Mɨkyananakɨa 9

Saulo ɔnacho mʉtima

1Akɔ angbinga ngɨananɨ, Saulo a꞉ɓio ta anɨsɨnganaka asagɨa ɓakpata ngʉɓɔ Makwɔɓɨɨ, ga a꞊ɓʉdʉka ta dʉka. Kʉdɔ, ɔ꞉sa agbʉka ngama ɔ ɓakumukumu, 2nɔ ɔ꞉mɨta ɓabalʉa ngʉɓa a꞊bi naɓɔ, alɨkáá lɔ nɨta ngɨlɔ Ɓayuda, la anɔ Damasɛkɛ. Ʉbalʉa wɔngɔ wa꞉ɓio nɔ ʉpanʉ ɓɔ ɔɓʉgbʉkeni ɓombi inani, ɓague kʉndʉ ɓoi ɓoɓieni akɔkpata Ɨngbaa ngɨyɔ Makwɔɓɨɨ, ɨɓʉfa, nɔ ɛka naɓɔ ɓasangɛ anɔ Yelusalɛma.

3Ɨyɔ tɨta anɔ ɨngbaa, tɨa tinene nɔ Damasɛkɛ, kʉdɔ, ta gagaa akɔ angbinga ngɨananɨ, ʉwanga mʉngana wɔjɛa anɨngwa akʉʉ ɔ ɓisi, nɔ wɔ꞉mukunguo. 4Ɔ꞉kwa akɔ ɛsɨ ga kpruu, nɔ, ɔ꞉ka iso mɛngana nayɔ asigio ɓɔ: «Saulo, Saulo, wanɛmɨ akyananaka ɓanɨ, dɔtanɨ?» 5Saulo ɔ꞉ɓokuo ɓɔ: «Makwasɛmɨ, ʉwɛ wa anɨ?» Iso ngɨyɛnɛnɨ yɔ꞉mutosio ɓɔ: «Ɨmɨ, na Yeso ɨya, wanayɔ akɔkyananaka. 6Yakamɛngana, ʉngwa pɨ ɨkʉʉ, nɔ wɔkumonio amati ɔ gʉlʉ, inani ɓa꞊binasigio yaka ngɨyɛ wakwanana akɔkɨa.»

7Ɓombi ngʉɓa ɓa꞉ɓio akɔkyɛnda nɔ atɨ Saulo, ɓɛ꞉maa nɔ ʉɓá, nɔ, sɔkɔmʉ ɓɔ꞉sugo yaka. Ɓɔ꞉ka ta iso, yakamɛngana, sɔkɔmʉ ɓɨna mombi. 8Saulo ɔ꞉ngwa aɨsɨ, ɔ꞉ɓono mesu, yakamɛngana, sɔkɔmʉ ɛ꞉na ɓata pɔ bele. Ɓa꞉sa nayɔ anɔ Damasɛkɛ tɨta ɨkɔndɔ iɓote. 9Ɔ꞉kɨa makwaa kaatʉ, sɔkɔmʉ anɨna, pɔ nɨdya, pɔ anɨmwa ɨkyɛmʉ.

10Inani anɔ Damasɛkɛ, ya꞉ɓio nɔ mʉkpata mʉngana ino ɓɔ Ananɨa. Makwɔɓɨɨ ɔ꞉mijeyo amati ɔ ɨkyɛmʉ ndʉ lɨwɔtɔ, nɔ, ɔ꞉musigio ɓɔ: «Ananɨa!» Ga ɨyɔ ɓɔ: «Makwasɛmɨ, ɨmɨ ɨya.» 11Makwɔɓɨɨ ɔ꞉musigio ɓɔ: «Ɨmaa, nɔ, wɔkpata mʉgyɛndɔ ngʉwa ino ɓɔ mʉgyɛndɔ wɔta Ngbingbii, nɔ, wɔsa ahata mombi mʉngana ɔ Talɨsɔ, ino ɓɔ Saulo, inani aɨkáá ngɨyɔ Yuda. Ɨtakɨtakɨ ngɨyɛ, amati ɔ nɨta Asɔɓɨɨ. 12Ɛ꞉na pɛ mombi mʉngana ino ɓɔ Ananɨa amati ɔ ɨkyɛmʉ ndʉ lɨwɔtɔ. Mombi ɔngɔ a꞉ɓio pɛ akumonio ambɛnɨ mʉngana ɓɔ, nɔ nayɔ anapɨa lɨkɔndɔ, dɔ, ɨpʉnga ɓata anɨna.»

