Malɨkɔ 12

Isisenio yɔ kʉbaa ɔ mujabibo

1Ɨɓɔ sɨ ta inani, Yeso ɔ꞉pʉnga naɓɔ anʉngakɨa yaka ɨngbaa akɔ isisenio ɓɔ: «Gue mʉngana, a꞉hʉna kʉbaa ɔ mijabibo angɔ. Ɔ꞉kunguo kʉbaa ngɨananɨ nɔ aga, nɔ, ɔ꞉mba ʉpɨa wɔ namioko lipumo lɔ mijabibo. Ɔ꞉tuɓoko ɨkáá yɛta ikongo, ayaka yɔ pɛmakɨa kʉbaa. Mbise ɔngɔ, ɛ꞉njo kʉbaa ngɨananɨ alɨkɔndɔ lɔ ɓombi ngʉɓa, ɓahʉna mijabibo, nɔ, ɔ꞉sa kyɛnda ga ngo. 2Tɨa akɔ angbinga ɔ ɗʉkʉa lipumo, ɔ꞉tʉma baya angɔ mʉngana atɨ ɓombi ngʉɓa a꞉ɓʉsɨa nɔ tɛa yɔ kʉbaa, dɔ, ɨmʉsɨkɨa tɨa lipumo nga langɔ atɨ ɓombi ɓɔ tɛa, ngʉɓa ɓa꞉kɔnɔ naɓɔ akɔ tɛa yɔ kʉbaa. 3Ɨɓɔ, ɓombi ɓɔ tɛa ngʉɓɔnanɨ, ɓɔ꞉mʉfa gue ngɨananɨ, ɓɔ꞉mʉɓɛnda ga sɛkɛ sɛkɛ, nɔ, ɓɔ꞉mutoiso lɨkɔndɔ ta ɓʉtʉʉ. 4Mamʉkwɔ ɔ kʉbaa, ɔ꞉tʉma ɓata ta baya nga ɔmɔ. Ɓɔ꞉mʉɓɛnda amʉtʉ, nɔ, ɓɔ꞉mʉsɛaka ɓɔ kyɛ kyɛ kyɛ. 5Ɔ꞉tɔtʉma ɓata ɨyɔ ɓeetu, ɓɔ꞉mʉwa ɨyananɨ tɨta nɨwa. Ɔ꞉tʉma ɓata ɓɔmɔ ɓaja, ɓɔ꞉ɓugbolo kʉ gbolo, nɔ amaa tɨa kʉ maa. 6Mamʉkwɔ ɔ kʉbaa a꞉ɓio kʉ nɔ mukpekpe wɔ mwana angɔ ɔ ɓʉkʉnda. A꞉pipiyo naɓɔ atʉmɨa tɨta mwana ngɨananɨ angɔ. Ga ɨyɔ ɓɔ: ‹Haya, ɓa꞊kumo pɛpɛ ɓʉnʉ mwana ngɨasɛmɨ akɛ, ta kumoni.› 7Yakamɛngana, ndʉ ɓombi ɓɔ tɛa ngʉɓɔnanɨ ɓa꞉mɨna anɨka, ɓɔ꞉pʉnga yakanaka ɓɔ: ‹Makwɔ ɔ mʉgyɛndɔ wɔ maɓɨɨ ngʉwa, ɨyananɨ. Inu ɓague ikeni, tɨmupipeni, iɗo ambɔ tɨa isu akɛ, tɨdya mʉgyɛndɔ wɔ maɓɨɨ ngʉwa.› 8Kʉdɔ, ɓa꞉mʉfa ga kwɨ, ɓɔ꞉sa nayɔ anɨwa, nɔ, ɓɔ꞉mʉgiso mʉnda aɓei ɔ kʉbaa. 9Kʉdɔ, Yeso ɔ꞉ɓuɓokuo ɓɔ: ‹Mamʉkwɔ ɔ kʉbaa abikɨa dɔ ɓʉnʉ tanɨ? Tɨta ɨyɔ ingainga akɛ ɛ꞊ka, nɔ, e꞊njo ʉpanʉ amaa ɓombi ɓɔ tɛa, nɔ, e꞊njo tɛa yɔ kʉbaa tɨa kʉ alɨkɔndɔ lɔ ɓombi nga ɓɔmɔ.› 10Inu ná꞉ngɔpopoko ndɨ sina Mabii ngʉka ɓa꞉tɛndakɨa-ɔɔ ɓɔ:

‹Ikopi ngɨyɛ ɓayoka ɓɔtuɓoko lɨkáá,

ɓa꞉ɨgiso anambamba,

tɨa ɨyɔ, yɛka ikopi ngɨyɛ ɨjangɨa nɔgbɛ.

