MATIUS 17

Yesus Bipemulie ku Kemil Lod

(Mrk 9:2-13; Luk 9:28-36)

1Telas enam arik ju kenjeh, Yesus Kien Petrus, Yakobus, ru Yohanes menang Yakobus ru naiet naihalei nu nanek lod de tinggi. 2Mase Ipengikot-pengikot ajeh naineng Yesus, naineng Kek Kibeubah. Irenes kijadi terang begei mat arik ru Ileknog kijadi biyeg ru cerengling. 3Aleh-aleh mong Nabi Musa ru Nabi Elia baibelwal ru Yesus. 4Petrus kiurok nu Yesus, “Guru, ihad bor jik mong ku padeh. Amen Jenhod, eng doh ngbeh nik kebek kemah, nanek ha Jen, nanek ha Nabi Musa, ru nanek nij ha Nabi Elia.”

5Tengah Petrus kibelwal, sagop de becahaya kiserkop dikdij liknai ru naicerngai suara ju sagop ajeh kiurok, “Adehloh Kenon Eng de Nghok. Kek Kipesenang sengik Eng. Cerngailoh engrok Kek!”

6Bile pengikot-pengikot Yesus naicerngai suara ajeh, enai ihad naisengoh lei naikekkop nu matik. 7Tapi Yesus Kihol ru Kipep enai. Kiurok, “Kosloh, agok sengoh!” 8Bile naiceriak nu sekelileg, pek naibakek bok-bok pen. Had mong Yesus Kihalei taleh.

9Mase naiceleh ju lod ajeh, Yesus Kibesat nu enai, “Selagi Eng Kenon Manusia pekseg biberkos ju danan Eng, agok pasal nu bok-bok pen ma de ya engkeneng.”

10Lalu Ipengikot-pengikot ajeh naitanya, “Yama guru-guru Hukom Taurat naiurok Nabi Elia hod kihol lebeh canuk daripade Peselamat de bijanji ya Jenang?”

11Yesus Kiberlag, “Betol, Nabi Elia mimang kihol lebeh canuk kaha-sedia dikdij hal sebelom Eng Nghol. 12Cerngailoh, Nabi Elia mimang ya kihol tapi mai pek naicam ha kek ru naisiksa kek sesuka sengik liknai. Ru care de sama, doh naibeh nu Eng Kenon Manusia.”

13Telas naicerngai begei ajeh, baruloh Ipengikot-pengikot naisedar Yesus Kiurok tentang Yohanes Pembaptis.

Yesus Kiperbor Numom Sanget de Bisangrog ya Nyanik

(Mrk 9:14-29; Luk 9:37-43)

14Bile Yesus ru nik mom Ipengikot ajeh nailos nij nu mai jengoi, mong numom keral kiterbuk ru kibelutot ku ngar Yesus. 15Kiurok, “Jen, yayakloh kenon eng! Kek kinyik nyaknik penyaket gila babi, isawan ihad terok. Kek selalo kijer nu kateh os ru teu. 16Eng ngen kek nu pengikot-pengikot Jen tapi pek dapat naiperbor kenon eng ajeh.”

17Yesus Kiberlag, “Eng ya cukop liu Nggei ru Ngbesabar ru engkek! Tapi engkek lekat juga pek engkepecaya, lekat jehat, ru pek dapat engkebeh ma de Ngbeh! Enloh sanget ajeh nu madeh!” 18Yesus Kitengking nyanik ajeh supaye kihol ju sanget ajeh ru nyanik ajeh pen kihol. Ku sarik jijeh juga sanget ajeh kibor.

19Telas ajeh bile pek mong mai kilek ku pajeh, pengikot-pengikot Yesus naiderleh ru naitanya nu Kek, “Yama jik pek dapat jiperet nyanik ajeh?”

20Yesus Kiberlag, “Kerana kurang engkepecaya nu Jenang. Cerngailoh abor! Amen engkek mong iman iteninoi mar numeknat mat sawi taleh pen, engkek dapat engkeor lod ajeh, ‘Jegloh diteh!’ ru lod ajeh doh kijeg. Engkek doh dapat engkebeh ma-ma taleh!” [21Tapi nyanik begei ajeh had dapat biperet ya doa ru puase taleh.]#17:21 Ayat adeh pek mong ku kateh memerip salinan Alkitab manah.

Yesus Kiurok Nij tentang Idanan

(Mrk 9:30-32; Luk 9:43-45)

22Bile dikdij Ipengikot-pengikot naibekumpol ku lengrik Galilea, Yesus Kiurok nu enai, “Eng Kenon Manusia doh biserah nu kuasa manusia. 23Eng doh biperdat tapi ku arik inik Eng doh Ngkos nij ju danan.”

Bile naicerngai ha bengwal ajeh, Ipengikot-pengikot ihad naisedeh.

Benayar Cukei Deg Jenang

24Telas Yesus ru Ipengikot-pengikot nailei ku pekan Kapernaum, mai de bekutep cukei ha Deg Jenang naihol nu Petrus ru naitanya, “Guru engkek Kaha-bayarka tok Icukei ha Deg Jenang?”#17:24 Icukei ha Deg Jenang: Ku jaman ajeh cukei ha Deg Jenang bikerna nu jap-jap keral mai Yahudi taleh de umur enai lebeh ju 20 tahut. Benayar ajeh biguna ha jenaga ru terembor Deg Jenang ajeh.

25Simon Petrus kiberlag, “Kibayarloh!”

Bile kimuj nu kateh deg ru sebelom kiurok ma-ma, Yesus Kiurok nu kek, “Simon, harasa bok de patot bebayar cukei nu raja-raja dunia adeh? Kekenon raja atao mai kilek?”

26Petrus kiberlag, “Mai kilek.”

Yesus Kiurok, “Amen begei ajeh, kekenon raja pek payah bebayar. 27Tapi wesloh agok hipesinggong sengik bok-bok pen. Etloh nu tasek ru terojloh kak. Ku kateh empag kak de petame hateroj, hek doh hakep duet perak de cukop ha benayar cukei har ha Deg Jenang. Kotloh duet ajeh ru bayarloh cukei ha har rimnar.”

Currently Selected:

MATIUS 17: AEH

Highlight

Copy

Compare