13Kʉdɔ, Ananɨa ɔ꞉tosio ɓɔ: «Makwasɛmɨ, ɓombi ɓaja ɓa꞉nɔngakɨa pɔngɔ yaka yɛta ɓɨɓɨ kʉ iɓomu, ɨyɛ mombi ngɨananɨ a꞉kɨa anɔ Yelusalɛma, akʉʉ ɓombi ngʉɓa ɓa꞉nabaya ʉwɛ. 14Nɔ, ɓangama ɓɔ ɓakumukumu, ɓa꞉minjo pɛ ʉpanʉ afeyo ɓombi ɓaɓomu ngʉɓa ɓanɨchwa ino ngɨyɛsɔɔ amati ɔ nɨta.» 15Yakamɛngana, Makwɔɓɨɨ ɔ꞉musigio ɓɔ: «Sa-pɨ, dɔ Ɨmɨ akɛ, na꞉chwa pɛ mombi ngɨananɨ, akɔnimbiiso Ino ngɨyɛsɛmɨ amababa kɔ ɓombi, ɨhɔ nɔ ɓangama ngʉɓeɓo, nɔ kʉ akɔ ɓana ɓɔ Ɨsalaɛlɛ. 16Ɨmɨ makwɔngɔ, na꞊mʉpana ɓʉkaɓʉkaɨ ɓuɓomu, ʉɓa, a꞊chana amati ɔngɔ, akʉʉ ɔ yaka ngɨyɛsɛmɨ.»

17Kʉdɔ, Ananɨa ɔ꞉sa, nɔ, ɔ꞉kumonio ambɛnɨ, ɔ꞉napɨa lɨkɔndɔ akʉʉ ɔ Saulo, ɔ꞉musigio ɓɔ: «Saulo nduku asɛmɛ! Makwɔɓɨɨ Yeso ɨyakɛ a꞉nejeyo pɛ anɔ ɨngbaa aki wa꞉ɓio pɛ-ɛɛ anɨka, ɔ꞉natʉmɔ ga pʉnga ɓata nɨna, nɔ, uhuo nɔ Mʉtɨma wɔta Tu.» 18Kʉdɔ, ta gagaa ngɨananɨ, ɨkyɛmʉ mɛngana ndʉ lakakʉ lɔ꞉mʉɓwana Saulo anɨngwa akɔ mesu, nɔ, ɔ꞉pʉnga ɓata anɨna. Ɔ꞉ngwa ɨkʉʉ, nɔ, ɔ꞉kwa uɓatiso. 19Ɔ꞉dyakaka, angu ngɨangɔ ɔ꞉tɔwa ɓata ta muɓomu.

Saulo ɔɓɨakɨɔ Ɨsaʉ anɔ Damasɛkɛ

Saulo a꞉kɨa ɓata-sɨ mikpekpe yɔ makwaa ta kɨanɨ ɨhɔ nɔ ɓakpata ngʉɓa ɓɔ Damasɛkɛ. 20Ta gagaa ngɨananɨ, ɔ꞉pʉnga ɓɨakɨa alɨkáá lɔ nɨta ngɨlɔ Ɓayuda, ɓɔ Yeso a mwana ɔ Asɔɓɨɨ. 21Yaka ngɨyɛnɛnɨ, ya꞉mbangɨa ɓombi ngʉɓa ɓa꞉ɓio nayɔ anʉka ɓɔ꞉ɓokuo ɓɔ: «Sɔkɔmʉ gue ngɨa a꞉ɓio pɔngɔ akyananaka ɓombi ngʉɓa ɓachweyoko ino yɔ Yeso anɔ Yelusalɛma, ɨyakɛ? Nɔ, ɛ꞉kɔ dɔ ɓʉnʉ aka ta naɓɔ afeyo, nɔ, anɨsa naɓɔ apɛɨ ɔ ɓangama ɓɔ ɓakumukumu?» 22Yakamɛngana, Saulo ɔ꞉pʉnga anɨka tɨa ɓʉmʉ nɔgbɛ amati ɔ báya. Angbinga ngɨa a꞉ɓio-ɔɔ apana aɓʉmba ɓɔ Yeso a Masia, Ɓayuda ngʉɓɔ Damasɛkɛ ɓa꞉ɓiomʉ ɓata nɔ yaka ngɨyɛ ɓaitosio.

