Mɨkyananakɨa 19

Pɔlɔ ɔsɔ apanɨa anɔ Ɛfɛsɔ

1Ngbinga ngɨa Apolo a꞉ɓio-ɔɔ anɔ Kolito, Pɔlɔ ɔ꞉ngwɨa kyɛnda anɨsa anɔ Ɛfɛsɔ, achana ɨngbaa alɨkʉmbʉ ngɨlɛ la alɨkpangba lɔ Ajia. Ɨyɛ a꞉ɓɔya inani, ɔ꞉tɔgbʉka tɨa mikpekpe yɔ ɓakpata, 2ga ɨyɔ naɓɔ ɓɔ: «Ngbinga ngɨa ná꞉bayanakɨa-ɔɔ né꞉nɨanɨa ndɨ kʉɔ nɔ Mʉtɨma wɔta Tu?» Ɨɓɔ, ɓɔ꞉mutosio ɓɔ: «Tangɔkɔmʉ sina yaka akʉʉ ɔ Mʉtɨma wɔta Tu, gʉtʉ pɔ nʉka.» 3Kʉdɔ, Pɔlɔ ɔ꞉ɓuɓokuo ɓata ɓɔ: «Ná꞉kwa dɔ-sɨ inu ɨkananja yɔ uɓatiso ngʉwɔkanɨ?» Ɓɔ꞉mutosio ɓɔ: «Uɓatiso ngʉwɔ Yɔanɨ.» 4Kʉdɔ, ga Pɔlɔ naɓɔ ɓɔ: «Uɓatiso ngʉwɔ Yɔanɨ, wa꞉ɓio akʉʉ ɔ necho mʉtɨma. Yɔanɨ a꞉sigio Ɓaɨsalaɛlɛ ɓɔ ɓɨbaya mombi ngɨa anɨka ambise angɔ, dɔ ɨyɔ akɛ, a Yeso.»

5Ɨyɛ ndʉ ɓɔ꞉ka yaka ngɨyɛnɛnɨ ɓanɨ, kʉdɔ, ɓɔ꞉kwa uɓatiso akɔ ino yɔ Makwɔɓɨɨ Yeso. 6Pɔlɔ a꞉napɨa lɨkɔndɔ akʉʉ ɔ eɓo, Mʉtɨma wɔta Tu wɔ꞉ɓijeyo, nɔ, ɓɔ꞉pʉnga yaka mɨyakɨa di di di nɔ, nɨkwa ɨgbɛ. 7Ɓombi ngʉɓɔnanɨ ɓaɓomu, ɓa꞉ɓio tinetine ndʉ tɛkɛɓɛ nɔ ɓepini.

8Amati ɔ mayi kaatʉ, Pɔlɔ ɔ꞉kumonokio aɨkáá yɔ nɨta ngɨyɔ Ɓayuda, aninjo ʉpanʉ kʉ ingono. A꞉ɓio anʉngaka yaka adaa ngɨa ɓɔ ɓombi ɓabaya-ɔɔ ta baya, apananiso ingono yɔ ɓʉngama ɓɔ Asɔɓɨɨ. 9Yakamɛngana, mikpekpe yɔ ɓombi ngaɓɔmɔ ɓa꞉ɓio mʉtʉ ɓumu, nɔ, ɓɔ꞉yaa abaya ta yaa. Ɓɔ꞉pʉnga yapakiso Ɨngbaa ngɨyɔ Makwɔɓɨɨ ati ɔ ɓombi tɨta yapakiso. Kʉdɔ, Pɔlɔ ɔ꞉ɓʉsɨa, nɔ ɓɔ꞉sa ɨɓɔ ɨhɔ nɔ ɓakpata tɨa aɨkáá yɔ popoko, yɔ mombi mʉngana ino ɓɔ Tilano. Ɔ꞉pʉnga yakanaka naɓɔ tɨta inani, masi maɓomu. 10Yaka ngɨyɛnɛnɨ, yɛ꞉sɨnganaka amati ɔ mago kapɨnɨ. Kʉdɔ, ɓombi ɓaɓomu, Ɓayuda kʉndʉ ʉɓa ɓangɔmʉ Ɓayuda, ʉɓa ɓa꞉ɓio aihoi yɔ Ajia, ɓɔ꞉ka mapanʉ kɔ Makwɔɓɨɨ.

