Mɨkyananakɨa 10

Malaika ejeyo Kolonelio

1Ya꞉ɓio nɔ gue mʉngana, anɔ Kaisalia ino ɓɔ Kolonelio. Ɨyɔ, a꞉ɓio ngama wɔ ndiba ɔ ɓasʉda ngɨa ɓamisoko ɓɔ Ndiba ɔ Italia. 2Gue ngɨananɨ, a꞉ɓio nɔ kɛkɛɛ akɔ tɛa yɔ Asɔɓɨɨ, nɔ ɔ꞉kumo Asɔɓɨɨ nɔ anja ngɨangɔ muɓomu. A꞉ɓisalɨa ɓajanga ngʉɓa ɓɔ Ɓayuda nɔgbɛ, nɔ, ɛ꞉ta Asɔɓɨɨ kʉ nɔgbɛ. 3Ambise ɔ musoti tinetine ndʉ saa ɨsaɓɔkʉ, Kolonelio ɛ꞉na malaika wɔ Asɔɓɨɨ iɗo nɔgbɛ amati ɔ ɨkyɛmʉ ndʉ lɨwɔtɔ. Malaika ɔngɔ, a꞉ɓio akumonio andɔngɔ, nɔ, nayɔ anisoko ɓɔ: «Kolonelio!» 4Ɔ꞉kanga malaika nɔ ʉɓa, nɔ, ɔ꞉musigio ɓɔ: «Ya tanɨ Makwasɛmɨ?» Malaika ɔ꞉mutosio ɓɔ: «Nɨta ngɨyɛsɔɔ, nɔ apɛpɛ ngɨa wakyenjo ɓayajanga, Asɔɓɨɨ ɔbayɔ bayanɨ.» 5Ɨtakɨtakɨ ngɨyɛ, tʉma ɓague anɔ Yɔpa, nɔwɛ anɨsokio gue mʉngana ino ɓɔ Simoni, kʉ ɓɔ Pɛtɛlɔ. 6Ɨyɔ, akunyoko suo atɨ Simoni ngɨa atambanaka mamba kɔ ɓanama. Ɨkáá ngɨangɔ, ya amutii wɔ nesini ngɨa ata mʉja. 7Akɔ angbinga ngɨa malaika ngɨa a꞉ɓio nayɔ asigio yaka a꞉tɔa-ɔɔ, kʉdɔ, Kolonelio e꞉soko ɓombi ɓapɨnɨ ati ɔ ɓombi ɓɔ tɛa ngʉɓangɔ, nɔ sʉda angɔ mʉngana wɔ kɛkɛɛ akɔ tɛa yɔ Asɔɓɨɨ, ati ɔ ɓasʉda ngʉɓa ɓa꞉pʉnga jɛnɛ nayɔ akɔkyananakɨa kʉ ɨjɛnɛ. 8Ndʉ a꞉ɓʉngakɨa yaka ngɨyɛnyɛnɨ iɓomu, kʉdɔ, ɔ꞉ɓʉtʉma anɔ Yɔpa.

Pɛtɛlɔ ɛnɔ yaka alɨwɔtɔ

9Nekuɓa yɔngɔ, ɨɓɔ tɨta anɔ ɨngbaa nɔ tɨa tinetine nɔ Yɔpa, tɨa nɔ musoti, Pɛtɛlɔ ɔ꞉ɗeto akʉʉ ɔ ʉpaʉ wɔ ɨkáá aki a꞉ɓio-ɛɛ anɨta. 10Ɔ꞉kwa taa, nɔ ɔ꞉hata ɓɔ ɨdyakaka gɔ pɛngɛ. Ɨyɛ ndʉ ɓa꞉ɓio tɨa nayɔ asookio, ɛ꞉na yaka mɛngana ndʉ lɨwɔtɔ. 11Amati ɔ yaka yɔngɔ, ɓisi ɓa꞉gananɨa, nɔ ɨkyɛmʉ mɛngana yɛta ɨja, nɔ lindu ɓɔgɨna ndʉ ɨbʉbʉ, yɔ꞉pʉnga anujo ɛsɨ. 12Inani amati ɔ ɨkyɛmʉ ngɨyɛnɛnɨ, ya꞉ɓio nɔ Migbo yɔ ɓanama ɓaɓomu ngʉɓɔ mɨtɨndɨ ɓɔgɨna, nɔ ɓanama ngʉɓa ɓaɗuɗuono aɨsɨ, nɔ migbo yɔ ɓanoi ɓaɓomu. 13Isó mɛngana yɔ꞉musigio ɓɔ: «Pɛtɛlɔ, ɔngwa ɨkʉʉ, ʉwa, nɔ wɔdya!» 14Pɛtɛlɔ ɔ꞉tosio ɓɔ: «Pɔ bele Makwɔɓɨɨ, dɔ ɨmɨ, na꞉ngɔdyamʉ sina ɨkyɛmʉ yɔ ɔpɛ, nɔ ɨyɛ yɔ mʉgwɛ!#10:14 pɔ ɓɔ, Asɔɓɨɨ enjo ʉpanʉ ɓɔ ɓatɨdyamʉ.» 15Isó ngɨyɛnɛnɨ, yɔ꞉kanɨa ɓata machaa kapɨnɨ, yɔ꞉musigio ɓɔ: «Ʉwɛ, watɨkiisomʉ ɔpɛ akʉʉ ɨkyɛmʉ ngɨyɛ Asɔɓɨɨ a꞉jaɓaka.» 16Yaka ngɨyɛnɛnɨ, ya꞉kɨanɨa machaa kaatʉ, ta gagaa ambise ngɨananɨ, yɔ꞉tʉmbanɨa atɔa kʉ akʉʉ ɔ ɓisi.

