Luka 11

Kàngpèí shvngøt we júrøtkà

Mat. 6:9-13

1Tiqni taq Yesu nø tiqzàngø vjú røtshìe. Vjurøt dv́ngshì bǿì kvt, coqcv́n tiqpèí, “Kàngpèá, Yohaní àng coqcv́nrì sv̀ng shvngøt yà:ngà dø, nøngmaq sv̀ng gø vjúrøt shèngøtshà,” a:lòe.

2Wekvt Yesuí, “Nàmaq vjú èrøt lóngnø̀ng dvgvp yadø èrøtnø̀ng.

‘Vpèá, Nà bø̀ng sv̀ng shànshér dø laq vpǿì.

Nà móngdàn laq tuq daq.

3Ni vrv̀m ràì we v́mpà nøngmaq sv̀ng èzí daqshà.

4Nøngmaq sv̀ng nàléì rì kaq nøngmaqí chutnaì rvt,

nøngmaqí vléì rì gø èchutnashà.

Dvløt ra yv́ng nøngmaq kaq mèshølshàni,’” a:lòe.

Røt nø̀ lún we

Mat. 7:7-11

5Vrá, Yesuí, “Nàmaq dvhø̀ kèní tiqgǿ nø, àng rv̀mnvng tiqgǿ yv́ngsv̀ng yaqdø̀ng mvlù:ngí di nø̀, ‘Jàá, ngà sv̀ng zidòng vshø̀m chv̀ng èrumà. 6Pawá wani ngà rv̀mnvng tiqpè tvrà di yv́ngkèní tuq ráì we, àng sv̀ng shvv́mlv́m pàgø màvlá:mì,’ a:lòe laq wa. 7Íwe, chø̀m vdòng kèní rv̀mnvngpèí, ‘Ngà sv̀ng mèbø̀nlongànøng. Bv́ngkà gø kvlaqshaq íe. Ngàcèrì nv̀ng ngà gø yøp dv́rshà. Nà sv̀ng zidòng zílv́m ngà kungshì mvnengshø̀ng,’ wa vtá:nòe. 8Ngàí vla:tnìni, àngní nø rv̀mnvng í nìgø, kungshì nø̀ zidòng mvzíò. Íwe à:ngí màshvraqraq mànar rø:tnò rvtnø̀, chø̀m àngkàngpè kungshì weí rà dv́ngte zí daqòe. #Luk. 18:5

9Wervt Ngàí vla:tnìni, røt èmvnnø̀ng, nàmaq sv̀ng èzí daqnø̀nge. Lá èmvnnø̀ng, lá èlún daqnø̀nge. Bvngkà vkoq èmvnnø̀ng, ètána daqnø̀nge. 10Kadø íe wani røt gǿí nø lú:nòe. Láò gǿí nø lá lú:nòe. Bvngkà vkoqò gǿ sv̀ng nø tána daqòe.

11Nàmaq dvhø̀ taq àngpèmaqí àngcèrì zidòng røt ra ke, lóng èzínø̀ng má? #11:11 Àngké kà tiqmaq taq, “zidòng røt ra ke, lóng èzínø̀ng má?” wa kà màbá. Nga røt ra ke, bø̀ èzínø̀ng má? 12Kalø̀m røt ra ke, muqhè èzínø̀ng má? 13Nàmaq nø vsv̀ng mvgv́m èínø̀ng we, nvcèrì kaq dvrè shvlá rì zí èshánø̀ng nìnø, muqlàng taqlap yv́ng vl we nàmaq Nvpèí téwa, Àng kaq røt ra rì sv̀ng Shànshér Pvlàcè zi daq we mø̀í má?” a:lòe.

