Mɨkyananakɨa 16

Pɔlɔ ɔsɨkɔ Tɨmɔtɛɔ akyɛndaka ɨhɔ nayɔ

1Kʉdɔ, Pɔlɔ a꞉ɓɔya anɔ Dɛlɛbɛ, nɔ, ɔngwa ananɨ anɨsa tɨa anɔ Lisutila. Inani, ya꞉ɓio nɔ mʉkpata mʉngana ino ɓɔ Tɨmɔtɛɔ. Inye a꞉ɓio muto ɔ Ɓayuda ngɨa a꞉baya Yeso, yakamɛngana, ɨsɛ a꞉ɓio Mugiliki. 2Ɓanduku ngʉɓa ɓɔ Kanisa ngɨyɔ Lisutila nɔ Ikonio ɓa꞉ɓio aninjo ɨsaʉ yɔ Tɨmɔtɛɔ ga a nɛgbama ata iɗo nɔgbɛ. 3Kʉdɔ, Pɔlɔ a꞉ɓio nɔ mʉsasa nayɔ akɔsɨka dɔ ɓɨsa ɨhɔ nayɔ. Tɨa akɔ yaka yɔ Ɓayuda ngʉɓɔ ɨkʉmbʉ ngɨyɛnɛnɨ, Pɔlɔ ɔ꞉kiiso Timiteo ɨgʉnɨ dɔ ɨɓɔ ɓaɓomu ɓa꞉ɓio anɨmbɨa iɗo ɓɔ ɨsɛ a Mugiliki. 4Amati ɔ ɓagʉlʉ ɓaɓomu ngʉɓa ɓa꞉chana-ɔɔ, ɓa꞉ɓio akɔninjo masaʉ kɔ yaka ngɨyɛ ɓatitima nɔ ɓatataɓasie ɓɛ꞉maiso anɔ Yelusalɛma, nɔ nɨta ɓombi ngʉɓa ɓa꞉báya Yeso akyananakɨa yaka ngɨyɛnɛnɨ. 5Makanisa kɛ꞉ka ɓʉmʉ amati ɔ báya nɔ mboi yɔ ɓombi ɓɔ ɨtakɨtakɨ yɔ꞉ɓio anɨsɨnganaka masi ta maɓomu.

Pɔlɔ ɛnɔ yaka ndʉ lɨwɔtɔ

6Ɓɔ꞉tɔchana ihoi yɔ Filigia nɔ Galatɨa ta chana, dɔ, mʉtɨma wɔta Tu wa꞉ɓʉgbɛma ga ɓa꞉tɨɓɨakɨamʉ ʉpanʉ wɔ Asɔɓɨɨ aihoi yɔ Ajia. 7Ngbinga ngɨa ɓa꞉ɓɔya-ɔɔ tinene nɔ ihoi yɔ Misia, ɓɔ꞉kanio ga ɓabi tɨa aihoi yɔ Bitinia. Yakamɛngana, Mʉtɨma wɔ Yeso wɔ꞉ɓʉgbɛma ɓata kʉ gbɛma. 8Tɨa ndʉ ɓa꞉chana anɔ Misia, ɓɔ꞉sa tɨa anɔ Tɔlɔa. 9Kʉdɔ, naɓutu Pɔlɔ ɛ꞉na yaka mɛngana ndʉ lɨwɔtɔ, mombi mʉngana ɔ Makedonia ɔɓieni ɓemaɨ apɛɨ angɔ. Mombi ngɨananɨ, ɔ꞉mʉndɨanɨa akɔsugo ɓɔ: «Atɨkɨa ɓaka isingo ɨkɨanɨ, iyani aihoi yɔ Makedonia!» 10Ambise ngɨa Pɔlɔ ɛ꞉na-ɔɔ yaka ngɨyɛnɛnɨ ndʉ lɨwɔtɔ, tɛ꞉mbɨa tɨta ingono ɓɔ Asɔɓɨɨ ɔ꞉tɨsoko anɨsa aɓɨakɨa Ɨsaʉ yɛta Iɗo inani. Kʉdɔ, tɔ꞉pʉnga tambanakɨa kyɛnda anisa tɨa kʉ inani anɔ Makedonia.