Ɓana ɓɔ Sɛkɛva ɓachwɛiso mɨtɨma yɔ madu

11Asɔɓɨɨ a꞉ɓio akɨa yaka yɛta ɨmbangɛ, nɔ ɨyɛ, yɛta kisoʉɓá, ɨngbaa akɔ lɨkɔndɔ lɔ Pɔlɔ. 12Kʉdɔ, ɓombi ɓɔ꞉pʉnga asɨkaka ɓalɛsɔ, nɔ magbaa kʉ lɨpʉkʉ ngʉkɔ Pɔlɔ ɔkʉɓotoko, nɔ, ɓɔ꞉sa aheiso nakɔ ɓombi ɓɔ ɓakaɓu, nɔ, chweiso kʉ nɔ mɨtɨma yɔ madu. 13Mikpekpe yɔ Ɓayuda ngʉɓa ɓa꞉mbambanio kʉ gbaɨ, nɔ, chwɛiso mɨtɨma yɔ madu amati ɔ ɓombi, ɓa꞉kanio tɨa kʉɔ ɨɓɔ anɨchwa ino yɔ Makwɔɓɨɨ Yeso. Ga ɨɓɔ ɓɔ: «Akɔ ino yɔ Yeso, ngɨa Pɔlɔ aɓɨakɨa ɨsaʉ yangɔ, nɔnasigio ɓɔ Chwɛa!» 14Ɓana ɓegue mɛɗɨanɛka, ngʉɓa ɓa꞉kɨa yaka ngɨyɛnɛnɨ, yaɓio ɓana ɓɔ mʉngana ɔ kumukumu ɔ Ɓayuda ino ɓɔ Sɛkɛva. 15Ɓisi mʉngana, ɨɓɔ ga ɓɔ꞉kanio ɓata kɨa kʉɓanɨ, ga mʉtɨma wɔ idu naɓɔ ɓɔ: «Nanɨmbɨa Yeso, nɔ, nɔ́pemiso kʉ ɓɔ Pɔlɔ anɨ. Yakamɛngana, inu ná ɓaneni?» 16Mombi ngɨa idu ya꞉ɓio amati angɔ, ɔ꞉ɓʉfa nɔ agbanga, ɔ꞉ɓʉnagaaka nɔ angu ɨɓɔ ta ɓaɓomu. Ɔ꞉ɓʉɓɛnda iɗo iɗo. Kʉdɔ, ɓa꞉chwɛa amati ɔ ɨkáá ngɨyɛnɛnɨ bangʉ tɨta munduu munduu, tɨa kʉ nɔ lɨpɨ. 17Ɓayuda nɔ mababa kɔ ɓombi ngaɓɔmɔ ɓaɓomu ngʉɓa ɓa꞉ɓio anɔ Ɛfɛsɔ, ɓɔ꞉kwa ʉɓá anʉka yaka ngɨyɛnɛnɨ, nɔ, ɓɔ꞉bibiso ino yɔ Makwɔɓɨɨ Yeso. 18Ɓombi ɓaja ngʉɓa ɓa꞉ɓio ɓɔbayeni Yeso, ɓɛ꞉ka apanjaka, nɔ, achweiso yaka ngɨyeɓo aɓʉmba. 19Nɔ ɓata, ɓombi ɓɔ nɔkɔ ɓaja ɓɛ꞉ka nɔ lɨtaɓʉ ngɨleɓo, nɔ, ɓɔ꞉lɨgbʉnda adyaa ananɨ, apɛɨ ɔ ɓombi ɓaɓomu. Ndʉ ɓa꞉pooko dada ɔ lɨtaɓʉ ngɨlɛnɛnɨ, ɓɛ꞉na ɓɔ ɨgabʉ yɔngɔ ya ɓagyɛgyɛ ɓaja nɔgbɛ.#19:19 pɔ ɓɔ, ɓagyɛgyɛ 50.000 ʉɓɔ mako kʉta ngelengele 20Ɨyɛ, ʉpanʉ wa꞉ndanaka-ɔɔ ɓombi ɓaja, akpatanakɨa nɔ angu ngɨyɔ Makwɔɓɨɨ, ya꞉pʉnganɨa ɓanɨ-ɔ! 21Ambise ɔ yaka ngɨyɛnɛnɨ, Pɔlɔ ɔ꞉kwaisio amati ɔ mʉtɨma, anɨsa anɔ Yelusalɛma achana ɨngbaa aihoi yɔ Makedonia, nɔ ɨya yɔ Akaya. Kʉdɔ, ga ɨyɔ ɓɔ: «Nɔɓɔyeni inani, yɔsisekio ɓɔ nɨɓɔya anɔ Lɔma kʉ ɓɔyanɨ.» 22Kʉdɔ, Pɔlɔ a꞉tʉma atɨ Tɨmɔtɛɔ, nɔ Elasɨtɔ anɔ Makedonia. Ɓapɨnɨ ati ɓombi ngʉɓangɔ ɓa꞉ɓimʉsalɨa, ɨbɔ ʉɓɔnanɨ. Yakamɛngana, ɨyɔ, a꞉tukoo ɓata-sɨ kʉ anɔ Ajia akɔ angbinga mʉngana ɓɔ.

