Mʉkpanganɨa 45
45
Yɛjɛfʉ ɔchweyenekio ɓamanye
1Yɛjɛfʉ a꞉ɓiomʉ ɓata adaa ngɨa afana-ɔɔ mʉtɨma, apɛɨ ɔ ɓombi ɓɔ tɛa ngʉɓangɔ ɓaɓomu. Kʉdɔ, ɔ꞉ɓutitio ɓɔ ɓɨ꞉chwɛa aɓei. Mombi pɔ mʉngana ɔ꞉tukoomʉ anambamba angɔ, ngbinga ngɨa a꞉ɓio-ɔɔ achweyenekio ɓamanye. 2Gue ɔ꞉natɨa nɔ ɨpaka yɔ ndɨa, ɓɔ waa waa! Ɓamisili ɓɔ꞉mʉka ndɨa, nɔ ɨkáá ngɨyɔ Falaɔ iɓomu, ɓɔ꞉mʉka kʉ kanɨ. 3Ga Yɛjɛfɛ nɔ ɓamanye aka ɓɔ: «Inu ɓana ɓɔ ɨnaa, ɨmɨ Yɛjɛfʉ ɨyakɛ! Aba a ndɨ-sɨ ta aubei?» Yakamɛngana, ananɨ apɛɨ angɔ ɓamanye ɓɔ꞉kwa ʉɓá, nɔ, sɔkɔmʉ ɓɔ꞉mutosio pɔ yaka.
4Ga Yɛjɛfʉ nɔ ɓamanye aka ɓɔ: «Kikiliki, ɨsɨnganeni tinene nɛmɨ.» Kʉdɔ, ɓɔ꞉mɨsɨnganɨa ta ɓanɨ. Ga ɨyɔ ɓɔ: «Inu, ná꞉nagaba jɛnɛ ɨmɨ, iyani anɔ Misili, ndʉ baya. Ɨmɨ, mwana ɔ anʉ eno Yɛjɛfʉ, ta ɨya. 5Ɨtakɨtakɨ ngɨyɛ, akʉʉ yaka ngɨyɛnɛnɨ ná꞉nagaba-ɔɔ, nátɨdyamʉ ikoko, nɔ, nátɨnamʉ ɓɔ ná꞉kɨa ɓɨɓɨ kʉɓanɨ. Asɔɓɨɨ akɛ, a꞉natʉma ɨmɨ, iyani apɛɨ ɔ eno, dɔ, niheiso uɓei wɔ ɓombi ɓaja. 6Aka taa ya꞉kwa pɔngɔ-ɔɔ akɔ dɔdɔ, mago ka tɨa kapɨnɨ. Yɔtukoo ɓata kʉ mago ɓɔkʉ kɔ taa, ʉka yangɔɓiomʉ-ɔɔ nɔ ɨhʉna, pɔ angbinga ɔ buoko masɔɔ. 7Asɔɓɨɨ akɛ, a꞉natʉma ɨmɨ iyani apɛɨ, ɓɔ dɔ, ɨnɨanɨeni nɔ ɓanɔnɔ aka, amati ɔ ɨkʉmbʉ ngɨyɛ, nɔ, nátisiomʉ kʉɓanɨ. Ya ɓʉhɛa ngʉɓa ɓɔta ɓʉja. 8Kʉɓanɨ, angɔmʉ inu akɛ, ná꞉natʉma ɨmɨ iyani, ya ta Asɔɓɨɨ. Ɨyɔ ingainga akɛ, a꞉nekisiso pɔngɔ ɨmɨ, aɓio nɛbaya ata mʉja ɔ Falaɔ. Kʉ ɨyɔ, a꞉napɨa ɨmɨ, akɔkyendekiso ɨmbaa ngɨyɔ Falaɔ iɓomu, nɔ ɓio ngama akanga ɨkʉmbʉ yɔ Misili iɓomu.
