Luka 10

Coqcv́n 70 gǿ sv̀ng dvzá:rò we

1Wemèpvng, Kàngpèí dvgá dø shvngøtcégǿ#10:1 Àngké kà tiqmaq taq “72 gǿ” wae. rvcà:ngò nø̀, Àng dìlv́m wa we mvrìng vrv̀m, zàng vrv̀m sv̀ng àngmaq kaq vnígǿ vnígǿ Àng vzv̀ngzv̀ng dvzá:ròe.

2À:ngí àngmaq sv̀ng, “Dvkømlv́m nø gvzà luq we, dvkømshúrì nø mvluq. Wervtnø̀ dvkømshúrì dvzv́ralv́m, rvmá Àngkàngpè sv̀ng èrøtnø̀ng. #Mat. 9:37-38; Yoh. 4:35 3Edìv́mnø̀ng, vyitmèré dvhø̀ sv̀ng vyv̀ngcèrì dvzá:rò padø Ngàí nàmaq sv̀ng dvzá:rìe. 4Gv̀msùng yǿngkoq, dv̀nggúng, híshvnam mèlvngshìnø̀ngni. Tvrà ramø kagǿ sv̀ng gø pàmvrà mèwànø̀ngni. #Luk. 9:3

5Chø̀m sv̀ng ègòngv́mnø̀ng dvgvp, ‘Yarvp mvdv̀m mòngzø̀l lòng laq tuq daq,’ wa nv̀mlat shèmánanø̀ng. 6Wechø̀m taq mòngzø̀l lòng lún mvyǿ we vsv̀ng vl nìnø, nàmaqí shèmánanø̀ng we mòngzø̀l lòng nø wegǿ mvdv̀m tuq daqe. Màvl nìnø, nàmaq sv̀ng vwv́ng rae. 7Wechø̀m taq èv̀lnø̀ng, àngmaqí kapv̀n èzívtnø̀ng nìnø wepv̀n èv́m èaqnø̀ng. Pàwá wani bv̀nlì wa gǿ nø zìbè lún vpǿe. Kuchø̀m wáchø̀m sv̀ng mènàcílshìnø̀ngni. #1Kr. 9:7-14; 1Tm. 5:17-18

8Wamà sv̀ng ègòngv́mnø̀ng nø̀ àngmaqí vto ra nø̀, kapà èzívtnø̀ng nìgø, èv́mnø̀ng. 9Weyv́ngø vl we zarì sv̀ng dèbannø̀ng nø̀, ‘Gvray móngdàn nø nàmaq yv́ng níshì ráì,’ èvlnø̀ng. 10Íwe, nàmaq sv̀ng mènàtonø̀ng we wamà taq nø tvrà sv̀ng èbúngnø̀ng dá:ngí yadø èv̀lnø̀ng, 11‘Nàmaq sv̀ng vtù we shvkse ílv́m rvt, nøngmaq hípà taq vyin we nàmaq mvrìng dvtø̀l gø nàmaq mv́rdv̀ngø vchaq ráìe. Íwe, Gvray móngdàn nø níshì ráì we sv̀ng leq shánø̀ng.’ #Mak. 6:11; Luk. 9:5; Dzr. 18:6 12Ngàí vla:tnìni, àngni weni taq wewamà mvhøtlv́m lòng nø Sodom wamà mvhøtlv́m lòng mvdv̀m té vlishì longe.”

Nøt mvlíngshì we vshø̀m wamà kaq nga:nò we

Mat. 11:21-23

13“Korazin wamàé, mèhøt longe. Betseda wamàé, mèhøt longe. Kadø íe wani nàní yv́ng wv̀ng bǿngà we jórnònggùn bv̀nlìrì nø, Tiru nv̀ng Sidon wamàní taq la wv̀ngò nø̀ngnø, dvnggǿ gwashì nø̀, waqpú taq rung sórí, darì nøt dvlíngshì yv̀ngni. 14Íwe kàngé we àngni taq, nàní mvhøtlv́m lòng nø Tiru nv̀ng Sidon wamàní mvhøtlv́m lòng mvdv̀m té vlishì longe. 15Kapernum wamàé, nà nø muqlàng yv́ng shvring we èlún lú:ngò má? Zùpvng svmi móng sv̀ng lè dèdòr bøe. #Esa. 14:13,15