17Pɛtɛlɔ ɔ꞉pʉnga ɓokwono ɓɔ yaka ngɨyɛnɛnɨ ɛ꞉nɔ ndʉ alɨwɔtɔ, ɓɔ ɨsɨ yɔngɔ ya-sɨ tanɨ? Kʉ angbinga mʉngana ngɨananɨ, ɓague ngʉɓa Kolonelio a꞉ɓʉtʉma ɓɔ꞉ɓio akɔhata ɨkʉmbʉ ngɨyɔ Simoni, nɔ ɨtakɨtakɨ ngɨyɛnɛnɨ, ɓa tɨa anɔ umongu. 18Kʉdɔ, ɓɔ꞉pʉnga asoko, nɔ ɓokuo ɓɔ: «Ɨkʉmbʉ ngɨyɛ Simoni, ngɨa eno yɔmɔ ɓɔ Pɛtɛlɔ akɨa suo-ɔɔ ya ndɨ aka?» 19Itungwio ngɨyɔ Pɛtɛlɔ ya꞉ɓio-sɨ ta akʉʉ ɔ yaka ngɨyɛ ɛ꞉nɔ ndʉ lɨwɔtɔ, kʉdɔ, ga Mʉtɨma wɔta Tu nayɔ ɓɔ: «Ɓague ɓaatʉ ɓa aka, ɓanɔwɛ akɔhata. 20Ʉngwa ɨkʉʉ, wɔjo nɔ wɔsa ɨhɔ naɓɔ, watɨpɛpɨamʉ, dɔ ɨmɨ akɛ, nɔ꞉ɓʉtʉmɔ.» 21Kʉdɔ, Pɛtɛlɔ ɔ꞉jo, ga ɨyɔ nɔ ɓague ngʉɓɔnanɨ ɓɔ: «Mombi ngɨa nánayɔ ahata, ya ɨmɨ. Nɛkɔ dɔ-sɨ tanɨ?» 22Ɓague ngʉɓɔnanɨ ɓɔ꞉mutosio ɓɔ: «Tɔ꞉ngwɔ atɨ Kolonelio ngɨa a ngama ɔ ndiba ɔ ɓasʉda. Ɨyɔ, a mombi ata ngbingbii ɨya akumo Asɔɓɨɨ, nɔ Ɓayuda ɓaɓomu ɓamʉchwa ino yɛta iɗo. Malaika wɔ Asɔɓɨɨ wa꞉mutitio pɛ nɔwɛ anisoko andɔngɔ, anʉka yaka ngɨyɛ wa꞊musigio.» 23Kʉdɔ, Pɛtɛlɔ ʉ꞉ɓukumoniso andɔngɔ, nɔ, ɔ꞉ɓʉpana lɨda lɔ ɓʉkwaa.

