Matayɔ 26
26
Ɓakumukumu ɓɔsingekio idimi anɨwa Yeso
(Mlk 14:1-2; Luk 22:1-2; Yɔa 11:45-53)
1Angbinga ngɨa Yeso a꞉pipo-ɔɔ nʉnga yaka ngɨyɛnɛnɨ ɓɔ gba, ga ɨyɔ nɔ ɓakpata ngʉɓangɔ ɓɔ: 2«Nánɨmbɨa ɓɔ ambise ɔ makwaa kapɨnɨ, ta꞊ɓio nɔ Ʉmbɔ wɔ chwɛa aɓubaya, nɔ, Mwana ngɨyɔ Mombi ɓɔmanɔ nayɔ agaba, nɔ, nayɔ aɓakaka akʉʉ ɔ mʉsalaba.»
3Kʉdɔ, ɓakumukumu, nɔ ɓatataɓasie ngʉɓɔ Ɓayuda, ɓɔ꞉mɔmanakɨa amati ɔ ɨkáá yɛta ɨja ngɨyɔ Kayafa, ngama wɔ ɓakumukumu. 4Ɨɓɔ, ɓaɓomu, ɓa꞉kwaisio anɨfa Yeso aɓaɗi, nɔ, nayɔ anɨwa ta nɨwa. 5Ga ɨɓɔ ɓɔ: «Tatɨmʉfenimʉ akɔ ɓisi ɓɔ Ʉmbɔ wɔ chwɛa aɓubaya, dɔ, ɓombi ɓatɨsɨkanakɨamʉ.»
Moi ɔto Yeso nɔ malaji amʉtʉ
(Mlk 14:3-9; Yɔa 12:1-8)
6Ɓisi mʉngana, Yeso a꞉ɓio anɔ Bɛtania, atɨ mombi ɔ keɓukeɓu mʉngana ino ɓɔ Simoni. 7Tɨa angbinga ɔ dyakaka, ga moi mʉngana anambamba ɔ Yeso ga sɛɛ. A꞉mɨkɨa nɔ malaji wɔ ɨgabʉ ɓʉmʉ nɔgbɛ amati ɔ supa ta ɓɔ kyɛɛ. Supa ɔngɔ, ɓa꞉mutuo kʉ nɔ ikopi yɔ ɨgabʉ. Ga ɨyɔ nɔ Yeso malaji amʉtʉ ga fʉɔ fʉɔ. 8Ɨyɛ ndʉ ɓakpata ngʉɓangɔ ɓɛ꞉na yaka ngɨyɛnɛnɨ, mɨtɨma yɔ ɓʉkɨa ɓɨɓɨ nɔgbɛ. Ɓɔ꞉sugo ɓɔ: «Ɔyangiso-sɨ malaji ɓanɨ dɔtanɨ? 9Ambɔ ɓɔʉgabɔ pɨ ta gaba, nɔ ɨgabʉ yɛta ɓumu, nɔ ɓagyɛgyɛ ɓɔngɔ, ɓɔɓinjekio ɓajanga!»
10Yeso ɛ꞉mbɨa yaka ngɨyɛnɛnɨ ɓa꞉ɓio asugo ta ɨmbɨanɨ, ga ɨyɔ naɓɔ ɓɔ: «Nánidyiso moi ngɨa ikoko ɓanɨ dɔtanɨ? Ɨyɔ, ɔ꞉nakɨɔ ɨmɨ, ta yaka yɛta iɗo nɔgbɛ! 11Dɔ inu, nákɨa ɨhɔ nɔ ɓajanga masi ta maɓomu. Yakamɛngana, ɨmɨ, nangɔɓiomʉ ɨhɔ nenu masi maɓomu. 12Malasi ngʉwɔnanɨ, ɔ꞉nuto nawɔ anɔ ndʉtʉ ngɨyɛsɛmɨ, ya atambanaka hʉnanɨa ngɨyɛsɛmɨ. 13Yaɓanɨ, ɨmɨ, nanenu asigio ɓɔ akɔ lindu lɔ dɔdɔ liɓomu, aki ɓabiɓɨakɨa sina-ɛɛ Ɨsaʉ yɛta Iɗo, ɓa꞊ɓɨchwa uduɓa wɔ yaka ngɨyɛ moi ngɨa ɔ꞉kɨɔ kʉ chwanɨ, nayɔ atunguo.»
