Mʉkpanganɨa 49
49
Yakɔɓɔ ɔkikio ɓana ɓangɔ apɛɨ ɔ ingwo ngɨangɔ
1Yakɔɓɔ e꞉soko ɓana ɓegue ngʉɓangɔ, nɔ, ɔ꞉ɓusigio ɓɔ:
«Ha inu ɓague, mɔmanɨeni ɨda mɛngana,
nɨnʉngakɨa yaka ngɨyɛ, ya꞊nɨgbʉka suo, akɔ uɓei wɔ ikuɓa ngʉweno, nangana nangana.
2Mɔmanɨeni, ʉkeni, inu ɓana ɓɔ Yakɔɓɔ!
Ʉkeni atɔ eno Ɨsalaɛlɛ!
3Ʉwɛ Lubeni, wa tapio ngɨasɛmɨ,
nɔ angu ngɨasɛmɨ, nɔ masaɨ ngʉkɔsɛmɨ kɔ pɛɨ,
ʉwɛ, wa꞊nagaaka ɓana ɓɔ anʉ, nɔ ʉbɨba, nɔ angu kʉtaa.
4Ʉwɛ, wa ndʉ ɨyɛ mipo kahuonoko-ɔɔ alisini.
Yakamɛngana, wa꞊ngɔnagaaka pɛpɛ dɔ tii ɓata ɓangɛ,
dɔ ʉwɛ, wa꞉nayapanakiso ɨmɨ, yapakisoni,
ngbinga ngɨa wa꞉ɗeto-ɔɔ, akʉʉ ɔ ɓʉkwaa ngʉɓɔsɛmɨ,
nɔ wɔ꞉sa akwaa nɔ moi asɛmɨ ngɨyɔmɔ#popoko 35:22.
5Atɨ Simoni, ɨɓɔ nɔ Lawi, ɓa ɓanduku ɓaɗetenie ɓɔ gbi.
Ɨɓɔ, ɓakɔkyananaka ɓangɛ ɓʉmʉ ɓʉmʉ, nɔ lɨɗɔkɔ lɔ ɗite ngɨleɓo.
6Natɨkumoniomʉ gɔ pɛpɛ ɨmɨ, akɔ lidimi ngɨleɓo,
Natɨsamʉ gɔ pɛpɛ ɨmɨ, amijonokio ngɨyeɓo,
dɔ ɨɓɔ, ɓa꞉maa pɔngɔ ɓombi nɔ ʉnganga ngʉweɓo#popoko 34:25-29.
Nɔ akɔ majɛjɛ ngʉkeɓo, ɓa꞉tinyoo pɔngɔ mɨndɨgbɔ yɔ ɓangɔmbɛ.
7Ambɔ ʉnganga ngʉweɓo, wɨsɨka gɔ ta mʉgwɛ, dɔ, wa ɓʉkaɓʉkaɨ nɔgbɛ,
nɔ mʉtɨma wɔta gbi ngʉweɓo, ʉwa wangɔ nɔ njanji.
Amati ɔ anja ngɨyɔ Yakɔɓɔ, na꞊ɓungbengo ta ngbengo,
nɔ amati ɔ Ɨsalaɛlɛ, nɔ꞊ɓʉpanja kʉ panja.
8Ʉwɛ Yuda, ɓanduku ngʉɓɔsɔɔ ɓa꞊nabibiso bibisoni-ɛɛ.
Wa꞊kwa nɔ ɓamʉyaa ɓɔsɔɔ, kwanɨ-ɛɛ.
Ɓana ɓɔ atɔ, ɓa꞊gbʉkʉmakɨa apɛɨ asɔɔ, gbʉkʉmakɨanɨ-ɛɛ.
9Ʉwɛ Yuda, mwana asɛmɨ, wanɔ angu, ndʉ mʉndambʉ wɔ kingbi,
ngɨa akɨa ɓɔ ɔdyeni nama, nɔ ɔtɔwa tɨa kʉ aiɓu ngɨangɔ.
Kingbi ɔgbʉkʉmɨa, nɔ, kwala ga ɓataa.
Anɨ ɨya amʉdʉa nayɔ animaiso?
10Ɨsandɨ yɔ ɓʉngama, ya꞊ngɔngwa sina amati ɔ anja ngɨyɔ Yuda-ɛɛ.
Mutupo wɔ ɓangama, wa꞊ɓio sina ta alɨkɔndɔ lɔ ɓanɔnɔ ɓangɔ-ɛɛ,
akɔɓɔya ta aka makwɔngɔ ingainga, ɛ꞊ka sina-ɔɔ-ɛɛ,
ɨya akɛ mababa kɔ ɓombi ɓaɓomu, ɓa꞊ɓio sina nayɔ akumo-ɛɛ.