23Ambise ɔ makwaa maja, Ɓayuda ɓɔ꞉kwaisio ga ɓamʉwa Saulo ta asini. 24Ambenigɔɓɔpe, Saulo ɔ꞉ka idimi yɔngɔ ta pɛɨ. Ɓɔ꞉pʉnga nayɔ aɓɛtɨa anɔ umongu wɔ gʉlʉ naɓutu kʉndʉ nɔ musoti ga dɔ ɓɨmʉwa. 25Kʉdɔ, ɓakpata ngʉɓɔ Saulo ɓɔ꞉mʉsɨka naɓutu, ɓɔ꞉mʉmaya amati ɔ itumo, nɔ, ɓɔ꞉mudiso aɓei ɔ aga ɔ gʉlʉ#9:25 pɔ ɓɔ, ijiliɓa yɛta ikongo ngɨyɛ ɓa꞉kunguo nayɔ gʉlʉ.

Saulo ɔsɔ anɔ Yelusalɛma

26Angbinga ngɨa Saulo a꞉ɓɔya-ɔɔ anɔ Yelusalɛma, ɔ꞉kanio ajonokio ɨhɔ nɔ ɓakpata, yakamɛngana, ɨɓɔ ɓaɓomu ɓo꞉ɓio nayɔ ta akumo. Ɓa꞉ɓiomʉ abaya ɓɔ Saulo, ɔ꞉natanɔ mʉkpata ta ingono. 27Kʉdɔ, Balanaba ɔ꞉mʉsɨka, ɔ꞉sa nayɔ apɛɨ ɔ ɓatitima. Ɔ꞉ɓʉngakɨa ngbanga ndʉ aka, Saulo ɛ꞉na pɔngɔ-ɔɔ Makwɔɓɨɨ anɔ ɨngbaa yɔ Damasɛkɛ, nɔ kʉndʉ aka Makwɔɓɨɨ a꞉yakanaka pɔngɔ-ɔɔ nayɔ. Ɔ꞉ɓʉngakɨa ngbanga kʉndʉ aka Saulo a꞉ɓɨakɨa pɔngɔ-ɔɔ Ɨsaʉ akɔ ino yɔ Yeso anɔ Damasɛkɛ, sɔkɔmʉ nɔ ɓajatwoko. 28Anɨngwa angbinga ngɨananɨ, Saulo a꞉ɓio tɨta ɨhɔ nɔ ɓakpata anɔ Yelusalɛma. A꞉ɓɨsa nɔ tɔwa akɔɓɨkɨa Ɨsau akɔ ino yɔ Makwɔɓɨɨ, sɔkɔmʉ nɔ ɓajatwoko. 29A꞉ɓio ayakanaka nɔ ɗuɗuono ɨhɔ nɔ Ɓayuda ngʉɓa ɓayaka Igiliki, yakamɛngana, ɨɓɔ ɓa꞉ɓio ahata ga ɓamʉwa ta nɨwa. 30Ngbinga ngɨa ɓaklisito ɓɔ꞉ka-ɔɔ yaka ngɨyɛnɛnɨ, ɓɔ꞉sa nayɔ anapɨa anɔ Kaisalia, ɓɔ꞉mʉsɨa anɨsa anɔ Talɨsɔ.

31Kanisa a꞉ɓio amati ɔ majɨɔ aihoi iɓomu ngɨyɔ Yudɛa, nɔ ɨyɔ Galilaya, nɔ ɨyɔ Samalɨa. Ɛ꞉ka ɓʉmʉ amati ɔ báya, nɔ, ɔ꞉kyɛndaka ɛsɨ ɔ mapanʉ ngʉkɔ Makwɔɓɨɨ, nɔ, ɛ꞉sɨnganaka nɔ pɛɨ ɨngbaa akɔ angu ɔ Mʉtɨma wɔta Tu.

