Matayɔ 8
8
Yeso ɔheiso keɓukeɓu
(Mlk 1:40-45; Luk 5:12-16)
1Angbinga ngɨa Yeso a꞉jo-ɔɔ aɨkpangba, ga ambaja ɔ ɓombi ata mʉja ambise angɔ ɓɔ hooo.
2Keɓukeɓu mʉngana ɓɔ, ɔ꞉tɔmʉchwɛanɨa. Ɔ꞉gbʉkʉmɨa apɛɨ angɔ, ga ɨyɔ nayɔ ɓɔ: «Hii Makwɔɓɨɨ, wɔkʉndeni, anagyaɓaka ɓaka kaɓu ngɨa gyaɓakanɨ#8:2 gyaɓakanɨ: ɨsɨ yɔngɔ ɓɔ mombi ɔ꞉heyeni jɛnɛ kaɓu ɔ keɓukeɓu, ɓʉɓɨɓɨ ngʉɓangɔ ɓɛ꞉paanakɨɔ tɨa kʉ ɨpaanakɨanɨ.»
3Yeso ɔ꞉yomo ɨkɔndɔ, nɔ, ɔ꞉mʉɓoto. Ɔ꞉musigio ɓɔ: «Ii, nɔbayɔ bayanɨ, gyaɓanakɨa!» Ta gagaa ngɨananɨ, ɔ꞉gyaɓakakɨa keɓukeɓu ga pwɛ.
4Yeso ɔ꞉musigio ɨyɔ mombi ngɨananɨ ɓɔ: «Kpɔ, kpɔ, kpɔ, watɨɓɨamʉ mombi pɔ mʉngana yaka ngɨyɛnɛnɨ! Yakamɛngana, sa apanana apɛɨ ɔ kumukumu. Nɔ, wenjo mutebii ngbanga ndʉ mapanʉ kɔ Musa ka꞉sugo. Ɨyɛnɛnɨ, ya꞉pananiso ɓɔ wɔhɛyɔ hɛyanɨ#8:4 hɛyanɨ: ɓɔ dɔ mombi ɔheyeni jɛnɛ keɓukeɓu tɨa hɛyanɨ, aɓio anɨsa panana atɨ ɓakumukumu ɓɔ ɔhɛyɔ tɨa hɛyanɨ, dɔ ɓɨmʉsɨa ɓata ajonokio nɔ ɓangɛ, popoko Ɓlw 13:45-46; 14:1-31.»
Báya ngɨyɔ ngama ɔ ɓasʉda
(Luk 7:1-10)
5Angbinga ngɨa Yeso a꞉kumonio-ɔɔ amati ɔ gʉlʉ ɔ Kapalanaumu, ngama ɔ ɓasʉda mʉngana ɔ Ɓalɔma, ɔ꞉mɨsɨnganɨa, nɔ, ɔ꞉mɨta ɓɔ ɨmʉsalɨa ɓaka. 6Ga ɨyɔ nayɔ ɓɔ: «Hii Makwɔɓɨɨ! Mombi ɔ tɛa ngɨasɛmɨ anɔ kaɓu ɓʉkaɨ, ndʉtʉ ya꞉muwo pɔngɔ, nɔ, a ta ɓakwaɛ ambɛnɨ ɓɔ kpru, nɔ, nɨdya ikoko nɔgbɛ.»
7Yeso ɔ꞉mutosio ɓɔ: «Na꞊nɨsa nayɔ aheiso.»
8Yakamɛngana, ɨyɔ ngama ngɨananɨ, ɔ꞉musigio ɓɔ: «Haa, Makwɔɓɨɨ! Ɨmɨ-sɨ ndʉ anɨ, ʉwɛ, akumonio aɨkáá ngɨyɛsɛmɨ? Sugo pɨ ta yaka mɛngana, ambɔ baya ngɨasɛmɨ ɨhɛya. 9Andɔ-sɨ ɨmɨ, na kʉ aɨsɨ ɔ ʉpanʉ wɔ ɓatataɓasie. Nɔ, na kʉ nɔ ɓasʉda ngʉɓa ɓa aɨsɨ asɛmɨ. Nɔsigieni mʉngana ɓɔ: ‹Sa!› Kʉ gagaa ngɨananɨ, ɔsa. Nɔ, nɔsigieni wɔmo ɓɔ: ‹Ika aka!› Kʉ gagaa ngɨananɨ, ɛka. Nɔ kʉndʉ baya ngɨasɛmɨ, nɔmusigieni ɓɔ kɨa ɓɔ, akɨa kʉndʉ ananɨ.»
10Ɨyɛ ndʉ Yeso ɔ꞉ka yaka ngɨyɛnɛnɨ, yɔmʉkyaka nɔgbɛ. Ga ɨyɔ nɔ ɓombi ngʉɓa ɓa꞉ɓio nayɔ akpata ɓɔ: «Nanenu asigio ɓɔ, amati ɔ Ɓaɨsalaɛlɛ ɓaɓomu, nangɛnamʉ sina mombi ɔ báya yɛta ɨja ngbanga ndʉ ɨyakɛ!