16Nàmaq kà ta gǿ nø, Ngà kà ta gǿ íe. Nàmaq sv̀ng mènàtonø̀ng rì nø, Ngà sv̀ng mènàtong rì íe. Ngà sv̀ng mènàtong gǿ nø, Ngà kaq dèzv́r dakngà pè sv̀ng màtoò gǿ íe,” a:lòe. #Mat. 10:40; Yoh. 5:23; 15:23

70 pè vtv́ng ráì we

17We shvngøtcépè nø, shaqshaq wa vtv́ng ráì nø̀, “Kàngpèá, cángrì gø Nà bø̀ng kèní nøngmaq vmíng sv̀ng cà:nòe,” wae.

18Yesuí, “Satan nø muqlàng kèní muqcøn lap dø vja we Ngàí yv̀ng bǿngà. #Yoh. 12:31; Dtn. 12:8-9 19Ètánø̀ng, vbø̀ nv̀ng muqhèrì sv̀ng lvmlv́m nv̀ng, Ngv̀nshàpè jórnònggùn shvngbe sv̀ng dv́ngkelv́m vmíng vkv́ng Ngàí nàmaq sv̀ng vzíshaq íe. Kapaí gø nàmaq sv̀ng mèdèlá lóngnø̀ng. #Shz. 91:13-14; Mak. 16:18 20Íwe cángrì nø nàmaq kà ta rvtnø̀ mèdebùnø̀ngni. Muqlàng yv́ng nàmaq bø̀ngrì vrushaq í rvt mv̀ng dèbùnø̀ng,” a:lòe. #Bng. 32:32; Mat. 7:22-23; Pil. 4:3; Dtn. 20:12

Yesu oqà wa we vjú røtkà

Mat. 11:25-27; 13:16-17

21Wervtø̀ taq Yesu nø Shànshér Pvlàcè vdòngø dvbù nø̀ yadø wae. “Muqlàng nv̀ng rvgaq Àngkàngpè Vpèá, Nà sv̀ng oqà. Pawá wani cíngrálnøt vl rì nv̀ng paqzí vl rì sv̀ng nø Nàí yadv́ng pv̀n èmáò nø̀, cv̀mrécèrì sv̀ng lè dèta:nòe. Íe, Vpèá, yalòng nø Nà èwv́mshì lòng íe. 22Vl dv́ngte shvngbe Vpèí Ngà sv̀ng tvleshaq íe. Vpèí wa mø̀í nìnø, Àngcèpè kagǿ í we sháò vsv̀ng màvl. Vrá, Àngcèpè nv̀ng Àngcèpèí dvta:nò rìí wa mø̀í nìnø Vpè kagǿ í we sháò vsv̀ng màvl,” wae.

23Wekvt Àng wv́l poshì nø̀, coqcv́nrì sv̀ng wa, “Nàmaqí èyv̀ngnø̀ng rì sv̀ng yv́ng lú:nò we nerì nø ìshøt vle. 24Ngàí vla:tnìni, nàmaqí èyv̀ngnø̀ng rì sv̀ng kàdvtutshúrì nv̀ng koqkv́mrì mvmeí yv́ng mvyǿ nìgø, yv́ng mvlún yà:ngò. Nàmaqí ètánø̀ng rì sv̀ng tá mvyǿ nìgø, tá mvlún yà:ngò,” a:lòe. #10:24 1Pt. 1:10-12

Samari vsv̀ng kàshvbóng

Mat. 22:35-40; Mak. 12:28-34

25Tiqkvt nø, dvrá svra tiqpè Yesu sv̀ng vløtlv́m rip lú:ngì nø̀, “Svrapèá, dvciqlvpat gø̀nshaq lúnlv́m rvt, ngà kapà wá rànge má?” wa rø:tnòe. #Luk. 18:18-20

26Yesuí, “Dvrá kàru taq kadø vru yà:ngà? Nàí kadø rø èlú:nòe má?” wa rø:tnòe.

