Mɨkyananakɨa 18

Pɔlɔ ɔsɔ anɔ Kolito

1Ambise ngɨananɨ, Pɔlɔ ɔ꞉ngwa agʉlʉ ngɨyɔ Atɛnɛ anɨsa agʉlʉ ngɨyɔ Kolito. 2Inani, ɔ꞉jonokio nɔ Muyuda mʉngana ino ɓɔ Akila ɨya a꞉nɔtanɨa aihoi yɔ Pɔtɔ. Ɨyɔ nɔ moi angɔ Pelesila, ɓa꞉ɓio ɓɛkɛni-sɨ anɔ Italia kʉ ɨtakɨtakɨ, dɔ, Kɔlɔdɛ ngama ata mʉja, a꞉ɓio ɓɔ enjeni ʉpanʉ achweiso Ɓayuda ɓaɓomu aɓei ɔ Lɔma. Pɔlɔ ɛ꞉ka naɓɔ agbʉka, 3nɔ ɔ꞉wolo ɨhɔ naɓɔ ananɨ akɔkɨa tɛa yɔ lɨhɛma, dɔ, ɨɓɔ ɓaɓomu ɓaɓikɨa kʉ tɛa mɛngana ngɨyɛnɛni. 4Akɔ ɓisi ɓɔ nuhomuo ngʉɓɔ Ɓayuda ɓuɓomu, Pɔlɔ a꞉ɓiyakanaka nɔ Ɓayuda nɔ Ɓagiliki amati ɔ ɨkáá yɔ nɨta ngɨyɔ Ɓayuda, adaa ngɨa ɓɔ ɓɨbaya ta báya.

5Yakamɛngana, angbinga ngɨa Sila nɔ Tɨmɔtɛɔ ɓɛ꞉ka-ɔɔ anɔ Makedonia, Pɔlɔ ɔ꞉pʉnga tɨa aninjo ʉpanʉ tɨa angbinga muɓomu, apananiso Ɓayuda aɓʉmba ɓɔ Yeso a Klisito. 6Yakamɛngana, Ɓayuda ɓɔ꞉yaa ta yaa, nɔ, ɓɔ꞉mʉsɛaka. Pɔlɔ ɔ꞉ɓɛndaka iɓungu yɔ lɨpʉkʉ ngɨlangɔ, ga ɨyɔ naɓɔ ɓɔ: «Yangaa ngɨyeno yɔnɨkangɔ tɨta inu! Yangɔmʉ ɓata yaka yɛsɛmɨ. Anɨngwa ɨtakɨtakɨ ngɨyɛ, na꞊nɨsa tɨta anɔ ʉgbaa wɔ ɓombi ngʉɓa ɓangɔmʉ Ɓayuda.»

7Kʉdɔ, a꞉ngwa ananɨ, nɔ, ɔ꞉tɔkumonio tɨa atɨ mombi mʉngana ino ɓɔ Yɔsʉtɔ Tito. Mombi ngɨananɨ, a꞉ɓibibiso Asɔɓɨɨ bibisoni, nɔ, ɨkʉmbʉ ngɨangɔ ya꞉ɓio tinene nɔ ɨkáá yɔ nɨta ngɨyɔ Ɓayuda. 8Kilisipo, ngama ɔ ɨkáá ngɨyɛnɛnɨ ɔ꞉baya Makwɔɓɨɨ, ɨhɔ nɔ ɨfananja ngɨangɔ. Ɓakolito ɓaja, ʉɓa ɓɔ꞉ka Pɔlɔ, ɓɔ꞉baya ɨɓɔ kʉ bayanɨ, nɔ, ɓɔ꞉kwa uɓatiso.

