Matayɔ 4

Abɨɨ ɔkanio Yeso

(Mlk 1:12-13; Luk 4:1-13)

1Ambise ɔngɔ, Mʉtɨma wɔta Tu ngʉwa Asɔɓɨɨ wɔ꞉mʉtʉma Yeso anɨsa amukengu, dɔ, abɨɨ ɨmʉkanio. 2Yeso a꞉taa idyo amati ɔ makwaa ɓatɛkɛɓɛ ɓɔgɨna, naɓutu, nɔ ɓisi ɓɔta ɓʉyɛ kʉtaa. Ambise ɔngɔ, ɔ꞉tɔkana dɔ tɨa taa.

3Kʉɓanɨ, abɨɨ ɔ꞉pʉnga nayɔ akanakio, nɔ ɔ꞉musigio ɓɔ: «Yɔɓieni-sɨ ɓɔ ʉwɛ, wa Mwana ɔ Asɔɓɨɨ, sigio-sɨ makopi ngʉka ɓɔ kɨnatakanaka mɨkatɨ.»

4Yeso ɔ꞉mutosio ɓɔ: «Amati ɔ Mabii kɔ ta Tu, ya꞉tɛndanakɨa ɓɔ: ‹Uɓei ngʉwɔ mombi, wangɔmʉ ta akɔ yaka yɔ idyo. Yakamɛngana, wa kʉɔ ɨngbaa akɔpɛmakɨa yaka iɓomu ngɨyɛ, yachwɛya amati ɔ monu kɔ Asɔɓɨɨ.›»#popoko Tngw 8:3

5Ambise ɔngɔ, abɨɨ ɔ꞉sa nɔ Yeso amati ɔ gʉlʉ ata Tu ngɨyɔ Yelusalɛma. Inani, ɔ꞉mimaiso aʉmʉa wɔta ikongo, akʉʉ ɔ ɨkáá yɔ Asɔɓɨɨ. 6Ga ɨyɔ nayɔ ɓɔ: «Yɔɓieni-sɨ ɓɔ, ʉwɛ, wa Mwana ɔ Asɔɓɨɨ ta nɔ ingono, bʉmbʉa nɔ wɔjo aɨsɨ. Dɔ, ya꞉tɛndanakɨa ɓɔ: ‹Asɔɓɨɨ, a꞊titio ɓamalaika ngʉɓangɔ ɓɔ ɓɨka nɔwɛ anɨfa, nɔ, ɓɔ꞊nasio alɨkɔndɔ ngɨleɓo, ambɔ, watɨgbʉsanamʉ akɔ ikopi.›»#popoko Mmb 91:11-12

7Ga Yeso nayɔ ɓɔ: «Ya꞉tɛndanakɨa ɓata kʉ ɓɔ: ‹Watɨkaniomʉ Asɔɓɨɨ Makwasɔɔ!›»#popoko Tngw 6:16

8Ambise ɔngɔ, abɨɨ ɔ꞉sa ɓata nayɔ, kʉ akʉʉ ɔ ɨkpangba yɛta ikongo nɔgbɛ. Ɔ꞉mʉpana ɓʉngama ɓuɓomu ɓɔ dɔdɔ, nɔ ʉbɨba wɔngɔ kʉtaa. 9Ɔ꞉musigio ɓɔ: «Ɨyɛnɛnɨ iɓomu, wɔgbʉkʉmɨeni nɔ mau apɛɨ asɛmɨ, nɛmɨ abibiso, na꞊nenjo ɨyɔ injoni.»

10Ga Yeso nayɔ ɓɔ: «Ʉwɛ Sɨtanɨ! Ʉngwa aka! Ya꞉tɛndanakɨa ɓɔ: ‹Mubibiso ta Asɔɓɨɨ Makwasɔɔ, nɔ, wɔmʉkyananakɨa kʉ ɨyɔ nangana.›#popoko Tngw 6:13»

11Kʉdɔ, abɨɨ a꞉mʉsɨa Yeso, nɔ, ɓamalaika ɓɛ꞉ka nayɔ akyananakɨa.

Yeso ɔpʉngɔ tɛa ngɨangɔ anɔ Galilaya

(Mlk 1:14-15; Luk 4:14-15)

12Angbinga ngɨa Yeso ɔ꞉ka-ɔɔ ɓɔ ɓɔ꞉mʉfɔ Yɔanɨ aboloko, kʉdɔ, ɔ꞉sa yangɔ anɔ Galilaya. 13Ɔ꞉tɔngwa anɔ Najalɛtɨ, ɔ꞉sa anuwolo tɨa anɔ Kapalanaumu, amutii wɔ ipuu ngɨyɔ Galilaya, aihoi yɔ Jabʉlɔnɨ nɔ Nafʉtalɨ. 14Ya꞉kyananakɨa ɓanɨ, akpatanakɨa nɔ yaka ngɨyɛ ɨgbɛ Isaya a꞉sugo jɛnɛ ɓɔ:

15«Ihoi yɔ Jabʉlɔnɨ, nɔ ɨyɔ Nafʉtalɨ,

nɔ ʉgbaa mesu anɔ ɨngbaa ngɨyɛ yasa aipuu yɛta ɨja, amondu ɔ Yɔlɔdanɨ,

amati ɔ Galilaya, ɨkʉmbʉ yɔ mababa kɔ ɓombi ngaɓɔmɔ.

