Mɨkyananakɨa 17

Ɓombi ɓɔ Tɛsalɔnɨka ɓɔsɨkanakɨɔ

1Tɨa ndʉ Pɔlɔ nɔ Sila ɓa꞉chana gʉlʉ ɔ Amufipoli nɔ ɨyɔ Apɔlɔnɨa, ɓɔ꞉ɓɔya tɨa akɔ ɨyakɛ ɔ Tɛsalɔnɨka aki ɨkáá yɔ nɨta yɔ Ɓayuda ya꞉ɓio-ɛɛ. 2Akpatanakɨa nɔ gbali ngɨyɔ Pɔlɔ, ɔ꞉kumonio inani amati ɔ ɨkáá ngɨyɛnɛnɨ. Ɨyɔ, ɨhɔ nɔ ɓombi ngʉɓa ɓa꞉ɓio inani, ɓɔ꞉yakanaka naɓɔ akʉʉ Mabii kɔ Asɔɓɨɨ akɔ maɓisi kɔ nuhomuo ngʉkɔ Ɓayuda amati ɔ ɓapɔsʉ ɓaatʉ. 3Ɨyɔ naɓɔ, akwananakisio nɔ apananiso inani amati ɔngɔ ɓɔ, yɔsisekio jɛnɛ Masia anɨdya ikoko, nɔ, achwɛa akɔ ingwo. Kʉdɔ, Pɔlɔ ɔ꞉sugo ɓɔ: «Yeso ngɨananɨ nanenu akɔɓɨakɨa ɨsaʉ yangɔ, ɨyɔ akɛ a Masia.»

4Ngana ngana ɔ Ɓayuda ngʉɓa ɓa꞉ɓio anʉka yaka ngɨyɛnɛnɨ, ɓɔ꞉baya ɓɔ yaka ngɨyɛnɛnɨ ya ta ingono. Ɓɛ꞉ka akumonio amati ɔ ndiba ngɨyɔ atɨ Pɔlɔ nɔ Sila. Ɓombi ɓaja ngʉɓa ɓangɔmʉ Ɓayuda ɓa꞉ɓibibiso Asɔɓɨɨ ɨhɔ nɔ ndiba ɔ ɓoi ɓɔta ɓɛ꞉mbɨanɨa ngʉɓa, ɓa꞉kɨa ɓata ɨɓɔ kʉɓanɨ. 5Yakamɛngana, Ɓayuda ngaɓɔmɔ ɓa꞉kwa tɨa imi. Ɓɔ꞉mɔmaka mukpekpe yɔ ɓombi ngʉɓa ɓamɔmanakɨa kʉ yayɛ amʉgyɛndɔ. Ɓɔ꞉ɓʉpɔpɨa ɓɔ ɓɨsɨkanakɨa, nɔ, ɓɨ꞉pʉnga chwɛiso ngbongbo amati ɔ gʉlʉ. Kʉdɔ, ɓɔ꞉chwɛanɨa akɔ ɨkáá ngɨyɔ Yasɔnɨ akɔhata Pɔlɔ nɔ Sila, dɔ, ɓɨ꞉sa naɓɔ apɛɨ ɓombi ngʉɓɔnanɨ. 6Ndʉ ɓa꞉ɓɨnamʉ inani, ɓɔ꞉sa tɨta titoko Yasɔnɨ nɔ mukpekpe yɔ ɓombi ngaɓɔmɔ ngʉɓa ɓa꞉ɓio ɓɔ꞉bayeni Yeso. Ɓɔ꞉sa naɓɔ apɛɨ ɔ ɓangama ɓɔ gʉlʉ ngɨananɨ, ɓɔ꞉pʉnga tʉɓɨa ɓɔ: «Ɓombi ngʉɓa ɓɔ꞉yanakiso lɨkʉmbʉ tɨta liɓomu, ɨnadɔ ɨtakɨtakɨ ngɨyɛ, ɓe꞉joo tɨa aka. 7Nɔ, Yasɔnɨ ɔ꞉ɓuwoliso tɨa andongo. Mʉkyananakɨa ngʉweɓo, wa di nɔ yaka ngɨyɛ ngama ata mʉja ɔ Ɓalɔma ɛ꞉maiso. Ɨɓɔ, ɓasugo ga ngama ngakɔmɔ ino ɓɔ Yeso.» 8Yaka ngɨyɛnɛnɨ ɓa꞉sugo, yɔ꞉jʉka ambaja ɔ ɓombi nɔ ɓangama ɓɔ gʉlʉ ɓʉkaɨ. 9Kʉdɔ, ɓangama ɓɛ꞉ta Yasɔnɨ nɔ ɓombi ngʉɓɔmɔ anapɨa ɓagyɛgyɛ amupita, apɛɨ ngɨa ɓa꞉ɓuɓono-ɔɔ.