11Makwɔɓɨɨ akɛ a꞉tambanaka jɛnɛ yaka ngɨyɛnɛnɨ ɓanɨ.

Nɔ, ya yaka yɛta ɨmbangɛ amesu keso.›#popoko Mmb 118:22»

12Ɓangama ɓɔ ɓakumukumu, nɔ ɓapananakɨa ɓɔ mapanʉ, ɓa꞉pemiso ta iɗo ɓɔ Yeso ɔ꞉ngakɔ isisenio ngɨyɛnɛnɨ ta akʉʉ eɓo. Kʉɓanɨ, ɓɔ꞉pʉnga ahata ɓɔ ɓamʉfa tanɨ. Yakamɛngana, ɓɔ꞉mʉsɨa, nɔ, ɓɔ꞉sa ɨɓɔ tɨa kʉ nɨsa, dɔ, ɓa꞉ɓio akumo ambaja ɔ ɓombi.

Ɓɔɓokuo Yeso yaka akʉʉ ɔ lipa majanja

13Kʉdɔ, ɓɔ꞉mʉtʉmɨa tɨa mukpekpe yɔ Ɓafalisayɔ, nɔ ɓombi ngʉɓa ɓa꞉ɓio amati ɔ ɨtandɛ ngɨyɔ Hɛlɔdɛ. Ɓa꞉ɓio ahata ɓɔ ɨfana aipindi, ta ɨngbaa akɔ yaka ngɨyɛ a꞉chweiso amonu ngʉkangɔ ingainga. 14Ɓɛ꞉ka, ga ɨɓɔ nɔ Yeso ɓɔ: «Ha Mʉpananakɨa! Tanɨmbɨa ɓɔ, wakyɔkio yaka ta ingono. Iii! Wapanɨa ɨngbaa yɔ Asɔɓɨɨ nɔ ɓungbingbii ta ndʉ yanɨtania. Nɔ, wangɔmʉ ʉwɛ nɔ ʉɓá wɔ mombi. Dɔ, ʉwɛ, wɛna ɓombi ɓaɓomu ta ngbanga. Ɛɛ, atɨɓɨa-sɨ ɓɔ wanɨna tanɨ. Tɔsisekio ndɨ kʉɔ alipa manjanja, kɔ ngama ata mʉja ngɨyɔ Ɓalɔma, ga pɔ ɓɔ ii, ga pɔ ɓɔ haa?» 15Ɨyɛ ndʉ ɨyɔ Yeso, ɛ꞉mbɨa pɛtanaka ngɨyeɓo, kʉdɔ, ɔ꞉ɓutosio ɓɔ: «Ha inu ɓague, ná-sɨ nɛmɨ apendekio lipindi ɓanɨ dɔtanɨ? Anenjeni gɔ-sɨ agyɛgyɛ ananɨ, nɨmɨna.» 16Ɓɔ꞉minjo agyɛgyɛ, nɔ, ɔ꞉ɓuɓokuo ɓɔ: «Mesu nɔ mabii ngʉka ɓa꞉tɛndakɨa akɛ, kanɨ?» Ya mesu nɔ mabii kɔ: «Ngama ata mʉja ngɨyɔ Ɓalɔma.» 17Ga Yeso ɓata naɓɔ ɓɔ: «Ɛɛ, lɨkyɛmʉ ngɨlɔ ngama ata mʉja ngɨyɔ Ɓalɔma, minjeni kʉ ngama ata mʉja ngɨyɔ Ɓalɔma, nɔ lɨkyɛmʉ ngɨlɔ Asɔɓɨɨ, nɔ́minjo kʉ Asɔɓɨɨ.» Yaka ngɨyɛnɛnɨ Yeso a꞉ɓutosio, yɔ꞉mbangɨa ɓague ngʉɓɔnanɨ ta mbangɨa.