Yuda Ɨsɨkalɨɔta ɔmanɔ agaba Yeso
(Mlk 14:10-11; Luk 22:3-6)
14Kʉdɔ, Yuda Ɨsɨkalɨɔta, mʉngana ɔ ɓatitima tɛkɛɓɛ nɔ ɓapɨnɨ, ɔ꞉sa agbʉka ɓakumukumu. 15Ɔ꞉ɓuɓokuo ɓɔ: «Nánenjo ɨmanɨ, ɨmɨ, nɔnɨgabɨeni Yeso?» Ɓɔ꞉mupoyo ɓagyɛgyɛ ɓatɛkɛɓɛ ɓaatʉ, ɓɔ꞉minjo ga ja. 16Anɨngwa tɨta angbinga ngɨananɨ, Yuda ɔ꞉pʉnga ahata ɨngbaa ngɨyɛ a꞊ɓʉgabɨa nayɔ Yeso.
Atɨ Yeso ɓɔdyɔ idyo yɔ Ʉmbɔ wɔ chwɛa aɓubaya
(Mlk 14:12-26; Luk 22:7-23; Yɔa 13:21-30; 1Klt 11:23-25)
17Ya꞉ɓio ɓisi ɓɔ mʉpʉnganɨa wɔ ʉmbɔ, ngʉwɔ mɨkatɨ ngɨyɛ yangɔmʉ nɔ ɓʉtɨ ɓɔta ɓʉfʉise, ɓakpata ɓɛ꞉ka aɓokuo Yeso ɓɔ: «Wakʉnda ɓɔ tɨsa nɔwɛ akɔtambanakɨa idyo yɔ Ʉmbɔ wɔ chwɛa aɓubaya gbanɨ?»
18Ɔ꞉ɓutosio ɓɔ: «Seni inani agʉlʉ#26:18 agʉlʉ: ɨyɛnɛnɨ ya gʉlʉ wɔ Yelusalɛma, atɨ mombi mʉngana ɓɔ. Nɔ, nɔ́musigio ɓɔ: ‹Mʉpananakɨa ɔtɨtʉmɔ nɔwɛ asigio, ɓɔ: Angbinga ngɨasɛmɨ a tɨa tinene, nɔkwaisio anɨdya idyo yɔ Ʉmbɔ wɔ chwɛa aɓubaya andɔɔ aka, ɨhɔ nɔ ɓakpata ngʉɓɔsɛmɨ.›» 19Ɓakpata ɓɔ꞉kɨa ngbanga kʉndʉ aka Yeso a꞉ɓusigio-ɔɔ, kʉdɔ, ɓɔ꞉pʉnga ɨɓɔ tɨta tambanakɨa Ʉmbɔ wɔ chwɛa aɓubaya.
20Tɨa nɔ ɨpasɨ ɓɔ dʉʉ, Yeso ɔ꞉wolo adyakaka, ɨhɔ nɔ ɓatitima ngʉɓangɔ tɛkɛɓɛ nɔ ɓapɨnɨ. 21Angbinga ngɨa ɓa꞉ɓio-ɔɔ adyakaka, ga ɨyɔ naɓo ɓɔ: «Nanenu asigio ingono ɓɔ, mʉngana ati eno aka, anɨsa nɛmɨ agaba.» 22Yaka ngɨyɛnɛnɨ, yɔ꞉ɓudyiso ikoko nɔgbɛ. Ɓɔ꞉pʉnga nayɔ aɓokuo nangana nangana ɓɔ: «Ha Makwɔɓɨɨ! Ɨmɨ ndɨ?»
