng gòng nø̀, shvrúngshúrìí wa v́m daq we Shvgaqshaq Zidòng lùò nø̀ á:mò dá:ngí, àng lamboqrì sv̀ng gø zí yà:ngà. #Lew. 24:5-9 5Vsv̀ng Àngcèpè nø Narni Àngkàngpè íe,” wa vtá:nòe.

Wur shì vsv̀ng dvba:nò we

Mat. 12:9-14; Mak. 3:1-6

6Narni dvgá tiqni taq, Yesu nø júrøt chø̀m sv̀ng gòng nø̀ shvngø:tnòe. Weyv́ngø vbàngpa wur shì we tiqpè vle. 7Dvrá svrarì nv̀ng Parisirìí nø Yesu sv̀ng cèlv́m mvtú lúnlv́m dvpvt, “Narni taq zarì sv̀ng À:ngí dvban daqò má?” wa nø̀ dvjà:mòe. 8Íwe àngmaqí dvda:mò rì sv̀ng Yesuí sháò rvt, wur tiqpa shì pè sv̀ng, “Ebúng nø̀ vzv̀ng kaq èrip long,” a:lòe. Wekvt wepè búng nø̀ rip lú:ngì.

9Vrá, Yesuí àngmaq sv̀ng, “Tiqkà røtna:tnìni. Narni taq bv̀nlì shvlá rì mø̀íni bv̀nlì mvgv́m rì, gø̀nshaq shvlutlv́m, mø̀íni shvmv́nglv́m, kapv̀n wá daqe má?” a:lòe.

10Àngmaq shvngbe sv̀ng gùrhøm dvjaqò dá:ngí, wepè sv̀ng, “Nà wur èzúshì long,” a:lòe. Àng wur zúshì lú:ngì kvt vrǿng baná:mì. 11Íwe àngmaq nøt vcor lú:ngì nø̀ Yesu sv̀ng kadø wàlv́m vrashìe.

Dvzv́r Tiqcé Vnípè rvcà:ngò we

Mat. 10:1-4; Mak. 3:13-19

12Wenila taq Yesu nø vjúrøtlv́m rvt mvrùl sv̀ng ngangá:mì nø̀, Gvray kaq pòyaq chapgá vjúrø:tnòe. 13Nv̀m gá daqì dvgvp, coqcv́nrì sv̀ng À:ngí goòe. Àngmaq kèní tiqcé vnípè rvcà:ngò nø̀, dvzv́r bø̀ng tǿòe. 14Àngmaq nø, À:ngí Piter, wa tǿa:pmà pè Simon nv̀ng àngnvmpè Anderu, Yaku, Yohan, Pilip, Bartolemi, 15Mati, Toma, Alpiu àngcèpè Yaku, dvcì shóngnøt tee a:lò pè Simon, 16Yaku àngcè Yuda nv̀ng Yesu kaq nvmvmlv́m pè Ishvkarot Yuda íe.

17Yesu nø àngmaq nv̀ng tiqdø shúngshì daqì nø̀, vdv́m tiqtø̀mø Àng coqcv́n loksok lokga tiqmvdò nv̀ng dvtǿngshìe. Wekvt Yuda rvgaq shvngbe nv̀ng Yerusalem kèní gø, nvmukdvra shvnvng Tiru nv̀ng Sidon móng rvgaq kèní gø vsv̀ng loksok lokga tiqmvdò nø #Mat. 4:23-25 18Àng mòngkà tashìlv́m nv̀ng àngmaqò záyv̀ngrì dvbana lúnlv́m rvt dì ráì. Cángrìí dvkiò rì gø dì ráì nø̀ baná:mì. 19Kadø íe wani Yesu yv́ngkèní jórnònggùn bung long weí àngmaq shvngbe zǿmban rvt, vsv̀ng loksokrì shvngbe nø Àng kaq shup lúnlv́m dvzaqshìe.

Shvmán dvgǿng kà

Mat. 5:3-12

20Yesuí coqcv́nrì sv̀ng dvjaqò sórí,

“Dèshànø̀ng rì nàmaq nø ìshøt vle.

Kadø íe wani Gvray móngdàn nø nàmaqò èíanø̀nge. #Mat. 5:3-12

21Yadvgvp svrí èshìnø̀ng rì nàmaq nø ìshøt vle.

Kadø íe wani nàmaq nàgà lóngnø̀nge.

Yadvgvp èngǿnø̀ng rì nàmaq nø ìshøt vle.

