Mɨkyananakɨa 20

Pɔlɔ ɔsɔ aihoi yɔ Makedonia nɔ Ɓagiliki

1Ndʉ gbongbo ngɨananɨ a꞉sio, Pɔlɔ ɔ꞉mɔmaka ɓakpata, nɔ, ɔ꞉ɓinjo iguegue. Kʉdɔ, ɓenjono naɓɔ lɨkɔndɔ, nɔ, ɔ꞉sa yangɔ anɔ Makedonia. 2Angbinga ngɨa a꞉ɓio-ɔɔ achana aihoi ngɨyɛnɛnɨ, e꞉njo ɓombi ngʉɓa ɓa꞉baya Yeso iguegue, ɨngbaa akɔ mapanʉ maja. Ndʉ a꞉ɓɔya aihoi ngɨyɔ Ɓagiliki, 3ɔ꞉kwaa ananɨ mayi kaatʉ. Angbinga ngɨa Pɔlɔ a꞉ɓio-ɔɔ atambanakɨa kyɛnda anɨsa anɔ Silia nɔ masʉa wɔ mipo, ɔ꞉tɔka ɓɔ Ɓayuda ɓanayɔ asingikio idimi. Kʉdɔ, ɔ꞉kwaisio atɔa ɨngbaa tɨta anɔ Makedonia. 4Ɓombi ngʉɓa ɓa꞉sa nayɔ anapɨa, ya꞉ɓio atɨ Sopateli mwana ɔ Pilusi, ɨya ndaɓʉ anɔ Bɛlɔya, nɔ Alɨsɨtalɨkɔ ɨɓɔ nɔ Sɛkʉndɔsɔ ndaɓʉ anɔ Tɛsalɔnɨka, nɔ Gayusi mombi ɔ Dɛlɛbɛ, nɔ tɨa Tɨmɔtɛɔ, nɔ Tɨkɨkɔ, nɔ Tɔlɔfɨmɔ ɓombi ɓɔ ihoi yɔ Ajia. 5Ɓombi ngʉɓɔnanɨ, ɓa꞉ngwɨa ɨɓɔ kyɛnda pɛɨ, ɓɔ꞉sa nesu aɓɛtaka tɨa anɔ Tɔlɔa. 6Kʉdɔ, ta꞉ngwa nɔ masʉa wɔ mipo anɔ Filipo, ambise ɔ ʉmbɔ wɔ Mɨkatɨ ngɨyɛ yangɔmʉ nɔ ɓʉtɨ ɓɔta ɓʉfʉise. Ambise ɔ makwaa ɓɔkʉ, tɔ꞉ɓʉgbʉka tɨa anɔ Tɔlɔa, nɔ, tɔ꞉kwaa ɓata-sɨ ananɨ kʉ pɔsʉ mʉngana.