Yesu nv̀ng Belzabul

Mat. 12:22-32; Mak. 3:22-27

14Tiqni taq Yesuí màá cáng tiqgo lù:ngòe. Cáng lúshiá:mì kvt, màá pè kà shø̀n lú:ngì nø̀ vsv̀ng loksokrì dàá:mì. 15Íwe tiqmaqí, “À:ngí nø cángrì ø:pmò pè Belzabul nònggùn kèní cángrì lù:ngò we íe,” wae. 16Dvgá tiqmaqí nø Àng sv̀ng cip lálv́m rvt, “Muqlàng kèní mvshv́lpvrámè tiqlòng dètanshà,” wa røtshìe. #Mak. 8:11

17Yesuí nø àngmaqí wedø dvda:mò rì sháò rvt, àngmaq sv̀ng, “Vdè shvdaq vtùke we kamóngdàn gø vrø̀lvme. Vdè shvdaq vtùke we karvp gø vcatnvme. 18Ngàí nø Belzabul nonggù:ni cángrì lù:ngòe, èvlshàe. Satan nø àng nø àng vtúshì we í nìnø, àng móngdàn nø kadøwa ngv̀ngdøngni? 19Ngàí nø Belzabul nònggùn taqkèní cáng lùngò we la í nìnø, nàmaq coqcv́nrìí nø kagǿ nònggùn taqkèní cángrì lù:ngò we í má? Wervtnø̀, nàmaq kà mvdìng we sv̀ng nàmaq coqcv́nrìò bv̀nlìí shvkse wà lú:ngòe. 20Íwe Ngàí nø Gvray nònggùn taqkèní cángrì lùngò we í nìnø, Gvray móngdàn nø nàmaq yv́ng tuq bǿì.

21Nònggùn zaq pè nø cìldvmrì kø̀m dø àng chø̀m roqshì nìnø, àng dvrèrì pàmvrà v́laòe. 22Íwe àng mvdv̀m té jòr we shvre tiqpèí àng sv̀ng gvca:tnò nø̀ jòrvm nìnø, àng vlǿmshì we cìldvmrì tølá:mò nø̀, àng dvrèrì gø vwalshì bøe. #Kol. 2:15

23Ngà lap mvwáshì gǿ nø Ngà kaq vtù gǿ íe. Ngà nv̀ng tiqdø màdvkøm gǿ nø, dvkangshú íe.#Luk. 9:50

Cáng vtv́ng ra we sv̀ng vyáshì rà we

Mat. 12:43-45

24Cáng nø vsv̀ng kèní kvngshìvm mèpvng, tì màvl rvgaq taq dam nø̀ v́lrà láòe. Íwe, v́lrà lá mvlún lú:ngà kvt, ‘Ngà nø ngà v̀l yv̀ngà chø̀m sv̀ng vtv́ngvme,’ wae. 25Àng vtv́ng ráì kvt, wechø̀m nø dvshérshaq, dvcøpshaq í da we yv̀ng bǿà. 26Wekvt àng dìá:mì nø̀, àng mvdv̀m té mvgvm we cáng dvgá shvngøtgo shø:lò weí, wegǿ yv́ng àngmaq gòng nø̀ vlvme. Wekvt wegǿí nø vzv̀ng mvdv̀m té dvshàlv́m vhǿm lú:ngòe,” a:lòe.

27Yesuí kà yarì shø̀:nò la:ngí, vsv̀ng loksok dvhø̀ kèní svmaré tiqmè nø, “Nà sv̀ng èrí nø nong dècøq yà:ngì we svmarémè nø ìshøt vle lé!” wa vkiqe. #Luk. 1:28,42,48

28Yesuí, “Íwe, Gvray mòngkà táò nø̀ cv̀n rì té ìshøt vle,” a:lòe.

