Mɨkyananakɨa 4

Pɛtɛlɔ nɔ Yɔanɨ apɛɨ ɔ ubua ngʉwa wɔta ʉja

1Akɔ angbinga ngɨa Pɛtɛlɔ nɔ Yɔanɨ ɓa꞉ɓio-ɔɔ-sɨ ta akɔngakɨa ambaja ɔ ɓombi yaka, ɓakumukumu nɔ ɓangama ɓɔ ɓapɛmakɨa ɓɔ ɨkáá yɔ Asɔɓɨɨ, nɔ Ɓasadukayɔ, ɓɔ꞉ɓijeyo. 2Ɨɓɔ, ɓa꞉ɓio nɔ ʉnganga akɔnɨna ɓɔ Pɛtɛlɔ nɔ Yɔanɨ ɓapanɨa ambaja ɔ ɓombi, nɔ akɔɓɨakɨa ɓɔ ɓombi ngʉɓa ɓa꞉sio, ɓa꞊jʉkana akɔ ingwo jʉkananɨ ngbanga kʉndʉ Yeso a꞉jʉkana. 3Kʉdɔ, ɓɔ꞉ɓʉfa, ɓɔ꞉ɓʉmaya akɔ boloko, akɔɓɔya nɔ ikuɓa, dɔ, ngbinga a꞉ɓio ɓɔ ɔ꞉chaneni tɨa nɔgbɛ. 4Yakamɛngana, ɓombi ɓaja ati ɔ ɓiga ngʉɓa ɓɔ꞉ka yaka ngɨyɛnɛnɨ, ɓɔ꞉baya Yeso. Mboi ngɨyeɓo yɛ꞉sɨnganaka tinetine ndʉ ɓague ɛlɔfʉ ɓɔkʉ.#4:4 sɔkɔmʉ apoo ɓoi nɔ ɓana

5Nekuɓa yɔngɔ, ɓangama ɓɔ Ɓayuda nɔ ɓatataɓasie, nɔ ɓapananakɨa ɓɔ mapanʉ, ɓɔ꞉mɔmanɨa anɔ Yelusalɛma. 6Ɓɔ꞉wolio ubua ɨɓɔ nɔ atɨ Ana kumukumu ngɨa ata mʉja, nɔ Kayafa, nɔ Yɔanɨ, nɔ Alɛkɨjandɛlɛ, nɔ ɓombi ɓaɓomu ngʉɓa ɓa꞉ɓio akɔ anja ngɨa ɔ kumukumu ngɨa ata mʉja. 7Ɓɔ꞉chweiso Pɛtɛlɔ nɔ Yɔanɨ apɛɨ ɔ iɓo, nɔ ɓɔ꞉ɓuɓokuo ɓɔ: «Angu ngɨa nɔheiso nayɔ mombi ɔ majangi ngɨa ɛkɔ ngbanɨ, nɔ, akɔ ino yanɨ?» 8Kʉdɔ, Pɛtɛlɔ ɔ꞉hueni nɔ Mʉtɨma wɔta Tu, ɔ꞉ɓutosio ɓɔ: «Inu ɓangama nɔ inu ɓatataɓasie, 9isu, tɔ꞉kɨɔ mombi mʉngana ɔ majangi iɗo, nɔ ɓʉɓʉnʉ ɓanesu akɔɓokuo tɨa ɓɔ mombi ngɨananɨ ɔhɛyɔ tanɨ. 10Inu ɓaɓomu, nɔ Ɓaɨsalaɛlɛ ɓaɓomu, ɨmbɨeni iɗo ɓɔ mombi ngɨa a mɨmaɛ apɛɨ ɔ eno akɛ, nɔ tɨa kʉ mʉhɛyɛ, ya akʉʉ ɔ angu ɔ ino yɔ Yeso Klisito ngɨyɔ Najalɛtɨ. Yeso ngɨa inu, ná꞉mʉɓakaka akɔ mʉsalaba, yakamɛngana, Asɔɓɨɨ ɔ꞉mʉjʉkaniso akɔ ingwo. 11Ɨyɔ a mombi ngɨa mabii ka꞉sugo akʉʉ angɔ ɓɔ:

‹Ikopi ngɨyɛ inu ɓombi ɓɔ tuɓoko lɨkáá ná꞉igiso,

ya꞉natana tɨa ikopi yɔ dada nɔgbɛ.›#popoko Mmb 118:12

12Takwanana nɨanɨa nɔ ɓʉhɛa ta akʉʉ angɔ nangana, dɔ, Asɔɓɨɨ e꞉njomʉ ino nga yɛmɔ pɔ mɛngana akɔ dɔdɔ, ɨyɛ yakwanana nesu akɔheiso.»