11Ta ingono nanenu asigio ɓɔ, ɓombi ɓaja ɓɛ꞊ka sina anɨngwa alindu lɔ dɔdɔ mabɔbɔ ta maɓomu, akɔ kumonio amati ɔ Ɓʉngama ngʉɓɔ akʉʉ ɔ ɓisi. Ɓɛ꞊ka sina adyakaka, ɨhɔ nɔ atɨ Abalaama, nɔ Isaka, nɔ Yakɔɓɔ. 12Yakamɛngana, ɓombi ngʉɓa ɓɔ꞉kwananɔ jɛnɛ akumonio aƁʉngama ngʉɓɔnanɨ, ɨɓɔ, ɓa꞊ɓugiso sina tɨa aɓei, amati ɔ umomo wɔta ʉja nɔgbɛ. Inani, ya꞊ɓio nɔ ndɨa nɔ dyana menu.»
13Ambise ɔngɔ, Yeso ɔ꞉musigio ɨyɔ ngama ngɨananɨ ɓɔ: «Sa! Yɨkyananakɨa, ta ngbanga nɔ báya ngɨyɛsɔɔ.» Ta akɔ angbinga ngɨananɨ, mombi ngɨananɨ angɔ, ɔ꞉hɛa ta hɛa.
Yeso ɔheiso ɓombi ɓɔ ɓakaɓu ɓaja
(Mlk 1:29-34; Luk 4:38-41)
14Ɨyɛ, Yeso a꞉kumonio amati ɔ ɨkáá ngɨyɔ Pɛtɛlɔ, ɔ꞉tɔgbʉka ndʉtʉ yɔgbʉndanieni inyenguu ɔ Pɛtɛlɔ nɔ kaɓu, ɨyɔ, tɨta ɓakwaɛ. 15Kʉdɔ, a꞉muɓoto ɨkɔndɔ, nɔ ta gagaa ngɨananɨ, ndʉtʉ yɔ꞉mʉkataka. Kʉdɔ, moi ngɨananɨ, ɔ꞉ngwa ɨkʉʉ, nɔ, ɔ꞉pʉnga nayɔ akyananakɨa.
16Tɨa nɛpasɨ yɔngɔ, ɓɔ꞉mɨkɨa Yeso nɔ ɓombi ɓɔ mɨtɨma yɔ madu ɓaja. Yeso a꞉chweiso madu ngʉkɔnanɨ, ta nɔ yaka yɛta isuge ɓʉtʉʉ. Nɔ, ɔ꞉heiso kʉ nɔ ɓombi ɓɔ ɓakaɓu ɓaɓomu. 17Ya꞉kyananakɨa ɓanɨ, akpatanakɨa nɔ yaka ngɨyɛ ɨgbɛ Isaya a꞉sugo jɛnɛ, ɓɔ: «Ɨyɔ, a꞉sɨka majangi ngʉkeso, nɔ, ɔ꞉tʉmba kʉ nɔ ɓakaɓu#popoko Isa 53:4 ngʉɓeso.»
Yeso ayakanaka nɔ ɓombi ngʉɓa ɓabaya nayɔ akpata
(Luk 9:57-62)
18Angbinga ngɨa Yeso ɛ꞉na-ɔɔ ɓɔ ɓombi ɓaja ɓɔ꞉mukunguo ɓɔ kuu, ɔ꞉titio ɓakpata ngʉɓangɔ ɓɔ, ɓɨtapʉa amondu ɔ ipuu yɛta ɨja. 19Ananɨ, mʉpananakɨa mʉngana wɔ mapanʉ, wɔ꞉mɨsɨnganɨa Yeso ga sɛɛ, ɔ꞉musigio ɓɔ: «Mʉpananakɨa, ɨmɨ, na꞊nakpa ɨda iɓomu aki wabi-ɛɛ.»
20Yeso ɔ꞉mutosio ɓɔ: «Ɓakakaa, ɓanɔ mafʉkʉ. Nɔ ɓanoi akʉʉ ɓisi, ɓa kʉ nɔ lɨkáá. Yakamɛngana, Mwana ngɨyɔ Mombi, angɔmʉ ɨyɔ gʉtʉ pɔ nɔ ɨda ngɨyɛ, ahomwono-ɔɔ!»
21Mbise ɔngɔ, ga mʉkpata ngawɔmɔ nayɔ ɓɔ: «Hii Makwɔɓɨɨ! Anasɨa ɓaka-sɨ nɨsa ahʉna aba.»
22Yeso ɔ꞉mutosio ɓɔ: «Sɨa mɨnda akɔhʉna ɓaɓwa ɓeɓo mɨnda. Ʉwɛ ingainga, anakpata!»
Yeso ɔdʉdiso mahuo kɔta ɓʉmʉ
(Mlk 4:35-41; Luk 8:22-25)
23Kʉdɔ, Yeso ɔ꞉ɗeto amati ɔ ɨngbɔɔ. Nɔ, ɓakpata ngʉɓangɔ ɓɔ꞉sa nayɔ akpata kʉ inani amati.