27Wepèí, “‘Nà nøt mvsø̀n shvngbeí gø, nà dòngnøt shvngbeí gø, nà nònggùn shvngbeí gø, nà shánøt shvngbeí gø, Kàngpè nà Gvray kaq shóngshì ràe.’ Vrá, ‘Vdè sv̀ng èshóngshì dø, nà tiqdv́ng vsv̀ng kaq shóngshì ràe,’” wa vtá:nòe. #Lew. 19:18; Drd. 6:5

28Yesuí, “Nà nàtv́nshì kà vdue. Yadø èwáshì kvtnø ècúnshì longe,” a:lòe. #Lew. 18:5; Mat. 19:17

29Íwe àng nø døngman pè í we dvtanshì mvyǿ rvtnø̀ Yesu sv̀ng, “Íni, ngàò tiqdv́ng vsv̀ng nø kagǿ íe?” wa rø:tnòe.

30Yesuí, “Vsv̀ng tiqpè nø Yerusalem kèní Yeriko sv̀ng shúngshì daqì ke, tølv́mshúrì nv̀ng vhøme. Werìí àng gónggwárì chutnaò nø̀ vdipmò dá:ngí tvnéné shì we la:ngò nø̀ loá:mì.

31Shvrúngshú tiqpè wetvrà taq shúngshì vdu daqì kvt, àng sv̀ng yv̀ng bǿà nìnø tiqtongtong ngweò nø̀ vleá:mì. 32Vrá Lewi vsv̀ng tiqgǿ gø weyv́ng tuq ráì nø̀ wepè sv̀ng yv̀ng bǿà nìnø, à:ngí gø tiqtongtong ngweò nø̀ vleá:mì.

33Íwe Samari vsv̀ng tiqgǿ nø tvrà di we, weyv́ng tuq ráì. À:ngí wepè sv̀ng yv̀ng bǿà kvt, mvré lú:ngà. 34Àng yv́ng tvp di nø̀ àng dvmmárì taq zanlún yøtì nv̀ng bìmtì vdø:rò dá:ngí døpmaòe. Vrá, wepè sv̀ng àng lòzè taq shvrú:ngò nø̀, zaqlè chø̀m tiqchø̀m sv̀ng shøl bǿà nø̀ àng sv̀ng dvzø:mòe.

35Mèpvng ni taq àng búng dvgvp, dinari vnígø̀m lùò nø̀, chø̀m àngkàngpè sv̀ng zíò sórí, ‘Yapè sv̀ng nàcún dáò. Yamvdv̀mø mvzv́n be nìgø, ngà vtv́ng rang dvgvp nà sv̀ng tvlelv́m íe,’ a:lòe. 36Tølv́mshúrìí dvlá bǿà pè ò tiqdv́ng vsv̀ng nø we vshø̀mgǿ kèní kagǿ í we nàí dèda:mò má?” wa vtá:nòe.

37Dvrá svrapèí, “Àng sv̀ng dvsházaò pè íe,” a:lòe.

Wekvt Yesuí, “Nà gø èdi nø̀ wedø èwa,” a:lòe.

Marta nv̀ng Mari

38Yesu nv̀ng coqcv́nrì tvrà di ke, mvrìng tiqmvrìng sv̀ng tuq ráì nø̀ Marta tǿò we svmaré tiqmèí Yesu sv̀ng àng chø̀m taq vtoòe. #Yoh. 11:1; 12:2-3 39Wemè nø Mari wa tǿò we àngnvm tiqmè vle. Mari nø Kàngpè hí yv́ngø rung nø̀ Àng mòngkà tashìe. 40Íwe Marta nø dvzøm bv̀nlì luq nø̀, nøt shok lú:ngì rvt Yesu yv́ng di nø̀ yadø wae. “Kàngpèá, vnvmmèí nø ngà wa dvzømshì dèzv́r we sv̀ng mènøtnangà má? Ngà sv̀ng dvbvnglv́m èvlangà,” a:lòe.

41Kàngpèí, “Martaé, Martaé, nà nø bv̀nlì mvme luq rvt góng dègishì nø̀ dvshá èlushìe. 42Íwe zǿmdv̀ng we nø tiqlòng wa vle. Mari nø té shvla lòng rvcvngshì bǿì. Àng yv́ngkèní welòng lúalv́m mø̀í,” wa vtá:nòe.

Currently Selected:

Luka 10: GSM

Highlight

Copy

Compare