Mʉkpanganɨa 47
47
1Kʉdɔ, Yɛjɛfʉ a꞉sa aɓɨa Falaɔ ɓɔ: «Ɓanduku ɓɔsɛmɨ nɔ atɨ aba kʉtaa, ɓɛ꞉kɔ anɨngwa anɔ Kanana, nɔ ɓamɛmɛ, nɔ ɓakɔndɔlɔ, nɔ ɓangɔmbɛ, nɔ ɓayaka ngʉɓeɓo ɓaɓomu. Ɓa tɨa aki, anɔ Gɔsɛnɨ.» 2Yɛjɛfʉ a꞉ɓio ɓɔ, ɔsɨkeni ɓombi ɓɔkʉ ati ɔ ɓamanye, ʉɓa a꞉sa naɓɔ apana Falaɔ. 3Ga Falaɔ naɓɔ ɓɔ: «Nákyɔkɨa-sɨ inu tɛa nga yino tanɨ?» Ɓɔ꞉mutosio ɓɔ: «Isu ɓabaya ɓɔsɔɔ, ta ɓapɛmakɨa ɓɔ ɓamɛmɛ, nɔ ɓakɔndɔlɔ. Tɛa ngɨyɛnɛnɨ, ɓaba ɓa꞉tɨsɨa nayɔ. 4Aki anɔ Kanana, taá yɔbeluo tɨta beluo. Ɨgbɛɨ adaa ngɨa tahuo ɓata nayɔ ɓamɛmɛ, nɔ ɓakɔndɔlɔ, yangɔ tii pɔ. Kʉ ananɨ, tɛ꞉kɔ-ɔɔ ɓɔ tiwolo gʉtʉ ɨkʉmbʉ iyani, ndʉ ɓɛɛka. Atɨsɨa ɓaka ɓɔ, tɨwolo ɨkʉmbʉ anɔ Gɔsɛnɨ.»
5Kʉdɔ, Falaɔ a꞉sigio Yɛjɛfʉ ɓɔ: «Atɨ atɔ nɔ ɓana ɓɔ anʉ, ɓɛ꞉kɔ andɔɔ. 6Ɨkʉmbʉ yɔ Misili iɓomu ya alɨkɔndɔ lɨsɔɔ. Ɓʉpana pɨ ʉgbaa wɔ ɨkʉmbʉ ngʉwɔ ʉdɔɓɔ nɔgbɛ. Ɓiwolo pɨ ɨkʉmbʉ anɔ Gɔsɛnɨ. Nɔ, yɔɓieni ɓɔ wanɨmbɨa ɓague ngʉɓa ɓɔta ɓɛmbɨmbɨanakɛ ati eɓo, ɓʉchwa, ɓiɓio ndɨ ɓangama, akanga mitunduga yɔ ɓanama ngʉɓɔsɛmɨ, ɓɔ kpɛ.»
7Kʉdɔ, Yɛjɛfʉ ɔ꞉mʉtʉmɨa ɨsɛ Yakɔɓɔ, nɔ, ɔ꞉tɔmʉpana Falaɔ. Ɨyɔ Yakɔɓɔ, ɔ꞉mukiokio Falaɔ. 8Ngama Falaɔ ɔ꞉muɓokuo Yakɔɓɔ ɓɔ: «Mago ngʉkɔsɔɔ ka pɛpɛ dɔ tɨa mapɨtanɨ, aɨsɨ ɨpá aka?» 9Yakɔɓɔ ɔ꞉mutosio ɓɔ: «Ha ngama, uɓei ngʉwɔsɛmɨ wa ta gbi, nɔ kʉ ɓʉkaɓʉkaɨ, akpatanakɨa nɔ ʉwɔ ɓakuku, ɨɓɔ jɛnɛ ndʉ ɓɛɛka. Ɨmɨ kʉndʉ mɛɛka, mago ngʉkɔsɛmɨ ka tɨa mɨa mʉngana nɔ ɓatɛkɛɓɛ ɓaatʉ.» 10Yakɔɓɔ ɔ꞉mukiokio ɓata ngama, nɔ, ɔ꞉ngwa, ananɨ amesu kangɔ. 11Ngbanga nɔ ʉpanʉ ngʉwɔ Falaɔ a꞉njo, Yɛjɛfʉ ɔ꞉tɔwoliso atɨ ɨsɛ, nɔ ɓamanye ɨkʉmbʉ tɨa kʉ anɔ Lamɛsɛsɨ#47:11 Lamɛsɛsɨ: pɔ ɓɔ ino ngayɛmɔ yɔ Gɔsɛnɨ, ɔ꞉ɓinjo ihoi. Ʉmʉwa ngʉwɔnanɨ, wa꞉ɓio uɗo nɔgbɛ amati ɔ Misili. 12Yɛjɛfʉ a꞉tinjo atɨ ɨsɛ idyo, ɨhɔ nɔ ɓamanye, nɔ ɨfananja iɓomu ngɨyɛ ɨsɛ, akpatanakɨa nɔ mboi ngɨyeɓo.