Ɓombi ɓɔsɨkanakɨɔ anɔ Ɛfɛsɔ

23Akɔ angbinga ngɨananɨ gbongbo ata mʉja nɔgbɛ ɔ꞉dʉana anɔ Ɛfɛsɔ, akʉʉ ɔ Ɨngbaa yɔ Makwɔɓɨɨ. 24Ya꞉ɓio nɔ gue mʉngana ino ɓɔ Demetilio, ɨya a꞉ɓio bʉbʉma wɔ kɨa ɓayaka ɓɔ ɨndambʉ nɔ mako kɔta ngelengele. A꞉ɓikɨa lisisenio lɔ ɨkáá yɔ mʉngʉ moi ɔngɔ ino ɓɔ Alitemisi. Tɛa ngɨyɛnɛnɨ, ya꞉ɓinjo ɓabʉbʉma ɓɔngɔ dada mʉja nɔgbɛ. 25Demetilio ɔ꞉ɓʉmɔma, ɨhɔ kʉ nɔ ɓabʉbʉma ngaɓɔmɔ, ʉɓa; ɓa꞉ɓikɨa kʉ tɛa mɛngana ngɨɛnɛnɨ. Kʉdɔ, ɔ꞉ɓusigio ɓɔ: «Inu ɓague, nánɨmbɨa iɗo ɓɔ isu takyɔdyakanaka nɔ tɛa ngɨyɛ. 26Ɨnadɔ, inu nátɨa kʉ anɨna nɔ nʉka yaka ngɨyɛ, ɨyakɛ eno ɓɔ Pɔlɔ akɔkɨa. Ga ɨyɔ ga ɓamʉngʉ ngʉɓa ɓaɓʉkɨa nɔ lɨkɔndɔ ɓangɔmʉ ɓamʉngʉ ɓɔ ingono. Nɔ yaka ngɨyɛnɛnɨ, ɓombi ɓaja ɓa꞉ɨbaya pɛ bayanɨ, sɔkɔmʉ ta anɔ Ɛfɛsɔ aka, yakamɛngana, kʉ nɔ ihoi yɔ Ajia iɓomu. 27Kyɛnda yɔ tɛa ngɨyeso ayanaka, nɔ nayɔ aninjiso ino yɛta ɓɨɓɨ, ɨyɛnɛnɨ. Nɔ ɓata, ɨkáá yɔ Asɔɓɨɨ ngɨyeso, Alitemisi, yɔmanɔ ayapaka, nɔ, ʉbɨba ngʉwangɔ wɔmanɔ suo asio, ɨyɔ, ngɨa ɓamubibiso amati ɔ Ajia, nɔ dɔdɔ kʉ muɓomu.»

28Ndʉ ɓɔ꞉ka yaka ngɨyɛnɛnɨ, ɓɔ꞉huo nɔ ʉnganga nɔ ɓɔ꞉pʉnga nachokoo akɔsugo ɓɔ: «Ee! Alitemisi ngɨakɛ ɔ Ɓaɛfɛsɔ amʉja!» 29Gʉlʉ muɓomu ɛmaana ga njataa. Ɓɔ꞉fa Gayɔ nɔ Alɨsɨtalɨkɔ. Ɨɓɔ, ɓa꞉ɓio ɓombi ɓɔ ihoi yɔ Makedonia, ʉɓa, ɓa꞉kyɛndaka ɨhɔ nɔ atɨ Pɔlɔ. Kʉdɔ, ɓɔ꞉sa naɓɔ bangʉ aɨmbaa yɔ tamba.#19:29 ya꞉ɓio nɔ basa ata mʉja ngɨa akumonio ɓombi ɓaja nɔgbɛ 30Pɔlɔ, ɨyɔ ingainga a꞉ɓio akʉnda anijoo apɛɨ ɔ ambaja ngɨananɨ. Yakamɛngana, ɓakpata ngʉɓɔ Ɛfɛsɔ ɓɔ꞉mʉgbɛma. 31Gʉtʉ ta mukpekpe yɔ ɓangama ɓɔ ihoi ngɨyɔ Ajia, ʉɓa ɓa꞉ɓio ɓawai ɓangɔ, ɓɔ꞉mʉmayakɨa iso ɓɔ atɨkaniomʉ anijoo akɔ ɨmbaa yɔ tamba. 32Angbinga ngɨananɨ, ambaja ɔ ɓombi muɓomu a꞉ɓiomʉ ɓata anɨmbɨa ɓɔ ɓasugo tɨa tanɨ. Imbi ngayɛ, yaɓɨnatɨa suo nɔ yaka mɛngana ɓɔ, ʉɓa ɓɔmɔ ɓɔnatɨa tɨa kʉ di, nɔ ɓʉjanana ɓɔngɔ ɓa꞉ɓiomʉ ɓata anɨmbɨa ɓɔ ɓɔmɔmanɨɔ-sɨ ananɨ ayaka yɔ ɨmanɨ. 33Mukpekpe yɔ ɓombi ati ɔ ambaja, ɓɔ꞉mʉngakɨa Alɛkɨjandɛlɛ yaka ngɨyɛ ya꞉kyananakɨa, dɔ, ɨyɔ akɛ, Ɓayuda ɓa꞉mutito anɨsa ayaka apɛɨ ɓombi. Kʉdɔ, ɔ꞉ɓʉgbɛma nɔ ɨkɔndɔ, dɔ, a꞉ɓio akʉnda naɓɔ asigio ɓɔ sɔkɔmʉ Ɓayuda akɛ, ɓɔdʉaniso gbongbo ngɨananɨ. 34Yakamɛngana, ndɨ ɓɛ꞉mbɨa ɓɔ a Muyuda, ɓombi ɓaɓomu ɓɔ꞉natɨa nɔ iso mɛnga akɔsugo ɓɔ: «Ee, Alitemisi ɔ Ɓaɛfɛsɔ a mʉja!» Ɨpʉmbʉ ngɨyɛnɛnɨ, ya꞉gbalɨa tinetine ndʉ ɓasaa ɓapɨnɨ.

