MATIUS 16

Mai Farisi ru Mai Saduki Naisemanj Tanda Ajaib

(Mrk 8:11-13; Luk 12:54-56)

1Memerip urag mai Farisi ru mai Saduki naiterbuk nu Yesus. Enai naiha-uji Kek, jadi naisemanj Yesus Kibeh tanda ajaib untok Kaha-pebukti Kek Kihol ju Jenang. 2Yesus Kiberlag, [“Bile mat arik kiceleh, engkeurok, ‘Iarik doh bor kerana iarik nyap.’ 3Ku ipegelap engkeurok, ‘Iarik kaha-pes kerana langit ceher ru kelap.’ Engkek dapat engkeagak ha iarik bile engkeneng tanda-tanda de tejadi ku langit, tapi engkek pek engkepaham tanda-tanda ha jaman adeh!]#16:2-3 Ayat-ayat adeh pek mong ku kateh memerip salinan Alkitab manah. 4Ihad jehat ru pek setie sengoi ku jaman adeh! Engkesemanj Ngperneng tanda ajaib. Tapi had nanek taleh tanda ajaib de Ngperneng nu engkek doh. Tanda ajeh tanda ajaib Nabi Yunus.”

Telas Kiurok begei ajeh, Yesus Kidek enai lalu Kiet ju kenjeh.

Ragi Mai Farisi ru Mai Saduki

(Mrk 8:14-21)

5Bile pengikot-pengikot Yesus nailintas tasek, naisip engen ruti. 6Yesus Kiurok nu enai, “Bejaga-jagaloh nu ragi mai Farisi ru mai Saduki.”

7Pengikot-pengikot Yesus mula naibelwal ratak liknai, “Kek Kiurok begei ajeh kerana hik pek hien ruti.”

8Yesus Kipanei ma de naibelwal ratak liknai. Jadi, Kiurok, “Engkebelwal ratak liengkek tentang hal pek engkeen ruti. Hal ajeh kiternyol engkek kurang engkepecaya nu Eng. 9Engkek mimang lekat pek engkereti. Engkek ya engkesipka? Eng Ngbercak lima ribu urag ya lima kebek ruti. Merip bakol ilembeh caknak de engkekumpol? 10Eng juga Ngbercak empat ribu urag ya tujoh kebek ruti. Merip bakol ilembeh caknak de engkekumpol? 11Engkek hod engkereti. Eng pek Ngbelwal nu engkek tentang hal ruti. Tapi bejaga-jagaloh nu ragi mai Farisi ru mai Saduki!”

12Baruloh naipanei bengwal Yesus ajeh pek kimaksod tentang ragi bahneh ruti tapi tentang neajar mai Farisi ru mai Saduki.

Neaku Petrus tentang Yesus

(Mrk 8:27-30; Luk 9:18-21)

13Yesus Kiet nu daerah beg kote Kaisarea Filipi. Ku pajeh Kek Kitanya nu Ipengikot-pengikot, “Amen hijoi engrok mai, Kenon Manusia ajeh bok?”

14Naiberlag, “Mong mai naiurok Kenon Manusia ajeh Yohanes Pembaptis. Mong juga mai kilek naiurok Kek ajeh Nabi Elia, ru mabek kilek nij naiurok Kek ajeh Nabi Yeremia atao numom ju nabi.”

15Yesus Kitanya nij nu enai, “Tapi ku engkek, Eng adeh bok?”

16Simon Petrus kiberlag, “Enjen adeh Peselamat de bijanji ya Jenang, Kenon Jenang de sui.”

17Yesus Kiurok, “Simon kenon Yohanes, Jenang Kiberkat hek kerana apeka manusia de kiog panei hal ajeh nu hek, tapi Menek Eng de ku sergaloh de Kiog panei. 18Kerana ajeh, cerngailoh hek Petrus, maksod muh hek ajeh batu. Ku batu ajehloh doh Eng Ngperjeg jemaah-jemaah Eng. Mahentok de dapat kipemusnah jemaah-jemaah ajeh, hamapen os nyeng! 19Eng doh Ngog kuasa nu hek untok habekuasa ku sengoi-sengoi de biperintah ya Jenang sebegei Raja. Ma taleh de haget ku enai, doh biget juga ya Jenang. Ma de hapebuleh ku enai, doh bipebuleh juga ya Jenang.”

20Telas ajeh Yesus Kiget Ipengikot-pengikot naipasal nu bok-bok pen tentang hal adeh: Kekloh Peselamat de bijanji ya Jenang.

Yesus Kipasal tentang Iseniksa ru Idanan

(Mrk 8:31–9:1; Luk 9:22-27)

21Sejak ju kenjeh, Yesus mula Kibeteros-terang nu Ipengikot-pengikot ru Kiurok Kek mesti Kiet nu kote Yerusalem ru Kikena jeoi seniksa ju raknak-raknak mai Yahudi, raknak-raknak imam agame Yahudi, ru guru-guru Hukom Taurat. Kek Kiurok Kek doh biperdat tapi ku inik arik doh Kikos nij ju danan.

22Petrus kitarek Yesus nu ibeg ru kitegor Kek, “Tok Tuhan, Menek ku serga pek Kiog hal ajeh kitejadi ku Jen doh!”

23Yesus Kiceleg ru Kiurok nu Petrus, “Et ju kendeh, Ibles! Hek hakerlag nong Eng. Peniker hek peniker manusia, pek peniker Jenang!”

24Telas ajeh Yesus Kiurok nu Ipengikot-pengikot, “Bok taleh de kaha-joi Eng, kek hodloh kiwes icare sinui de kipenteng ha diri ilei sendiri ru kek hodloh kitanggong senusah hamapen hod kidat. 25Bok imai de kihok inyawe, inyawe ajeh doh nyep. Tapi bok imai de nyep inyawe ha Eng, kek doh kikep sinui de lei ditehjeh. 26Pek mong iguna amen numom kikep dikdij kenaya dunia adeh tapi nyep inyawe kerana pek mong ma-ma pen ku dunia adeh de dapat kiganti ha nyawe. 27Pek liu nij Eng Kenon Manusia doh Nghol besama ru malikat-malikat ku kateh kemuliean Menek Eng. Ku mase ajeh, Eng doh Ngbalas bahneh jap sengoi Ngjoi bahneh enai. 28Cerngailoh abor! Memerip urag ju engkek doh pek engkedat lei engkeneng Eng Kenon Manusia Nghol nij untok Ngmemerintah sebegei Raja.”

Currently Selected:

MATIUS 16: AEH

Highlight

Copy

Compare