Nekuɓa yɔngɔ, ɓɔ꞉ngwɨa kyɛnda, tɨa kʉ ɨhɔ nɔ mikpekpe yɔ Ɓombi ngʉɓa ɓabaya Yeso akɔnɨngwa anɔ Yɔpa. 24Ɓa꞉ɓɔya anɔ Kaisalia ta nɔ ɓisi ngʉɓɔnanɨ. Kolonelio ɛ꞉soko ɓombi ati ɔ ɨfananja ngɨangɔ, nɔ ɓawai ngʉɓangɔ ɓɔ ingono, aɓɛtɨa atɨ Pɛtɛlɔ. 25Ndʉ Pɛtɛlɔ a꞉ɓio tɨa tinene akumonio, Kolonelio ɔ꞉mʉtɛtɨa. Ɔ꞉gbʉkʉmɨa nɔ mawu apɛɨ angɔ aɓɔya mesu ta aɨtaka, nayɔ akɔbibiso. 26Yakamɛngana, Pɛtɛlɔ ɔ꞉munguso ɨkʉʉ, ga ɨyɔ nayɔ ɓɔ: «Ɨmaa, dɔ ɨmɨ, na ta mombi kʉndʉ ʉwɛ.» 27Ambise ngɨananɨ, ɨɓɔ tɨta ayakanaka nɔ Kolonelio, ɔ꞉kumonio ambɛnɨ nɔ ɔ꞉gbʉka ɓombi ɓaja ɓɔmɔmanɨeni. 28Kʉdɔ, ɔ꞉ɓusigio ɓɔ: «Inu ɓague, nánɨmbɨa iɗo ɓɔ ɨtandɛ ngɨyeso yɔ Ɓayuda, yakyɔtɨgbɛma ajonokio nɔ mɛɛka, gʉtʉ ta akumonio andɔngɔ ambɛnɨ. Yakamɛngana, Asɔɓɨɨ ɔ꞉napanɨɔ ɓɔ natɨsɨkamʉ mombi pɔ mʉngana ndʉ iɓio mʉsʉgʉ, pɔ ndʉ ɔpɛ. 29Kʉdɔ, ngbinga ngɨa wɔ꞉nesoko-ɔɔ, nɛ꞉kɔ sɔkɔmʉ nɔ ɓundo monu. Nakʉnda nɨmbɨa tɨa ɓanɨ ɓɔ wɔ꞉nesekio ɨmanɨ.»

30Kolonelio ɔ꞉mutosio ɓɔ: «Makwaa ka tɨa kaatʉ, pɛ kʉ ngbinga ngɨa, nɔ saa ɨsaɓɔkʉ ngɨyɔ ɨpasɨ, na꞉ɓio pɛ anɨta Asɔɓɨɨ andamɨ ambɛnɨ. Ta gagaa, Mombi mʉngana nɔ lɨpʉkʉ lɨta lɨjɨɛ nɔgbɛ, ɔ꞉tɔnachwɛanɨa, 31nɔ, ɔ꞉nasigio ɓɔ: ‹Kolonelio, Asɔɓɨɨ ɔ꞉ka nɨta ngɨyɛsɔɔ ʉkanɨ, nɔ, ɔ꞉bayɔ ninjekenekio ngɨyɛsɔɔ wakɨkɨa akɔ ɓajanga bayanɨ.›» 32Tʉma ɓombi anɔ Yɔpa, atɨ Simoni ngɨa ɓamisoko ɓɔ Pɛtɛlɔ. Ananɨ atɨ Simoni ngɨa atambanaka mamba kɔ ɓanama. Ɨkʉmbʉ ngɨangɔ ya amutii wɔ lisini ngɨa ata mʉja. 33Kʉdɔ, nɔtʉmɔ ɓombi ta gagaa nɔwɛ ahata. Nɔ ʉwɛ, wɔ꞉kɨɔ ta iɗo anɨka. Ɨtakɨtakɨ ngɨyɛ, isu ɓaɓomu ta tɨa apɛɨ ɔ Asɔɓɨɨ anʉka yaka iɓomu ngɨyɛ Makwɔɓɨɨ ɔ꞉nenjo akɔsugo.