23Yeso ɔ꞉tɔsio ɓɔ: «Mombi ngɨa adyakaka ɨhɔ nɛmi, amati ɔ sanɨ mʉnga, ɨyɔ akɛ a꞊nagaba atɨ ɓamʉyaa. 24Ɨmɨ, Mwana ngɨyɔ Mombi nɔmanɔ aniwo, ngbanga ta ndʉ aka Mabii ka꞉tɛndanakɨa-ɔɔ akʉʉ asɛmɨ. Yakamɛngana, ikoko pɛpɛ dɔ akɔ mombi ngɨa anɛmɨ agaba! Ambɔ, mombi ngɨananɨ, a꞉tɨnɔtanɨamʉ gɔ jɛnɛ pɔ nɔtanɨa!»
25Ɨyɔ, Yuda ngɨa a꞉gaba Yeso, ɔ꞉muɓokuo ɓɔ: «Ha Mʉpananakɨa! Ɓɛ, ɨmɨ ndɨ?» Yeso ɔ꞉mutosio ɓɔ: «Ʉwɛ, makwɔngɔ akɛ, wɔsugo!»
Ndʉtʉ nɔ menike ngʉkɔ Yeso
26Angbinga ngɨa atɨ Yeso nɔ ɓakpata, ɓa꞉ɓio-ɔɔ tɨa adyakaka, ɔ꞉sɨka mʉkatɨ, nɔ, ɔ꞉tosio Asɔɓɨɨ ʉbɨba. Ɔ꞉ʉɓundo, nɔ, ɔ꞉ɓinjekio, ga ɨyɔ naɓɔ ɓɔ: «Sɨkeni nɔ dyeni, ɨyɛnɛnɨ ya ndʉtʉ ngɨyɛsɛmɨ.» 27Mbise ɔngɔ, ɔ꞉tɔsɨka tɨa ʉpata, nɔ, ɔ꞉bibiso ɓata Asɔɓɨɨ, nɔ, ɔ꞉tɔɓinjo, ga ɨyɔ naɓɔ ɓɔ: «Mweni ɓaɓomu! 28Dɔ ʉkyɛpʉ ngʉwa, wa menike ngʉkɔsɛmɨ, ʉka, ka꞊njɨlaka suo akʉʉ ɔ ɓombi ɓaja, dɔ, ɓʉɓɨɓɨ ngʉɓeɓo ɓɨpaanakɨa. Menike ngʉkɔnanɨ, ka mʉgbanga wɔ agɔmɛ ngɨa Asɔɓɨɨ. 29Nanenu asigio ɓɔ, anɨngwa ɨtakɨtakɨ ngɨyɛ, na꞊ngɔmwa sina ɓata ʉkyɛpʉ ngʉwa, akɔɓɔya ta akɔ ɓisi ngʉɓa, ta꞊mwa sina ɓata-ɔɔ ʉwɔ ɨtakɨtakɨ, ɨhɔ nenu, amati ɔ Ɓʉngama ngʉɓɔ Aba ngɨasɛmɨ.»
30Kʉdɔ, ɓɔ꞉sʉa ʉmbɔ#26:30 ʉmbɔ: Ɓayuda, angbinga ngɨa ɓa꞉ɓipipo-ɔɔ idyo yɔ Ʉmbɔ wɔ chwɛa akɔ ɓubaya, ɓɔ꞉sʉa Mambɔ, popoko Mmb 113—118 wɔ bibiso Asɔɓɨɨ. Mbise ɔngɔ, ɓɔ꞉chwɛa, nɔ ɓɔ꞉sa aɨkpangba yɔ Mijeituni.