Eutiko ɔjʉkanɔ akɔ ingwo

7Akɔ ɓisi ɓɔ yɛnga nɛpasɨ, ta꞉mɔmanɨa aɓundo mʉkatɨ. Pɔlɔ ɔ꞉pʉnga yakanaka nɔ ɓombi ngʉɓa ɓa꞉baya Yeso, dɔ, a꞉ɓio tɨa nɔ kyɛnda nekuɓa yɔngɔ. Yakamɛngana, ɛ꞉sɨnganakiso yaka aɓɔya tɨta ati ɔ gʉndʉ. 8Inani ambɛnɨ ɔ ɨkʉʉ yɔ ɨkáá ngɨyɛ ta꞉ɓio-ɛɛ ɓamɔmanɨɛ, ya꞉ɓio nɔ ɓatala ɓaja. 9Mwana ɔ ɓandambʉ mʉngana, ino ɓɔ Eutiko a꞉ɓio ɓawele akɔ idilisa yɔ mbɛnɨ ɔ ɓeetu wɔ ɨkáa yɛta ikongo ngɨyɛnɛnɨ. Ndɨ Pɔlɔ a꞉ɓio tɨa aɗuɗuo yaka ɨta nɔgbɛ, kʉdɔ, tɔɔ kɔta ɓuto kɔ꞉mʉfa. Tɨa nɔ ingwo yɔ tɔɔ ngʉkɔnanɨ, ga mwana ɔ ɓandambʉ ɓɔ kaɓʉ, ga kii, iyani ɛsɨ. Ɓombi anɨka ga ɓamʉtʉmbaka, tɨta mʉnda ʉwɔnanɨ ga gbɨnjala! 10Kʉdɔ, Pɔlɔ ɔ꞉jo iyani aɨsɨ nɔ, ɔ꞉tʉkʉma nayɔ atʉmba nɔ lɨkɔndɔ, ga ɨyɔ nɔ ɓombi ɓɔ: «Natɨmbambanieni kɔmʉ, a-sɨ ta kʉ ʉwɔ.» 11Kʉdɔ, Pɔlɔ ɔ꞉tɔwa ɓata ta inani akʉʉ, ɔ꞉ɓundo mʉkatɨ, ɔ꞉dyakaka. Nɔ, ɛ꞉sɨnganaka ɓata nɔ yaka aɓɔya ta nekuɓa. Mbise ɔngɔ, ɔ꞉sa yangɔ. 12Ɓɔ꞉tɔwa nɔ mwana ɔ ɓandambʉ ngɨananɨ andei, tɨta mʉhɛyɛ, yaka yɔngɔ yɔ꞉sungo ɓombi ɓaɓomu mʉtɨma nɔgbɛ.

Pɔlɔ ɔngwɔ anɔ Tɔlɔa anɨsa anɔ Mɨlɛtɔ

13Kʉdɔ, tɔ꞉ɗeto masʉa wɔ mipo, tɔ꞉sa isu apɛɨ anɔ Asɔsɨ. Ya꞉ɓio anɨtanɨa ɓɔ tɨsɨka Pɔlɔ ananɨ, dɔ, a꞉ɓio ɔ꞉kwaisieni anɨsa inani nɔ mɨtɨndɨ. 14Angbinga ngɨa a꞉tɨgbʉka-ɔɔ anɔ Asɔsɨ, tɔ꞉mʉtʉmba nɔ tɔ꞉sa naɓɔ anɔ Mɨtɨlɛnɛ. 15Anɨngwa ananɨ, tɔ꞉ɓɔya nekuɓa yɔngɔ apɛɨ ɔ uji ngʉwa weno ɓɔ Kɨɔ. Akɔ ɓisi ɓɔ kapɨnɨ ɓɔngɔ, tɔ꞉tapʉa nɔgbaa anɔ Samɔsɨ, nɔ tɨa nɔ ɓisi ngʉɓɔmɔ, tɔ꞉ɓɔya anɔ Mɨlɛtɔ. 16Pɔlɔ a꞉kwaisio ɓɔ angɔchanisomʉ angbinga anɔ Ajia, kʉdɔ a꞉chana anɔ Ɛfɛsɔ ta chana. Dɔ a꞉ɓio ahʉya ɓɔ ɓisi ɓɔ ʉmbɔ wɔ Patɛkɔtɨ ɓɨmʉgbʉka ta ɓɔ ɔ꞉ɓɔyeni anɔ Yelusalɛma ɓɔyanɨ.

