Matayɔ 9
9
Yeso ɔheiso jikɛsɨ
(Mlk 2:1-12; Luk 5:17-26)
1Mbise ɔngɔ, Yeso ɔ꞉ɗeto amati ɔ ɨngbɔɔ, nɔ, ɔ꞉tapʉa amondu ɔ ipuu yɛta ɨja. Kʉdɔ, ɔ꞉tɔɓɔya tɨa agʉlʉ ngɨa andaɓʉ. 2Ɓɔ꞉mɨkɨa nɔ jɨkɛsɨ mʉngana ɓakwaise akʉʉ ɔ kalagba. Ndʉ Yeso ɛ꞉na báya ngɨyeɓo, ga ɨyɔ nɔ jikɛsɨ ɓɔ: «Ɛɛ, mwana asɛmɨ! Fana mʉtɨma! Ɓʉɓɨɓɨ ngʉɓɔsɔɔ ɓɛpaanakɨɔ ɨpaanakɨanɨ.»
3Kʉdɔ, nganangana ɔ ɓapananakɨa ɓɔ mapanʉ, ɓɔ꞉pʉnga yakanaka ati eɓo, ɓɔ: «Mombi ngɨa, akɔsɛaka Asɔɓɨɨ!»
4Yakamɛngana, yaka ngɨyɛ ɨɓɔ, ɓa꞉tunguo amati ɔ mɨtɨma, Yeso ɛmbɨa ta ɨmbɨanɨ. Kʉdɔ, ɔ꞉ɓuɓokuo ɓɔ: «Nánɔ itungwio yɛta ɓɨɓɨ ɓanɨ, dɔtanɨ? 5Ɨmanɨ dɔ-sɨ, ya siasia, ga pɔ asugo ɓɔ: ‹Ɓʉɓɨɓɨ ngʉɓɔsɔɔ ɓɛpaanakɨɔ ɨpaanakɨanɨ›, ga pɔ ɓɔ: ‹Ɨmaa, nɔ, kyɛndaka?› 6Ɨmbɨeni dɔ iɗo ɓɔ, Mwana ngɨyɔ Mombi, anɔ ʉpanʉ wɔ nɨpaakɨa ɓʉɓɨɓɨ amati ɔ dɔdɔ ngɨa.» Kʉdɔ, ga Yeso, nɔ jɨkɛsɨ ɓɔ: «Ʉwɛ, ɨmaa! Sɨka kalagba ngɨasɔɔ, nɔ, wɔtɔa andɔɔ andei!» 7Mombi ngɨananɨ, ɔ꞉ngwa ɨkʉʉ ga ɗasa, nɔ, ɔ꞉sa yangɔ andei.
8Angbinga ngɨa ambaja ɔ ɓombi, ɛ꞉na-ɔɔ yaka ngɨyɛnɛnɨ, ɓɔ꞉huo nɔ ʉɓá. Ɓɔ꞉bibiso Asɔɓɨɨ ngɨa e꞉njo ɨkananja yɔ angu ngɨananɨ akɔ ɓombi.
Yeso ɛsoko Matayɔ ɓɔ ɨmʉkpata
(Mlk 2:13-17; Luk 5:27-32)
9Kʉdɔ ɨyɔ, achana ta chana tɨa nɔpɛɨ ɓɔ, Yeso ɔ꞉tɛna ndɔmbɛ mʉngana, ino ɓɔ Matayɔ. Ɨyɔ Matayɔ, ɓawele aɨda yɔ lipisa manjanja. Ga ɨyɔ nayɔ ɓɔ: «Ha gue, anakpata!» Ɔ꞉ngwa ɨkʉʉ ga vanga, nɔ, ɔ꞉pʉnga nayɔ akpata!
10Mbise ɔngɔ, atɨ Yeso ɓɔ꞉sa adyakaka atɨ Matayɔ andei. Ɓandɔmbɛ ɓaja, ɨhɔ nɔ ɓombi ɓɔta ɓɨɓɨ, ɓa꞉kumonio kʉ inani, ɓɔ꞉wolo ɨhɔ nɔ atɨ Yeso, nɔ ɓakpata ngʉɓangɔ ga kyɛɛ. 11Ɨyɛ ndʉ Ɓafalisayɔ ɓɛ꞉na ɓanɨ, ga ɨɓɔ nɔ ɓakpata ngʉɓangɔ ɓɔ: «Mʉpananakɨa ngɨyeno, adyakaka ɨhɔ nɔ ɓandɔmbɛ ɓɔ lipisa manjanja nɔ ɓombi ɓɔta ɓɨɓɨ ngʉɓa, dɔtanɨ?»