Yeso ɔ꞉sugo ɓɔ Pɛtɛlɔ amʉtata
(Mlk 14:27-31; Luk 22:31-34; Yɔa 13:36-38)
31Inani, Yeso ɔ꞉ɓusigio ɨɓɔ ɓakpata ngʉɓangɔ ɓɔ: «Naɓutu ngɨyɔ ɓʉɓʉnʉ, nɔ́manɔ anɨkwa amati ɔ báya ngɨyeno ɓaɓomu akʉʉ asɛmɨ. Dɔ, ya꞉tɛndanakɨa, ɓɔ:
‹Na꞊wa mʉpɛmakɨa wɔ ɓakɔndɔlɔ.
Nɔ, mutunduga wɔ ɓakɔndɔlɔ, wɔ꞊panjaa.›#popoko Jak 13:7
32Gʉtʉ ɓanɨ, na꞊jʉkana akɔ ingwo ta jʉkananɨ, nɔ, nabi nenu aɓɛtaka tɨta anɔ Galilaya.»
33Ga Pɛtɛlɔ nayɔ ɓɔ: «Gʉtʉ báya ngɨyɛ ɓombi ngaɓɔmɔ ɓaɓomu yɔkweni akʉʉ asɔɔ, yakamɛngana, báya nga yɛsɛmɨ pɛpɛ ya꞊ngɔkwamʉ pɔ bele!»
34Yeso ɔ꞉mutosio ɓɔ: «Nanɔwɛ asigio ingono ɓɔ, naɓutu ngɨyɔ ɓʉɓʉnʉ, pɛɨ ngɨa gue ɔ kɔɓɔ anatɨa-ɔɔ, wa꞊natata machaa kaatʉ, ɓɔ wangɔnɛmbɨa.»
35Ga Pɛtɛlɔ nayɔ ɓɔ: «Gʉtʉ yɔɓieni ta ɓɔ ɨmɨ, niwo ɨhɔ nɔwɛ, pɛpɛ ɨmɨ nɔwɛ atata, fi fili fi!» Ɓakpata ngʉɓɔmɔ ɓaɓomu, ɓɔ꞉sugo ta ngbanga.
Yeso ɛtɔ Asɔɓɨɨ anɔ Gɛtɛsɛmanɨ
(Mlk 14:32-42; Luk 2:39-46)
36Atɨ Yeso, nɔ ɓakpata ngʉɓangɔ, ɓɔ꞉sa anɔ Gɛtɛsɛmanɨ. Angbinga ngɨa ɓa꞉ɓɔya-ɔɔ, ga ɨyɔ naɓɔ ɓɔ: «Uwolokeni-sɨ inu aka, nɨsa-sɨ ɨmɨ, anɨta Asɔɓɨɨ aki.» 37Ɔ꞉sɨka atɨ Pɛtɛlɔ, nɔ ɓana ɓɔ Jɛbɛdayɔ ɓapɨnɨ, anɨsa ɨhɔ nayɔ. Ɔ꞉pʉnga anɨdya ikoko nɔgbɛ, nɔ, mʉtɨma wɔ꞉mʉyangaa.
38Ga ɨyɔ naɓɔ ɓɔ: «Mʉtɨma wɔnasioko nɔ ikoko, tinene nɔ ingwo. Inu, tukueni tɨa aka, nɔ, ɓieni ta ɓaɓɨsɨnɨ, ɨhɔ nɛmɨ.»
39Ɛ꞉sɨngana mwana ɔngɔ nɔ pɛɨ bele, ɔ꞉kwa akɔɓɔya mesu ta aɨsɨ. Ɔ꞉pʉnga nɨta Asɔɓɨɨ, ɓɔ: «Hii Aba! Yɔbayanɨeni ɓaka, anangusio ʉpata wɔ ikoko ngʉwawɛ! Gʉtʉ ɓanɨ, watɨkɨamʉ ndʉ ɓʉkʉnda ɓɔsɛmɨ. Yakamɛngana, ɓʉkʉnda ɓɔsɔɔ ɓɨkyananakɨa.»