Ludia ɔbayɔ Makwɔɓɨɨ

11Kʉdɔ, ta꞉ɗɛtɔ masʉa wɔ mipo anɨngwa anɔ Tɔlɔa, tɔ꞉yomo ta yomo ɓɔ gɔ anɨsa auji wɔ Samɔtɨlakɛ, nekuɓa yɔngɔ tɔ꞉ɓɔya anɔ Neapoli. 12Anɨngwa ananɨ, tɔ꞉sa tɨa anɔ Filipo, ɨya, a꞉ɓio gʉlʉ ata mʉja amati ɔ ihoi yɔ Makedonia. Gʉlʉ ngɨananɨ, a꞉ɓio ɛsɨ ɔ ɓʉngama ɓɔ Ɓalɔma. Ta꞉kwaa inani makwaa maja. 13Akɔ ɓisi ɓɔ nuhomuo ngʉɓɔ Ɓayuda, tɔ꞉chwɛa aɓei ɔ gʉlʉ anɨsa amutii wɔ lisini. Dɔ, ta꞉ɓio ayongo ɓɔ ɨda yɔ nɨta Asɔɓɨɨ ya ananɨ. Ndʉ ta꞉wolo, tɔ꞉pʉnga yakanaka nɔ ɓoi ngʉɓa ɓa꞉ɓio ɓamɔmanɨɛ ananɨ. 14Ananɨ ati ɔ iɓo, ya꞉ɓio nɔ moi mʉngana ɔ gʉlʉ ɔ Tʉatɛla ino ɓɔ Lidia. Moi ngɨananɨ, a꞉ɓɨgaɓakiso lɨpʉkʉ lɛta ngbo ngbo ngbo, nɔ kʉ manjanja. Ɨyɔ, a꞉ɓio nɔ ʉɓá wɔ Asɔɓɨɨ amati angɔ. A꞉ɓio nesu anʉka nɔ mʉsasa, kʉdɔ, Makwɔɓɨɨ ɔ꞉mʉgana mʉtɨma abaya yaka ngɨyɛ Pɔlɔ a꞉ɓio anʉngaka. 15Kʉdɔ, ɔ꞉kwa uɓatiso ɨhɔ nɔ ufini ngʉwangɔ uɓomu. Ambise ngɨananɨ, ɔ꞉tisoko akɔsugo ɓɔ: «Ikeni ɓaka-sɨ awolo iyani andamɨ, néneni ɓɔ nɔbayɔ Makwɔɓɨɨ ta nɔ ingono.» Kʉdɔ, ɔ꞉tɨkpakpa ɓɔ tɨsa ta sanɨ.

Ɓɔfɔ Pɔlɔ nɔ Sila aboloko anɔ Filipo

16Ɓisi mʉngana, isu tɨa anɨsa aɨda yɔ nɨta, kʉdɔ, tɔ꞉jonokio nɔ atɨ moi mʉngana mombi ɔ tɛa ɔngɔ. Moi ngɨananɨ, a꞉ɓichwɛisio ɓamakwɔɓangɔ ɓagyɛgyɛ ɓajanana. Dɔ, mʉtɨma wɔ idu wa꞉timinjo anɨkwa ɨgbɛ, nɔ, ngaka yaka ngɨyɛ ya꞊suo akyananakɨa. 17Ɔ꞉pʉnga nesu kpata, nɔ, nachokoo asugo ɓɔ: «Ɓombi ngʉɓa ɓa ɓabaya ɓɔ Asɔɓɨɨ ngɨa akʉʉ ɓisi nɔgbɛ, ʉɓa ɓanenu aɓɨakɨa ɨngbaa yɔ ɓʉhɛa.» 18A꞉kɨa yaka ngɨyɛnɛnɨ amati ɔ makwaa maja. Ndʉ ya꞉bɔmbaniso Pɔlɔ, ɔ꞉natana mesu ambise ɔ꞉sigio idu ngɨyɛnɛnɨ ɓɔ: «Akɔ ino yɔ Yeso Klisito nɔnenjo ʉpanʉ achwɛa amati ɔ moi ngɨa!» Ta angbinga ngɨananɨ, idu yɔ꞉mʉchwɛa. 19Ndʉ ɓamakwɔɓangɔ ɓɛ꞉na ɓɔ moi ngɨananɨ ɨɓɔ angɔkwanana ɓata naɓɔ achwɛisio ɓagyɛgyɛ, kʉdɔ, ɓɔ꞉fa Pɔlɔ nɔ Sila, nɔ, ɓɔ꞉sa naɓɔ apɛɨ ɔ ɓangama ɓɔ ɨkʉmbʉ aibamu. 20Ɓɔ꞉tɔɓʉɓɔiso tɨa apɛɨ ɔ ɓajuji ɓɔ Ɓalɔma ga ɨɓɔ ɓɔ: «Ɓombi ngʉɓa ɓa Ɓayuda, ɨɓɔ akɛ ɓa꞉kɔyanakiso gʉlʉ ngɨyeso akɛ. 21Ɓakɔpanɨa ɓagbali ngʉɓa isu Ɓalɔma tosisekiomʉ naɓɔ abaya pɔ gʉtʉ naɓɔ akpata.»

