Mʉkpanganɨa 50
50
Didima ngɨyɔ Yakɔɓɔ
1Yɛjɛfʉ ɔ꞉naputo ndʉtʉ yɔ ɨsɛ, ta ananɨ ya꞉ɓio-ɔɔ ikwaise, nɔ, ɔ꞉pʉnga ndɨa nɔ masoi, ananɨ amʉtʉ wɔ ɨsɛ, ɔɓieni nayɔ anɨmwaka lɨngʉngʉ. 2-3Kʉdɔ, Yɛjɛfʉ e꞉njo ɓamʉnganga ngʉɓangɔ, ʉpanʉ atambanaka ndʉtʉ ngɨyɛ ɨsɛ Ɨsalaɛlɛ nɔ ɓʉtɨ, ɓɔ dɔ yatɨpɔamʉ, pɛɨ ngɨa ɓamʉhʉna-ɔɔ. Akpatanakɨa nɔ gbali ngɨyeɓo, ɨɓɔ ɓamʉnganga ngʉɓɔnanɨ, ɓɔ꞉nanɨa ndʉtʉ nɔ ɓʉtɨ ngʉɓɔnanɨ, amati ɔ makwaa ɓatɛkɛɓɛ ɓɔgɨna. Ɓamisili ɓa꞉kɨa didima ngɨyɔ Yakɔɓɔ, amati ɔ makwaa ɓatɛkɛɓɛ mɛɗɨanɛka.
4Ɨyɛ ndʉ, didima ngɨyɔ Yakɔɓɔ a꞉sio ɓɔ gba, ga Yɛjɛfʉ nɔ ɓanɛbaya ngʉɓɔ Falaɔ ɓɔ: «Inu ɓaba, yɔɓieni ɓɔ nɛnɨanɨɔ nɔ ɨjɨɔ amesu keno, nɔnɨtɔ ɓɔ seni nɛmɨ asigio Falaɔ ɓɔ: 5‹Aba Yakɔɓɔ a꞉nakiiso pɛ silika asugo ɓɔ ɔweni, kpɔ, kpɔ, kpɔ, nɨsa nayɔ ahʉna, ta anɔ Kanana, amati ɔ ɓʉnjaʉ ngʉɓa a꞉mbiso jɛnɛ inani. Ɨtakɨtakɨ ngɨyɛ, nɔnɨtɔ ɓɔ anasɨeni ɓaka-sɨ anɨsa ahʉna aba, mbise ɔngɔ, nɔ꞊tɔwa kʉ iyani.›» 6Falaɔ ɔ꞉tosio ɓɔ: «Ngbanga ta ndʉ aka atɔ a꞉nakiiso pɛ-ɔɔ silika, sa-sɨ nayɔ akɔhʉna ta ɓanɨ.»
7Kʉdɔ, Yɛjɛfʉ ɔ꞉ngwɨa kyɛnda ta ɓanɨ, anɨsa ahʉna ɨsɛ. Ɓa꞉kyɛndaka ɨhɔ nɔ ɓanɛbaya ɓaɓomu ngʉɓɔ Falaɔ, nɔ ɓatataɓasie ɓaɓomu ngʉɓɔ ɨkáá ngɨyɛ Falaɔ, nɔ ɓatataɓasie ɓaɓomu ngʉɓɔ Misili. 8Yɔtɛka ananɨ tɨa ɓombi ɓɔ ɨkáá ngɨyɛ Yɛjɛfʉ iɓomu, ɨhɔ nɔ ɓamanye, nɔ ɓombi ɓaɓomu ngʉɓɔ ɨkáá ngɨyɛ ɨsɛ. Aki anɔ Gɔsɛnɨ, ɓa꞉sɨa inani ta ɓana, nɔ ɓamɛmɛ, nɔ ɓakɔndɔlɔ, nɔ ɓangɔmbɛ. 9Ga ambaja ɔ ɓombi ata mʉja ngɨananɨ ɓɔ sioo, tɨa akɔ mɨtʉka ngɨyɛ ɓanama ɓaɗuɗuo, tɨa akɔ ɓague ngʉɓa ɓakyɛndakiso ɓapunda. 