40Mbise ɔngɔ, Yeso ɔ꞉tɔa ananɨ ɓakpata ngʉɓangɔ ɓa꞉tukoo-ɔɔ. Ɔ꞉ɓʉgbʉka ta atɔɔ ɓɔ ɗɛsɛɛ. Ɔ꞉musigio Pɛtɛlɔ ɓɔ: «Ha inu, ɓague! Yɔnɨkyakɔ ndɨ aɓio ɓaɓɨsɨnɨ ɨhɔ nɛmɨ, gʉtʉ ta akɔ angbinga mʉngana? 41Ɓieni ta ɓaɓɨsɨnɨ, nɔ, anɨta Asɔɓɨɨ, dɔ, nátɨkumoniomʉ aikanio! Mʉtɨma wa ɨwɔ ta nɔ angu, yakamɛngana, ndʉtʉ yanɔ majɛjɛ.»
42Ɔ꞉ɓʉsɨa, nɔ, ɔ꞉sa ɓata kyɛnda ngɨyɔ ɓepini anɨta Asɔɓɨɨ ɓɔ: «Hii Aba! Yɛtanɨeni ɓɔ ʉpata wɔ ɓʉkaɓʉkaɨ ngʉwa watɨnangwɨamʉ, ɓɔ nɨʉmwa ta mwanɨ, sɨa ɓʉkʉnda ngʉɓɔsɔɔ akɨanɨa!»
43Ɔ꞉tɔa ɓata aki ɓakpata ɓa꞉ɓio-ɛɛ, nɔ, ɔ꞉ɓʉgbʉka ta atɔɔ, dɔ, mesu ka꞉ɓio naɓɔ tɨa ngbangii ngbangii nɔ tɔɔ. 44Kʉdɔ, ɔ꞉ɓʉsɨa, nɔ, ɔ꞉sa ɓata anɨta Asɔɓɨɨ kyɛnda ngɨyɔ ɓeetu. Nɔ, ɔ꞉toyo sugo yaka ta mɛnga.
45Mbise ɔngɔ, ɔ꞉tɔtɔa ɓata aki ɓakpata ɓa꞉ɓio-ɛɛ, ga ɨyɔ naɓɔ ɓɔ: «Eeɓee, ná ta amati ɔ tɔɔ, nɔ, nuhomuono! Angbinga ɛkɔ dɔ tɨa tineni-e! Ɨna, mwana ngɨyɔ mombi ɨyananɨ, ɓɔ꞉mʉgabɔ ɓanɨ alɨkɔndɔ lɔ ɓombi ɓɔta ɓɨɓɨ-e! 46Jʉkaneni, tɨseni! Ineni-sɨ, mombi ngɨa ɔ꞉nagabɔ ɨyakɛ, a tɨa tinene-a!»
Ɓɔfɔ Yeso
(Mlk 14:43-50; Luk 22:47-53; Yɔa 18:3-12)
47Angbinga ngɨa Yeso a꞉ɓio-ɔɔ-sɨ ta ayaka, ndʉ aka, Yuda, mʉngana ɔ ɓakpata tɛkɛɓɛ nɔ ɓapɨnɨ ngʉɓangɔ, ɔ꞉chwɛanɨa ga wɛɛ. Ɨyɔ, Yuda ɛ꞉ka ɨhɔ nɔ ɓombi ɓaja. Ɓa꞉ɓio nɔ mapi, nɔ mangbe alɨkɔndɔ. Ɓakumukumu, nɔ ɓagʉgʉ ɓɔ Ɓayuda, ɓa꞉ɓʉtʉma. 48Yuda ngɨa a꞉mʉgaba a꞉ɓio ɓɔ enjekieni ngbangá ɓɔ: «Mombi ngɨa nabimuɓokuo nayɔ anɨmwa ɨngʉngʉ, ambɔ ɨyɔ, ɨyananɨ, mʉfeni ta nɨfa!»
