Luka 5

Nv̀mlat coqcv́nrì goò we

Mat. 4:18-22; Mak. 1:16-20

1Tiqkvt nø Genesaret Tìnúngmè#5:1 Galili Tìnúngmè sv̀ng wae. shvnvngø Yesu rip dvgvp, Gvray mòngkà tashilv́m vsv̀ng loksokrìí Àng sv̀ng shvgøra:tnà. 2Wekvt nga vkwìke rìí tìrìn yv́ngø vdǿn dá:rà we kùngshí vnígø̀m À:ngí yv̀ng bǿà. Nga vkwìke rì nø kùngshí kèní léshì nø̀ shǿmgún zvlshìe. 3Simon kùngshí gø̀m taq Yesu zv́ngshìá:mì nø̀, kùngshí sv̀ng vdàmpa kèní tiqramcè rvbaqlv́m Simon kaq dvzá:ròe. Wekvt Yesu nø kùngshí taq rung sórí, vsv̀ng loksokrì kaq shvngø:tnòe. 4À:ngí mvshǿl shǿn dv́ng bǿà kvt Simon kaq, “Rvnaq yv́ngsv̀ng èra:pmò dá:ngí, nga lúnlv́m rvt shǿmgúnrì dègøpnø̀ng,” a:lòe.

5Simoní, “Kàngpèá, nøngmaqí pòyaq dvgø:pmì we, tiqgo gø mvlú:nì! Íwe Nà kà rvt nø dvgøp dv̀ng íe,” wa vtá:nòe.

6Àngmaqí dvgøp bǿà nìnø, shǿmgúnrì dínglv́m høq nga tiqré dø̀ng dvgøpké bǿà. 7Wekvt àngmaqí kùngshí wá gø̀m taq vl we rv̀mnvngrìí dvbvnglv́m wur vwatshì sórí goòe. Àngmaq dì ráì nø̀ kùngshí vnígø̀mgø̀m vtøn lú:ngì høq nga dv̀n zø̀ngá:mì.

8Simon Piterí welòng yv̀ng bǿà kvt, Yesu hí yv́ng kǿngkupshì nø̀, “Kàngpèá, ngà yv́ngkèní èrv́lshìvm! Ngà nø mvrà vl pè ǿngàe,” a:lòe. 9Pàwá wani àngmaqí nga póngràng dvgøp lún bǿà rvtnø̀, Piter nv̀ng tiqdø vl rì shvngbe dàá:mì. 10Simonò nga vkwí rv̀mnvng í we Zebedi àngcè Yaku ó Yohan gø dàá:mì.

Yesuí Simon sv̀ng, “Mèsèreni. Akvt kèní, nàí vsv̀ng vkwìlv́m#5:10 vsv̀ng vkwìlv́m nø Yesuò coqcv́n wáshì dvzv́rlv́m í longe wa kà íe. í longe,” a:lòe. 11Àngmaqí vdàmpa sv̀ng kùngshí gø̀mní koqa:tnà dá:ngí, dvrè vl dv́ngte là:ngò nø̀ Yesu mèpvng cv̀n bǿà. #Mat. 19:27

Mvnggang dvshè:rò we

Mat. 8:1-4; Mak. 1:40-45

12Yesu nø mvrìng tiqmvrìng taq vl dvgvp, góngkøp mvnggvng vcaq we vsv̀ng tiqpè dì ráì. Wepèí Yesu sv̀ng yv̀ng bǿà kvt, kǿngkupshì nø̀, “Kàngpèá, Nà èwv́mshì nìnø, ngà sv̀ng dvshér èngutnàe,” wa kórshìe.

13Wekvt Yesu wur zúshì nø̀ àng sv̀ng shu:pmò sórí, “Ngà wv́mshø̀nge. Leq shèrvm,” a:lòe. Wela:ngí ni mvnggvng vna baná:mì.

14Vrá, kagǿ sv̀ng gø màdvtálv́m Yesuí àng sv̀ng dvká:mò dá:ngí, “Èdivm nø̀ shvrúngshúpè sv̀ng nà góng dètanshìvm. Vsv̀ng mv́rdv̀ng nà èshèrá:mì we shvkse ílv́m dvpvt, Moshií dèkv́m yv̀ngshà dø núngpà shèrúngò,” a:lòe. #Lew. 14:2-32

15Ínìgø, Àng dang shv̀ngkà nø dvshàshà dvshvng bǿà rvt, vsv̀ng loksok lokgarì nø mvshǿl tálv́m nv̀ng, àngmaq záyv̀ngrì banlv́m dvpvt dvkǿmshì ráì. 16Íwe Yesu nø àngkvtkvt rvgaq mvgung sv̀ng Àng wawa di nø̀ vjúrøtshìe. #Mak. 1:35

Hí wur shì vsv̀ng dvba:nò we

Mat. 9:1-8; Mak. 2:1-12

17Tiqni taq Yesuí mvshǿl shvngø:tnò dvgvp, Parisirì nv̀ng dvrá svrarì nø weyv́ng runge. Àngmaq nø Galili rvgaq, Yuda rvgaq taq vl we rvwá vrv̀m nv̀ng Yerusalem kèní di ráì rì íe. Záyv̀ng dvbanlv́m Gvray jórnònggùn nø Yesu taq vle. 18Wekvt vsv̀ng tiqpèlaí hí wur shì vsv̀ng tiqgǿ chà taq baqa:tnà. Àng sv̀ng chø̀m vdòng dvgòng nø̀ Yesu mv́rdv̀ngø dvbǿm mvyǿe. 19Íwe vsv̀ng loksok rvt àng sv̀ng dvgònglv́m tvrà lá mvlún lú:ngà kvt, àngmaq nø rv́gùng sv̀ng rvlv̀ngá:mì nø̀, rv́gùng wa:tnò dá:ngí, àng sv̀ng chà nv̀ng tvpwa shvngbe dvhø̀ø Yesu mv́rdv̀ng la daqà.