Mangoi akʉʉ ɔ jʉkana akɔ ingwo

18Mukpekpe yɔ Ɓasadukayɔ ɓɔ꞉mɨsɨnganɨa Yeso kʉ inani. Ɨɓɔ, ɓangɔbayamʉ yaka yɔ jʉkana akɔ ingwo. Ɓɛ꞉ka akɔɓokuo Yeso ɓɔ: 19«Mʉpananakɨa, amati ɔ Mabii ngʉkangɔ, Musa a꞉tɨsɨa nɔ ʉpanʉ ɓɔ: ‹Gue ɔweni, nɔ ɔsɨa moi ngɨa ɓa꞉nɔtamʉ nayɔ mwana, woko ngɨananɨ, anasana tɨta manye ɔ swaɨ, iɗo ambɔ ɨnɔtɨa abɨɨ ɔ manye ɓana.› 20Ɨnadɔ, ya꞉ɓio nɔ ɓiga ɓegue mɛɗɨanɛka, ʉɓa ɓa꞉chwɛa ta ɓʉa mʉngana. Tapio a꞉sɨkana nɔ ɔ꞉wo, sɔkɔmʉ ɨsɨa mwana. 21Gwa ngɨa a꞉mʉkwa amʉkɔngʉ, ɔ꞉tɔnasana woko, nɔ, ɔ꞉tɔwo ɨyɔ kʉ woni, sɔkɔmʉ ɨ꞉sɨa ɨyɔ mwana kʉɓanɨ. Gwa ngɨyɔ ɓeetu ɔ꞉tɔkɨa ɨyɔ kʉɓanɨ. 22Yɔ꞉sakanaka tɨta ɓanɨ, akɔɓɔya aka ɓague ngʉɓɔnanɨ mɛɗɨanɛka ɓaɓomu ɓa꞉sio-ɔɔ, sɔkɔmʉ ɓɨ꞉sɨa gʉtʉ pɔ mwana. Tɨa amupipio ɓɔ gbu, moi ɔ꞉tɔwo ɨyɔ tɨa kʉ woni. 23Sina tɨa akɔ ɓisi ɓɔ jʉkana akɔ ingwo, ʉɓa, ɨɓɔ ɓaɓomu, ɓa꞊jʉkana-ɔɔ, woko ngɨananɨ a꞊ɓio tɨa moi anɨ? Dɔ, ɨɓɔ ɓaɓomu mɛɗɨanɛka, ɓa꞉mʉsɨka sɨkanɨ.» 24Yeso ɔ꞉ɓutosio ɓɔ: «Inu ɓague, ya ndʉ nɛ́paɔ ɨngbaa ɨpaanɨ. Dɔ, nángɔmʉ apemiso Mabii kɔ Asɔɓɨɨ gʉtʉ pɔ angu ngɨangɔ. 25Dɔ, ɓisi ngʉɓa ɓombi ɓa꞊jʉkana sina-ɔɔ akɔ ingwo, yaka yɔ sɨkana ati ɔ ɓague nɔ ɓoi yangɔɓio tii ɓata. Ɓombi ɓa꞊ɓio sina tɨa ngbanga ndʉ ɓamalaika akʉʉ ɔ ɓisi. 26Akʉʉ ɔ yaka ngɨyɛnɛnɨ yɔ jʉkana akɔ ingwo, inu, nángɔpopoko ndɨ sina amati ɔ Mabii ngʉkɔ Musa, yaka yɔ ɨkpa ngɨyɛ ya꞉ɓio aɗɛtɨa? Inani, Asɔɓɨɨ a꞉musigio ɓɔ: ‹Ɨmɨ, na Asɔɓɨɨ ngɨyɔ Abalaama, Asɔɓɨɨ ngɨyɔ Isaka nɔ Asɔɓɨɨ ngɨyɔ Yakɔɓɔ.› 27Ɨyɛnɛnɨ yapananiso aɓʉmba ɓɔ, ɓombi ngʉɓa ɓa꞉sio, ɓa꞊jʉkana sina akɔ ingwo jʉkananɨ. Asɔɓɨɨ angɔmʉ Asɔɓɨɨ ɔ mɨnda, yakamɛngana, a Asɔɓɨɨ ɔ ɓombi ngʉɓa ɓa-sɨ kʉɔ. Inu, nɛ́꞉paa ɨngbaa ta ingono.»