9Naɓutu mʉngana Pɔlɔ ɛ꞉na yaka ndʉ alɨwɔtɔ, Makwɔɓɨɨ nayɔ asigio ɓɔ: «Watɨnamʉ ʉɓá, yakamɛngana, ɨsɨnganaka nɔ ɓɨakɨa yaka, nɔ, watikutomʉ monu, 10dɔ ɨmɨ, na ta ɨhɔ nɔwɛ. Mombi pɔ mʉngana angɔkwanana nɔwɛ akyananaka, dɔ, ɓombi ngʉɓa, ɓa꞊natana suo aɓio ɨhɔ nɛmɨ, ɓa ɓaja amati ɔ gʉlʉ ngɨa.» 11Kʉdɔ, Pɔlɔ ɔ꞉wolo ananɨ anɔ Kolito apanɨa ɓombi mapanʉ kɔ Asɔɓɨɨ, amati ɔ igo mɛngana nɔ mayi mɛɗɨa.

12Yakamɛngana, angbinga ngɨa Galio a꞉ɓio-ɔɔ ngama ɔ Ɓalɔma, ɓa꞉mʉnapɨa aihoi yɔ Akaya. Ɓayuda ɓɔ꞉kɔnɔ akɔsɨkanakɨa Pɔlɔ. Kʉdɔ, ɓa꞉sa nayɔ abasa ɔ mʉkɔmbʉ, 13ga ɨɓɔ ɓɔ: «Mombi ngɨa atitio ɓombi akɔbibiso Asɔɓɨɨ, sɔkɔmʉ akpatanakɨa nɔ mapanʉ.» 14Pɔlɔ ta ga asamʉa ɓɔ, Galio ɔ꞉tosieni Ɓayuda tosioni ɓɔ: «Ɛɛ inu Ɓayuda! Mombi ngɨa ɔkɨeni pɛngɛ yaka ngɨyɛ yangɔmʉ ngbingbii, pɔ yaka yɛta ɓɨɓɨ, ambɔ nɔ́꞊kio mʉkɔmbʉ ngʉwangɔ kioni. 15Yakamɛngana, dɔ, náɗuɗuono naɓɔ ta akʉʉ ɔ yaka, nɔ mano kɔ ɓombi, nɔ mapanʉ ngʉkeno, yɔnɨkangɔ ta inu. Ɨmɨ, nangɔmʉ akio ɨkananja yɔ yaka ndʉ ɨyɛnɛnɨ.»

16Kʉdɔ, ɔ꞉ɓukponyo ga ɓɨngwa ananɨ abasa ɔ mʉkɔmbʉ. 17Kʉdɔ ɨɓɔ ɓaɓomu, ɓɔ꞉mʉfa Sɔsɨtɛnɨ ngɨa a꞉ɓio ngama ɔ ɨkáá yɔ nɨta yɔ Ɓayuda. Ɓɔ꞉pʉnga nayɔ aɓɛnda gbɛgbɛ ta ananɨ apɛɨ ɔ basa ɔ mʉkɔmbʉ. Yakamɛngana, sɔkɔmʉ Galio ɛ꞉na yaka ngɨɛnɛnɨ ndʉ ɨkyɛmʉ.

Pɔlɔ ɔtɔwɔ ɓata anɔ Atiokia ngɨɔ Silia

18Pɔlɔ a꞉kɨa ɓata-sɨ makwaa ta maja ananɨ anɔ Kolito, ɨhɔ nɔ ɓanduku ngʉɓɔnanɨ. Mbise, ɔ꞉sɨana naɓɔ, nɔ, ɔ꞉ngwɨa kyɛnda anɨsa aihoi yɔ Silia, ɨɓɔ nɔ atɨ Pelesila nɔ Akila. A꞉pʉnga-sɨ ahɔiso ta ndii, akɔpananiso ɓɔ ɔ꞉kyananakɨɔ agɔmɛ ngɨa a꞉ɓio ɓɔ enjeni akɔ Asɔɓɨɨ kyananakɨa, pɛɨ ɨyɔ, aɗeto masʉa wɔ mipo anɔ Kɨnɨkɨa. 19Ndʉ ɓa꞉ɓɔya anɔ Ɛfɛsɔ, Pɔlɔ ɔ꞉sɨa-sɨ atɨ Pelesila nɔ Akila ta ananɨ. Ta ɨyɔ nangana, ɔ꞉sa aɨkáá yɔ nɨta yɔ Ɓayuda, nɔ, apʉnga ayakanaka naɓɔ. 20Ɨɓɔ, ɓɔ꞉mɨta ga ɓɨkɨa-sɨ ɓata naɓɔ mikpekpe yɔ makwaa ananɨ ta kɨanɨ, yakamɛngana, sɔkɔmʉ ɨbaya. 21Kʉdɔ, a꞉sɨana naɓɔ, nɔ, ɔ꞉ɓusigio ɓɔ: «Ndʉ ya꞉ɓio ɓʉkʉnda ɓɔ Asɔɓɨɨ nɛ꞊ka ɓata suo aka andɛnɔ ta ɨkanɨ.» A꞉ngwa ananɨ tɨa nɔ masʉa wɔ mipo. 22Masʉa wɔ mipo wɔ꞉fɔma anɔ Kaisalia. Kʉdɔ, ɨyɔ Pɔlɔ, ɔ꞉sa anɔ Yelusalɛma aɓokuo kanisa ngɨananɨ. Mbise ɔngɔ, ɔ꞉tɔchana tɨa anɔ Atiokia.