Pɛtɛlɔ ɔndɔyakɨɔ ubua ati Kolonelio

34Kʉdɔ, Pɛtɛlɔ ɔ꞉pʉnga yaka ga ɨyɔ ɓɔ: «Ɨtakɨtakɨ ngɨyɛ nɛmbɨɔ tɨa ɨmbɨanɨ ɓɔ Asɔɓɨɨ angɔmʉ nɔ ɨbaba akʉʉ ɔ ɓombi.» 35Yakamɛngana, mombi muɓomu ngɨa akumo Asɔɓɨɨ, nɔ kɨa yaka yɛta ngbingbii, a muɗo a mesu kangɔ, sɔkɔmʉ nɔ ɨbaba yɔ lɨfananja. 36Asɔɓɨɨ a꞉tʉma Ɨsaʉ ngɨangɔ aɨfananja ngɨyɔ Ɨsalaɛlɛ, Ɨsaʉ yɛta Iɗo ngɨyɔ majɨɔ ɨngbaa akɔ Yeso Klisito, ɨya a Makwɔɓɨɨ ɔ ɓombi ɓaɓomu. 37Nánɨmbɨa yaka iɓomu ngɨyɛ ya꞉chana anɔ Galilaya nɔ Yudɛa muɓomu ambise ngɨa Yɔanɨ a꞉ɓɨakɨa-ɔɔ Ɨsaʉ, nɔ akɔɓatiso ɓombi. 38Nánɨmbɨa ɓɔ Asɔɓɨɨ a꞉to angu ɔ Mʉtɨma wɔta Tu, akʉʉ ɔ Yeso ngɨyɔ Najalɛtɨ tanɨ. Nɔ ná kʉ anɨmbɨa nɔ ɨngbaa nga yeno tanɨ, Yeso akpata-ɔɔ mɨgyɛndɔ yɔ ɨkʉmbʉ ngɨyɛ, akɨa ɓombi iɗo, nɔ aheiso ɓombi ɓaɓomu ngʉɓa ɓa꞉ɓio ɓɔnganɨɛ ɛsɨ ɔ ʉpanʉ wɔ abɨɨ, dɔ, Asɔɓɨɨ a꞉ɓio ɨhɔ nayɔ. 39Isu, ta ɓadɛmʉ ɓɔ yaka iɓomu, ngɨyɛ Yeso a꞉kɨa aɨkʉmbʉ yɔ Ɓayuda nɔ anɔ Yelusalɛma. Ɓa꞉mʉwa ɨngbaa nayɔ akɔɓakaka akʉʉ ɔ mʉsalaba. 40Yakamɛngana, ambise ɔ makwaa kaatʉ, Asɔɓɨɨ a꞉mʉjʉkaniso akɔ ingwo, nɔ ɔ꞉minjo angu akɔpananɨa aɓʉmba, 41sɔkɔmʉ akɔ ɓombi ɓaɓomu, yakamɛngana, a꞉pʉnga-sɨ ta nesu ngʉɓa, a꞉tɨchwa aɓio ɓadɛmʉ. Ta꞉dyakanaka, nɔ, tɔ꞉mwakanaka naɓɔ ambise ngɨa Asɔɓɨɨ a꞉mʉjʉkaniso-ɔɔ akɔ ingwo. 42Ɨyɔ, a꞉tinjo ʉpanʉ akɔɓɨakɨa ɓombi Ɨsaʉ yɛta Iɗo, nɔ naɓɔ anɨmbiiso ɓɔ ɨyɔ a mombi ngɨa Asɔɓɨɨ a꞉mʉchwa akɔɓio juji ɔ ɓombi ngʉɓa ɓa auɓei, nɔ ʉɓa ɓa꞉sio. 43Magbɛ kɔ Asɔɓɨɨ maɓomu, ka꞉ngaka jɛnɛ yaka akʉʉ angɔ, ɓɔ mombi muɓomu ngɨa a꞊mʉbaya, ɓa꞊mɨpaakɨa ɓʉɓɨɓɨ ngʉɓangɔ akɔ ino yɔ Yeso.

Mʉtɨma wɔta Tu ɔjeyo ɓombi ngʉɓa ɓangɔmʉ Ɓayuda

44Ngbinga ngɨa Pɛtɛlɔ a꞉ɓio-ɔɔ sɨ ta ayaka, Mʉtɨma wɔta Tu wɔ꞉jo akʉʉ ɔ ɓombi ɓaɓomu ngʉɓa ɓa꞉ɓio akɔnʉka yaka ngɨyɛnɛnɨ. 45Yaka ngɨyɛnɛnɨ, yɔ꞉kiso Ɓayuda ngʉɓa ɓa꞉ɓio ɓɔbayeni Yeso, nɔ ʉɓa, ɓɛ꞉ka nɔ atɨ Pɛtɛlɔ ʉɓá. Dɔ, Mʉtɨma wɔta Tu ngʉwɔ Asɔɓɨɨ e꞉njo, wɔnababanɔ tɨa kʉ akʉʉ ɔ ɓombi ngaɓɔmɔ, ʉɓa, ɓangɔmʉ Ɓayuda. 46Kʉdɔ, ɓɔ꞉ɓʉka ayaka nɔ mɨyakɨa di di di, nɔ, akɔbibiso Asɔɓɨɨ. Pɛtɛlɔ ɔ꞉sugo ɓata ɓɔ: 47«Ɓombi ngʉɓa, ɓɛ꞉nɨanɨɔ nɔ Mʉtɨma wɔta Tu tɨa kʉ ngbanga nesu. Tɨa ɨmanɨ ya꞊ɓunangyo ɓata ɓɔ ɓatɨkwamʉ uɓatiso?» 48Kʉdɔ, e꞉njo ʉpanʉ ɓɔ ɓɨkwa uɓatiso akɔ ino yɔ Yeso Klisito. Ɨɓɔ ɓombi ngʉɓɔnanɨ, ɓɛ꞉ta ɓɔ ɓɨkwaa ɓata-sɨ mukpekpe yɔ makwaa ɨhɔ nɔ atɨ Pɛtɛlɔ ta kwaa.

Currently Selected:

Mɨkyananakɨa 10: buuN

Highlight

Compare

Copy