Mɨkyananakɨa 8

1Saulo a꞉ɓɛndɨa Itieni matindia ɓɔ ɔ꞉wo-sɨ iɗo.

Saulo ɔkyananakɔ Kanisa

Ta nɔ ɓisi ngʉɓɔnanɨ, ɓa꞉pʉnga kyananaka Kanisa ngɨa ɔ Asɔɓɨɨ ɓʉmʉ ɓʉmʉ. Ɓombi ngʉɓa ɓa꞉baya Yeso ɓaɓomu, ɓɔ꞉panjaa aihoi ngɨyɔ Yudɛa, nɔ Samalɨa. Ta ɓatitima nangana, ɓa꞉tukoo ananɨ anɔ Yelusalɛma. 2Ɓombi ɓɔ kɛkɛɛ akɔ tɛa yɔ Asɔɓɨɨ, ɓɔ꞉mʉhʉna Itieni, nɔ, ɓɔ꞉kumonokio didima mʉngana ata mʉja nɔgbɛ.

3Saulo a꞉pʉnga ahata nɔ angu akɔdukiso kanisa. A꞉ɓikumonokio alɨkáá, anɨfa ɓague nɔ ɓoi, nɔ, ɔ꞉ɓungiso aboloko.

Filipo aɓɨakɨa Ɨsaʉ aihoi yɔ Samalɨa

4Kʉdɔ, ɓombi ngʉɓa ɓa꞉panjaa, ɓa꞉pʉnga akpata mɨgyɛndɔ yɔ ɨkʉmbʉ, aɓɨakɨa Ɨsaʉ yɛta Iɗo. 5Filipo a꞉sa yangɔ agʉlʉ mʉngana ata mʉja ɨyɔ Samalɨa. Inani, ɔ꞉ɓɨakɨa Ɨsaʉ yɔ Masia akɔ ɓombi ɓɔ gʉlʉ ngɨananɨ. 6Ɓombi ɓaɓomu, ɓa꞉ɓio nɔ mʉsasa anʉka yaka ngɨyɛ Filipo a꞉ɓio asugo, nɔ anɨna yaka yɛta ɨmbangɛ ngɨyɛ a꞉ɓio akɨa. 7Mɨtɨma yɔ madu maja ngɨyɛ ya꞉ɓio amati ɔ ɓombi, yɔ꞉chwɛa nɔ ɨpʉmbʉ yɛta ɨja. Tɨa kʉ nɔ ɓajɨkɛsɨ, nɔ ɓombi ɓɔ dɛɛ ɓaja ɓɔ꞉hɛa ta hɛa. 8Kʉdɔ, ɨgyagya yɛta ɨja, ya꞉ɓio amati ɔ gʉlʉ ngɨananɨ.

9Mombi ɔ nɔkɔ mʉngana, ino ɓɔ Simoni, a꞉ɓio amati ɔ gʉlʉ ngɨananɨ, anɨngwa kʉ ɨjɛnɛ. Yaka ngɨangɔ ya꞉ɓimbangɨa ɓombi ɓɔ gʉlʉ ngɨyɔ Samalɨa nɔgbɛ, nɔ ɨyɔ, a꞉ɓisɨkana ndʉ mombi ata mʉja. 10Ɓombi ɓaɓomu anɨngwa akɔ ɓana, aɓɔya akɔ ɓakʉʉ ɓa꞉ɓimʉka nɔ mʉsasa, nɔ, ɓɔ꞉sugo ɓɔ: «Gue ngɨakɛ anɔ angu ɔ Asɔɓɨɨ, ɨya ɓamisoko ɓɔ ‹Angu ata Mʉja›.» 11Ɓombi ɓaɓomu ɓa꞉ɓio nayɔ anʉka nɔ mʉsasa nɔgbɛ, dɔ, amati ɔ makwaa maja ɓakɔkɔ ɓɔ nɔkɔ ngɨangɔ ɓa꞉ɓʉmbangɨa nɔgbɛ. 12Akɔ angbinga ngɨa ɓombi ngʉɓɔnanɨ, ɓa꞉baya-ɔɔ Ɨsaʉ yɛta Iɗo, ngɨyɛ Filipo akʉʉ Ɓʉngama ɓɔ Asɔɓɨɨ, nɔ akɔ ino yɔ Yeso Klisito, kʉdɔ, ɓague nɔ ɓoi ɓɔ꞉kwa uɓatiso. 13Simoni, ɨyɔ makwɔngɔ a꞉baya, nɔ ɔ꞉kwa kʉ uɓatiso, nɔ, ɔɓio tɨta ɨhɔ nɔ atɨ Filipo. Ɨyɛ ndʉ ɛ꞉na yaka yɛta ɨmbangɛ, nɔ ɓakɔkɔ ngʉɓa ɓa꞉ɓio akɔkyananakɨa, yɔ꞉mukiso ʉɓa nɔgbɛ.