22Kʉdɔ, ambaja ɔ ɓombi ɔ꞉ɓʉnatanɨa atɨ Pɔlɔ. Ɓajuji ɓɔ꞉titio ga ɓiɗuo Pɔlɔ nɔ Sila lɨpʉkʉ, nɔ, ɓiɓʉɓɛnda pimbo. 23Mbise ɔ naɓɔ akɔtubo nɔ ɓɛnda, ɓɔ꞉ɓʉmaya aboloko, nɔ, ɓe꞉njo sʉda ngɨa a꞉ɓio mʉpɛmakɨa wɔ ɨkáá yɔ boloko ʉpanʉ naɓɔ akɔkanga iɗo. 24Akʉʉ ɔ ʉpanʉ ngʉwɔnanɨ, sʉda ɔ꞉ɓʉmaya atɨ Pɔlɔ nɔ Sila tɨta ambɛnɨ ɔ pɛɨ ngɨyɔ ɨkáá yɔ boloko, nɔ, ɔ꞉ɓʉmaya mɨtɨndɨ amati ɔ ɓakpokpo. 25Naɓutu, tinene nɔ gʉndʉ, Pɔlɔ nɔ Sila ɓa꞉ɓio anɨta, nɔ, asʉa lɨta lɔ bibiso Asɔɓɨɨ. Ɓombi ɓɔ boloko ngaɓɔmɔ ɓa꞉ɓio naɓɔ kʉ anʉka. 26Gagaa ngɨananɨ, akpʉkʉma ata ɓʉmʉ nɔgbɛ ɔ꞉pʉnga ajigijo muɓumba wɔ ɨkáá yɔ boloko. Pɔ gbalakɨa, ga mamongu maɓomu ɓɔ ga, ga. Ga, magbenje kɔ ɓombi ɓɔ boloko, ga paa, paa. 27Sʉda ngɨananɨ, a꞉tɔjʉkana ga gbrii. Ɛ꞉na mamongu maɓomu tɨta ɓwau ɓwau. Ga ɨyɔ nɔ mapi ngʉwangɔ ɓɔ tʉɓa, ahata ga awanana ta nɨwanana. A꞉ɓio ayongo ɓɔ ɓombi ɓɔ boloko ɓɔnanjanɔ nɔ bangʉ. 28Yakamɛngana, ga Pɔlɔ nayɔ nɔ iso yɛta ɓʉmʉ ɓɔ: «Ha gue, Watɨwananamʉ, isu ɓaɓomu ta ta aka!» 29Kʉdɔ, sʉda ngɨananɨ e꞉soko mombi nayɔ anɨkɨa nɔ manga. Ga ɨyɔ gagaa inani ambɛnɨ ɔ pɛɨ ɔ ɨkáá yɔ boloko ga ngbuu. Ɨyɔ tɨta agʉgʉma nɔ ʉɓá, ɛ꞉ka agbʉkʉmɨa a mɨtɨndɨ yɔ Pɔlɔ nɔ Sila. 30Ɔ꞉ɓʉchweiso aɓei, ɔ꞉ɓuɓokuo ɓɔ: «Inu ɓakwɔ ɓɔsɛmɨ, yanɨtanɨa ɓɔ nɨkɨa tanɨ, akʉnda nɨanɨa nɔ ɓʉhɛa?» 31Ga ɨɓɔ nayɔ ɓɔ: «Báya Makwɔɓɨɨ Yeso, kʉdɔ ʉwɛ, wɛnɨanɨa nɔ ɓʉhɛa ɨhɔ nɔ ɨkáá ngɨyɛsɔɔ iɓomu.» 32Kʉdɔ ɓɔ꞉ɓʉɓɨakɨa ʉpanʉ wɔ Makwɔɓɨɨ, ɨyɔ, ɨhɔ nɔ ɨkáá ngɨangɔ kʉtaa. 33Sʉda ngɨananɨ, ɔ꞉sa naɓɔ agyaɓa lɨpɨ ngɨleɓo ta nɔ gʉndʉ ngɨananɨ. Kʉdɔ, ɓɔ꞉mʉɓatiso ta gagaa ngɨananɨ, ɨyɔ, nɔ ɓafandɔngɔ maɓomu. 34Ɔ꞉sa nɔ atɨ Pɔlɔ, nɔ Sila andɔngɔ andei, nɔ, ɔ꞉ɓinjo idyo. Ɨyɔ ɨhɔ nɔ ɨkáá ngɨangɔ kʉ iɓomu ɓɔ꞉kwa ɨgyagya nɔgbɛ, dɔ ɓa꞉ɓio tɨa ɓɔ ɓɔbayeni Asɔɓɨɨ bayanɨ.