16Ɓombi ngʉɓa, ɓa꞉ɓio amati umomo,

ɓɛ꞉na ʉwanga wɔta ʉja nɔgbɛ,

nɔ akʉʉ ɔ ɓombi ngʉɓa, ɓa꞉wolo inani amati ɔ ɨkʉmbʉ,

ʉɓa, ɓa꞉fanɨa amati ɔ igoɓi yɔ ingwo,

ʉwanga wɔta ʉja, wa꞉chwɛanɨa.»#popoko Isa 9:1-2

17Anɨngwa ta angbinga ngɨananɨ, Yeso ɔ꞉pʉnga ɓɨakɨa ɓombi ɓɔ: «Sieni ɓʉɓɨɓɨ ngʉɓeno! Dɔ, Ɓʉngama ngʉɓɔ akʉʉ ɔ ɓisi ɓa tɨa tinene.»

Yeso ɔpʉngɔ nɨchwa ɓakpata ngʉɓangɔ

(Mlk 1:16-20; Luk 5:1-11)

18Angbinga ngɨa Yeso a꞉ɓio-ɔɔ achana amutii wɔ ipuu yɔ Galilaya, ɛ꞉na ɓombi ɓɔ nɨfa sipe ɓapɨnɨ: atɨ Simoni (ɨya a ino kʉ ɓɔ Pɛtɛlɔ), nɔ manye Andɛlɛa. Ɨɓɔ, ɓaɓomu ɓapɨnɨ ɓa꞉ɓio anunoko mayia amati ɔ ipuu ngɨyɛnɛnɨ.

19Ga Yeso naɓɔ ɓɔ: «Anakpateni! Ɨmɨ, na꞊ninjo tɛa nɛmɨ ahatɨa tɨa ɓombi.» 20Ta gagaa ngɨananɨ, ɓɔ꞉sɨa mayia ngɨyeɓo, nɔ, ɓɔ꞉mʉkpata.

21Angbinga ngɨa Yeso ɛ꞉sɨnganaka-ɔɔ nɔ kyɛnda, ɔ꞉tɛna ɓata ɓombi ɓɔ nɨfa sipe ngaɓɔmɔ ɓapɨnɨ: atɨ Yakɔɓɔ, ɨɓɔ nɔ manye Yɔanɨ. Ɨɓɔ, ɓaɓomu ɓapɨnɨ ɓa꞉ɓio amati ɨngbɔɔ, ɨhɔ, nɔ atɨ ɨsɛ eɓo Jɛbɛdayɔ, ɨɓɔ, atambanaka mayia ngɨyeɓo. Kʉdɔ, Yeso a꞉ɓisoko. 22Ta gagaa ngɨananɨ, ɓɔ꞉sɨa ɨngbɔɔ, nɔ, ɓɔ꞉sɨa kʉ nɔ ɨsɛ eɓo, nɔ, ɓɔ꞉mʉkpata Yeso.

Yeso apanɨa ɓombi nɔ heiso ɓombi ɓɔ ɓakaɓu

(Luk 6:17-19)

23Yeso a꞉chanaka amati ɔ ihoi iɓomu yɔ Galilaya. A꞉ɓio akumonokio amati ɔ lɨkáá lɔ nɨta ngɨlɔ Ɓayuda, aɓɨakɨa ɓombi Ɨsaʉ yɛta Iɗo yɔ Ɓʉngama ngʉɓɔ akʉʉ ɔ ɓisi. Ɔ꞉ɓʉheiso kʉ nɔ migbo yɔ ɓakaɓu ta iɓomu, nɔ ɓombi ɓɔ majangi ɓaɓomu.

24Awɨa ngɨangɔ ɔ꞉sa amati ɨkʉmbʉ yɔ Silia iɓomu. Ɓɔ꞉mɨkɨa nɔ ɓombi ɓaɓomu ngʉɓa, ɓa꞉ɓio nɔ migbo yɔ ɓakaɓu di di di. Ati eɓo, ya꞉ɓio nɔ ʉɓa, ɓakaɓu ɓa꞉ɓʉbeluo tɨa nɔgbɛ. Ya꞉ɓio kʉ nɔ ɓombi ɓɔ mɨtɨma yɔ madu, nɔ lɨga, nɔ ʉɓa ndʉtʉ yaɓʉkpɔja. Ʉɓɔnanɨ ɓaɓomu, Yeso ɔ꞉ɓʉheiso ta heiso. 25Kʉɓanɨ, ɓambaja ɓɔ ɓombi ɓaja nɔgbɛ, ɓa꞉ɓio nayɔ akpataka, anɨngwa anɔ Galilaya, nɔ anɔ Dɛkapɔlɨ, nɔ anɔ Yelusalɛma, nɔ anɔ Yudɛa, nɔ amondu ɔ Yɔlɔdanɨ.

Currently Selected:

Matayɔ 4: buuN

Highlight

Copy

Compare