14Ndʉ ɓatitima ngʉɓa ɓa꞉ɓio anɔ Yelusalɛma ɓɔ꞉ka ɓɔ Ɓasamalɨa ɓɔ꞉bayɔ ʉpanʉ wɔ Asɔɓɨɨ, kʉdɔ, ɓɔ꞉ɓʉtʉmɨa Pɛtɛlɔ nɔ Yɔanɨ. 15Akɔ angbinga ngɨa ɓa꞉ɓɔya-ɔɔ anɔ Samalɨa, ɓɛ꞉ta Asɔɓɨɨ, akʉʉ ɔ ɓombi ngʉɓa ɓabaya, dɔ, ɓɨnɨanɨa nɔ Mʉtɨma wɔta Tu. 16Ɓa꞉kɨa ɓanɨ, dɔ, Mʉtɨma wɔta Tu wa꞉ɓio-sɨ ta ɓɔ wa꞉ngejeyenimʉ gʉtʉ pɔ mombi mʉngana ati ɔ Ɓasamalɨa ngʉɓɔnanɨ. Yakamɛngana, ɓa꞉ɓio ɓɔ ɓɔkweni-sɨ ɨɓɔ uɓatiso ta akɔ ino yɔ Makwɔɓɨɨ Yeso. 17Pɛtɛlɔ nɔ Yɔanɨ ɓɔ꞉napɨa lɨkɔndɔ akʉʉ eɓo, kʉdɔ, ɓɛ꞉nɨanɨa tɨa nɔ Mʉtɨma wɔta Tu. 18Ndʉ Simoni ɛ꞉na ɓɔ Ɓombi ngʉɓa ɓa꞉baya Yeso ɓɛ꞉nɨanɨɔ nɔ Mʉtɨma wɔta Tu, dɔ, Ɓatitima ɓa꞉napɨa lɨkɔndɔ akʉʉ eɓo, kʉdɔ, ɨyɔ Simoni e꞉njo ɓatitima ɓagyɛgyɛ. 19Ɔ꞉ɓusigio ɓɔ: «Anenjeni ɓaka kʉɔ ɨmɨ, angu ngɨananɨ, iɗo ambɔ mombi ngakɛ ino tanɨ na꞊napɨa-ɔɔ lɨkɔndɔ, ɛnɨanɨa kʉɔ nɔ Mʉtɨma wɔta Tu.» 20Pɛtɛlɔ ɔ꞉mutosio ɓɔ: «Ambɔ ɓagyɛgyɛ ngʉɓɔsɔɔ ɓɨyanaka gɔ ta yakana ɨhɔ nɔwɛ kʉtaa, dɔ, wakɔyongo ɓɔ apɛpɛ ngɨyɔ Asɔɓɨɨ, ɛnɨanɨa ɨngbaa akɔ ɓagyɛgyɛ!»