9Seni gagaa anʉngɨa aba ɓɔ: ‹Mwana asɔɔ Yɛjɛfʉ, ɔ꞉sugo ɓɔ: Iyani anɔ Misili, Asɔɓɨɨ a꞉nachwa pɛ ɨmɨ, akanga ɨkʉmbʉ iɓomu.› Musigieni ɓɔ ɨka iyani na-ɛɛ gagaa. 10Ɔ꞉sugo ɓata kʉ ɓɔ: ‹Wabiwolo ɨkʉmbʉ ta tinene nɔ ɨmɨ anɔ Gɔsɛnɨ aka, ʉwɛ makwɔngɔ, nɔ ɓana ɓɔsɔɔ, nɔ ɓanɔnɔ ɓɔsɔɔ, nɔ ɓamɛmɛ, nɔ ɓangɔmbɛ ngʉɓɔsɔɔ, nɔ ɓayaka ngʉɓɔsɔɔ ɓaɓomu. 11Inani anɔ Gɔsɛnɨ, ɨmɨ makwɔngɔ na꞊mʉpɛmakɨa, dɔ, mago kɔ taá kɔtukoo ɓata-sɨ kʉ ɓɔkʉ. Iɗo ambɔ nátɨkwamʉ angɨɔ ɔ ɨkyɛmʉ.›»
12Ga Yɛjɛfʉ ɓata kʉ ɓɔ: «Nɛ́꞉nɔ nɔ mesu, kʉndʉ Bɛnjamɛ ngɨa isu, ta꞉chwɛa nayɔ ɓɔ kpɛ, ɛ꞉nɔ tɨa kʉ ɨnanɨ ɓɔ ta ɨmɨ ingainga akɛ, nanenu anʉngakɨa yaka ngɨyɛ. 13Nábingakɨa aba ɓɔ ɨmɨ Yɛjɛfʉ, na mombi ata mʉja iyani anɔ Misili. Mʉ꞊ngakɨeni yaka ngɨyɛ nɛ́꞉nɔ nɔ mesu. Ɨkeni nɔ atɨ aba aka ta gagaa.» 14Mbise ɔngɔ, ɔ꞉mʉnaputo manye Bɛnjamɛ ga putu, ɔ꞉mʉkpanga akɔ ɨmɨyɔ, kʉdɔ ɨɓɔ ɓapɨnɨ ɓaɓomu, ɓɔ꞉pʉnga ndɨa. 15Ɨyɔ-sɨ ta amati ɔ ndɨa, ɔ꞉naputoko ɓamanye ngʉɓɔmɔ, ga putu putu, ta ɓaɓomu. Ambise ɔngɔ, ɓanduku ɓangɔ ɓɔ꞉potio tɨa yakanaka nayɔ.
Ɓɔtʉmɨɔ Yakɔɓɔ anɨka anɔ Misili
16Ɨyɛ ɨsaʉ ngɨyɛnɛnɨ, ya꞉ɓɔya atɨ Falaɔ ɓɔ, ɓamanye ɓɔ Yɛjɛfʉ ɓɛ꞉kɔ pɛngɛ ɨkanɨ, ɨɓɔ nɔ ɓafandɔngɔ, ɓɔ꞉kwa ɨgyagya. 17Ga ngama nɔ Yɛjɛfʉ aka ɓɔ: «Sigio ɓana ɓɔ anʉ ɓɔ, ɓɨpakiso ɓanama ngʉɓeɓo ɓasakɨ, ɓɨngwɨa kyɛnda, nɔ, ɓɨtɔwa anɔ Kanana. 18Mʉsɨkeni atɔ eno, nɔ anja muɓomu ngɨyeno, nɔ, nɛka awolo ɨkʉmbʉ tinene anɔ ambamba asɛmɨ aka. Na꞊ninjo ihoi ngɨyɛ yanɔ ʉdɔɓɔ nɔgbɛ, anɔ Misili aka, nɔ, ná꞊ɓio adyakaka iɗo nɔgbɛ. 19Ɓinjo ʉpanʉ ɓɔ, anɨngwa gbɛgbɛ ta anɔ Misili aka, ɓɨsɨka mɨtʉka ngɨyɛ ɓapunda ɓaɗuɗuo, anɨsa atʉmba ɓana, nɔ ɓoi ɓeɓo, nɔ atɨ ɨsɛ eɓo kʉtaa, ɓɨka naɓɔ. 20Ɓa꞊tiɓiomʉ nɔ ɓatumo, akʉʉ lɨkyɛmʉ ngɨleɓo ɓa꞊lɨsɨa inani anɔ Kanana, dɔ, ikesi yɛta manjanja iɓomu ngɨyɛ ya iyani anɔ Misili, ya꞊ɓio amʉtʉ weɓo.»