Ʉpanʉ ngʉwa wɔta ʉja achana

28Mʉpananakɨa wɔ mapanʉ mʉngana, a꞉ɓio kʉ ananɨ, akpata ɗuɗuono ngɨyɛnɛnɨ, ɓa꞉ɓio amati ɔngɔ. Ɨyɔ, ɛ꞉na ɓɔ Yeso ɔ꞉tosio ɓasadukayɔ yaka nɔ nɨmbɨmbɨanaka nɔgbɛ. Kʉdɔ, ɔ꞉mɨsɨnganɨa, nɔ, ɔ꞉muɓokuo ɓɔ: «Ʉpanʉ ngʉwɔ pɛɨ amati ɔ mapanʉ maɓomu, wa ʉwɔkanɨ?» 29Yeso ɔ꞉mutosio ɓɔ: «Amati ɔ mapanʉ maɓomu, ʉwa wɔ pɛɨ wa ɓɔ: ‹Ʉwɛ, Ɨsalaɛlɛ ʉka iɗo, Asɔɓɨɨ Makwɔɓɨɨ ngɨyeso, ɨyɔ nangana, a Makwɔɓɨɨ. 30Kʉɓanɨ, wa꞊kʉnda Asɔɓɨɨ, Makwɔɓɨɨ ngɨasɔɔ nɔ ipumo yɔ mʉtɨma ngɨyɛsɔɔ iɓomu, nɔ mʉtɨma ngʉwɔsɔɔ uɓomu, nɔ nɨmbɨmbɨanaka ngɨyɛsɔɔ iɓomu, nɔ angu ngɨasɔɔ ku muɓomu.› 31Ʉpanʉ ngʉwɔ ɓepini wa ɓɔ: ‹Kʉnda mangɛ kʉndʉ wakʉndana ʉwɛ makwɔngɔ.› Ʉpanʉ ngawɔmɔ wɔta ʉja achana mapanʉ ngʉkɔnanɨ, wangɔmʉ.» 32Mʉpananakɨa wɔ mapanʉ ɔ꞉musigio ɓata ɓɔ: «Iii, Mʉpananakɨa, ya ingono, ndʉ ananɨ wɔ꞉sugo-ɔɔ: ‹Asɔɓɨɨ, a ɨyɔ ta nangana, nɔ, ɔmɔ ndʉ ɨyɔ, angɔmʉ. 33Nɔ, yɔkwananɔ mombi akʉnda Asɔɓɨɨ, nɔ ipumo yɔ mʉtɨma ngɨangɔ iɓomu, nɔ itungwiyo ngɨangɔ iɓomu, nɔ angu ngɨangɔ muɓomu. Nɔ, yɔkwananɔ kʉ kʉnda mangɛ kʉndʉ ʉwɛ, makwɔngɔ.› Yaka ngɨyɛnɛnɨ, yanɔ dada nɔgbɛ akɔchana ninjo ɓapɛpɛ nɔ migbo yɔ mitebii iɓomu.» 34Ɨyɛ ndʉ Yeso ɛ꞉na ɓɔ ɔ꞉tosio nɔ nɨmbɨmbɨanaka, ga ɨyɔ nayɔ ɓɔ: «Ʉwɛ, wangɔmʉ ɗu nɔ Ɓʉngama ngʉɓa Asɔɓɨɨ.» Mbise ngɨananɨ, mombi pɔ mʉngana a꞉kanio tii ɓata pɔ nayɔ aɓokuo yaka.