49Ta gagaa ngɨananɨ, Yuda ɔ꞉mɨsɨnganɨa Yeso, ga ɨyɔ ɓɔ: «Mʉpananakɨa! Nɔnaɓɔkuo!» Nɔ, ɔ꞉mʉmwa ɨngʉngʉ#26:49 ɔ꞉mʉmwa ɨngʉngʉ: ɓɔkwono ngɨyɛ Ɓayuda amati ɔ ɓʉkʉnda nɔgbɛ ya ɓanɨ.
50Yeso ɔ꞉mutosio ɓɔ: «Hii awai! Ɨyɛ wɛ꞉kɔ akɨa, kɨa pɨ.» Ta gagaa ngɨananɨ, ɨɓɔ ɓombi ngʉɓɔnanɨ, ɓɔ꞉mɨsɨnganɨa Yeso, ga ɨɓɔ lɨkɔndɔ akʉʉ ɔ Yeso ga hrii, ga ɨɓɔ nayɔ ɓɔ kwɨ.
51Gbɛgbɛ ta ananɨ, mombi mʉngana ati ɔ ʉɓa, ɓa꞉ɓio nɔ atɨ Yeso, ɔ꞉chweiso mapi ngʉwangɔ ga fwaa. Nɔ, ɔ꞉mʉtɨna mombi ɔ tɛa mʉngana ɔ ɓakumukumu uchwei ga chwaa.
52Yakamɛngana, Yeso ɔ꞉musigio ɓɔ: «Tɔso mapi ngʉwɔsɔɔ amati ɔ ɨkáá yɔngɔ! Dɔ, mombi muɓomu ngɨa aɓɛndaniso nɔ mapi, a꞉wo sina kʉ nɔ mapi! 53Ha gue, wangɔmʉ ndɨ anɨmbɨa? Nɛsokeni pɛngɛ Aba nɛmɨ anɨkɨa isingo, ambɔ ɔnatʉmɨa ndɨ ɓamalaika ɓaɛlɛfʉ, nɔ ɓaɛlɛfʉ? 54Yakamɛngana, ɔkɨeni ɓanɨ, yaka ngɨyɛ ɓa꞉tɛndakɨa amati ɔ Mabii, yakyananakɨa tɨa tanɨ? Dɔ, ingainga yanɨtanɨa ɓɔ yaka iɓomu, yɨkyananakɨa ngbanga ta ɓanɨ.»
55Ga Yeso nɔ ɓombi ngʉɓɔnanɨ ɓɔ: «Nánɛmɨ anɨkɨa nɔ mapi nɔ ɓayaka ɓɔ ɗite, ndʉ niɓio mombi ɔ ndiɓo ɓanɨ, dɔtanɨ? Masi maɓomu na꞉ɓisaaka, nɔ, panɨa ɓombi amati ɔ ɨkáá yɔ Asɔɓɨɨ. Sɔkɔmʉ inu, nɔ́nafa pɔ nɨfa. 56Yakamɛngana, iɓomu ngɨyɛnɛnɨ yɔkyananakɨɔ, ngbanga ta ndʉ aka magbɛ kɔ Asɔɓɨɨ ka꞉tɛndakɨa jɛnɛ-ɔɔ.»
Gbɛgbɛ ta ananɨ, ɓakpata ngʉɓangɔ ɓaɓomu ɓɔ꞉mʉsɨa, nɔ, ɓɔ꞉nanjana nɔ bangʉ ga waa.