35Tɨa nekuɓa yɔngɔ, ɓajuji ɓɔ꞉tʉma ɓombi ngʉɓeɓo atɨ sʉda ngɨa ɔ ɨkáá yɔ boloko akɔsugo ɓɔ: «Ɓoo ɓombi ngʉɓɔnanɨ.» 36Ɨyɔ sʉda ngɨananɨ, ɔ꞉ngakɨa Pɔlɔ ɨsaʉ ɓɔ: «Ɓajuji ɓɔtʉmɔ iso ɓɔ ɓiniɓono. Ɨtakɨtakɨ ngɨyɛ ɓoniɓoo tɨa ɓooni, seni kʉ nɔ majɨɔ.» 37Yakamɛngana, Pɔlɔ ɔ꞉ɓutosio ɓombi ngʉɓɔnanɨ ɓa꞉ɓʉtʉma ɓɔ: «Ɨma! Ɨɓɔ ngʉɓa ɓa꞉tiɓendiso pɛ apɛɨ ɔ ɓombi ɓaɓomu, sɔkɔmʉ pɔ ɓɔ꞉tisambiso pɔ kʉ ɓanɨ, isu ngʉɓa ta Ɓalɔma! Nɔ ɓata, ɓɔ꞉tɨmaya kʉ aɨkáá yɔ boloko, nɔ ɨtakɨtakɨ ngɨyɛ, ɓa꞉hata nesu aɓono tɨa aɓaɗi. Pɔ belekeke! Yɔsisekio ɓɔ ɨɓɔ ɓamakwɔngɔ ɓɨka nesu aɓoo aka.» 38Kʉdɔ, ɓombi ngʉɓɔnanɨ ɓa꞉ɓʉtʉma ɓɔ꞉tɔa anʉngakɨa ɓajuji yaka ngɨyɛnɛnɨ. Ndʉ ɓɔ꞉ka ɓɔ Pɔlɔ nɔ Sila ɓa Ɓalɔma, ɓɔ꞉kwa ʉɓá. 39Kʉdɔ, ɓɛ꞉ka naɓɔ anɨta ɓɔ ɓʉɓɨpaakɨa, nɔ, ɓɔ꞉ɓʉchweiso aɨkáá yɔ boloko, nɔ, ɓɔ꞉ɓusigio ɓɔ ɓɨchwɛa akɔ gʉlʉ ngɨananɨ ta chwɛa. 40Ndʉ Pɔlɔ nɔ Sila ɓa꞉chwea aɨkáá yɔ boloko ɓanɨ, ɓɔ꞉sa atɨ Lidia andei. Ɨyɛ ndʉ ɓɛ꞉nana nɔ ɓombi ngʉɓa ɓa꞉baya Yeso, nɔ naɓɔ, aninjo iguegue, kʉdɔ, ɓɔ꞉ngwɨa kyɛnda anɨsa.

Currently Selected:

Mɨkyananakɨa 16: buuN

Highlight

Compare

Copy