Yona mvshv́lpvrá

Mat. 12:38-42

29Vsv̀ng loksokrì luq ráì kvt, Yesuí, “Nàmaq nø mvgvm we mvrilcèrì èínø̀nge. Nàmaq nø mvshv́lpvrámè èlánø̀nge. Íwe Yona mvshv́lpvrámè wa mø̀í nìnø, nàmaq sv̀ng dvgá dø mvshv́lpvrámè mvzílv́m íe. 30Yona nø Ninewe vsv̀ngrì dvpvt mvshv́lpvrá í yà:ngì dø, Vsv̀ng Àngcèpè Ngà gø yamvrilcèrì dvpvt mvshv́lpvrá ǿng longe. 31Sheba#11:31 Sheba “Tìni lap kèní” wa nø̀ gø rø daqe. móng koqkv́mmè nø Solomon Koqkv́m zitnøt kàrì tashìlv́m dvpvt, vrúm móng kèní dì yà:ngì. Èyv̀ngnø̀ng, Solomon mvdv̀m té ring we tiqpè yayv́ng vle. Wervt, kàngé we àngni taq, koqkv́mmè shvkse wáshì long nø̀, yamvrilcèrì kaq mvrà shvri lú:ngòe. #1Kk. 10:1-13 32Ninewe wamàcèrì nø Yonaí dvsha:ngò kà sv̀ng táò nø̀ nøt língshì yà:ngì. Èyv̀ngnø̀ng, Yona mvdv̀m té ring we tiqpè yayv́ng vle. Wervt, kàngé we àngni taq, Ninewe wamàcèrì nø shvkse wáshì long nø̀ yamvrilcèrì kaq mvrà shvri lú:ngòe. #Yon. 3:1-10

Svmigwìn kàshvbóng

Mat. 5:15; 6:22-23

33Svmigwìn dvciqò dá:ngí máò we, mø̀íni mvgù:rí ku:pmò we kagǿ gø màvl. Chø̀m vdòng gòng ra vsv̀ngrìí gálòng lvyà:ngò dø, àng shvrúngrà taq lè shvrú:ngòe. #Mak. 4:21; Luk. 8:16 34Nà ne nø nà góng dvpvt svmigwìn íe. Nà ne shàn nìnø, nà góng køp làng gá longe. Íwe, nà ne màshvla nìnø, nà góng sǿngsǿng dø longe. 35Wervtnø̀ nà vdòng taq vl we gálòng nø dølòng mø̀ílv́m nàyáshì. 36Nà góng køp làng gá nø̀ dølòng tiqhvn gø màvl nìnø, svmigwìn gálù:ngí nà sv̀ng nàwan padø, nà góng køp làng gá longe,” a:lòe.

Parisirì sv̀ng nga:nò we

Mat. 23:1-36

37Yesuí kà shǿn dv́ng bǿà kvt, Parisi tiqpèí àng nv̀ng v́mpà v́mlv́m Yesu sv̀ng goòe. Wervt Àng gòngá:mì nø̀ v́m shvbóy taq runge. #Luk. 7:36; 14:1 38V́mpà shini màvm ke, Yesu nø wur mvzv́lshì we sv̀ng, Parisipèí yv̀ng bǿà kvt dàe. #Mat. 15:2

39Wekvt Kàngpèí àng sv̀ng, “Parisirì nàmaq nø gwìn nv̀ng bànrì vtv́nglap wa èzv́lnø̀nge. Íwe nàmaq vdòng rv́m nø mapnøt nv̀ng mvgvm we nøt dv̀n èzø̀ngnø̀nge. 40Àngdálrìé, vtv́nglap sv̀ng má:nò pèí nø vdòng rv́m gø má:nò we mø̀í má? 41Wervt dvshà rì kaq èzínø̀ng weí vdòng rv́m dèshérshìnø̀ng. Wekvt í dv́ngte nø nàmaq dvpvt mv́ngshèrvme.