10Ɓɔ꞉tɔɓɔya akɔ ibamu yɔ Atadɨ. Ʉmʉwa ngʉwɔnanɨ, wa꞉ɓio amutii wɔ Yɔlɔdanɨ, nɔ ʉgbaa mesu aki ɨpá yachwʉchwaka-ɛɛ. Ɓɔ꞉kumonokio amati ɔ didima mʉngana, ata kisoɓa, kʉ nɔ ikoko nɔgbɛ. Didima ngɨananɨ, Yɛjɛfʉ a꞉tambanaka akɔndɨa ɨsɛ, a꞉kwaa makwaa mɛɗɨanɛka. 11Ɓakanana ngʉɓa ɓa꞉ɓio ɨkʉmbʉ ananɨ, ɓɛ꞉na didima ngɨananɨ, ga ɨɓɔ ɓɔ: «Eeɓe, ɨna ambɔ didima akisoɓa nɔ Ɓamisili-ee!» Yaka ngɨyɛ ɓa꞉sʉa-ɔɔ ʉmʉwa ngʉwɔnanɨ, wa amondu wɔ Yɔlɔdanɨ ino ɓɔ «Abɛlɨ-Misili#50:11 Abɛlɨ-Misili: pɔ ɓɔ ɨsɨ yɔngɔ ɓɔ didima ɔ Ɓamisili nɔ Ebelenia», ya꞉kwa ɓanɨ.
12Kʉdɔ, ɓana ɓɔ Yakɔɓɔ ɓa꞉kɨa ɨsɛ eɓo ngbanga, ta ndʉ aka a꞉ɓusigio-ɔɔ. 13Ɓɔ꞉sa nayɔ anɔ Kanana, nɔ ɓɔ꞉tɔmʉhʉna tɨa kʉ inani anɔ Makɛpɛla, amati ɔ ʉgbʉ wɔ ikopi, tinene nɔ Mamʉlɛ. Ʉmʉwa ngʉwɔnanɨ, Abalaama a꞉ʉkaya jɛnɛ alɨkɔndɔ lɔ Ɛfʉlɔnɨ, Mʉhɨtɨ wɔngɔ, ndʉ ihoi yɔ manjaʉ yangɔ. 14Ɨyɛ ndʉ atɨ Yɛjɛfʉ ɓa꞉pipo hʉna ɨsɛ eɓo ɓɔ gba, kʉdɔ, ɓɔ꞉tɔwa anɔ Misili, ɨhɔ nɔ ɓamanye, nɔ ɓombi ɓaɓomu ngʉɓa ɓɛ꞉ka naɓɔ.
Ɓamanye ɓɔ Yɛjɛfʉ ɓɛtɔ nɨpaakɨa
15Ambise ɔ ingwo yɔ ɨsɛ eɓo, ɓamanye ɓɔ Yɛjɛfʉ, ɓɔ꞉yakanaka ati eɓo ɓɔ: «Dɔ aba, ɨya ɔ꞉wo-a, andɔ tɨa Yɛjɛfʉ ɔtɨsɨkanakɨeni, nɔ nesu atosio ikosi yɔ ɓʉɓɨɓɨ ɓuɓomu ngʉɓa ta꞉mʉkɨa jɛnɛ!» 16Kʉdɔ, ɓɔ꞉mayakɨa Yɛjɛfʉ iso ɓɔ: «Pɛɨ ngɨa atɔ a꞉wo-ɔɔ, a꞉sɨa ʉpanʉ ɓɔ: 17‹Sigieni Yɛjɛfʉ ɓɔ kikiliki, ɨpaakɨa ɓaka ɓamanye ɓʉɓɨɓɨ ngʉɓeɓo ɨpaakɨanɨ, nɔ yaka iɓomu ngɨyɛ, ɓa꞉mʉkɨa jɛnɛ.› Kikiliki, atɨpaakɨa ɓaka ɓʉɓɨɓɨ ngʉɓeso, isu, ɓabaya ɓɔ Asɔɓɨɨ ngɨa atɔ.» Ngbinga ngɨa Yɛjɛfʉ ɔ꞉ka-ɔɔ ɨsaʉ ngɨyɛnɛnɨ, ɔ꞉ndɨa ta nɔ masoi.