11Mijabibu ya꞊ɓio sina tɨa ɨja nɔgbɛ, adaa ngɨa ɓamʉnga-ɔɔ punda ngɨangɔ, tɨta ananɨ-ɛɛ,
nɔ mwana ɔ punda akɔ mʉtapʉ wɔ mujabibo, ngʉwɔ wɔta uɗo nɔgbɛ-ɛɛ.
A꞊jaɓa sina ɨpʉkʉ ngɨangɔ, nɔ ʉkyɛpʉ ʉja, ʉwɔ mijabibo-ɛɛ,
nɔ kɔtɨ ngɨangɔ amati ɔ ʉkyɛpʉ wɔ mijabibo wɔta ngbo ndʉ menike-ɛɛ.
12Mesu ka꞊mʉngbongbwanaka sina nɔ ʉkyɛpʉ ɓɔ ngboo ngboo-ɛɛ,
nɔ menu kɔ꞊michoo nɔ majɨɓa ɓɔ tuu tuu-ɛɛ.
13Ʉwɛ Jɛbʉlʉnɨ, wa꞊ɓio sina ɨkʉmbʉ ta anambamba ɔ lisini ata mʉja-ɛɛ.
Ɨda yɔngɔ ya꞊ɓio sina ndʉ iso yɔ lisini, aka masʉa yɔ mipo yafɔmaka-ɔɔ-ɛɛ.
Mʉyɔ wɔ ɨkʉmbʉ ngɨyɛsɔɔ, ya꞊ɓio sina anɔ Sɨdɔna-ɛɛ.
14Ʉwɛ Isakali, wa ndʉ punda ngɨa angu-ɛɛ,
ɨya, amʉkwaɛ amati ɔ ijiliɓa-ɛɛ.
15Ngbinga ngɨa ɛna-ɔɔ ɓɔ, ɨda yɔ homuo ya iɗo,
nɔ ɨkʉmbʉ kʉ iɗo, ɔtʉkʉma akɔpakaa lɨkyɛmʉ,
nɔ, ɛka tɨa baya.
16Ʉwɛ Danɨ, wa꞊kio sina mʉkɔmbʉ wɔ ɓafandɔɔ-ɛɛ,
ndʉ ɨfananja mɛngana yɔ Ɨsalaɛlɛ.
17Danɨ a꞊ɓio gue ata mɨnɛ ndʉ sɨɨ anɔ ɨngbaa-ɛɛ,
ndʉ njʉmʉ anɔ ɨngbaa yɔ mutii-ɛɛ,
ɨya akwaka litindi lɔ falasɨ-ɛɛ,
nɔ, ɔkwisiso mombi ngɨa aɓio akʉʉ ɔngɔ ɛsɨ, ɓɔ kpru-ɛɛ.
18Hii MAKWƆƁƗƗ, nɔnapɨanɔ mʉtɨma ɓɔ anaheiso ɓaka heisoo!
19Ʉwɛ Gadɨ, ndiba ɔ ɓakwa, ɓa꞊nachwɛa sina ɗite.
Yakamɛngana, ʉwɛ akɛ, wawa naɓo ɗite, nɔ, wɔɓʉkpata ambise ta kpatanɨ-ɛɛ.
20Ʉwɛ Aseli, ɨkʉmbʉ ngɨyɛsɔɔ ya꞊ɓio sina nɔ idyo ɨja-ɛɛ,
idyo yɛta manjanja ngɨyɔ ɓangama-ɛɛ.
21Ʉwɛ Nafʉtalɨ, wa꞊ɓio sina ndʉ magaɓue ngɨa agɔaka bangʉ aneju-ɛɛ,
ɨya, anɔtoko ɓana ɓɔta manjanja-ɛɛ.
22Ʉwɛ Yɛjɛfʉ, wa ndʉ ɓʉtɨ ngʉɓa ɓaɓaa akɔ ɨtaka yɔ ʉdɔɓɔ-ɛɛ,
ʉɓa, ɓamo lipumo tinene, nɔ, mʉchɛmʉchɛɛ wɔ lisini-ɛɛ,
ʉɓa, mɨtapʉ yɔngɔ, yanagaaka aga, ta nagaaka-ɛɛ.
23Ɓague ɓɔ manyopi ɓa꞉mʉchwɛa ɗite kingono, nɔ,
ɓɔ꞉mugisio magʉsa, nɔ, ɓo꞉mʉkyananaka ɓʉkaɨ.
24Yakamɛngana, ɨpoto ɓopi ngaɓangɔ ta ɓɔ ngbɛmʉ-ɛɛ
nɔ lɨkɔndɔ lɛta ɓumu ɓumu-ɛɛ,
ɨhɔ nɔ Asɔɓɨɨ ngɨyɔ Angu ngɨyɔ Yakɔɓɔ.
Ɨyɔ, a Mʉpɛmakɨa ngʉwɔ ɓafandɔngɔ-ɛɛ,
ɨyɔ, a Ikopi yɛta ɨja, ngɨyɛ yapɛmakɨa Ɨsalaɛlɛ.