Ɓatataɓasie ɓɔ Ɛfɛsɔ ɓenjo Pɔlɔ kyɛnda

17Pɔlɔ a꞉ɓio ananɨ tɨa anɔ Mɨlɛtɔ. Kʉdɔ, ɔ꞉mayakɨa ɓatataɓasie ɓɔ kanisa ɔ Ɛfɛsɔ iso ɓɔ ɓɨka-sɨ. 18Ngbinga ngɨa ɓɛ꞉ka-ɔɔ anɔ ambamba angɔ ga ɨyɔ naɓɔ ɓɔ: «Nánɨmbɨa mʉkyananakɨa ngʉwɔsɛmɨ ta uɗo ngbinga muɓomu ati weno, anɨngwa ta nɔ ɓisi ngʉɓa na꞉kumonio-ɔɔ amati ɔ ihoi yɔ Ajia. 19Na꞉kyananakɨa Makwɔɓɨɨ nɔ mʉtɨma wɔ disoniso nɔ mʉdʉʉ. Nɔ na꞉dya ikoko nɔ ɓʉkaɓʉkai akɔ yaka yɔ lidimi ngɨlɛ Ɓayuda ɓa꞉nasingekio. 20Nánɨmbɨa ɓɔ nɔ꞉nɨnayɨamʉ yaka pɔ mɛngana ɨyɛ, ná꞉ɓio nɔ mʉsasa wɔngɔ. Na꞉nʉngakɨa, nɔ, nɔ꞉nɨpanɨa yaka ta iɓomu aɓʉmba, nɔ amati ɔ lɨkáá ngɨleno kʉtaa. 21Na꞉ɓɨakɨa pɔngɔ Ɓayuda nɔ ɓombi ngʉɓa ɓangɔmʉ Ɓayuda ta aɓʉmba ɓɔ ɓɨnecho mʉtɨma akɔ Asɔɓɨɨ, nɔ, ɓɔbaya Makwɔɓɨɨ Yeso.

22Nɔ ɨtakɨtakɨ ngɨyɛ, nanɨsa anɔ Yelusalɛma ngbanga ta ndʉ aka, Mʉtɨma wɔta Tu wa-ɔɔ nɛmɨ atitio. Nanɨsa inani, sɔkɔmʉ ɨmɨ, anɨmbɨa yaka ngɨyɛ ya꞊nagbʉka suo inani. 23Yaka ngɨyɛ nanɨmbɨa mɛngana, ya ta ɓɔ agʉlʉ nangana nangana aki nachanaka pɔngɔ-ɛɛ, Mʉtɨma wɔta Tu wakyɔnaɓɨa suo ta aɓʉmba, ga na꞊nɨsa akumonio boloko, ɨhɔ nɔ nɨdya ɓʉkaɓʉkaɨ. 24Gʉtʉ ɓanɨ, Ɨmɨ makwɔngɔ, nanɨna uɓei ngʉwɔsɛmɨ ta ndʉ wangɔmʉ ɨkyɛmʉ. Yaka ngɨyɛ yɛta ɨja, ya pipiso tʉma ngɨyɛsɛmɨ, nɔ, pipiso kʉ nɔ tɛa ngɨyɛ Makwɔɓɨɨ Yeso a꞉nenjo, aɓɨakɨa Ɨsaʉ yɔ ɨjɨɔ ngɨyɛ Asɔɓɨɨ.

25Na꞉kyɛnda pɔngɔ kyɛndanɨ, ati eno ɓaɓomu, aɓɨakɨa Ɨsaʉ yɔ ɓʉngama ngʉɓɔ Asɔɓɨɨ. Yakamɛngana, ɨtakɨtakɨ ngɨyɛ, nanɨmbɨa iɗo ɓɔ ati eno, mombi a꞊ngɔnɛna ɓata sina pɔ mʉngana. 26Tɨa kʉ ananɨ, nanenu asigio ɓʉɓʉnʉ ɓɔ, mombi mʉngana ati eno ɛngɨtɨeni ɓata, yangɔmʉ ɓata akʉʉ asɛmɨ pɔ bele. 27Ɨmɨ, nɔ꞉nɨnayɨɔmʉ ɨkyɛmʉ pɔ mɛnga, yakamɛngana, na꞉nɨpanjakɨa itunguwio ngɨyɔ Asɔɓɨɨ, ta iɓomu aɓʉmba ɓɔ gbau gbau. 28Inu ingainga, kanganɨeni iɗo nɔ ndiba kʉ muɓomu ngɨa Mʉtɨma wɔta Tu, a꞉mʉnapɨa pɔngɔ alɨkɔndɔ leno. Nɔ ɓata, kanisa ngɨa Asɔɓɨɨ, a꞉mʉkayakɨa nɔ menike kɔ Mwana angɔ, mʉpɛmakɨeni pɛmakɨanɨ! 29Nɔ, nanɨmbɨa iɗo ɓɔ ɨyɛ na꞊ngwa suo-ɔɔ, iyani ambise, ɓombi ngʉɓa ɓa ndʉ ɓakwei ɓɔta ɓʉkaɓʉkaɨ#20:29 pɔ ɓɔ ɓapananakɨa ɓɔ mʉjɛɛ ɓɛ꞊ka suo nenu apanja nɔ, ɓa꞊ngɛnɨa ndiba ikoko pɔ bele. 30Gʉtʉ ta ati ɔ ndiba ngɨyeno, ɓombi nga ɓɔmɔ ɓa꞊chwɛanɨa suo nɔ mapanʉ kɔ mʉjɛɛ ta chwɛanɨanɨ, aɗuɗuo ɓombi ngʉɓa ɓa꞉baya Yeso ambise eɓo, naɓɔ akɔkpata. 31Kʉɓanɨ, kanganɨeni iɗo, nɔ, nɔ́tunguo ta tunguoni ɓɔ, naɓutu kʉndʉ musoti, amati ɔ mago kaatʉ, na꞉kɔbɔmbanamʉ nenu akɔgɔgaka, mombi nangana nangana ati eno, gʉtʉ ta nɔ ndɨa nɔ masoi.