12Ɨyɛ ndʉ Yeso ɔ꞉ka ɓanɨ, ga ɨyɔ naɓɔ ɓɔ: «Ɓombi ɓɔta ɓʉmʉɓʉmʉ, ɓangɔmʉ ɨɓɔ nɔ taa yɔ mʉnganga. Yakamɛngana, ta ɓombi ɓɔ ɓakaɓu, akɛ ɓanɔ taa yɔngɔ! 13Seni, apemiso ɨsɨ yɔ yaka ngɨyɛ Asɔɓɨɨ a꞉sugɔ-ɔɔ ɓɔ: ‹Ɨmɨ, nabaya nɔgbɛ mombi ngɨa ɛnɨa ɓangɛ ikoko, anagaaka ɨya, enjekio ɨyɔ ta mutebii.›#popoko Ɔsɛa 6:6 Dɔ ɨmɨ, nɛ꞉kamʉ anisoko ɓombi ngʉɓa, ɓa ɓasisekie apɛɨ ɔ Asɔɓɨɨ. Yakamɛngana, nɛ꞉ka anisoko ɓombi ɓɔta ɓɨɓɨ.»
Ɓakpata ngʉɓɔ Yɔanɨ ɓɔɓokuo Yeso akʉʉ ɔ taa idyo
(Mlk 2:18-22; Luk 5:33-39)
14Mbise ɔngɔ, ɓakpata ngʉɓɔ Yɔanɨ ɓɔ꞉mɨsɨnganɨa Yeso ga sɛɛ, ga ɨɓɔ nayɔ ɓɔ: «Isu nɔ Ɓafalisayɔ, takyɔtaa idyo akɔ angbinga taanɨ. Yakamɛngana, ɓakpata ngʉɓɔsɔɔ, ɓangɔkyɔtaamʉ ɨɓɔ idyo akɔ angbinga, dɔtanɨ?»
15Yeso ɔ꞉ɓutosio ɓɔ: «Yakwa tanɨ, ɓɔ ɓombi ngʉɓa ɓa꞉ɓisoko akɔ ʉmbɔ wɔ mʉsɨkana, ɓɨkumɔnio adidima, ati ngɨa ɓa-sɨ-ɔɔ ta ɨhɔ nɔ atɨ swaɨ ɔ moi? Ya꞊ɓio sina ɓisi mʉngana, ʉɓa, ɓa꞊ɓungusio-ɔɔ swaɨ ɔ moi, ambɔ kyɛnda ngɨyeɓo, ataa idyo akɔ angbinga tɨa ɨyɛnɛnɨ.
16Mombi pɔ mʉngana angɔkwananamʉ akutoko ɨnjanjaka yɔ ɨpʉkʉ, nɔ ɨɗaka ngɨyɛ ɨtakɨtakɨ. Dɔ, ɨɗaka ngɨyɛ ɨtakɨtakɨ, yanatʉa ɨnjanjaka yɔngɔ ta natʉa, nɔ ihoo yɛ꞊ka tɨa ɨja nɔgbɛ. 17Kʉndʉ, ɓangɔkwananamʉ nuto ʉkyɛpʉ wɔ ɨtakɨtakɨ amati ɔ lɨkɔchɔ#9:17 lɨkɔchɔ: pɔ ɓɔ ɓa꞉lɨkɨa nɔ mamba kɔ ɓanama lɛjɛnɛ, Dɔ, ɓɔkɨeni ɓanɨ, ʉkyɛpʉ ngʉwɔnanɨ, wanatʉa lɨkɔchɔ lɛjɛnɛ ngɨlɛnɛnɨ ta natʉa, nɔ, ʉkyɛpʉ wɔyabuo tɨa aɨsɨ. Nɔ, gʉtʉ ta lɨkɔchɔ ngɨlɛnɛnɨ, lɔyanaka ɨlɔ tɨa kʉ yanakanɨ. Ʉkyɛpʉ ngʉwɔ ɨtakɨtakɨ, wɔsisekio ɨwɔ anuto ta amati ɔ lɨkɔchɔ lɔ ɨtakɨtakɨ. Kʉɓanɨ, ɓayaka ɓapɨnɨ ngʉɓɔnanɨ, ɓaɓomu ɓɛka dɔ ɓaɗo!»