Ɓombi ɓɔ Bɛlɔya ɓɔtɛtɨɔ Pɔlɔ nɔ Sila

10Akʉʉ ɔ yaka ngɨyɛ ya꞉kyananakɨa anɔ Tɛsalɔnɨka, ta naɓutu ngɨananɨ, ɓombi ngʉɓa ɓa꞉baya Yeso, ɓɔ꞉chaniso atɨ Pɔlɔ nɔ Sila anɔ Bɛlɔya. Ɨyɛ ɓa꞉ɓɔya inani, ɓɔ꞉sa aɨkáá yɔ nɨta yɔ Ɓayuda. 11Yakamɛngana, Ɓayuda ngʉɓɔnanɨ ɓa꞉ɓio di achana Ɓayuda ngʉɓɔ Tɛsalɔnɨka, dɔ, ɓa꞉baya ʉpanʉ wɔ Asɔɓɨɨ nɔ mʉtɨma wɔta uɗo nɔgbɛ. Masi ta maɓomu, ɓa꞉ɓikangaka Mabii tinetine anɨna ɓɔ yaka ngɨyɛ Pɔlɔ a꞉ɓio angaka ya ndɨ kʉ ingono. 12Ɓayuda ɓaja ɓa꞉baya ɨhɔ nɔ ɓoi ɓɔta ɓɛmbɨanɨɛ ngʉɓɔ Ɓagiliki nɔ ɓague ɓɔngɔ ɓaja. 13Angbinga ngɨa Ɓayuda ngʉɓɔ Tɛsalɔnika ɓɔ꞉ka-ɔɔ ɓɔ Pɔlɔ a tɨa kʉ aɓɨakɨa Ɨsaʉ yɔ Asɔɓɨɨ anɔ Bɛlɔya, ɓɛ꞉ka, nɔ, ɓɔ꞉pʉnga pɔpɨa ɓombi ɓɔ ɓɨsɨkanakɨa, nɔ, ɓɨchwɛiso ngbongbo. 14Kʉdɔ, ɓombi ngʉɓa ɓa꞉baya Yeso ɓɔ꞉chaniso Pɔlɔ nɔgbaa mesu a mutii wɔ lisini ngɨa ata mʉja. Yakamɛngana, Sila nɔ Tɨmɔtɛɔ ɓɔ꞉tukoo-sɨ ɨɓɔ ta anɔ Bɛlɔya. 15Ɓombi ngʉɓa ɓa꞉ɓio akyɛndakiso Pɔlɔ, ɓɔ꞉muɓoiso anɔ Atɛnɛ. Angbinga ngɨa ɓa꞉ɓio anɨngwɨa kyɛnda akɔtɔwa anɔ Bɛlɔya, Pɔlɔ ɔ꞉ɓinjo ʉpanʉ asugo ɓɔ Sila nɔ Tɨmɔtɛɔ ɓɨmʉkpata ta gagaa.