Ɓʉngama ngʉɓɔ Yɛjɛfʉ ngbinga ɔ ayende
13Ɨyɛ ndʉ, ayende a꞉sɨkanaka tɨa nɔgbɛ, idyo yɔ꞉sio amati ɔ ɨkʉmbʉ tɨta sio. Ɓombi ɓɔ Misili nɔ ʉɓɔ Kanana, ɓɔ꞉kwa uwondi nɔ taá ngɨyɛnɛnɨ. 14Yɛjɛfʉ ɔ꞉pʉnga gabɨa Ɓamisili, nɔ Ɓakanana idyo. Kʉɓanɨ, ɔ꞉mɔmiso ɓagyɛgyɛ ngʉɓeɓo ta ɓaɓomu ɓɔ sɛ, nɔ, ɔ꞉sa naɓɔ aɨkáá yɔ ɓagyɛgyɛ ngɨyɔ Falaɔ. 15Ɨyɛ ndʉ ɓagyɛgyɛ ngʉɓɔ Ɓamisili, nɔ ʉɓɔ Ɓakanana ɓa꞉sio, Ɓamisili ɓaɓomu ɓɔ꞉mɨsɨnganɨa Yɛjɛfʉ ga hɨtɔɔ, ga ɨɓɔ nayɔ aka ɓɔ: «Ɓagyɛgyɛ ɓɔtɨsio, tiwo ndɨ taá tɨta amesu kʉsɔɔ ɓɔ, atinjo idyo!» 16Yɛjɛfʉ ɔ꞉ɓutosio ɓɔ: «Dɔ ɓagyɛgyɛ ɓɔ꞉nisiyo, anenjeni ɨmɨ mitunduga yɔ ɓanama ngʉɓeno, ɨmɨ nɔninjo dɔ tɨa idyo.» 17Kʉdɔ, ɓɔ꞉mɨkɨa Yɛjɛfʉ nɔ mitunduga yɔ ɓanama ngʉɓeɓo: tɨa akɔ ɓafalasɨ, ɓapunda, ɓangɔmbɛ, ɓakɔndɔlɔ, ɓamɛmɛ, akaya naɓɔ idyo. Amati ɔ igo ngɨyɛnɛnɨ, Yɛjɛfʉ a꞉tɨɓʉgabɨa idyo, anagombonio tɨta nɔ ɓanama ngʉɓeɓo ɓaɓomu.
18Ambise ɔ igo mɛngana, ɓɔ꞉tɔmɨkɨa ɓata Yɛjɛfʉ, ga ɨɓɔ nayɔ ɓɔ: «Ʉwɛ ndʉ makweso, tangɔmʉ nɔwɛ nɔ ɓaɗi, tangɔmʉ pɔ tii pɔ nɔ ɓagyɛgyɛ, mitunduga yɔ ɓanama ya tɨa kʉ inani wa-ɛɛ. Yɔtukoo tɨta ɓɔ isu ɓakuɓɔngɔ, tinjono, ɨhɔ nɔ lihoi ngɨleso. 19Watɨsɨa ndɨ aniwo ta akɔ mesu kʉsɔɔ ɓɔ, nɔ lihoi ngɨleso lɔyanaka? Ɨndɔ atɨkaya ɓaka nɔ lihoi ngɨleso, tɨnɨanɨa gʉtʉ ta nɔ idyo, tɔ꞊ɓio tɨa kʉ ɓabaya ɓɔ Falaɔ. Tinjo pɨ masɔɔ, dɔ, ta꞊tɨsiomʉ, nɔ lihoi ngɨleso la꞊tɨkamʉ maɓɨɨ.»