Yeso ɔheiso moi nɔ ɔjʉkaniso mʉnda wɔ gwa ata moi
(Mlk 5:21-43; Luk 8:40-56)
18Ngbinga ngɨa Yeso a꞉ɓio-sɨ-ɔɔ naɓɔ ta anʉngakɨa yaka ngɨyɛnɛnɨ, ta ndʉ aka nasugo-ɔɔ aka, ngama mʉngana ɛ꞉ka agbʉkʉmɨa nɔ mau apɛɨ angɔ ga gbʉkʉ. Ga ɨyɔ ɓɔ: «Mwana ngɨasɛmɨ ata moi, ɔwo ta ɨtakɨtakɨ ngɨyɛ. Gʉtʉ ɓanɨ, ika ɓaka nayɔ anapɨa ɨkɔndɔ, dɔ, a꞊jʉkana ta jʉkananɨ.» 19Kʉdɔ, atɨ Yeso nɔ ɓakpata ngʉɓangɔ, ɓa꞉ngwɨa kyɛnda anɨsa akpata ngama ngɨananɨ.
20Ya꞉ɓio ananɨ kʉ nɔ moi mʉngana ɨya, a꞉ɓio jɛnɛ nɔ kaɓu ɔ chwɛa menike, amati ɔ mago tɛkɛɓɛ nɔ kapɨnɨ. Ɨyɔ, moi ngɨananɨ, ɛ꞉sɨngana ambise ɔ Yeso, nɔ, ɔ꞉muɓoto ambamba wɔ ɨpʉkʉ ngɨangɔ ga kpa. 21Dɔ, a꞉yakanaka amati angɔ ɓɔ: «Nɔɓoteni ta ɨpʉkʉ ngɨangɔ, na꞊hɛya ta hɛya!»
22Ndʉ a꞉mupoto ɓanɨ, Yeso ɔ꞉natana ga pɛɨ, ɔ꞉mɨna, ga ɨyɔ nayɔ ɓɔ: «Mwana asɛmɨ, fana mʉtɨma! Báya ngɨyɛsɔɔ yɔ꞉naheiso.» Ta gagaa ngɨananɨ, ɨyɔ moi ngɨananɨ, ɔ꞉hɛya ta hɛya.
23Ambise ɔngɔ, Yeso ɔ꞉tɔɓɔya tɨa, atɨ ngama ngɨananɨ. Inani, ɓana ɓɔ mbaa ɓa꞉ɓio anʉpa mbaa ɔ didima, ɨhɔ nɔ ambaja ɔ ɓombi ngaɓɔmɔ, amati ɔ gbongbo ɓɔ hooo.
24Ga Yeso nɔ ambaja ngɨananɨ ɓɔ: «Inu, chwɛeni aɓei! Gwa ata moi ngɨa, angɔwokɔmʉ! Ɔkwaɔ ta tɔɔ!» Ɨyɛ ndʉ ɓombi ɓɔ꞉ka ɓanɨ, ɓɔ꞉pʉnga nayɔ ta nononoko. 25Kʉdɔ, ɓa꞉chwɛa ɓaɓomu aɓei, nɔ, ɔ꞉kumonio inani ambɛnɨ ga ngbuu. Ɔ꞉mupoto gwa ata moi ngɨananɨ ɨkɔndɔ ga kpa. Ta gagaa ngɨananɨ, gwa ata moi ɔ꞉jʉkana, nɔ, ɔ꞉ngwa ɨkʉʉ ga ɗasa.
26Ɨsaʉ yɔngɔ, yɔ꞉kyɛnda amati ɨkʉmbʉ ngɨyɛnɛnɨ ta iɓomu.
Yeso ɔheiso ɓombi ɓɔ mamɔmɔ ɓapɨnɨ
27Yeso a꞉ngwɨa kyɛnda, nɔ, ɔ꞉sa. Ɓombi ɓɔ mamɔmɔ ɓapɨnɨ, ɓɔ꞉pʉnga nayɔ akpata ambise, nɔ, nachokoo ɓɔ: «Hii! Mwana ɔ Dawidi! Atɨnɨa ɓaka ikoko!»
