Mʉkpanganɨa 48

Yakɔɓɔ ɔkiokio ɓana ɓɔ Yɛjɛfʉ

1Mbise ɔngɔ, ɓɛ꞉ka anʉngɨa Yɛjɛfʉ ɓɔ: «Atɔ anɔ kaɓu.» Kʉdɔ, ɔ꞉sɨka ɓana ngʉɓangɔ ɓapɨnɨ, atɨ Manasɛ ɨɓɔ nɔ Ɛfalaɨmʉ. 2Ɓɔ꞉mʉngɨa Yakɔɓɔ ɓɔ: «Mwana asɔɔ Yɛjɛfʉ ɨya, ɛkɔ nɔwɛ anɨna akɛ.» Ɨsalaɛlɛ ɔ꞉tundwono ga tuu, nɔ, ɔ꞉wolo ga jikomu, ananɨ akʉʉ ɔ ɓʉkwaa ngʉɓangɔ.

3Ga Yakɔɓɔ nɔ Yɛjɛfʉ aka ɓɔ: «Asɔɓɨɨ ngɨa ɔ Angu Nɔgbɛ, a꞉nachwɛanɨa jɛnɛ anɔ Luji#popoko Mʉkp 28:19; 35:6, amati ɔ ɨkʉmbʉ yɔ Kanana, nɔ, ɔ꞉nakiokio. 4Nɔ, ɔ꞉nasigio ɓɔ: ‹Anɔka iɗo! Na꞊nenjo ɓanɔnɔ, nɔ, nɔ꞊nachiso. Nɔ ʉwɛ, na꞊napɨa anɨka ɨsɛ ɔ mababa kɔ ɓombi ɓaja. Ambise asɔɔ, na꞊ɓinjo ɨkʉmbʉ ngɨyɛ, nɔ, ya꞊ɓio tɨta yeɓo amati ɔ mago nɔ mago.› 5Ngbanga ta ndʉ atɨ Lubeni, ɨɓɔ nɔ Simoni, ɓana ɓapɨnɨ ngʉɓɔsɔɔ, wa꞉ɓʉnɔta, pɛɨ ɨmɨ anɨka iyani anɔ Misili, atɨ Manasɛ, ɨɓɔ nɔ Ɛfalaɨmʉ, ɓa tɨa ɓana ɓɔsɛmɨ. 6Yakamɛngana, ʉɓa wa꞊ɓʉnɔta ambise eɓo, ɓa꞊ɓio ɓɔsɔɔ. Nɔ, ɓa꞊dya mʉgyɛndɔ wɔ maɓɨɨ, akɔ ɨda ngɨyɛ ɓamanye ɓeɓo, Manasɛ nɔ Ɛfalaɨmʉ. 7Ɨyɛ ndʉ na꞉ɓio atɔwa anɔ Padanɨ, anʉ Lakeli, a꞉nawio ta anɔ ɨngbaa, ananɨ anɔ Kanana, tinetine nɔ Ɛfʉlatɨ. Kʉdɔ, na꞉mʉhʉna tɨa kʉ ananɨ, anɔ ambamba ɔ ɨngbaa yɔ Ɛfʉlatɨ, pɔ ɓɔ Bɛtɛlɛmʉ.»

8Kʉdɔ, Ɨsalaɛlɛ ɔ꞉kanga ɓana ɓɔ Yɛjɛfʉ ɓɔ gbɔɔ, nɔ, ɔ꞉ɓokuo ɓɔ: «Ɓanɨ ʉɓa ɓɛ?» 9Yɛjɛfʉ ɔ꞉mutosio ɨsɛ ɓɔ: «Ɓana ngʉɓɔsɛmɨ Asɔɓɨɨ a꞉nenjo ɨɓɔ, anɔ Misili aka, ɨɓɔ ʉɓɔnanɨ.» Ga ɨyɔ nɔ mwana angɔ ɓɔ: «Ika naɓo tinene nɛmɨ aka, nɨɓukiokio.»

10Ɓʉkʉʉ ɓa꞉ɓio ɓɔ ɓɔɓɔyeni Ɨsalaɛlɛ tɨa kʉ amesu, sɔkɔmʉ ɓata ɨyɔ akɔnɨna iɗo. Yɛjɛfʉ ɛ꞉ka nɔ ɓana tinene nayɔ, ɔ꞉ɓʉnaputo, nɔ, ɔ꞉ɓʉmwaka lɨngʉngʉ. 11Ga Ɨsalaɛlɛ nɔ Yɛjɛfʉ aka ɓɔ: «Na꞉ngɔɓitunguo pɔngɔ tii pɔ tunguo ɓɔ, nɛ꞊na ɓata kʉɔ mesu kɔsɔɔ, ɨnadɔ, Asɔɓɨɨ ɔ꞉nasɨɔ anɨna tɨa kʉ nɔ ɓana ɓɔsɔɔ!» 12Kʉdɔ, Yɛjɛfʉ a꞉ɓunguso ananɨ amawu kɔ ɨsɛ, nɔ, ɔ꞉gbʉkʉmɨa mesu akɔɓɔya ta asɨ.