Yeso a-sɨ mwana anɨ

35Ngbinga ngɨa Yeso a꞉ɓio-ɔɔ apanɨa amati ɔ ɨkáá yɔ Asɔɓɨɨ, ɔ꞉ɓokiso ɓombi ɓɔ: «Ɓapananakɨa ɓɔ mapanʉ ɓa dɔ tɨa asugo ɓɔ, Klisito a꞉chwɛa akɔ ɨfananja ngɨyɔ ngama Dawidi, dɔtanɨ? 36Dawidi ɨyɔ makwɔngɔ, ɨngbaa akɔ Mʉtɨma wɔta Tu, a꞉sugo ɓɔ:

‹Makwɔɓɨɨ a꞉sigio Makwasɛmɨ ɓɔ:

Uwolo akɔ ɨkɔndɔ yɔ guɔngɔ ngɨyɛsɛmɨ,

akɔɓɔya aka nanapɨa-ɔɔ ɓamʉyaa ngʉɓɔsɔɔ,

aɓio ɨda yɔ napɨa mɨtɨndɨ ngɨyɛsɔɔ.›#popoko Mmb 110:1

37Dawidi ɨyɔ makwɔngɔ, anayɔ anisoko ɓɔ ‹Makwɔɓɨɨ›. Masia a dɔ-sɨ tɨa mwana angɔ, nɔ ɨngbaa nga yeno tanɨ?»

Mʉkɔmbʉ ngʉwɔ ɓapananakɨa

Ambaja ɔ ɓombi ata mʉja, a꞉ɓio anʉka Yeso nɔ mʉsasa. 38Amati ɔ mapanʉ ngʉkangɔ, Yeso a꞉sigio ɓombi ɓɔ: «Pɛmanɨeni nɔ ɓapananakɨa ɓɔ mapanʉ. Ɨɓɔ, ɓakʉnda kyɛndanaka nɔ lɨpʉkʉ lɛta lɨta lɨta ɓɔ yuu yuu, ɨlɛ lɔ ʉbɨba, nɔ, ɓɔkʉnda ɓɔ ɓombi ɓɨɓuɓokuo nɔ ʉbɨba alɨda lɔ nujonokio. 39Nɔ, ɓɔhata wolo ta apɛɨ amati ɔ ɨkáá yɔ nɨta, nɔ akɔ lɨda lɔ mambɔ, ɓɔhata kʉ mawolo kɔ ʉbɨba. 40Ɓahɨnɨa ɓawoko lɨkyɛmʉ ta hɨnɨa, nɔ, ɓɔgbaliso nɨta ɓɔ ndɨɨ, dɔ, ɓombi ɓɨɓɨna ɨnanɨ. Ɓa꞊kio sina mʉkɔmbʉ ngʉwɔ ɓague ngʉɓɔnanɨ, ɓʉkaɨ nɔgbɛ.»

Woko enjo apɛpɛ

41Kʉdɔ, Yeso ɔ꞉tɔwolo ta tinene nɔ ikpoko ngɨyɛ ɓombi ɓa꞉ɓio-ɛɛ amayaka apɛpɛ. Ɛ꞉na aka ɓa꞉ɓio-ɔɔ aninjo. Ɓombi ɓɔ lɨkyɛmʉ ɓaja ɓe꞉njo ɓagyɛgyɛ kʉ ɓaja. 42Ɔ꞉tɛna tɨa kʉ nɔ ajanga woko, ɨya, a꞉maya ɓana ɓɔ ɓagyɛgyɛ ɓapɨnɨ, ʉɓa, ɓɔta bele bele. 43Ɨyɛ Yeso e꞉soko ɓakpata ngʉɓangɔ, ɔ꞉ɓusigio ɓɔ: «Ta ingono, nanenu asigio ɓɔ, ajanga woko ngɨakɛ, e꞉njo ɓagyɛgyɛ ɓaja nɔgbɛ akɔchana ɓombi ɓaɓomu ngʉɓa ɓɔ꞉mayɔ ɨkyɛmʉ aikpoko aka. 44Dɔ, ɓombi ngʉɓa ɓɔmɔ, ɓe꞉njo ta ɓagyɛgyɛ ngʉɓa ɓangɔkɨa suo naɓɔ nɔ ɨjangɨa. Yakamɛngana, ɨyɔ, amati ɔ angɨɔ ngɨangɔ, e꞉njo ɓagyɛgyɛ ɓaɓomu ngʉɓa ɔ꞉ɓio naɓɔ akɔ uɓei ngʉwangɔ.»

Currently Selected:

Malɨkɔ 12: buuN

Highlight

Copy

Compare