Pɔlɔ ɔɓɨakɨɔ ɓombi ɓɔ Atɛnɛ ʉpanʉ wɔ Asɔɓɨɨ

16Angbinga ngɨa Pɔlɔ a꞉ɓio-ɔɔ aɓɛtaka atɨ Sila nɔ Tɨmɔtɛɔ anɔ Atɛnɛ, a꞉dya ikoko nɔgbɛ amʉtɨma, anɨna ɓɔ gʉlʉ ngɨananɨ a꞉mʉhue nɔ ɓamʉngʉ ɓɔ majɛjɛ. 17Amati ɔ ɨkáá yɔ nɨta, Pɔlɔ a꞉ɓio ayakanaka nɔ Ɓayuda ɨhɔ nɔ ɓombi ngʉɓa ɓangɔmʉ Ɓayuda ʉɓa, ɓa꞉ɓibibiso Asɔɓɨɨ. Nɔ ɓata masi maɓomu, a꞉ɓio kʉ ayakanaka nɔ ɓombi ngʉɓa ɓa꞉ɓijonokio naɓɔ aibamu. 18Ɓombi ɓɔ nɨmbɨmbɨanaka nganangana amati ɔ lɨtandɛ lɔ Ɓaipukulio nɔ Ɓasitoiko, ɓɔ꞉pʉnga chwiso pasi nayɔ. Ɓɔmɔ ɓɔ꞉sugo ɓɔ: «Mombi ɔ yakanaka ngɨa a-sɨ akʉnda asugo tanɨ?» Ɓɔmɔ ɓɔ꞉sugo ɓɔ: «Yanɨnɨa ndʉ aɓɨakɨa Ɨsaʉ yɔ ɓamʉngʉ ɓɔta di.» Dɔ, Pɔlɔ a꞉ɓio aɓɨakɨa Ɨsaʉ akʉʉ ɔ Yeso, nɔ akʉʉ ɔ jʉkana akɔ ingwo. 19Kʉdɔ, ɓɔ꞉mʉsɨka Pɔlɔ nɔ ɓɔ꞉sa nayɔ apɛɨ ɔ ubuwa ngʉwa wa꞉ɓijonokio aʉmʉa wɔngɔ, Aɛlɔpagɔ#17:19 pɔ ɓɔ, ɨda yɔ ubua, ga ɨɓɔ nayɔ ɓɔ: «Ha gue, Atʉngakɨa-sɨ, ɨsɨ yɔ mapanʉ kɔ ɨtakɨtakɨ ngʉka wakɨa suo akɔpanɨa. 20Yaka ngɨyɛnɛnɨ wanesu anʉngakɨa, isu, tangɔkɔmʉ sina ɨkananja yɔ yaka ndʉ ɨyɛnɛnɨ pɛɨ. Ta pɛngɛ akʉnda nɨmbɨa ɓɔ yaka ngɨyɛnɛnɨ, yakʉnda sugo tanɨ?» 21(Ya꞉ɓio ɓanɨ, dɔ ɓana ɓɔ ɨkʉmbʉ yɔ Atɛnɛ nɔ ɓɛka ngʉɓa ɓa꞉ɓio ananɨ, ɓa꞉ɓichaniso angbinga ngɨyeɓo muɓomu ta anʉngaka maduɓa, nɔ, nʉka masaʉ ngʉkɔ ɨtakɨtakɨ.)

22Kʉdɔ, Pɔlɔ ɛ꞉maa ati ɔ ubuwa ngʉwɔnanɨ ga ɨyɔ ɓɔ: «Inu ɓana ɓɔ ɨkʉmbʉ ngɨyɔ Atɛnɛ! Nanɨna ndʉ inu, nakʉnda kpataka yaka yɔ ɓamʉngʉ nɔgbɛ amati ɔ lɨngbaa lɔ ɓayaka kʉ liɓomu. 23Kʉdɔ, angbinga ngɨa na꞉chanaka pɛ-ɔɔ amati ɔ gʉlʉ ngɨyeno, nɛ꞉na-pɛ ɓakɔkɔ ɓɔ lɨtandɛ ngɨleno, nɔ, nɔ꞉tejeyo-pɛ ɨda mɛngana ngɨyɛ ɓa꞉tɛndakɨa-ɔɔ ɓɔ: ‹Akɔ mʉngʉ ngɨa angɛmbɨanɨa›. Yaka ngɨyɛ nanɛnu aɓɨakɨa, ɨyɔ mɛngana ta ɨyɛ nakyɔibibiso sɔkɔmʉ nɔ nɨmbɨa.»

24«Asɔɓɨɨ ngɨa a꞉kɨa ʉɓɨɨ nɔ ɓayaka ɓaɓomu ngʉɓa ɓa amati ɔngɔ, ɨyɔ akɛ, a Makwɔɓɨɨ akʉʉ ɔ ɓisi kʉ nɔ dɔdɔ, ɨyɔ, angɔwolomʉ ɨkʉmbʉ amati ɔ ɨkáá ngɨyɛ ɓombi ɓa꞉ɨtuɓoko nɔ lɨkɔndɔ. 25Nɔ ɓata angɔmʉ nɔ ɓanangɨa nɔ mombi pɔ mʉnga, pɔ ɓɔ mombi ɨmʉkyananakɨa. Dɔ ɨyɔ akɛ, enjo ɓombi ɓaɓomu uɓei, nɔ, angu wɔ nuhomuo nɔ ɓata kʉ nɔ lɨkyɛmʉ liɓomu. 26Nɔ kʉ ɨyɔ Asɔɓɨɨ, a꞉kɨa mababa kɔ ɓombi ɓaɓomu achwɛa amati ɔ mombi mʉngana#17:26 pɔ ɓɔ, Adamʉ, nɔ, ɔ꞉ɓunapɨa awoloko lɨkʉmbʉ amati ɔ dɔdɔ kʉ muɓomu. Nɔ, ɔ꞉tambanaka ɓangbinga nɔ tinyoko mɨyɔ yɔ lihoyi ngɨlɛ ɓombi ɓa-ɔɔ.»