21Kʉdɔ, ɨɓɔ ɓana ɓɔ Ɨsalaɛlɛ ɓa꞉baya ɨɓɔ tɨa kʉ ananɨ. Yɛjɛfʉ ɔ꞉ɓinjo mɨtʉka, nɔ idyo kʉtaa, ngbanga ta ndʉ ananɨ Falaɔ a꞉mutitio-ɔɔ, ɓɔ ɨkɨa. 22Enjo mombi nɔ mombi ati eɓo, lɨpʉkʉ lɨta manjanja. Yakamɛngana, e꞉njo Bɛnjamɛ nangana, mangyɛɛ kɔ mako kɔ dada lɨmɨa ɗietu, ɨhɔ nɔ lɨpʉkʉ lɨta manjanja ɓɔkʉ. 23Tɨa akɔ yaka yɔ ɨsɛ eɓo, a꞉tʉma ɓague ɓɔ ɓapunda tɛkɛɓɛ, ɓɔtʉmbakeni ɓayaka ɓɔta manjanja ngʉɓɔ Misili. Nɔ, ɓoi ɓɔ ɓapunda tɛkɛɓɛ ɓa꞉tʉmbaka eɓo nganɔ, nɔ mɨkatɨ, nɔ madyo di di di, akɔ yaka yɔ kyɛnda ngɨangɔ. 24Kʉdɔ, e꞉njo ɓanduku ɓangɔ kyɛnda ɓɔ ɓɨsa. Ga ɨyɔ naɓɔ ɓɔ: «Nátɨyakanenimʉ mangoi anɔ ɨngbaa!»
25Kʉdɔ, ɨɓɔ ɓa꞉ngwa anɔ Misili, ɓɔ꞉tɔwa anɔ Kanana atɨ ɨsɛ eɓo Yakɔɓɔ. 26Ɓɔ꞉mʉngakɨa akɔsugo ɓɔ: «Ha aba-e! Mwana asɔɔ Yɛjɛfʉ a-sɨ ta a ubei. Nɔ ɨyɔ akɛ, a mombi ngɨa akɔkanga ɨkʉmbʉ, yɔ Misili iɓomu.» Yakamɛngana, Yakɔɓɔ ɔ꞉gbaa nɔ ingwo ɓɔ woo, dɔ, abayɔmʉ yaka ngɨa ɓa꞉mʉngakɨa. 27Yakamɛngana, ndʉ ɓa꞉mʉngakɨa masaʉ maɓomu, ngʉka Yɛjɛfʉ a꞉mʉtʉmakɨa, nɔ, ɛ꞉na tɨa kʉ nɔ mɨtʉka ngɨyɛ Yɛjɛfʉ a꞉mʉtʉmɨa nayɔ akpataka, kʉdɔ, mʉtɨma ngʉwɔ Yakɔɓɔ, wɔ꞉mʉdʉdʉa ga dʉʉ. 28Ga Ɨsalaɛlɛ aka ɓɔ: «Iii, ya ɓanɨ, ambɔ mwana asɛmɨ Yɛjɛfʉ a gɔ-sɨ ta ubei! Pɛɨ ngɨa na꞊wo-ɔɔ, nabimɨna-sɨ ta ɨnanɨ!»
Currently Selected:
Mʉkpanganɨa 45: buuN
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc.