42Parisirì nàmaq nø mèhøt lóngnø̀nge. Kadø íe wani nàmaqí bvnzi, zøngløm nv̀ng vyúngkvn àngpv̀npv̀n tiqcéwál Gvray kaq shèrúnganø̀nge. Íwe dvrá dø wàlv́m lòng nv̀ng, Gvray kaq shóngshìlv́m lòng nø nàmaqí èngálnø̀nge. Tiqcéwál sv̀ng mènàlanø̀ng dø, dvrá dø wàlv́m lòng nv̀ng, Gvray kaq shóngshìlv́m lòng sv̀ng gø nàmaqí cv́n vdue.

43Parisirì nàmaq nø mèhøt lóngnø̀nge. Kadø íe wani nàmaq nø júrøt chø̀m taq dvgùng vl we rúngtv̀ngrì nv̀ng gvttø̀mø vpǿ nø:tní kà tv́ngshì ra we sv̀ng èshòngnø̀nge. #Luk. 20:46

44Nàmaq nø mèhøt lóngnø̀nge. Pàwá wani nàmaq nø màmvshv́lshaq dvgv̀mrì dø nàshv́mnø̀ng rvtnø̀, wemvdv̀m di vsvngrìí dvgv̀m í we mvsháò,” a:lòe.

45Dvrá svra tiqpèí, “Svrapèá, Nà yadø èshø̀n we nø nøngmaq sv̀ng gø shèyǿmshà we íe,” a:lòe.

46Yesuí, “Dvrá svrarì nàmaq gø mèhøt lóngnø̀nge. Kadø íe wani nàmaqí vsv̀ng kaq nø rí rvzaq we døngjá shèrinø̀ng nø̀, nàmaq vdè nø wur tiqhà:mí gø werì sv̀ng mèzømshìnø̀ng.

47Nàmaq nø mèhøt lóngnø̀nge. Kadø íe wani nàmaqí nø nvkop nvkàngmaqí shvt yà:ngà we kàdvtutshúrìò lóngdùng dvgv̀mrì èwànø̀nge. 48Nàmaq nø nvkop nvkàngmaqí shvt yà:ngà we kàdvtutshúrìò dvgv̀mrì sv̀ng èwànø̀ng weí, àngmaqí wà yà:ngà lòng sv̀ng nàmaq gø nàránø̀ng we shvkse èwáshìnø̀nge. 49Yadø í rvtnø̀ Gvray zitnø:tní shø̀n yà:ngà we nø, ‘Ngàí àngmaq yv́ngsv̀ng kàdvtutshúrì nv̀ng dvzv́rrì dvzv́r dakngòe. Tiqmaq sv̀ng nø àngmaqí sha:tnò nø̀ dvki vrè lú:ngòe,’ wae. 50-51Wervtnø̀ Abel shvwi shvyǿ yà:ngà ni kèní, Shànshér Dǿng nv̀ng shvrúngrà dvhø̀ø shvt yà:ngà pè Zekaria shvwi shvyǿ yà:ngà ni høq, rvgaq àngké shvzøng yà:ngà dvgvp kèní kàdvtutshúrìò shvwi shvyǿ yà:ngà we mv̀ngrø̀ nø yamvrilcèrì sv̀ng shvri daqòe. Íe, Ngàí vla:tnìni, mvrà yarì shvngbe nø yamvrilcèrì sv̀ng ni tuq daqe. #Nnp. 4:8; 2Dg. 24:20-21

52Dvrá svrarìé, nàmaq nø mèhøt lóngnø̀nge! Kadø íe wani shánøt shv̀msòpuq nø nàmaqí èzø̀mnø̀nge. Íwe nàmaq vdè gø mègòngnø̀ng, gònglv́m wa rì sv̀ng gø nàgámnø̀nge,” a:lòe.

53Weyv́ng kèní Yesu búng dvgvp, dvrá svrarì nv̀ng Parisirì nø Àng sv̀ng vtvngshaq shvngoshì nø̀, røtkà mvme pv̀n røt nø̀, 54Àng kà kèní Àng sv̀ng shvwálv́m dvzaqshìe.#Luk. 20:20

Currently Selected:

Luka 11: GSM

Highlight

Copy

Compare