28Ndʉ Yeso a꞉ɓɔya andei, ɓombi ɓɔ mamɔmɔ ngʉɓɔnanɨ, ɓɔ꞉mɨsɨnganɨa. Kʉdɔ, Yeso a꞉ɓio naɓɔ ɓɔ: «Inu, ná ndɨ nɔ báya ta ingono ɓɔ, ɨmɨ, nakwanana nenu aheiso?» Ga ɨɓɔ ɓɔ: «Iii Makwɔɓɨɨ! Tanɔ báya!»
29Ta gagaa ngɨananɨ, Yeso ɔ꞉ɓʉnapɨa lɨkɔndɔ akɔ mesu, nɔ ɔ꞉ɓusigio ɓɔ: «Yɨkyananakɨa ngbanga ta nɔ báya ngɨyeno.» 30Gbɛgbɛ ta ananɨ, mesu ngʉkeɓo kɔgananakɨa.
Ga Yeso naɓɔ ɓɔ: «Kpɔ, kpɔ, kpɔ, nátɨɓɨamʉ mombi pɔ mʉngana yaka ngɨyɛnɛnɨ!» 31Yakamɛngana, ɨyɛ ta ɓa꞉ngwa ananɨ, ɓɔ꞉pʉnga ɓɨakɨa ɨsaʉ yɔ Yeso, amati ɔ ɨkʉmbʉ tɨta iɓomu.
Yeso ɔheiso ijangi
32Ɨyɛ ndʉ ɓombi ɓapɨnɨ ngʉɓɔnanɨ Yeso a꞉ɓʉheiso, ɓa꞉ɓio tɨa anɨsa, ɓɔ꞉tɔmɨkɨa ɓata Yeso kʉ nɔ mombi mʉngana ngɨa mʉtɨma wɔ idu wa꞉mʉkiiso aɓio tɨa ndʉ ijangi. 33Yeso ɔ꞉muchweiso mʉtɨma wɔ idu, kʉdɔ, ijangi ngɨyɛnɛnɨ, yɔ꞉pʉnga ɓata ayaka.
Yaka ngɨyɛnɛnɨ, yɔ꞉kyaka ɓombi ɓaɓomu ta kyaka, ga ɨɓɔ ɓɔ: «Ta꞉ngɛnamʉ sina ɨkananja yɔ yaka ndʉ ɨyayɛ, aka anɔ Ɨsalaɛlɛ aka!»
34Yakamɛngana, ga Ɓafalisayɔ ta ɓɔ: «Akɔchweiso mɨtɨma yɔ madu, nɔ angu ɔ ngama ɔ madu.»
Ɓombi ɓɔ tɛa ɓa bele
35Yeso a꞉chanaka amati ɔ ɓagʉlʉ ɓaɓomu, nɔ lɨkʉmbʉ lɛta bele bele liɓomu. Lɨda liɓomu aki a꞉chanaka-ɛɛ, e꞉njo ʉpanʉ amati ɔ lɨkáá lɔ nɨta ngɨlɔ Ɓayuda, akɔɓɨakɨa ɓombi Ɨsaʉ yɛta Iɗo yɔ Ɓʉngama ngʉɓa akʉʉ ɔ ɓisi. A꞉heiso migbo yɔ ɓakaɓu ta iɓomu, nɔ ɓombi ɓɔ majangi ɓaɓomu.
36Nɔ, angbinga ngɨa ɛ꞉na-ɔɔ ɓambaja ɓɔ ɓombi, ɔ꞉ɓɨnɨa ta ikoko, dɔ, ɓa꞉ɓio ɓabɔmbanɛ, sɔkɔmʉ ɓata nɔ angu kʉɓanɨ. Ɓa꞉ɓio ngbanga ndʉ ɓakɔndɔlɔ ngʉɓa ɓangɔmʉ nɔ mʉpɛmakɨa.
37Kʉdɔ ga ɨyɔ, nɔ ɓakpata ɓɔ: «Masɔɔ ka maja akʉbaa. Yakamɛngana, ɓombi ɓɔ tɛa ɓa bele. 38Mɨteni Asɔɓɨɨ Mamʉkwɔ kʉbaa ɓɔ, ɨtʉma ɓata ɓombi ɓɔ tɛa ngaɓɔmɔ ɓaja, amati ɔ kʉbaa ngɨangɔ.»
Currently Selected:
Matayɔ 9: buuN
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc.