21Wangɔmʉ amati ɔ mʉpaká, kʉndʉ wangɔmʉ nɔ ɨkyɛmʉ pɔ mɛngana amati ɔ yaka ngɨyɛ, dɔ, mʉtɨma ngʉwɔsɔɔ, wangɔmʉ ngbingbii apɛɨ ɔ Asɔɓɨɨ. 22Kʉɓanɨ, nataniso itungwio yɛta ɓɨɓɨ ngɨyɛsɔɔ, nɔ wɛta Makwɔɓɨɨ. Adiga a꞊nɛpaakɨa gɔ pɔ ɨkananja yɔ itungwio ngɨyɛnɛnɨ. 23Dɔ, nanɨna ndʉ mʉtɨma ngʉwɔsɔɔ, wa koi, nɔ, wa-sɨ ta ʉfanɨɛ amati ɔ boloko ɔ ɓʉɓɨɓɨ. 24Kʉdɔ, Simoni ɔ꞉tosio atɨ Pɛtɛlɔ, nɔ Yɔanɨ ɓɔ: «Ta inu akɛ anɛtieni pɨ Makwɔɓɨɨ, iɗo ambɔ ɨkananja yɔ yaka ngɨyɛnɛnɨ násugo, yatɨnakɨamʉ pɔ mɛngana.»

25Ndʉ ɓa꞉panɨa nɔ ɓɨakɨa Ɨsaʉ ngɨyɔ Makwɔɓɨɨ, kʉdɔ ambise ngɨananɨ, ɓɔ꞉sa anɔ Yelusalɛma. Anɔ ɨngbaa, ɓɛ꞉sɨngaka ɓɨakɨa Ɨsaʉ yɛta iɗo akɔ lɨkʉmbʉ lɨja ngɨlɔ Ɓasamalɨa.

Filipo ɓɔjonokio nɔ mʉbʉla wɔ Etiopia

26Malaika wɔ Makwɔɓɨɨ wɔ꞉musigio Filipo ɓɔ: «Ʉngwɨa kyɛnda anɨsa nɔ ʉkaka mesu nɔ mʉdʉʉ, nɔ ɨngbaa ngɨyɛ yanɨngwa anɔ Yelusalɛma, anujo anɔ Gaja. Ɨngbaa ngɨyɛnɛnɨ, ya amukengu.» 27Filipo ɔ꞉ngwɨa kyɛnda nɔ ɔ꞉sa. Tɨa anɔ ɨngbaa, ɛ꞉na gue mʉngana ɨya a꞉ɓio isumi nɔ kʉ mʉbʉla wɔta ʉja wɔ Itiopia. Ɨyɔ akɛ, a꞉ɓiɓeyoko ɨngama iɓomu ngɨyɔ Kandakɛ, moi, ngama ɔngɔ ngɨa ɔ Etiopia. Gue ngɨananɨ, a꞉ɓio ekeni anɔ Yelusalɛma abibiso Asɔɓɨɨ. 28Ndʉ a꞉ɓio tɨa atɔwa andɔngɔ, ɔ꞉wolo amati ɔ mʉtʉka ngʉwangɔ, ʉwa ɓanama ɓa꞉ɓio aɗuɗuo. Kʉdɔ, ɔ꞉pʉnga popoko ɨtaɓʉ ngɨyɔ ɨgbɛ Isaya. 29Mʉtɨma wɔta Tu wɔ꞉musigio Filipo ɓɔ: «Sa, nɔ wɛsɨnganɨa masʉa ngʉa tinene.» 30Kʉdɔ, ɔ꞉sa ta gagaa, nɔ, ɔ꞉ka gue ngɨananɨ akɔpopoko ɨtaɓʉ ngɨyɛ yɔ ɨgbɛ Isaya. Ɔ꞉muɓokuo ɓɔ: «Wa-ndɨ kʉ anɨmbɨa ɨsɨ yɔ yaka ngɨyɛnɛnɨ, wapopoko?» 31Gue ngɨananɨ ɔ꞉mutosio ɓɔ: «Nɛmbɨa pɨ dɔ-sɨ tanɨ nɔkɔɓieni kɔmʉ nɔ mombi ngɨa anapanɨa?» Kʉdɔ, ɛ꞉soko Filipo anɨka awolo tinene nayɔ, amati ɔ mʉtʉka. 32Ʉgbaa wɔ ɨtaɓʉ ngɨyɔ Isaya a꞉ɓio akɔpopoko wa꞉ɓio akɔsugo ɓɔ:

«Ɓa꞉sa nayɔ ngbanga ndʉ ɨyɛ ɓasa-ɔɔ nɔ kɔndɔlɔ,

akɔ ɨda ngɨyɛ ɓasɛndaka-ɛɛ ɓanama.