Kyɛnda ngɨyɔ Pɔlɔ yɔ ɓeetu aɓɨakɨa Ɨsaʉ

23A꞉kɨa inani ta mukpekpe yɔ makwaa, kʉdɔ, ɛ꞉sɨnganaka nɔ kyɛnda. A꞉chana tɨa ɨngbaa aihoi yɔ Galatia nɔ Filigia, ɨyɔ, anɨtatanakiso ɓakpata ɓaɓomu, amati ɔ báya.

Apolo ɔpanɨɔ anɔ Ɛfɛsɔ nɔ anɔ Kolito

24Muyuda mʉngana ino ɓɔ Apolo, ɨya, a꞉nɔtanɨa anɔ Alɛkɨjandɨlɨa, ɛ꞉ka anɔ Ɛfɛsɔ. A꞉ɓio gueɔ ʉɗaɗa kʉ ingonɔ nɔ nɨmbɨa Mabii kɔ Asɔɓɨɨ nɔgbɛ. 25Ɓa꞉mʉpananakɨa anɨmbɨa mapanʉ kɔ ɨngbaa yɔ Makwɔɓɨɨ, nɔ, tɨa kʉ muhue nɔ dyaa ngɨyɛnɛnɨ, ɔ꞉pʉnga aɓɨakɨa nɔ panɨa yaka yɔ Yeso ngbingbii nɔgbɛ. Yakamɛngana, a꞉ɓio apanɨa ta akʉʉ ɔ uɓatiso ngʉwɔ Yɔanɨ. 26Ndʉ Pelesila nɔ Akila ɓa꞉mʉka ayaka sɔkɔmʉ nɔ ʉɓá amati ɔ ɨkáá yɔ nɨta ngɨyɔ Ɓayuda, ɓɔ꞉mʉsɨka anɨsa nayɔ andaɓʉ andei. Inani, ɓɔ꞉mʉpanɨa yaka yɔ ɨngbaa yɔ Asɔɓɨɨ ɓata iɗo tɨa nɔgbɛ anagaaka. 27Ndʉ Apolo a꞉ɓio akʉnda anɨsa aihoi yɔ Akaya, kʉdɔ, ɓanduku ɓɔ꞉minjo iguegue, nɔ, ɓɔ꞉tɛndakɨa ɓombi ngʉɓa ɓa꞉baya Yeso anɔ Kolito ʉbalʉa, dɔ, ɓɨ꞉mʉtɛtɨa nɔ ɨgyagya. Ndʉ a꞉ɓɔya inani, ɔ꞉salɨa ɓombi nɔgbɛ, ʉɓa ɓa꞉baya Yeso akpatanakɨa nɔ ɨjɨɔ yɔ Asɔɓɨɨ. 28Ya꞉kɨanɨa ɓanɨ, dɔ, agbaiso Ɓayuda ta ananɨ apɛɨ ɔ ɓombi ɓaɓomu. A꞉ɓio anʉngaka yaka ngbingbii, nɔ, naɓɔ akɔpana amati ɔ mabii kɔ Asɔɓɨɨ ɓɔ Yeso a Klisito.

Currently Selected:

Mɨkyananakɨa 18: buuN

Highlight

Compare

Copy