Kadø íe wani nàmaq nàhøshì lóngnø̀nge. #Dtn. 7:16-17

22Vsv̀ng Àngcèpè rvtnø̀ vsà:ngí shvngo we, rvwìng we, dvcø we nv̀ng nàmaq bø̀ng sv̀ng màshvla dø shèyǿmvtnø̀ng kvt,

nàmaq nø ìshøt vle. #Yoh. 15:19

23Wedø í we àngni taq dèbùnø̀ng nø̀ èchóngshìnø̀ng. Kadø íe wani, muqlàng taqlapmø nàmaq zìbè nø ringe. Àngmaq àngkop àngkàngrìí gø kàdvtutshúrì sv̀ng wedøni wà yà:ngà.

Dvshà mvhøt kà

24Íwe mvgàmrérì nàmaq nø mèhøt lóngnø̀nge.

Kadø íe wani nàmaq nø shøtshú lòng èlúnvm bǿshà.

25Yadvgvp nàgànø̀ng rì nàmaq nø mèhøt lóngnø̀nge.

Kadø íe wani nàmaq nø svrí èbang lóngnø̀nge.

Yadvgvp nàhøshìnø̀ng nàmaq rì nø mèhøt lóngnø̀nge.

Kadø íe wani nàmaq nø rèyùnø̀ng nø̀ èngǿ lóngnø̀nge.

26Vsv̀ng shvngbeí shègùnvtnø̀ng kvtnø mèhøt lóngnø̀nge.

Kadø íe wani àngmaq àngkop àngkàngrìí gø mvdø̀ng mvman kàdvtutshúrì sv̀ng wedøni shvgùn yà:ngà.

Ngv̀nshàrì sv̀ng shóngshì rà we

Mat. 5:39-48

27Íwe Ngà kà ètashìnø̀ng rì nàmaq sv̀ng vla:tnìni, nàmaq ngv̀nshàrì sv̀ng èshóngshìnø̀ng. Nàmaq kaq shvngoshì rì sv̀ng shvla we èwáanø̀ng. 28Nàmaq kaq mètv́nvtnø̀ng rì sv̀ng shèmánanø̀ng. Nàmaq sv̀ng mèyvmkévtnø̀ng rì dvpvt vjú èrøtnanø̀ng. 29Mvwa tiqpa nàpaqvtnø̀ng gǿ sv̀ng wápa gø shènáshìnø̀ng. Mvdv̀m bèlaq dùng ètølv́mvtnø̀ng gǿ sv̀ng vdòng bèlaq dùng gø mènàgv́rnø̀ngni. 30Røt ra we kagǿ sv̀ng gø èzínø̀ng. Vrá, nàmaq dvrèrì èlv́ngav́mnø̀ng gǿ kèní mègùnnø̀ngni. 31Vsa:ngí nàmaq sv̀ng wáa ra we èshòngnø̀ng dø, nàmaqí gø àngmaq sv̀ng wedø èwáanø̀ng. #Mat. 7:12

32Nàmaq sv̀ng shóngshì rì kaq wa èshóngshìnø̀ng kvtnø, nàmaq dvpvt pà vjú vle má? Mvrà vl rì dv́ng vdè kaq shóngshì rì sv̀ng shóngshìe. 33Nàmaq kaq shvla rì sv̀ng wa nàmaqí shvla we èwáanø̀ng kvtnø, nàmaq dvpvt pà vjú vle má? Mvrà vl rì dv́ng wedø wae. 34Tvle vtv́nga lún rì kaq wa èrumnø̀ng nìnø, nàmaq dvpvt pà vjú vle má? Mvrà vl rì dv́ng todø vtvngshì lúnlv́m vlǿmshì nø̀ mvrà vl rì sv̀ng ru:mòe. 35Íwe nàmaq nø ngv̀nshàrì sv̀ng èshóngshìnø̀ng, shvla we èwáanø̀ng. Vtv́nga ra we sv̀ng màlǿmshìshaq èrumnø̀ng. Wekvt nàmaq zìbè nø ring nø̀, Vháng Vtvngpè àngcèrì gø èí lóngnø̀nge. Pawá wani Àng nø oqà wá mvsháò rì nv̀ng vsv̀ng mvgv́m rì sv̀ng gø nøt shvlae. 36Nàmaq Nvpèí mvré èzanø̀ng dø, nàmaq gø mvré nàzakénø̀ng.