Ɨyɔ, a꞉ɓio ngbanga ndʉ mwana ɔ kɔndɔlɔ,

ngɨa akɨa ta ɓɔ woo, ɓɔɓieni nayɔ ahoo mata.

Kʉ ɓanɨ, ɨyɔ a꞉samʉamʉ.

33Ɓa꞉mʉndapakiso nɔ sɔkɔmʉ ɓi꞉kio yaka ngɨangɔ ngbingbii.

Anɨ ɨyakɛ, a꞊ngaka yaka yɔ ɓanɔnɔ ngʉɓangɔ?

Dɔ, ɓa꞉nguso uɓei ngʉwangɔ akɔ dɔdɔ.»

34Mʉbʉla ngʉwɔnanɨ, wɔ꞉muɓokuo Filipo ɓɔ: «Kikiliki anaɓɨa ɓaka-sɨ ɓɔ ɨgbɛ yɔ Asɔɓɨɨ ya-sɨ ingainga akɔyaka akʉʉ ɔ anɨ? Pɔ ɓɔ yakɔyaka akʉʉ angɔ, pɔ ɓɔ akʉʉ ɔ mombi nga kɔmɔ.»

35Kʉdɔ, Filipo a꞉pʉnga nayɔ akɔɓɨakɨa Ɨsaʉ yɛta Iɗo ngɨyɔ Yeso, ta akʉʉ ɔ Mabii ngʉkɔnanɨ. 36Ɨɓɔ tɨta asɨnganaka nɔ kyɛnda, ɓɔ꞉tɛjeyo tɨa lisini. Mʉbʉla ngʉwɔnanɨ, wɔ꞉musigio Filipo ɓɔ: «Ɨna nesini ɨya, tɨa ɨmanɨ yɔ꞉tukoo ɓɔ nɨkwa uɓatiso?» [ 37Filipo ɔ꞉mutosio ɓɔ: «Ndʉ wabaya Yeso nɔ mʉtɨma ngʉwɔsɔɔ kʉ uɓomu, wa꞊kwa uɓatiso kwanɨ.» Ɔ꞉musigio Filipo ɓɔ: «Nɔbayɔ ɓɔ Yeso Klisito a mwana ɔ Asɔɓɨɨ.»] 38Kʉdɔ e꞉njo ʉpanʉ ɓɔ mʉtʉka wɨmaa, ɨɓɔ nayɔ ɓaɓomu ɓɔ꞉jo anesini, Filipo ɔ꞉muɓatiso. 39Ngbinga ngɨa ɓa꞉chwɛa-ɔɔ amati ɔ mipo, Mʉtɨma ngʉwa wɔ Makwɔɓɨɨ, wɔ꞉munguso Filipo ga ɗasa. Sɔkɔmʉ ɓata mʉbʉla ngɨananɨ ɨ꞉mɨna, yakamɛngana, ɛ꞉sɨnganaka ɨyɔ ta nɔ kyɛnda, nɔ ɨgyagya nɔgbɛ. 40Filipo ɔ꞉tɔjʉkanɨa ɔɓieni tɨa anɔ Ajɔtɔ. Ananɨ, ɔ꞉pʉnga ɓɨakɨa Ɨsaʉ yɛta Iɗo, akɔ ɓagʉlʉ aɓɔya anɔ Kaisalia.

Currently Selected:

Mɨkyananakɨa 8: buuN

Highlight

Compare

Copy