13Ɨyɔ Yɛjɛfʉ, ɔ꞉ɓʉsɨka ɨɓɔ ɓaɓomu ɓapɨnɨ. Ɔ꞉sɨka Ɛfalaɨmʉ, akɔ ɨkɔndɔ yɔ gue ɔngɔ ngɨangɔ, nɔ ɔ꞉mʉnapɨa akɔ ɨkɔndɔ yɔ aɗeku ngɨyɔ Ɨsalaɛlɛ. Ɔ꞉sɨka Manasɛ, akɔ ɨkɔndɔ yɔ aɗeku ngɨangɔ, nɔ ɔ꞉mʉnapɨa, akɔ ɨkɔndɔ yɔ gue ɔngɔ ngɨyɔ Ɨsalaɛlɛ. Nɔ, ɔ꞉ɓɨsɨnganiso tinene nɔ ɨsɛngʉʉ eɓo. 14Ɨsalaɛlɛ ɔ꞉yomo ɨkɔndɔ yɔ gue ɔngɔ ngɨangɔ, nɔ ɔ꞉ɨnapɨa akʉʉ ɔ mʉtʉ ngʉwɔ Ɛfalaɨmʉ ga ja. Ɨnadɔ, ɨyɔ Ɛfalaɨmʉ ɔɓieni mwana. Ɔ꞉tɔnapɨa ɨkɔndɔ yɔ aɗeku akʉʉ ɔ Manasɛ ga ja. A꞉nagataniso lɨkɔndɔ ta ɓanɨ, ɨnadɔ, Manasɛ ingainga akɛ, a꞉ɓio tapio. 15Ɔ꞉mukiokio Yɛjɛfʉ akɔsugo ɓɔ:

«Asɔɓɨɨ ngɨa ɓaba ngʉɓɔsɛmɨ,

Abalaama nɔ Isaka ɓa꞉ɓimukumo,

Asɔɓɨɨ ngɨa a꞉naɓeyoko ɨmɨ ngbinga ta muɓomu,

akɔɓɔya kʉndʉ ɓʉɓʉnʉ.

16Malaika ngʉwa wa꞉naheiso ɨmɨ, akɔ ɓʉɓɨɓɨ ɓuɓomu,

ukiokio gɔ ɓandambʉ ngʉɓa, ukiokioni-ɛɛ!

Ɓisokonio gɔ, ta nɔ ino ngɨyɛsɛmɨ-ɛɛ,

kʉ nɔ ino yɔ ɓakuku, Abalaama nɔ Isaka-ɛɛ,

ɓicho, nɔ, ɓɔnadaa amati ɔ dɔdɔ, nadaanɨ-ɛɛ.»

17Ɨyɛ ndʉ, Yɛjɛfʉ ɛ꞉na ɓɔ ɨsɛ ɔnapɨɔ ɨkɔndɔ yɔ gue ɔngɔ ngɨangɔ, amʉtʉ wɔ Ɛfalaɨmʉ, yɔmʉkɨa ɓɨɓɨ. Ɔ꞉mʉfa ɨsɛ ɨkɔndɔ, ahata ga aɨnguso amʉtʉ wɔ Ɛfalaɨmʉ, nɔ ɔɨchaniso tɨa amʉtʉ wɔ Manasɛ. 18Ga Yɛjɛfʉ nɔ ɨsɛ ɓɔ: «Sɔkɔmʉ ɓanɨ, aba! Tapio ta ɨyakɛ, napɨya pɨ ɨkɔndɔ yɔ gue ɔngɔ ngɨyɛsɔɔ, ta akʉʉ angɔ.» 19Yakamɛngana, ɨsɛ ɔ꞉yaa ta yaa, nɔ, ɔ꞉musigio ɓɔ: «Haya! Nanɨmbɨa, mwana asɛmɨ, na ta anɨmbɨa. Ɨyɔ Manasɛ, a꞊ɓio sungo kʉ mʉja, nɔ, ɓanɔnɔ ɓangɔ kʉ ɨfananja yɛta ɨja. Yakamɛngana, manye ngɨa mwana, a꞊ɓio sungo tɨa mʉja nɔgbɛ, nayɔ anagaaka, nɔ ɓanɔnɔ ɓangɔ, ɓa꞊ɓio sina itindindi yɔ mababa kɔ ɓombi ɓɔta ɓaja.»

20Ɔ꞉ɓukiokio ɓana ɓɔ Yɛjɛfʉ, nɔ ɓisi ngʉɓɔnanɨ asugo ɓɔ:

«Ɓanɔnɔ ɓɔsɛmɨ ɓɔ꞊ɓieni sina anukiokio mombi, ɓa꞊ɓigbanga ta nɔ mano keno ɓɔ:

‹Asɔɓɨɨ ɨnakɨa gɔ iɗo, ta ndʉ a꞉kɨa Ɛfalaɨmʉ, nɔ Manasɛ-ɛɛ.›»

Yaka ngɨyɛ Ɨsalaɛlɛ a꞉chaniso-ɔɔ Ɛfalaɨmʉ, apɛɨ ɔ Manasɛ, ya꞉kwa ɓanɨ-o.

21Kʉdɔ, Ɨsalaɛlɛ ɔ꞉sigio Yɛjɛfʉ ɓɔ: «Ha gue, ʉka! Nɔmanɔ ɨmɨ aniwo. Yakamɛngana, Asɔɓɨɨ a꞊ɓio ta ɨhɔ nenu. Nɔ, ɨyɔ, a꞊nɨtoso sungo, kʉ aɨkʉmbʉ ngɨyɛ yɔ ɓatʉngwanʉ ɓeno, anɔ Kanana. 22Ɨmɨ ingainga, nɔ꞉namatɨɔ ʉwɛ, ihoi ngɨyɛ Sɛkɛmʉ, anagaaka ɓana ɓɔ anʉ. Ihoi ngɨyɛnɛnɨ, na꞉hɨnɨa Ɓaamɔlɨ, ɨngbaa akɔ mapi nɔ ɓopi ngʉɓɔsɛmɨ.»

Currently Selected:

Mʉkpanganɨa 48: buuN

Highlight

Copy

Compare