27«Asɔɓɨɨ a꞉kɨa yaka ngɨyɛnɛnɨ, ɓɔ dɔ ɓombi ɓɨmʉhata adiga ɓa꞊bimijeyo gɔ pɔ, ngbinga ngia ɓa-ɔɔ apotio ʉmʉa ɓɔ kpa kpa, nayɔ akɔhata. Ingono yɔ yaka ya ɓɔ, Asɔɓɨɨ angɔmʉ ɗu nɔ mombi nangana nangana ati eso. 28Ya ngbanga ndʉ mombi mʉngana a꞉sugo ɓɔ: ‹Isu ta akɔ uɓei amati angɔ, nɔ, takyɛndanaka, nɔ, ta-sɨ kʉɔ.› Ɨyɛnɛnɨ ya kʉ yaka ngɨyɛ mombi ɔ nɨmbɨmbɨanaka eno mʉngana a꞉sugo ɓɔ: ‹Ɨyɔ akɛ, a꞉tɨkɨa isu ɓaɓomu.› 29Dɔ Asɔɓɨɨ akɛ, a꞉tɨkɨa isu ɓaɓomu, yɔsisekiomʉ ɓɔ tɨmʉsɨka ndʉ ɨkyɛmʉ ngɨyɛ ɓa꞉ɨtuo nɔ ɔlɔ, pɔ nɔ uko, pɔ nɔ ikopi akpatanakɨa nɔ niyokonoko ngɨyɔ ɓombi. 30Ɨnadɔ, Asɔɓɨɨ angɔmʉ ɓata akpata yaka ngɨyɛ ɓombi ɓa꞉kɨa nɔ ɓujangi jangi, yakamɛngana, ɨtakɨtakɨ ngɨyɛ, anisoko ɓombi ɓaɓomu, akɔ ʉmʉa kʉ uɓomu anacho mʉtɨma. 31Dɔ, a꞉napɨa ɓisi ngʉɓa a꞊kio-ɔɔ mʉkɔmbʉ ngʉwɔ ɓombi ɓɔ dɔdɔ ngbingbii ɨngbaa akɔ mombi ngɨa a꞉mʉchwa. Asɔɓɨɨ a꞉pananiso yaka ngɨyɛnɛnɨ apɛɨ ɔ ɓombi ɓaɓomu, achweiso mombi ngɨananɨ akɔ ingwo.»

32Ndʉ ɓɔ꞉ka Pɔlɔ anʉngaka yaka akʉʉ ɔ ɓombi ngʉɓa ɓa꞉sio ɓɔ ɓa꞊chwɛa sina akɔ ingwo chwɛanɨ, ɓɔmɔ ati ɔ eɓo ɓɔ꞉pʉnga nayɔ anononoko. Yakamɛngana, ɓɔmɔ ɓɔ꞉sugo ɓɔ: «Ta꞊nɔka suo ɓata-sɨ ʉwɛ, nesu anʉngakɨa yaka ngɨyɛnɛnɨ ta ʉkanɨ.» 33Ambise ngɨananɨ, Pɔlɔ ɔ꞉ngwa, nɔ, ɔ꞉sa yangɔ. 34Yakamɛngana, nganangana ɔ ɓombi ngaɓɔmɔ ati ɔ eɓo, ɓɛ꞉ka nayɔ agbʉka, nɔ, ɓɔ꞉baya Yeso. Ati ɔ eɓo ya꞉ɓio nɔ Dionisio, mʉngana wɔ ɓombi ɓɔ ubuwa ngʉwɔ Aɛlɔpagɔ, nɔ mwana ata moi mʉngana ino ɓɔ Damali nɔ ɓata kʉ nɔ ɓombi ngaɓɔmɔ.

Currently Selected:

Mɨkyananakɨa 17: buuN

Highlight

Compare

Copy