35Kʉdɔ, ndɔmbɛ ngɨa ɔ gʉlʉ ngɨananɨ ɔ꞉ɓugbaiso, nɔ, ɔ꞉ɓusigio ɓɔ: «Aa! Inu ɓana ɓɔ Ɛfɛsɔ! Mombi nga eno-sɨ tanɨ ɨyakɛ angɔmʉ anɨmbɨa ɓɔ gʉlʉ ngɨa ɔ Ɛfɛsɔ akɛ a ɨkʉmbʉ yɛta ɨja yɔ Alitemisi, nɔ ɓɔ isisenio ngɨangɔ, ya꞉ɓwana anɨngwa akʉʉ ɓisi? 36Yaka ngɨyɛnɛnɨ, yangɔmʉ aka mombi a꞊ɨtatɨa-ɔɔ. Tɨa kʉɓanɨ, ukomoneni-sɨ ɓɔ pisi. Nátɨkienimʉ yaka nɔ ɓujangijangi. 37Ɨna-sɨ nɛ́꞉kɔ nɔ ɓombi ngʉɓa aka ɓɔ, ɨnadɔ, ɓɔsɨkɔmʉ pɔ ɨkyɛmʉ yɔ ɨkáá yɔ mʉngʉ, gʉtʉ pɔ akɔsɛaka mʉngʉ ngɨyeso kʉɓanɨ.

38Yɔɓieni ɓɔ Demetilio nɔ ɓabʉbʉma ngʉɓa ɓa꞉kɨa naɓɔ tɛa ɓanɔ mʉkɔmbʉ akʉʉ ɔ ɓombi ngʉɓa, lɨda lɔ kio mʉkɔmbʉ, nɔ ɓajuji ɓa kʉɔ. Ɓɔkwananɔ nɨsa naɓɔ achɔngɨa inani. 39Ndʉ náɓio ɓata nɔ yaka nga yɛmɔ aɓokuo, ɓa꞊nɨsa nayɔ atambanaka tɨa apɛɨ ɔ ɓatataɓasie ɓɔ ɨkʉmbʉ ngʉɓa ɓa꞉ɓʉchwa ayomoko yaka. 40Dɔ, akʉʉ ɔ yaka ngɨyɛ yɔkyananakɨɔ ɓʉɓʉnʉ, yɔtukoo ta bele ɓɔ ɓisugo ɓɔ isu akɛ tɔ꞉titio ɓombi akɔchwɛiso gbonɓgo ngɨa. Nɔ, ɓɔtiɓokiseni ɓɔ tɔmɔmakɔ ambaja ngɨa dɔtanɨ, yaka ngɨyɛ tatosio yangɔmʉ.»

41Ambise ɔ ngaka yaka ngɨyɛnɛnɨ, ɔ꞉sigio ambaja ɔ ɓombi ɓɔ ɓɨnanjana.

Currently Selected:

Mɨkyananakɨa 19: buuN

Highlight

Compare

Copy