20Àngmaq kv́mnøt sv̀ng Yesuí yv̀ng bǿà kvt, “Rv̀mnvngpèá,#5:20 Àngké kà taq “Lvngàrépèá” gø wae. nà mvrà chutnang bǿngà,” a:lòe.

21Wekvt dvrá svrarì nv̀ng Parisirìí, “Gvray kaq shvyǿm kà shø̀n we yapè nø kagǿ íe má? Gvray tiqpè wa mø̀í nìnø, kagǿí mvrà chutna lú:nòe má?” wa dvda:mòe. #Esa. 43:25

22Àngmaqí wedø dvda:mò we sv̀ng Yesuí dǿ:mò rvt, “Nàmaq nøt taq pàwá wedø dèdvmnø̀nge má? 23‘Nà mvrà chutnang bǿngà,’ mø̀íni, ‘Èkungshì nø̀ èdivm,’ wa we yakàní kèní, kakà té shǿn yùle má? 24Vsv̀ng Àngcèpè nø rvgaqtø̀mø mvrà chutnalv́m vmíng vkv́ng vl we nàmaqí shálv́m dvpvt,” À:ngí hí wur shì pè kaq, “Ngàí vlvtnø̀ng, èkungshì, nà pvlu èlvngshì nø̀ chø̀m sv̀ng èlovm,” a:lòe.

25Wekvt chàng àngmaq mv́rdv̀ngø wepè søt kungshì dv̀ng, pvlu lòng lvngshì nø̀, Gvray ngø̀rdvgùng shvri:ngò sórí chø̀m sv̀ng loá:mì. 26Wervt àngmaq shvngbe gvzà dàá:mì nø̀, Gvray kaq shvri:ngòe. Àngmaq nø vpǿ svrenøt zø̀ngá:mì nø̀, “Dèni nø nøngmaqí vtiqlv́m rì yv̀ng bǿshà,” wae.

Lewi goò we

Mat. 9:9-13; Mak. 2:13-17

27Wemèpvng Yesu búngá:mì nø̀, Lewi tǿò we kùyà gúnshú tiqpè, kùyà gúnrà yv́ng rung da we À:ngí yv̀ng bǿà kvt, “Ngà mèpvng ècv̀n ra,” a:lòe. 28Wekvt Lewi tv̀m búng nø̀ vl dv́ngte là:ngò dá:ngí, Yesu mèpvng cv̀n bǿà.

29Vrá, Lewií Yesu dvpvt àng chø̀m yv́ng v́mbóymè dvgǿ dvzá:rò nø̀, kùyà gúnshúrì mvme tiqmvdò nv̀ng dvgá mvme gø àngmaq nv̀ng tiqdø vme. 30Parisirì nv̀ng àngmaq mvdò kèní dvrá svrarì nø Yesu coqcv́nrì sv̀ng, “Nàmaq nø kùyà gúnshúrì nv̀ng mvrà vl rì ó tiqdø pàwálv́m èv́m èaqnø̀ng má?” wa vbønshìe.

31Yesuí, “Shiqshàn rì nø cìsvra zǿm mvdv̀ng, za rì lè zǿmdv̀nge. 32Ngà nø døngman rì sv̀ng golv́m dø̀ng dakngà we mø̀í, mvrà vl rì nøt lvlíngshìlv́m rvt go nv̀ng dø̀ng dakngà,” wa vtá:noe.

Màv́m vnatshì dang

Mat. 9:14-17; Mak. 2:18-22

33Vsv̀ng tiqmaqí Yesu sv̀ng, “Yohan coqcv́nrì nv̀ng Parisi coqcv́nrì nø àngkvtkvt màv́m vnatshì nø̀ vjú røtne. Íwe Nà coqcv́nrì nø vm aq nø̀ lvvl nì!” a:lòe.

34Yesuí, “Lvngàshv́rpè shini vl dvgvp, zvmì lé bóy zaqlèrì sv̀ng nàmaqí màv́m vnatshì dèzv́rnø̀ng má? 35Ínìgø, lvngàshv́rpè sv̀ng àngmaq yv́ngkèní lù bǿò we àngni tuq rae. Wenila taq mv̀ng àngmaq màv́m vnatshì longe,” a:lòe.

36Yesuí àngmaq sv̀ng kàshvbóng tiqlòng shǿnaòe. “Bèlaq shv́r kèní tiqpuq rá:nò nø̀ bèlaq bøt taq dvceò vsv̀ng màvl. Wedø èwàò nìnø, àngshv́r dùng gø díngvm mvdv̀m, dvce bǿà we àngshv́r puq nv̀ng àngbøt dùng màbóng long. 37Vrá, bìmtì shv́r nø shace yǿngkoq bøt taq zá:ngò vsv̀ng màvl. Wedø èzá:ngò nìnø, bìmtì shv́r rvt shace yǿngkoq díngvm nø̀, bìmtì vupmvme. Shace yǿngkoq gø gvyaqvme. 38Bìmtì shv́r nø shace yǿngkoq shv́r taq mv̀ng zv́ng ràe. 39Bìmtì ànglí aq dvr vsv̀ng nø bìmtì shv́r aq mvneshì. Kadø íe wani, ‘Ànglí lòng té gvme,’ wa longe,” a:lòe.

Currently Selected:

Luka 5: GSM

Highlight

Copy

Compare