MATIUS 4

Ibles Kicuba Yesus ku Padag Guron

(Mrk 1:12-13; Luk 4:1-13)

1Telas ajeh Yesus bibetek ya Kelog Santen nu padag guron supaye bicuba ya Ibles. 2Telas Kibepuase selame 40 arik, 40 kenglem, Yesus pen Kicuag. 3Lalu Ibles kihol ru kiurok nu Kek, “Amen Hek Kenon Jenang, orloh batu-batu adeh kijadi ruti.”

4Yesus Kiberlag, “Ku kateh Alkitab mong bicot, ‘Manusia pek kisui ya caknak taleh, tapi juga ya jap-jap engrok ju Jenang.’ ”#Ul 8:3

5Telas ajeh Ibles kien Yesus nu kote Yerusalem, kote kudus ajeh, lalu kidek Kek ku tempat de paleng tinggi ku kemil Deg Jenang. 6Ibles kiurok nu Yesus, “Amen Hek Kenon Jenang, tauloh nu kerop kerana ku kateh Alkitab mong bicot,

‘Jenang doh Kior Imalikat-malikat naijaga Hek.

Enai doh naisamut Hek ya teg enai supaye jog Hek pek kena batu.’ ”#Mzm 91:11-12

7Yesus Kiberlag, “Tapi ku kateh Alkitab mong juga bicot, ‘Agokloh cuba TUHAN Jenang engkek.’ ”#Ul 6:16

8Lalu Ibles kien Yesus nu lod de ihad tinggi, ru kiperneng nu Kek dikdij kerajaan ru kenaya ku dunia adeh. 9Ibles kiurok nu Yesus, “Amen Hasujod ru Hasembah eng, dikdij adeh doh ngog nu Hek.”

10Yesus Kiberlag, “Hei Ibles! Etloh ju kendeh! Ku kateh Alkitab mong bicot, ‘Sembahloh TUHAN Jenang engkek ru ogloh diri engkek nu Kek taleh!’ ”#Ul 6:13

11Lalu Ibles kidek Yesus ru malikat-malikat pen naihol naitulog Kek.

Yesus Kimula Ipelayanan ku Lengrik Galilea

(Mrk 1:14-15; Luk 4:14-15)

12Mase Yesus Kicerngai Yohanes Pembaptis bijel, Kek pen Kijog nu lengrik Galilea. 13Kek pek Kigei ku pekan Nazaret tapi Kiet Kaha-gei ku pekan Kapernaum, ku beg Tasek Galilea ku daerah suku Zebulon ru suku Naftali. 14Hal adeh kitejadi supaye ma de biurok ya Nabi Yesaya kitejadi,

15“Tik Zebulon ru tik Naftali,

de baialak nu Tasek Galilea,

tik-tik ajeh mong ku englag Batag arik Jordan,

lengrik Galilea, lengrik mai pek Yahudi!

16Mai ku pajeh de naisui ku kateh gengwer ya naibakek cahaya de lau!

Mai de bikuasa ya danan, cahaya ajeh kibesinar nu enai!”#Yes 8:23–9:2

17Sejak ju kenjeh, Yesus mula Kibeajar begei adeh: “Betobatloh ju dosa engkek kerana pek liu nij Jenang doh Kimemerintah sebegei Raja!”

Yesus Kicereg Empat Urag Nelayan

(Mrk 1:16-20; Luk 5:1-11)

18Ku nanek arik tengah Yesus Kicekcip ku beg Tasek Galilea, Kek Kibakek nar mom nelayan. Simon de bicereg juga Petrus ru imenang Andreas tengah baibejala kak ku tasek ajeh. 19Yesus Kiurok nu ubai, “Joiloh Eng. Jerkek doh jerkejadi mai bejala sengoi ru doh jerkepejadi enai pengikot Eng.” 20Ku sarik jijeh juga ubai tenek-menang ajeh baiwes jala liubai lalu baijoi Yesus.

21Yesus Kipeteros Iceknip lalu Kibakek tenek-menang de kilek nij, Yakobus ru Yohanes. Ubai ajeh kekenon Zebedeus. Ku mase ajeh, ubai mong ku kateh perahu besama apak liubai tengah naiterbor jala. Yesus Kicereg ubai. 22Ku sarik jijeh juga baidek perahu ru apak liubai lalu baijoi Yesus.

Yesus Kiajar, Kiperlei Gah Bor, ru Kiperbor Mai

(Luk 6:17-19)

23Yesus Kicip nu dikdij lengrik Galilea. Kek Kibeajar ku deg-deg sembahyang ru Kiperlei Gah Bor tentang begeiharok Jenang Kimemerintah sebegei Raja. Kek juga Kiperbor jeoi mai ju dikdij nyaknik. 24Gah tentang Yesus lei nu dikdij lengrik Syria. Jadi, jeoi mai naien nu Kek dikdij sengoi de nainyik bebegei jenis nyaknik, mai de naitanggong penghod de ihad terok, mai de bisangrog ya nyanik, mai de sawan, ru mai de lumpoh. Yesus Kiperbor dikdij enai ajeh. 25Ihad jeoi mai naijoi ha Yesus. Enai ajeh ju lengrik Galilea, kawasan Dekapolis, kote Yerusalem, lengrik Yudea, ru ju lengrik ku englag Jordan.

Currently Selected:

MATIUS 4: AEH

Highlight

Copy

Compare