37Vsv̀ng kaq mèshèrànø̀ngni, wekvt Gvrayí nàmaq sv̀ng gø mèshèràvtnø̀ng. Vsv̀ng kaq mvrà mèshèrinø̀ngni, wekvt Gvrayí nàmaq sv̀ng gø mvrà mèshèrivtnø̀ng. Mvrà èchutnanø̀ng, wekvt Gvrayí nàmaq mvrà gø èchutnavtnø̀nge. #Mat. 6:14; 7:1-2 38Èzínø̀ng, wekvt nàmaq sv̀ng gø èzívtnø̀nge. Zìdvng shvlá taq tø:ngò nø̀ yølyøl a:lò dá:ngí, nàmaq pé taq limlimwa èshóravtnø̀nge. Kadø íe wani nàmaqí ètínganø̀ng zìdvng dø, nàmaq sv̀ng wedø ètíngavtnø̀nge,” a:lòe.

Dvgá mvshǿl àngpv̀npv̀n

39Vrá, Yesuí àngmaq sv̀ng kàshvbóng tiqlòng shø̀:nòe. “Nemà:ní nø nemàn sv̀ng shøl ngu:tnòe má? Shòní gǿ dv̀ngkø̀r sv̀ng màjavm ni má? #Mat. 15:14; 23:16,24 40Coqcv́n nø àngò shvngøtshú mvdv̀m té ring we mø̀í. Íwe, kø̀mgøm cvnshì bø we kagǿ gø, àng shvngøtshú dø í longe. #Mat. 10:24-25

41Nvnvm nvchvng neróng sv̀ng nø tènuò we, nà ne taq vl we shǿngdø̀m sv̀ng nø pàwá mèdǿmshì má?#Mat. 7:3-5 42Nà ne taq vl we shǿngdø̀m sv̀ng dv́ng nà mèyv́ngshì ke, nvnvm nvchvng gǿ kaq, ‘Vnvmpèá, nà neróng lóngangvtnøng,’ wa kadø shǿn shvla ni? Vnínøt ènøt we nàé, nà ne taqò shǿngdø̀m lòng vzv̀ng èlùò. Wekvt nvnvm nvchvng neróng lúalv́m nàí shàn wa èyv̀ng lú:ngòe.

43Shǿngtø̀ng shvlá kèní àngshí mvgv́m mvshí. Vrá, shǿngtø̀ng mvgv́m kèní nø àngshí shvlá mvshí. #6:43-45 Mat. 7:15-20 44Àngshí kèní kapv̀n shǿngtø̀ng í we sháshìe. Bv̀nghǿ tø̀ng kèní nv̀mgwè shí røpmv́m mvlúnshì. Bv̀nghǿ póng kèní bìmshí røpmv́m mvlúnshì. 45Vsv̀ng shvlá nø, àng nøt vdòngø shvla lòng shø:pmò yv́ngkèní shvla pv̀n vjáng lú:ngòe. Vsv̀ng mvgv́m nø àng nøt vdòngø mvgvm lòng shø:pmò yv́ngkèní mvgvm pv̀n vjáng lú:ngòe. Kadø íe wani nøt vdòngø dv̀n vshøt pv̀n kèní nònggø:pmí shø̀n lú:ngòe. #Mat. 12:34-35

Chø̀m wa kàshvbóng

Mat. 7:24-29

46Nàmaq nø Ngà sv̀ng, ‘Kàngpèá, Kàngpèá,’ wa ègoshà dá:ngí, Ngàí shø̀nò dø pàwá mèwànø̀ng má? #Mal. 1:6; Mat. 7:21 47Ngà yv́ng di ra nø̀, Ngà kà táò dá:ngí, cv́n døng rì shvngbe nø kagǿ nv̀ng vbóng we Ngàí dvtana:tnìni. 48Àngmaq nø vba rvnaq dø dùò dá:ngí lóngtv́ng mvdv̀m mvpv̀ng àngké vra:ngò nø̀, chø̀m washì pè nv̀ng vbónge. Tì tø̀ng lú:ngì kvt, tìciqí wechø̀m sv̀ng vpuqò nìgø, ngv̀ngngv̀ng vrvngshaq í rvt púl mvdá:ngò. 49Ngà kà táò dá:ngí cv́n mvdøng gǿ nø, mvpv̀ng àngké màrvngshaq vba mvdv̀mø chø̀m washì pè nv̀ng vbónge. Tì lv̀nggu:ngí wechø̀m vpuqa:tnò kvt, vtungvm nø̀ àngshi vrø̀mvme,” a:lòe.

Currently Selected:

Luka 6: GSM

Highlight

Copy

Compare