Yeso ɛmaɔ apɛɨ ɔ ubua wɔ ɨkʉʉ ngʉwɔ Ɓayuda
(Mlk 14:53-65; Luk 22:54-55,63-71; Yɔa 18:13-14,19-24)
57Ɓombi ngʉɓɔnanɨ, ɓɔ꞉mʉfa Yeso, nɔ, ɓɔ꞉sa nayɔ atɨ Kayafa, ngama ɔ ɓakumukumu. Ɓapananakɨa ɓɔ mapanʉ nɔ ɓatataɓasie ɓɔ Ɓayuda ɓaɓomu, ɓa꞉jonokio ananɨ. 58Pɛtɛlɔ a꞉ɓio akpataka Yeso, ta ambise ɗu ɓɔ kɛlɛ. Kʉdɔ ɨyɔ, ɔ꞉tɔɓɔya ɓɔyanɨ ta aɨmbaa yɔ ɨkáá ngɨyɔ ngama ɔ ɓakumukumu. Ɔ꞉kumonio ga ngbuu, nɔ ɔwɔlɔ, ɨhɔ nɔ ɓapɛmakɨa, dɔ, ɨna yaka ngɨyɔ Yeso, aka yapipenekio-ɔɔ.
59Ɓakumukumu, ɨhɔ nɔ ubua ngʉwa wɔta ʉja, ɓa꞉ɓio ahata ɓadɛmʉ ɓɔ mʉjɛɛ, dɔ, ɓɨna ɨngbaa ngɨyɛ ɓamuwisiso nayɔ Yeso. 60Yakamɛngana, gʉtʉ ndɨ ɓombi ɓaja, ɓɛ꞉ka nayɔ akɔsingekio mʉjɛɛ, sɔkɔmʉ, ɓɨna yaka pɔ mɛngana ɨyɛ, ɓamʉnapɨa-ɔɔ nɔ mʉkɔmbʉ.
Amupipio ɓɔ gbu, ɓombi ɓapɨnɨ ɓɛ꞉ka asugo ɓɔ: 61«Mombi ngɨa, a꞉sugo pɛ ɓɔ: ‹Nakwanana anuto ɨkáá yɔ Asɔɓɨɨ, nɔ, nɔɨtuɓoko ɓata kʉ amati ɔ makwaa kaatʉ.›»
62Ananɨ, Kumukumu ngɨa ata mʉja ɛ꞉maa ga gba, ɔ꞉muɓokuo Yeso ɓɔ: «Wangɔ ndɨ atosio ɨkyɛmʉ? Wa-sɨ ʉwɛ, asugo tanɨ akɔ mʉkɔmbʉ ngʉwa ɓɔnɔwɛ anapɨɔ nawɔ ʉpɛ ɓɔ?» 63Yakamɛngana, Yeso ɔ꞉gbaa ta gbaa ɓɔ woo.
Ga Kumukumu ngɨa ata mʉja, ɓata nayɔ aka ɓɔ: «Akɔ ino yɔ Asɔɓɨɨ ngɨyɔ uɓei, nɔnɛtɔ ɓɔ, atɨɓɨa-sɨ ingono, ʉwɛ, wa ndɨ Klisito, Mwana ɔ Asɔɓɨɨ?»
64Yeso ɔ꞉mutosio ɓɔ: «Ʉwɛ, wɔsugo sugoni! Nanenu asigio ɓɔ, anɨngwa ɨtakɨtakɨ ngɨyɛ, nɛ́꞊na suo Mwana ngɨyɔ Mombi, ɓawele aɨkɔndɔ yɔ guɔngɔ ngɨyɔ Asɔɓɨɨ ngɨa Angu muɓomu. Nɔ, ná꞊mɨna ɔɓieni suo anɨka amati ɔ lɨkʉɓa akʉʉ ɔ ɓisi.»
65Kʉdɔ, kumukumu ngɨa ata mʉja, ɔ꞉natʉa lɨpʉkʉ ngɨlangɔ, ga hua hua. Ga ɨyɔ ɓɔ: «Ɔsɛakɔ Asɔɓɨɨ sɛakanɨ! Tahata dɔ ɓata ɓadɛmʉ nga ɓeno tanɨ? Inu, nɔ́kɔ tɨa kʉ ʉkanɨ aka, ɔsɛakɔ-ɛɛ Asɔɓɨɨ! 66Ɛɛ! Inu, nɛ́nɔ tanɨ?» Ɓɔ꞉mutosio ɓɔ: «Ɔsisekio ta nɔ ingwo!»
