MATIUS 19

Neajar Yesus tentang Hal Cengrei

(Mrk 10:1-12)

1Telas Yesus Kiurok dikdij ajeh, Kek Kidek lengrik Galilea lalu Kiet nu daerah ku lengrik Yudea de ku englag Batag arik Jordan. 2Jeoi mai naijoi Kek ru Kek pen Kiperbor enai ku pajeh.

3Lalu holloh memerip urag mai Farisi naiha-uji Kek. Naitanya nu Kek, “Amen hijoi Taurat Musa, bulehka tok numom gengsir kicerei ikenah ru ma taleh ialasan?”

4Yesus Kiberlag, “Pek pernah engkebacaka ayat Alkitab de kiurok, ‘Ku imemula Jenang Kicipte keral ru kerdor’?#Kej 1:27 5Telas ajeh Jenang Kiurok, ‘Ajehloh isebab numom keral doh kidek iamek-apak ru kibenanek ru ikenah, ru ubai rimnar doh baijadi nanek.’#Kej 2:24 6Jadi, ubai pek bainar nij tapi baijadi nanek. Kerana ajeh, ma de ya bipenanek ya Jenang pek buleh bicerlah ya manusia.”

7Mai Farisi ajeh naitanya nu Yesus, “Amen begei ajeh, yama Nabi Musa kiog perintah mai buleh kicerei ikenah amen kiog surat cerei?”

8Yesus Kiberlag, “Nabi Musa kipebuleh cengrei kerana sengik engkek jehat. Tapi sebenarnye, sejak ju imemula Jenang Kinyek hicirei. 9Cerngailoh, amen numom keral kicerei ikenah kerana ikenah ajeh kibezinah, igengsir ajeh pek kibeh dosa. Tapi, amen numom gengsir kicerei ikenah de pek bezinah ru kijeg kerdor kilek nij, kek ya kibezinah.”

10Pengikot-pengikot Yesus naiurok nu Kek, “Amen begei ajehloh ihal ru sinui kenah-gengsir, lebeh bor pek hijekjeg.”

11Tapi Yesus Kiberlag nu enai, “Pek dikdij mai dapat naiterima hal pek jekjeg ajeh. Had mai de ya bitentu ya Jenang taleh de mampu naiterima hal ajeh. 12Jeoi isebab yama numom pek kijekjeg. Mong mai de pek jekjeg kerana biperyos cacat ialat kelamin, mong mai de bipemandul ya mai kilek, ru mong juga mai de pek kijekjeg supaye buleh kiog idiri untok betol-betol kimelayani Jenang sebegei iRaja. Mai de sanggop kiterima hal ajeh, biarloh kiterima.”

Yesus Kiberkat Sesanget

(Mrk 10:13-16; Luk 18:15-17)

13Mong memerip urag sengoi naien sesanget nu Yesus supaye Kidek Iteg ku sesanget ajeh ru Kidoa ha enai. Tapi Ipengikot-pengikot nairok sengoi-sengoi ajeh. 14Tapi Yesus Kiurok, “Agokloh get sesanget ajeh. Biarloh naihol nu Eng kerana mai begei enai ajehloh de naijadi sengoi-sengoi de biperintah ya Jenang sebegei Raja.”

15Lalu Yesus Kidek Iteg ku dikdij sanget ajeh. Telas ajeh Kek pen Kiet ju kenjeh.

Mai Nyengnyam de Kaya

(Mrk 10:17-31; Luk 18:18-30)

16Ku nanek arik numom keral kihol nu Yesus. Kek kitanya, “Guru, maka bahneh bor de patot ngbeh supaye ngkep sinui de lei ditehjeh?”

17Yesus Kiberlag, “Yama hatanya nu Eng hal ma de bor? Had Jenang Kihalei taleh de bor. Joiloh hukom Jenang amen hahod sinui de lei ditehjeh.”

18Mai ajeh kitanya nij, “Hukom kek belok?”

Yesus Kiberlag, “Agok perdat mai, agok bezinah, agok siksij, agok og kesaksian palsu,#Kel 20:13-16; Ul 5:17-20 19hormatloh keneng-menek hek, ru hokloh ratak manusia begei hahok ha diri lihek sendiri.”#Im 19:18

20Mai nyengnyam ajeh kiberlag, “Dikdij hukom ajeh ya ngbeh, ma nij de kurang?”

21Yesus Kiurok nu kek, “Amen hahod hajadi sempurne, etloh jual dikdij harta hek ru ogloh duet ajeh nu mai hajap. Amen habeh begei ajeh, hek doh hakep harta ku serga. Telas ajeh beiloh joi Eng.”

22Bile kicerngai bengwal Yesus ajeh, kek kidek ju tempat ajeh ru sedeh isengik kerana kek ihad kaya.

23Lalu Yesus Kiurok nu Ipengikot-pengikot, “Cerngailoh abor, ihad susah mai kaya naiha-jadi sengoi-sengoi de biperintah ya Jenang sebegei Raja. 24Cerngailoh nij, lebeh senang nuikor unte kimuj nu lubang jarop daripade mai kaya naijadi sengoi-sengoi de biperintah ya Jenang sebegei Raja.”

25Cengang empag pengikot-pengikot Yesus bile naicerngai Iengrok ajeh. Naitanya, “Amen begei ajeh, bokka de dapat bipeselamat?”

26Yesus Kineng nu enai lalu Kiurok, “Hal ajeh pek dapat bibeh ya manusia tapi ya Jenang dapat!”

27Lalu Petrus kiurok nu Yesus, “Jik ya jiwes dikdij ma de mong ku jik jiha-joi Jen. Jadi, maka doh de jikep?”

28Yesus Kiurok nu enai, “Cerngailoh abor, ku mase Jenang Kibeh dikdij hal kijadi pai ru Eng Kenon Manusia Nggei ku tahte Raja de mulie, dikdij liengkek de jijoi Eng pen doh engkegei ku kemil 12 tahte ru engkememerintah 12 suku bangse Israel! 29Jap-jap mai de naidek ideg, itenek-menang, ikeneng-menek, ikekenon, atao iselai kerana naiha-joi Eng, enai doh naikep 100 kali gande ma de ya naidek ajeh, ru naikep sinui de lei ditehjeh. 30Tapi jeoi mai de canuk doh naijadi keknit sekali, ru mai de keknit sekali doh naijadi canuk.”

Currently Selected:

MATIUS 19: AEH

Highlight

Copy

Compare