20Kʉdɔ, Yɛjɛfʉ a꞉kayakɨa Falaɔ, lihoi liɓomu ngɨlɔ ɨkʉmbʉ yɔ Misili. Ɓamisili ɓa꞉gaba lihoi ngɨleɓo ɓanɨ, dɔ, ayende a꞉ɓio ɓɔ, ɔbelueni tɨa kisoɓa. Anɨngwa ananɨ, ɨkʉmbʉ yɛ꞉ka tɨta yɔ Falaɔ. 21Amati ɔ ɨkʉmbʉ yɔ Misili iɓomu, Yɛjɛfʉ ɔ꞉ɓʉfa ɓombi tɨta aɓubaya. 22Yakamɛngana, ɓakumukumu ɓa꞉ɓio ɨɓɔ, nɔ ʉpanʉ ngʉwa wa꞉tɨɓʉpɛmakɨa, anɨngwa atɨ Falaɔ, nɔ, ɓa꞉tɨdyakanakɨa tɨa kʉ ʉpanʉ ngʉwɔnanɨ. Kʉ ananɨ, Yɛjɛfʉ a꞉kayamʉ-ɔɔ ɨyɔ lihoi ngɨleɓo. 23Ga Yɛjɛfʉ nɔ ɓombi ɓɔ: «Ɓʉɓʉnʉ ngɨa, nɔ꞉nɨkayɔ, nɔ lihoi ngɨleno kʉtaa, ná tɨa lɨkyɛmʉ lɔ Falaɔ. Masɔɔ tɨa ʉka, huneni tɨa ɓakʉbaa hʉnanɨ. 24Ngbinga ɔ buoko masɔɔ, né꞊njo suo Falaɔ, mʉngana wɔ ɓɔkʉ. Inu nɔ꞊sɨka tɨa kʉ ɓɔgɨna wɔ ɓɔkʉ, ngʉkɔ tukoo akɔ ɓakʉbaa, nɔ akɔ dyakaka ngɨyeno, ɓambaja ngʉɓeno, nɔ ɓana ɓeno.» 25Ga ɨɓɔ nayɔ aka ɓɔ: «Iii makweso, wɔtɨheiso ta heiso. Tɔbayɔ bayanɨ, ta꞊ɓio ɓabaya ɓɔ Falaɔ, dɔ ʉwɛ, wa꞉tɨpananiso pɛ ɨjɨɔ ngɨyɛsɔɔ.» 26Kʉdɔ, Yɛjɛfʉ a꞉napɨa ʉpanʉ, ngʉwa wakyananakɨa anɔ Misili, akɔɓɔya kʉndʉ ɓʉɓʉnʉ. Wasugo ɓɔ, mʉngana wɔ ɓɔkʉ wɔ masɔɔ, aɓio wɔ Falaɔ. Ta lihoi ngɨlɛ ɓakumukumu nangana, langɔmʉ lɔ Falaɔ.
Yakɔɓɔ enjo ʉpanʉ akʉʉ ɔ ingwo ngɨangɔ
27Ɓaɨsalaɛlɛ ɓa꞉wolo ɨkʉmbʉ anɔ Misili, anɔ Gɔsɛnɨ. Inani, ɓɛ꞉nɨanɨa nɔ lihoi. Ɓɔ꞉nɔta nɔ ɓɔ꞉cho, ɓɛ꞉ka tɨa ɓaja nɔgbɛ. 28Yakɔɓɔ a꞉kwaa anɔ Misili mago tɛkɛɓɛ nɔ mɛɗɨanɛka. Makwaa ngʉkangɔ maɓomu aɨsɨ ɔ ɨpá, ka꞉ɓio mɨa mʉngana nɔ ɓatɛkɛɓɛ ɓɔgɨna nɔ mɛɗɨanɛka. 29Ɨyɛ ndʉ, Ɨsalaɛlɛ ɛ꞉nana ingwo tɨa tinene, ɛ꞉soko mwana angɔ Yɛjɛfʉ, nɔ, ɔ꞉mʉngɨa ɓɔ: «Yɔɓieni ɓɔ nɛnɨanɨa nɔ ɨjɨɔ apɛɨ asɔɔ, ɨndɔ napɨya ɨkɔndɔ ngɨyɛsɔɔ aɨsɨ ɔ ɨpɔɔ ngɨyɛsɛmɨ aka, nɔ, wɔpananiso iɗo iɗo nɔ ɓʉkʉnda. Kikiliki, watɨnahʉnamʉ iyani anɔ Misili! 30Ndʉ nawo, ɔngwa nɛmɨ aka ta nɨngwa, nɔ, wɔsa nɛmɨ ahʉna, ta ɨda mɛngana nɔ ɓaba, inani amanjaʉ ngʉkeɓo.» Ɔ꞉mutosio ɓɔ: «Iii aba, na꞊kɨa ta ɓanɨ.» 31Ga ɨyɔ ɓata nɔ Yɛjɛfʉ ɓɔ: «Anakio gɔ silika.» Kʉdɔ, ɔ꞉mukio silika kʉndʉ ananɨ. Mbise ɔngɔ, ɨyɔ Ɨsalaɛlɛ ɔ꞉gbʉkʉmɨa ga gbʉkʉ, ananɨ amʉtʉ wɔ kanga ngɨangɔ.
Currently Selected:
Mʉkpanganɨa 47: buuN
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc.