13Yaka ngɨyɛnɛnɨ, yɔmbangɨa ɓombi ɓɔ ubua ngʉwɔnanɨ nɔgbɛ, akɔnɨna Pɛtɛlɔ nɔ Yɔanɨ akɔngaka yaka sɔkɔmʉ nɔ ɓajatwoko. Nɔ ɓata, ɓa꞉ɓio akɔnɨmbɨa kʉ ɓɔ ɓa ɓombi ɓɔta ɓʉtʉʉ, sɔkɔmʉ nɔ nɨmbɨa balʉa, nɔ ʉɓa ɓa꞉ɓio ɨhɔ nɔ atɨ Yeso. 14Yakamɛngana, ɓa꞉ɓio anɨna mombi ngɨa a꞉hɛa mɨmaɛ, kʉ ananɨ anambamba ɔ Pɛtɛlɔ, nɔ Yɔanɨ, nɔ sɔkɔmʉ ɨɓɔ ɓata nɔ yaka ngɨyɛ ɓaitosio. 15Kʉdɔ, ɓɔ꞉ɓinjo ʉpanʉ akɔchwɛa aɓei ɔ basa ɔ ubuwa ngʉwa wɔta ʉja, nɔ ɓɔ꞉tukoo ayakanaka-sɨ tɨta ati eɓo. 16Ɓɔ꞉sugo ɓɔ: «Takɨeni yaka ngɨyɛ ɓombi ngʉɓa tanɨ? Dɔ, ɓombi ngʉɓa ɓɔ Yelusalɛma ɓaɓomu ɓanɨmbɨa ɓɔ, ɓague ngʉɓa ɓɔ꞉kɨɔ yaka yɛta ɨmbangɛ. Nɔ tangɔkwananamʉ anusio.» 17Yakamɛngana, yɔkwananamʉ ɓɔ ɨsaʉ yɔ yaka ngɨyɛnɛnɨ yɨndanaka, tɨta akɔ ɓombi ɓaɓomu. Kʉɓanɨ, tɨɓʉnyakɨeni nɔ tɔɓʉgbɛma ɓɔ ɓatɨngakɨamʉ ɓata mombi pɔ mʉngana, yaka akʉʉ ɔ ino yɔ Yeso.

18Kʉdɔ, ɓa꞉ɓisoko ɓata kʉ mbise, nɔ ɓɔ꞉ɓinjo ʉpanʉ nɔ angu ɓɔ ɓatʉngamʉ ɨkyɛmʉ, pɔ panɨa ɓata akɔ ino yɔ Yeso. 19Yakamɛngana, atɨ Pɛtɛlɔ nɔ Yɔanɨ ɓa꞉ɓutosio ɓɔ: «Ta inu ɓakwɔɓɔngɔ kieni-sɨ yaka ngɨyɛ. Ya-ndɨ ngbingbii apɛɨ Asɔɓɨɨ akumo ʉpanʉ ngʉweno, pɔ ʉwɔ Asɔɓɨɨ? 20Akɔ isu, tangɔsɨamʉ akɔngaka yaka ngɨyɛ tɛ꞉na, nɔ ɨyɛ tɔ꞉ka.» 21Ɓombi ɓɔ ubua ɓɔ꞉ɓʉnyakɨa ɓata ɓɔ nyaka nyaka, nɔ ɓɔ꞉ɓʉsɨa. Ɓɛ꞉namʉ ɨngbaa ngɨyɛ ɓa꞉ɓʉkyananaka-ɔɔ nayɔ, dɔ, ɓombi ɓaɓomu ɓa꞉ɓio abibiso Asɔɓɨɨ akʉʉ ɔ yaka ngɨyɛ ya꞉kyananakɨa. 22Mombi ngɨa ɛ꞉nɨanɨa nɔ ɓʉhɛa ɓʉta ɓʉmbangɛ ngʉɓɔnanɨ, a꞉ɓio nɔ mago akɔnagaaka ɓatɛkɛɓɛ ɓɔgɨna.

Ɓaklisito ɓanɨta Asɔɓɨɨ

23Ngbinga ngɨa ɓa꞉sɨa-ɔɔ atɨ Pɛtɛlɔ nɔ Yɔanɨ, ɓɔ꞉sa akɔgbʉka ambaja ngɨyeɓo, nɔ, ɓɔ꞉ɓʉngakɨa yaka iɓomu ngɨyɛ, ɓakumukumu nɔ ɓatataɓasie ɓa꞉sugo. 24Ndʉ, ɓombi ngʉɓa ɓa꞉baya Yeso ɓɔ꞉ka ɨsaʉ ngɨyɛnɛnɨ, ɓɛ꞉ta Asɔɓɨɨ nɔ mʉtɨma mʉngana akɔsugo ɓɔ: «Makwɔɓɨɨ, ʉwɛ akɛ wa꞉kɨa ɓisi nɔ dɔdɔ, nɔ ɓanesini, nɔ ɓayaka ɓaɓomu ngʉɓa ɓa amati ɔngɔ. 25Ʉwɛ akɛ, wa꞉sugo jɛnɛ ɨngbaa akɔ Mʉtɨma wɔta Tu, nɔ akɔ monu kɔ kuku Dawidi ngɨa a baya asɔɔ ɓɔ:

‹Mababa kɔ ɓombi ka꞉sɨkanakɨa, dɔtanɨ?