32Nɔ tɨa ɨtakɨtakɨ ngɨyɛ, nɔnɨnapɨɔ tɨa aɨkɔndɔ yɔ angu ngɨa Asɔɓɨɨ, nɔ akɔ Ɨsaʉ yɔ ɨjɨɔ ngɨangɔ. Ɨyɔ, anɔ angu ɔ nɨsɨnganakiso báya ngɨyeno nɔ nenu aninjo ʉɓʉnga ngʉwa a꞉napɨɨya ɓombi ngʉɓangɔ ɓaɓomu. 33Pɔ ɓisi pɔ mʉngana, ɨmɨ, na꞉kɔtatanɨamʉ ɓagyɛgyɛ, pɔ ɔlɔ, pɔ gʉtʉ lɨpʉkʉ lɔ mombi ati eno pɔ mʉngana. 34Inu ɓakwɔɓɔngɔ, nánɨmbɨa iɗo ɓɔ na꞉ɓio akɨa tɛa ta nɔ lɨkɔndɔ ngɨlɛsɛmɨ makwɔngɔ, akɔhata nɨnɨanɨa nɔ ɨkyɛmʉ, auɓei ngʉwɔsɛmɨ, nɔ ʉwa, wɔ ɓadii ɓɔsɛmɨ ngʉɓa ta꞉kyɛndaka naɓo. 35Amati ɔ iɓomu ngɨyɛnɛnɨ, na꞉nɨpanɨa nɔ mʉkyananakɨa ɓɔ, tɔsisekio akɨa tɛa nɔ lɨkɔndɔ ngɨleso, akʉʉ ɔ salɨa ɓombi ngʉɓa ɓangɔmʉ nɔ angu. Tɔɓieni atunguo yaka ngɨyɛ Makwɔɓɨɨ Yeso makwɔngɔ, asugo ɓɔ: ‹Ɨgyagya yɔ ninjo, yɔchanɔ ɨyɛ, yɔ nɨanɨa nɔ ɨkyɛmʉ.›»

36Ambise ɔ ngaka yaka ngɨyɛnɛnɨ, Pɔlɔ ɔ꞉gbʉkʉmɨa nɔ mau ɛsɨ ɨhɔ naɓɔ ɓaɓomu, nɔ, ɔ꞉pʉnga nɨta. 37Ɨɓɔ ɓaɓomu, ɓɔgbʉngwanɨa nɔ ndɨa, nɔ, ɓɔmʉnaputo nayɔ aninjo kyɛnda. 38Ɓa꞉kwa ikoko nɔgbɛ, dɔ, Pɔlɔ a꞉ɓusigio ga ɓangɛnana sina ɓata naɓɔ pɔ nɨnana. Kʉdɔ, ɓɔ꞉sa nayɔ anapɨa aɓɔya aka masʉa wɔ mipo wa꞉ɓio-ɔɔ.

Currently Selected:

Mɨkyananakɨa 20: buuN

Highlight

Compare

Copy