MATIUS 20

Perumpamaan tentang Mai Kerakjak ku Selai Anggor

1“Begei ha perumpamaan adehloh Jenang doh Kibalas bor kerjak de bibeh ya Isengoi-sengoi de biperintah ya Ilei sebegei Raja: Mong numom tuan selai anggor kihol ku pepegelap kaha-kek mai de buleh kerakjak ku iselai anggor. 2Bile ya kikep mai de buleh kerakjak, kek kibesetuju kaha-bayar jap-jap enai nukepeg duet perak. Lalu kek kior enai ajeh et kerakjak ku iselai anggor. 3Kira-kira pukol sembilan pegelap, kek kiet nij nu tempat kengnem ru kineng mong nij memerip urag de pek bekerjak. 4Kiurok nu enai, ‘Bei kerakjak ku selai anggor eng. Eng doh ngbayar engkek ru upah de patot.’ 5Enai pen naiet. Ku pukol 12 tengah arik ru ku pukol tige dui, kibeh nij hal de sama. 6Kira-kira ku pukol lima dui kek kiet nij nu tempat kengnem ru kineng lekat mong nij memerip urag de pek bekerjak. Kitanya nu enai, ‘Yama lei dui engkebuang mase pek engkebeh ma-ma kerjak?’ 7Naiberlag, ‘Kerana pek mong mai de naiha-kot jik kerakjak.’ Tuan selai ajeh kiurok, ‘Amen begei ajeh, beiloh kerakjak ku selai anggor eng.’

8Bile iarik ya dui, tuan selai anggor ajeh kiurok nu ketue pekerjak ku selai anggor ajeh, ‘Ceregloh dikdij mai kerakjak ajeh ru bayarloh upah enai. Mula ju mai de keknit sekali naihol kerakjak lei nu mai de mula-mula sekali naikerakjak ku selai eng adeh.’ 9Mai de mula naikerakjak ku pukol lima dui naikep nukepeg duet perak penumom. 10Sebab ajehloh mai de naikerakjak sejak pegelap naisangka doh naikep upah de lebeh nij tapi biog nek nukepeg duet perak juga. 11Bile naikep duet ajeh, enai mula naibesungut nu tuan selai ajeh. 12Naiurok, ‘Mai de keknit naimuj kerjak, naikerjak had nujam taleh tapi jik jikerakjak ju pegelap ku kerop bengket mat arik. Tapi jenbayar nu enai sama begei jenbayar nu jik!’

13Tuan selai anggor ajeh kiberlag nu numom ju enai ajeh, ‘Eng pek nglenglod hek. Hek ya hasetuju hakerakjak iupah nukepeg duet perak nuarik. 14Kotloh upah ajeh ru jogloh. Eng ngha-og mai de keknit naikerakjak upah de sama de hakep. 15Eng buleh ngbeh sesuka sengik lieng ru duet eng. Engkek pek patot engkebelal ha sengik eng de menghar.’ ”

16Lalu Yesus Kiurok nij, “Begei ajehloh mai de keknit sekali doh kijadi canuk, ru mai de canuk doh kijadi keknit sekali.”

Yesus Kipasal Nij tentang Hal Idanan ru Ikisnos

(Mrk 10:32-34; Luk 18:31-34)

17Bile Yesus ru 12 urag Ipengikot naiet nu kote Yerusalem, ku semakdek nong Yesus Kiajak Ipengikot-pengikot ajeh nu ibeg lalu Kiurok nu enai, 18“Hunen hiha-et nu kote Yerusalem. Ku pajeh Eng Kenon Manusia doh biog nu raknak-raknak imam agame Yahudi ru guru-guru Hukom Taurat. Enai doh naipejatoh hukom dat nu Eng. 19Telas ajeh naiog Eng nu mai pek Yahudi. Enai doh nainyeh, nairempet, ru naisaleb Eng. Tapi ku arik de inik Eng doh Ngkos nij ju danan LiEng.”

Semmanj Numom Amek

(Mrk 10:35-45)

20Telas ajeh kenah Zebedeus ru nar mom ikekenon naihol nu Yesus. Lalu naibelutot ku ngar Yesus kerana mong bende de naiha-semanj ju Kek.

21Yesus Kitanya, “Ma de engkehod?”

Kenah Zebedeus kiberlag, “Bile Jenmemerintah sebegei Raja doh, ogloh nar mom kekenon eng adeh baigei ku englag Jen. Numom ku englag kentop ru numom nij ku englag kengwil.”

22Yesus Kiberlag, “Hek pek hapanei ma de hasemanj.”

Yesus Kitanya nu kekenon Zebedeus, “Sanggopka jerketempeh seniksa de doh Ngtempeh?”

Baiberlag, “Sanggop.”

23Yesus Kiurok nu enai, “Mimang jerkek doh jerketempeh seniksa de doh Ngtempeh. Tapi, Eng pek berhak Ngha-petentu bok imai de doh kigei ku englag kentop atao englag kengwil Eng. Menek Eng ya Kipetentu bok imai de gigei ku tempat ajeh.”

24Bile 10 urag pengikot Yesus de kilek naicerngai tentang hal ajeh, naibelal nu nar mom tenek-menang ajeh. 25Kerana ajeh, Yesus Kicereg dikdij liknai lalu Kiurok, “Engkek ya engkepanei penguasa-penguasa mai pek Yahudi naitindas ha rakyat liknai sendiri. Mai entoi naipaksa rakyat supaye naitaat nu ernor enai. 26Tapi engkek pek patot engkebeh begei ajeh. Bok imai de kaha-jadi mai entoi ku engkap engkek adeh, kek hodloh kijadi begei ha hambe. 27Bok imai de kaha-jadi sengoi de canuk, kek hodloh kijadi hambe 28sama begei ha Eng Kenon Manusia de Nghol pek Ngha-jadi tuan tapi Ngha-jadi hambe ru Ngha-og nyawe Eng untok Ngterlas jeoi mai ju dosa liknai.”

Yesus Kiperbor Nar Mom Mai Buta

(Mrk 10:46-52; Luk 18:35-43)

29Ku mase Yesus ru Ipengikot-pengikot naihol ju pekan Yerikho, jeoi mai jengoi naijoi enai. 30Mong nar mom mai buta de baigei ku beg nong. Ubai baicerngai Yesus tengah Kilalu ku pajeh. Baicereg, “Tuhan Kenon-cenok Raja Daud, yayakloh jar!”

31Mai jengoi de mong ku pajeh nailes ha ubai ru naior baikerakdik serakngek. Tapi baicereg gulebeh kuat nij, “Tuhan, Kenon-cenok Raja Daud, yayakloh jar!”

32Yesus pen Kibehenti ru Kicereg ubai. Kitanya, “Ma de jerkehod Eng Ngbeh ha jerkek?”

33Ubai berlag, “Tuhan, jarhod jarha-nengneng!”

34Yesus Kiyayak ha ubai, lalu Kipep mat ubai. Ku sarik jijeh juga ubai ya dapat bainengneng. Lalu ubai pen baijoi Yesus.

Currently Selected:

MATIUS 20: AEH

Highlight

Copy

Compare