Ɓombi ɓa꞉kɨa lidimi lɛta ɓɨɓɨ ta ɓʉtʉʉ, dɔtanɨ?

26Ɓangama ɓɔ dɔdɔ ɓa꞉sangaka ɗite,

nɔ ɓa꞉mɔmanɨa ɨhɔ,

akɔnɨwa ɗite nɔ Makwɔɓɨɨ, nɔ Masia ngɨangɔ.›

27Ya ta ingono, ɓɔ Hɛlɔdɛ nɔ Pɔsɨ Pilato, ɨhɔ nɔ ɓɛɛka, nɔ Ɓaɨsalaɛlɛ, ɓa꞉mʉmɔmanakɨa akɔ gʉlʉ ngɨa, akɔpananiso ʉnganga ngʉweɓo, akʉʉ ɔ baya asɔɔ ata tu, Yeso ngɨa wa꞉mʉchwa. 28Kʉɓanɨ, ɓa꞉kyananakɨa ɨɓɔ ta yaka ngɨyɛ wa꞉kwaisio jɛnɛ kʉ pɛɨ, akɔ angu nɔ ɓʉkʉnda ngʉɓɔsɔɔ. 29Nɔ ɨtakɨtakɨ ngɨyɛ, Makwɔɓɨɨ ɨna yaka ngɨyɛ ɓɔtɨnyakɨa-ɔɔ, nɔ injo ɓabaya ɓɔsɔɔ angu, akɔɓɨakɨa ɨsaʉ ngɨyɛsɔɔ, sɔkɔmʉ nɔ ɓajatwoko. 30Pananiso angu ngɨasɔɔ, iɗo ambɔ heiso ɓakaɓu, nɔ yaka yɛta ɨmbangɛ, nɔ ɓakɔkɔ ɓɨkɨanɨa akɔ ino yɔ Yeso, baya ngɨa asɔɔ ata tu.» 31Ngbinga ngɨa ɓa꞉pipo-ɔɔ nɨta, ɨda ngɨyɛ ɓa꞉ɓio-ɔɔ ɓamɔmanɨɛ, yɔ꞉gʉgʉma. Ɨɓɔ ɓaɓomu, ɓɔ꞉huo nɔ Mʉtɨma wɔta Tu, nɔ ɓɔ꞉pʉnga ɓɨakɨa ɨsaʉ yɔ Asɔɓɨɨ sɔkɔmʉ nɔ ɓajatwoko.

Ɓaklisito ɓa tɨa ɨkyɛmʉ mɛngana

32Ndiba ɔ ɓombi ngʉɓa ɓa꞉baya Yeso, ɓa꞉ɓio ɨkyɛmʉ mɛngana amati ɔ mʉtɨma nɔ itungwio kʉtaa. Mombi pɔ mʉngana ati ɔ eɓo a꞉sugɔmʉ ɓɔ lɨkyɛmʉ ngɨlangɔ la ta akɔ ɨyɔ nangana, yakamɛngana, la꞉ɓio ta ɨhɔ akɔ ɨɓɔ ɓaɓomu. 33Ɓatitima ɓa꞉ɓio akɔchwɛa ɓʉdɛmʉ ɓɔ jʉkana ngɨyɛ yɔ Makwɔɓɨɨ Yeso akɔ ingwo, nɔ angu muɓomu, nɔ Asɔɓɨɨ ɔ꞉ɓukiokio ɨɓɔ ɓaɓomu kʉ ingono. 34Ati ɔ eɓo mombi pɔ mʉngana a꞉ɓiomʉ nɔ angɨɔ ɔ ɨkyɛmʉ. Dɔ, ɓombi ngʉɓa ɓa꞉ɓio nɔ ɓakʉbaa, pɔ nɔ lɨkáá, ɓa꞉lɨgabiso, nɔ ɓɛ꞉ka nɔ ɓagyɛgyɛ ɓɔngɔ, 35nɔ ɓɛ꞉ka naɓo apɛɨ ɔ ɓatitima. Kʉdɔ, ɓɔ꞉pakɨa ɓagyɛgyɛ ɓɔngɔ akɔ mombi nɔ mombi akɔkpatanakɨa nɔ angɨɔ ngɨangɔ.

36Ya꞉ɓio nɔ mombi mʉngana ɔ ɨfananja ngɨyɔ Lawi ɨya a꞉nɔtanɨa anɔ Kipulo ino ɓɔ Yɛjɛfʉ. Ɓatitima ɓa꞉mʉsʉa ino nga yɛmɔ ɓɔ Balanaba, ɨsɨ yɔngɔ ɓɔ, Mombi ngɨa enjo angu. 37A꞉gabiso kʉbaa ngɨangɔ, ɔ꞉sɨka ɓagyɛgyɛ ɓɔngɔ, ɛ꞉ka naɓɔ apɛɨ ɔ ɓatitima.

Currently Selected:

Mɨkyananakɨa 4: buuN

Highlight

Compare

Copy