24Tɨa angbinga ngɨa ɓa꞉ɓio-ɔɔ anɨsa amati ɔ ipuu yɛta ɨja, ndʉ aka nachwa-ɔɔ aka, mahuo kɔta ɓʉmʉ nɔgbɛ kɔ꞉pʉnga huo. Ɨngbɔɔ yɔ꞉mwaka mipo, yakamɛngana, Yeso ta atɔɔ ɓɔ gbɛ.
25Kʉdɔ, ɓakpata ɓɛ꞉ka nayɔ ajʉkaniso. Ɓɔ꞉musigio ɓɔ: «Hii Makwɔɓɨɨ! Atɨheiso ɓaka, tɔ꞊manɔ adʉka!»
26Ga ɨyɔ naɓɔ ɓɔ: «Ʉɓá wɛmanɨ-sɨ, wanenu akɨa ɓanɨ? Ɓombi ɓɔ báya yɛta bele ngʉɓa!» Ambise ɔngɔ, ɔ꞉ngwa ɨkʉʉ, nɔ, ɔ꞉nyakɨa mahuo ɨhɔ nɔ ipuu kʉtaa, ga ʉmʉa ta ɓɔ nyɛ.
27Ɨɓɔ, ɓague ngʉɓɔnanɨ, yɔ꞉ɓʉmbangɨa nɔgbɛ. Ga ɨɓɔ ɓɔ: «Mombi nga ino tanɨ ɨyakɛ? Gʉtʉ mahuo kɔta ɓʉmʉ, nɔ ipuu, yamʉka kʉ kanɨ!»
Yeso ɔheiso ɓombi ɓɔ mɨtɨma yɔ madu ɓapɨnɨ
(Mlk 5:1-20; Luk 8:26-39)
28Angbinga ngɨa Yeso a꞉tapʉa-ɔɔ amondu ɔ ipuu yɛta ɨja, tɨa inani aɨkʉmbʉ yɔ Ɓagɛlasɛ, ɔ꞉tɔjono nɔ ɓombi ɓapɨnɨ, ɓɔhueni nɔ mɨtɨma yɔ madu. Ɨɓɔ, ɓombi ngʉɓɔnanɨ, ɓa꞉ngwa amanjaʉ#8:28 amanjaʉ: inani, ɓa꞉tɨhʉna mɨnda amati ɔ lihoo lɔ makopi, ɓɔ꞉lɨtambanakeni liɗo. Ɓa꞉ɓio ɓʉkaɓʉkaɨ nɔgbɛ, nɔ mombi pɔ mʉngana, a꞉ngɔɓikaniomʉ ɓata achana ɨngbaa inani pɔ chana.
29Ɨɓɔ, ɓombi ɓɔ mɨtɨma yɔ madu ngʉɓɔnanɨ, ɓɔ꞉pʉnga natɨa nɔ iso yɛta ɓʉmʉ ɓɔ: «Hii Mwana wɔ Asɔɓɨɨ! Ɨyeso nenu yɔkwɔ-sɨ tanɨ? Wɛ꞉kɔ ndɨ nesu akyananaka tɨa apɛɨ ɓɔ?»
30Ɨnadɔ, mutunduga wɔ ɓanɛmbʉ wɔta ʉja, wa꞉ɓio adyakanaka tinetine kʉ ananɨ. 31Kʉdɔ, mɨtɨma yɔ madu ngʉkɔnanɨ kɔ꞉mukikelekio Yeso asugo ɓɔ: «Kikiliki, wɔɓieni nesu achweiso, atɨtʉma ɓaka ta amati ɔ ɓanɛmbʉ ngʉɓa.»
32Ga ɨyɔ naɓɔ ɓɔ: «Seni gɔ!» Kʉɓanɨ, mɨtɨma yɔ madu yɔ꞉chwɛa amati ɔ ɓombi ngʉɓɔnanɨ, nɔ, yɔ꞉sa akumonio amati ɔ ɓanɛmbʉ. Ta gagaa ngɨananɨ, mutunduga wɔ ɓanɛmbʉ uɓomu, wɔ꞉ngwa inani ɓa꞉ɓio-ɛɛ akʉʉ ɔ kpuma, wɔ꞉sa adʉka amipo kɔ ipuu ga bʉʉ.
33Angbinga ngɨa ɓapɛmakɨa ɓɔ ɓanɛmbʉ ɓɛ꞉na-ɔɔ ɓanɨ, ɓɔ꞉tʉgbʉa bangʉ, anɨsa aɓɨakɨa ɓombi ɓaɓomu agʉlʉ, yaka ngɨyɛ Yeso a꞉kɨa ɓombi ɓɔ mɨtɨma yɔ madu.
34Ɓombi ɓɔ gʉlʉ ɓaɓomu, ɓɔ꞉sa agbʉka Yeso. Nɔ, ɨyɛ ndʉ ɓa꞉mɨna, ɓɔ꞉mukikelekio ɓɔ ɨɓʉngwɨa ɓaka ɨɓɔ ananɨ andaɓʉ ʉngwɨanɨ.
Currently Selected:
Matayɔ 8: buuN
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc.