18Ambise ɔngɔ, ɓamanye ingainga ɓɛ꞉ka, nɔ, ɓɔ꞉kwekweyo ananɨ apɛɨ angɔ, ga kpu kpu mesu akɔ ɨtaka. Ɓɔ꞉pʉnga sugo ɓɔ: «Ʉka-sɨ! Isu ta ɓabaya ɓɔsɔɔ!» 19Yakamɛngana, ga Yɛjɛfʉ naɓɔ ɓɔ: «Nátɨkwenimʉ ʉɓá, na-sɨ ɨmɨ ndɨ anɨ, atosio ikosi akɔ ɨda ngɨyɛ Asɔɓɨɨ? 20Ɓʉɓɨɓɨ ngʉɓa inu, ná꞉kwaisio jɛnɛ nɛmɨ akɔkɨa, Asɔɓɨɨ a꞉ɓʉnacho anɨka tɨa yaka yɛta iɗo, aheiso uɓei wɔ ɨfananja yɔ ɓombi yɛta ɨja, kʉndʉ aka ná-ɔɔ anɨna ɓʉɓʉnʉ. 21Ɨtakɨtakɨ ngɨyɛ, sɨeni pɨ nɨkwa ʉɓá, ɨmɨ, na꞊nɨpɛmakɨa pɛmakɨanɨ, ɨhɔ nɔ ɓana ngʉɓeno kʉtaa.» Kʉdɔ, Yɛjɛfʉ a꞉diso ɓamanye mʉtɨma, nɔ, ɔ꞉ɓʉyakɨa nɔ iso yɔ majɨɔ.
Ingwo ngɨyɔ Yɛjɛfʉ
22Kʉdɔ, atɨ Yɛjɛfʉ, ɨhɔ nɔ ɨfananja ngɨyɛ ɨsɛ, ɓɛ꞉sɨnganaka-sɨ aɓio ɨkʉmbʉ ta anɔ Misili. Ɨyɔ Yɛjɛfʉ, a꞉kwaa akɔ uɓei, mago maɓomu mɨa mʉngana nɔ tɛkɛɓɛ. 23Yɛjɛfʉ ɛ꞉na ɓana, nɔ ɓanɔnɔ ɓɔ Ɛfalaɨmʉ. Nɔ ɓata, a꞉sɨka ɓana ɓɔ mwana ɔ mwana angɔ, Makɨlɨ ngɨa mwana ɔ Manasɛ, ta ndʉ ɓana ɓangɔ ɓɔ kpɛ.
24Ɓisi mʉngana, ga Yɛjɛfʉ nɔ ɓamanye ɓɔ: «Ingwo ngɨyɛsɛmɨ ya tɨa tinene. Yakamɛngana, Asɔɓɨɨ a꞊nɨkɨa sina isingo ta ɨkɨanɨ, nɔ, ɔ꞊nɨchweiso akɔ ɨkʉmbʉ ngɨyɛ, nenu atoiso kʉ akɔ ɨkʉmbʉ ngɨyɛ a꞉panaka jɛnɛ ɓatɔ ɓeno ɨngbaa akɔ agɔmɛ, atɨ Abalaama, nɔ Isaka, nɔ Yakɔɓɔ.» 25Kʉdɔ, Yɛjɛfʉ a꞉kiiso ɓana ɓɔ Ɨsalaɛlɛ silika, ɓɔ: «Ngbɨnga ngɨa Asɔɓɨɨ a꞊nɨkɨa sina-ɔɔ isingo, kpɔ, kpɔ, kpɔ, ná꞊tɨsɨamʉ maho ngʉkɔsɛmɨ iyani anɔ Misili, pɔ bele.»
26Yɛjɛfʉ a꞉wo anɔ Misili, ɨyɔ, nɔ mago maɓomu tɨa mɨa mʉngana nɔ tɛkɛɓɛ. Ɓɔ꞉nanɨa ndʉtʉ ngɨangɔ nɔ matɨ, nɔ, ɓɔ꞉ɨmaya amati ɔ sanda ta inani.
Currently Selected:
Mʉkpanganɨa 50: buuN
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc.