Pɛtɛlɔ ɔheiso Ɛnɛa

32Pɛtɛlɔ a꞉ɓio achanaka akangaka ɓombi ngʉɓa ɓabaya, amati ɔ lɨkʉmbʉ ngɨlɛnɛnɨ ta liɓomu. Kʉdɔ ɓisi mʉngana, a꞉sa atɨ ɓombi ngʉɓa ɓabaya Yeso amati gʉlʉ mʉngana ino ɓɔ Lida. 33Inani, a꞉gbʉka gue mʉngana ino ɓɔ Ɛnɛa. Gue ngɨananɨ, a꞉ɓio jikɛsɨ, nɔ amati ɔ mago ɓɛgɨna ta ɓakwaɨ. 34Pɛtɛlɔ ɔ꞉musigio ɓɔ: «Ɛnɛa, Yeso Klisito ɔnaheiso. Ɔngwa ɨkʉʉ, nɔ, wɔguɓo ɓʉkwaa ngʉɓɔsɔɔ!» Ta gagaa ngɨananɨ, Ɛnɛa ɔ꞉ngwa ɨkʉʉ ga ɗasa. 35Ɓombi ɓaɓomu ngʉɓɔ gʉlʉ ɔ Lida, ɨya a꞉ɓio amati ɔ ihoi yɔ Salɔna, ʉɓa ɓa꞉mɨna Ɛnɛa tɨa akyɛndaka, ɓɔ꞉baya Makwɔɓɨɨ.

Pɛtɛlɔ ɔjʉkaniso Dolika akɔ ingwo

36Anɔ Yɔpa, ya꞉ɓio nɔ mʉkpata mʉngana ata moi, ino ɓɔ Tabita (nɔ mʉyakɨa ngʉwɔ Igiliki ino ngɨyɛnɛnɨ ya ɓɔ «Dolika» ɨsɨ yɔngɔ ɓɔ magaɓue). A꞉ɓichaniso ngbinga mʉja akɨa ɓombi iɗo, nɔ akɔninjokonoko ɓayajanga. 37Angbinga ngɨananɨ, ɔ꞉kwiso kaɓu ta nɔ ingwo. Ndʉ ɓa꞉mʉjaɓaka, ɓɔ꞉mukwaiso ambɛnɨ mʉngana ngɨa a꞉ɓio nɔ ɨkʉʉ amati ɔ ɨkáá. 38Ɓakpata ngʉɓɔ Yɔpa, ɓɔ꞉ka ɓɔ Pɛtɛlɔ anɔ Lida ngɨa a꞉ɓio kʉ tinene nɔ Yɔpa. Ɓɔ꞉mʉtʉmɨa ɓague ɓapɨnɨ nayɔ asigio ɓɔ: «Tɔnɛtɔ ʉwɛ anɨka iyani andɛsɔ gagaa.» 39Pɛtɛlɔ ɔ꞉ngwɨa kyɛnda atɔwa ɨhɔ naɓɔ ta gagaa. Ndʉ a꞉ɓɔya, ɓɔ꞉sa nayɔ ambɛnɨ ngɨa a꞉ɓio nɔ ɨkʉʉ amati ɔ ɨkáá. Ɓawoko ɓaɓomu ɓɔ꞉mɨsɨnganɨa nɔ ndɨa, nɔ, ɓɔ꞉mʉpana lɨpʉkʉ lɔ ɨkʉʉ nɔ ɓakoti ngʉɓa Tabita a꞉kɨa, ngbinga ngɨa a꞉ɓio sɨ-ɔɔ kʉ akɔ uɓei. 40Pɛtɛlɔ ɔ꞉chweiso ɓombi ɓaɓomu aɓei, ɔ꞉gbʉkʉmɨa nɔ mawu, nɔ ɛ꞉ta Asɔɓɨɨ. Kʉdɔ, ɔ꞉natana mesu aki ndʉtʉ ya꞉ɓio-ɛɛ ikwaise, ɔ꞉sugo ɓɔ: «Tabita ʉngwa ɨkʉʉ!» Ɔ꞉gana mesu, ɨyɔ anɨna Pɛtɛlɔ ta nɨna ɓɔ, ɔ꞉wolo ga sele. 41Pɛtɛlɔ ɔ꞉mupoto ɨkɔndɔ nɔ ɔ꞉mimaiso. Ambise ngɨananɨ, ɛ꞉soko ɓawoko, ɨhɔ nɔ ɓombi ngaɓɔmɔ ʉɓa ɓabaya Yeso, nɔ, ɔ꞉ɓʉpana Tabita tɨta mʉhɛyɛ. 42Yaka ngɨɛnɛnɨ, yɛ꞉mbɨanɨa amati ɔ gʉlʉ ɔ Yɔpa muɓomu, nɔ ɓombi ɓaja ɓɔ꞉baya Makwɔɓɨɨ. 43Pɛtɛlɔ a꞉kwaa makwaa maja anɔ Yɔpa, atɨ gue mʉngana ino ɓɔ Simoni. Gue ngɨananɨ, a꞉ɓituo ɓayaka nɔ mamba kɔ ɓanama.

Currently Selected:

Mɨkyananakɨa 9: buuN

Highlight

Compare

Copy