25Asɔɓɨɨ ngɨyɔ ɓatɔ anɛkɨa isingo, ɨkɨanɨ-ɛɛ,
Asɔɓɨɨ ngɨyɔ Angu anɔkiokio, kiokioni-ɛɛ,
ɔnaneisio ʉgbaá anɨngwa akʉʉ ɔ ɓisi-ɛɛ,
ɔnachwɛisio mipo amati ɔ ɓambɛna, ɛsɨ ɨtaka-ɛɛ,
ɨfananja ngɨyɛsɔɔ yucho choni, nɔ ɓanama ngʉɓɔsɔɔ kʉtaa-ɛɛ.
26Nukiokio ngɨyɛ atɔ anɔkiokio,
yɔnagaakɔ iɗo iɗo, ngɨyɔ lɨkpangba ngɨlɔ mago, nɔ mago-ɛɛ.
Nɔ, yɔnagaaka kʉ nɔ ɨngama, yɔ lɨkpangba ngɨlɛ ɨjɛnɛ jɛnɛ-ɛɛ.
Ʉɓʉnga ngʉwɔnanɨ, wiɓio a mʉtʉ, ngʉwɔ Yɛjɛfʉ-ɛɛ,
mombi ngɨa a꞉ɓio ɨnga ati ɔ ɓamanye-ɛɛ.
27Ʉwɛ Bɛnjamɛ, wa ndʉ ɨmva iju, ngɨa ata ɓʉkaɓʉkaɨ-ɛɛ,
ɨya awa, nɔ hɛsʉa nama, ɓɔ chwɛɛ chwɛɛ nekuɓa yɛta dɨ-ɛɛ,
tɨa nɔ ɨpasɨ yɔngɔ, ɔpaka lɨkyɛmʉ ngɨlɛ a꞉lɨhɛnɨa-ɛɛ.»
28Ɓana ɓɔ Yakɔɓɔ, ngʉɓa ɓa litindindi lɔ lɨfananja tɛkɛɓɛ nɔ ɓepini, ngɨlɔ Ɨsalaɛlɛ, ɨɓɔ ʉɓɔnanɨ. Nɔ yaka ngɨyɛ ɨsɛ eɓo, Yakɔɓɔ, a꞉ɓʉngakɨa, nɔ naɓɔ anukiokio, apɛɨ ɔ ingwo ngɨangɔ, ɨyɔ tɨa kʉ ɨyɛnɛnɨ. Mombi nɔ mombi ati eɓo, ɨ꞉nɨanɨa nɔ ʉɓʉnga nga wangɔ ta di.
Ingwo ngɨyɔ Yakɔɓɔ
29-30Mbise ngɨananɨ, ɔ꞉ɓinjo ɓana ɓangɔ ʉpanʉ ɓɔ: «Ɛɛ inu ɓague, ɨmɨ ɨya tɨa, nɔmanɔ anujonokio nɔ ɓaba ngʉɓa ɓa꞉sio jɛnɛ pɛɨ. Kpɔ, kpɔ, kpɔ, seni nɛmɨ ahʉna ta ɨhɔ naɓɔ, anɔ Kanana, amati ɔ ʉgbʉ mʉngana wɔta ʉja wɔ ikopi, inani anɔ Makɛpɛla nɔ ʉgbaa mesu aki ɨpá yachwʉchwaka-ɛɛ, wɔɓieni anɔ Mamʉlɛ. Ya kuku Abalaama akɛ, a꞉kaya jɛnɛ ihoi ngɨyɛnɛnɨ, alɨkɔndɔ lɔ Ɛfʉlɔnɨ, Mʉhɨtɨ wɔngɔ, ndʉ ɨda yɔ manjaʉ akɔ ɓafandɔngɔ. 31Ta inani aihoi ngɨyɛnɛnɨ, ɓa꞉hʉna jɛnɛ kuku Abalaama, ɨɓɔ nɔ moi angɔ Sala. Nɔ, ɓɔ꞉tɔhʉna ɓata atɨ aba Isaka, ɨɓɔ nɔ moi angɔ Lɛbɛka, kʉ inani. Ɨmɨ, nɔ꞉tɔhʉna ɓata Lɛa, kʉ inani. 32Kʉbaa ngɨananɨ, nɔ ʉgbʉ wɔta ʉja ngʉwa amati ɔ ikopi, ɓa꞉kaya alɨkɔndɔ lɔ Ɓahɨtɨ.» 33Ɨyɛ ndʉ, Yakɔɓɔ a꞉pipo aninjo ɓana ɓangɔ mapanʉ ɓɔ gba, ga ɨyɔ ɓɔ ɓataa akʉʉ ɔ kanga. Kʉdɔ, ɔ꞉kio mʉtɨma, nɔ, ɔ꞉sa anujonokio, nɔ ɓɛsɛ ngʉɓa ɓa꞉sio jɛnɛ pɛɨ.
Currently Selected:
Mʉkpanganɨa 49: buuN
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc.