67Ananɨ, ɓɔ꞉pʉnga tɔkɔkɔ Yeso nɔ maɗaʉ akɔ mesu. Ɓɔ꞉mʉɓɛnda makɔfɨ, nɔ ɓɔmɔ, ɓɔ꞉mʉnatʉa lɨkɔndɔ, ɓɔ hua, hua. 68Ga ɨɓɔ nayɔ ɓɔ: «Ha Klisito-ee! Kwa-sɨ ɨgbɛ, nɔ, wɔchwa mombi ngɨa ɔ꞉naɓɛndɔ!»
Pɛtɛlɔ ɔtatɔ Yeso
(Mlk 14:66-72; Luk 22:56-62; Yɔa 18:15-18,25-27)
69Pɛtɛlɔ a꞉ɓio yangɔ ɓawele ta aɓei, inani aɨmbaa. Mombi ɔ tɛa mʉngana, gwa ata moi ɔngɔ, ɔ꞉mɨsɨnganɨa ga sɛɛ, nɔ, ɔ꞉musigio ɓɔ: «Gʉtʉ ta ʉwɛ, ná꞉ɓio pɔngɔ ta ɨhɔ nɔ Yeso ngɨyɔ Galilaya.» 70Pɛtɛlɔ ɔ꞉tata mesu ta ɓɔ ngbakalʉ, ananɨ apɛɨ eɓo ɓaɓomu. Ga ɨyɔ ɓɔ: «Iɓomu ngɨyɛ wasugo, nangɔmʉ ɨmɨ anɨmbɨa pɔ nɨmbɨa!»
71Mbise ɔngɔ, ɔ꞉ngwa ananɨ, nɔ, ɔ꞉sa anɔ umongu wɔ ɨmbaa. Mombi ɔ tɛa, gwa ata moi ɔngɔ wɔmɔ, ɔ꞉tɔmʉgbʉka ananɨ. Ga ɨyɔ nɔ ɓombi ngʉɓa ɓa꞉ɓio ananɨ ɓɔ: «Mombi ngɨakɛ, ɓa꞉ɓio ɨhɔ nɔ Yeso, Mʉnajalɛtɨ.» 72Pɛtɛlɔ ɔ꞉tata ɓata, nɔ, ɔ꞉kio silika ɓɔ: «Nangɔmʉ ɨmɨ, anɨmbɨa mombi ngɨananɨ pɔ nɨmbɨa!»
73Ambise angbinga bele, ɓombi ngʉɓa ɓa꞉ɓio ananɨ, ɓɔ꞉mɨsɨnganɨa Pɛtɛlɔ, nɔ ɓɔ꞉musigio ɓɔ: «Ingono, wa ta mʉngana ɔ eɓo. Ɨdʉmbʉ ngɨyɛsɔɔ, yanɔwɛ anɨmbiiso!» 74Pɛtɛlɔ ɔ꞉kio silika ɓɔ: «Manja ta aba, ɨmɨ, nangɔmʉ anɨmbɨa gue ngɨa pɔ nɨmbɨa!» Ta angbinga ngɨananɨ, gue ɔ kɔɓɔ ɔ꞉natɨa.
75Pɛtɛlɔ ɔ꞉tunguo yaka ngɨyɛ Yeso a꞉musigio ɓɔ: «Pɛɨ ngɨa gue ɔ kɔɓɔ anatɨa-ɔɔ, wanatata machaa kaatʉ.» Kʉdɔ, ga ɨyɔ aɓei ɓɔ puu, nɔ, ɔ꞉pʉnga ndɨa nɔ ikoko, ɓɔ hiki, hiki.
Currently Selected:
Matayɔ 26: buuN
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc.
