Mɨkyananakɨa 15

Ubua ngʉwɔ Yelusalɛma

1Ɓombi nganangana ɓa꞉ngwa anɔ Yudɛa anɨsa anɔ Atiokia. Ɓɔ꞉pʉnga panɨa ɓombi ngʉɓa ɓa꞉baya Yeso ɓɔ: «Nɔ́kɔkiisenimʉ ɨgʉnɨ akpatanakɨa nɔ mapanʉ ngʉkɔ Musa, nángɛnɨanɨamʉ nɔ ɓʉhɛa pɔ bele.» 2Yaka ngɨyɛnɛnɨ, yɔ꞉kwa tɨa mangoi, nɔ, ɗuɗuono yɛta ɨja ati ɔ Pɔlɔ nɔ Balanaba nɔ ɓombi ngʉɓɔnanɨ. Akʉʉ ɔ ɗuɗuono ngɨyɛnɛnɨ, ɓɔ꞉kwaisio achaniso Pɔlɔ nɔ Balanaba, ɨhɔ nɔ ɓombi nganangana nga ɓɔmɔ ati ɔ eɓo anɔ Yelusalɛma, apɛɨ ɔ ɓatitima nɔ ɓatataɓasie, dɔ, bɨkwananakiso yaka ngɨyɛnɛnɨ. 3Kanisa ngɨa ɔ Atiokia ɔ꞉ɓʉkyananakɨa kyɛnda, kʉdɔ, ɓɔ꞉chana amati ɔ ihoi ngɨɔ Foiniki, nɔ ɨyɔ, Samalɨa aɓɨakɨa ɓɔ ɓombi ngʉɓa ɓangɔmʉ Ɓayuda ɓe꞉njono akɔ Yeso tanɨ. Ɓombi ngʉɓa ɓa꞉baya Yeso ɓaɓomu, ɓɔ꞉kwa ɨgyagya nɔgbɛ akʉʉ ɔ Ɨsaʉ ngɨyɛnɛnɨ. 4Ɨyɛ ɓa꞉ɓɔya anɔ Yelusalɛma, Kanisa nɔ ɓatitima, ɨhɔ nɔ ɓatataɓasie ɓɔ꞉ɓʉtɛtɨa. Kʉdɔ, atɨ Pɔlɔ ɓɔ꞉ɓʉngakɨa yaka iɓomu ngɨyɛ Asɔɓɨɨ a꞉kɨa ɨngbaa akɔ ɛɓɔ. 5Nganangana ɔ ɓombi ngʉɓa ɓa꞉ɓio amati ɔ ɨtandɛ yɔ Ɓafalisayɔ, ʉɓa, ɓa꞉baya Yeso, ɓɔ꞉vɔmʉa nɔ ɓɔ꞉sugo ɓɔ: «Ɓombi ngʉɓa ɓa꞉baya Yeso ɓɔɓienimʉ Ɓayuda, yɔ꞉sisokio naɓɔ akio ta ɨgʉnɨ, nɔ naɓɔ, anɨta akpata Mapanʉ ngʉkɔ Musa.» 6Kʉdɔ, ɓatitima nɔ ɓatataɓasie ɓɔ꞉mɔmanakɨa akpɛngbiso yaka ngɨyɛnɛnɨ. 7Ambise ɔ ɗuɗuono tɨa nɔgbɛ, Pɛtɛlɔ ɛ꞉maa, nɔ, ɔ꞉ɓusigio ɓɔ: «Inu ɓanduku, nánɨmbɨa iɗo ɓɔ Asɔɓɨɨ a꞉nachwa jɛnɛ ɨmɨ ati eno, aɓɨakɨa ɓombi ngʉɓa ɓangɔmʉ Ɓayuda Ɨsaʉ yɛta Iɗo, dɔ, ɓʉka nɔ ɓɔbaya. 8Asɔɓɨɨ ngɨa ɛ꞉mbɨa mɨtɨma yɔ ɓombi e꞉njo ɓombi ngʉɓa ɓa꞉baya Yeso ɓɔɓienimʉ Ɓayuda Mʉtɨma wɔta Tu ngbanga kʉ nesu. Ɨyɛnɛnɨ, yapananiso aɓʉmba ɓɔ Asɔɓɨɨ a꞉ɓʉbaya bayanɨ. 9Asɔɓɨɨ a꞉ɓʉjaɓaka mɨtɨma dɔ ɓa꞉baya Yeso, sɔkɔmʉ ɨ꞉napɨa ɨbaba ati ɔ eso naɓɔ. 10Tɨa ɨtakɨtakɨ ngɨyɛ nákɔkanio Asɔɓɨɨ, tɨa dɔtanɨ? Nákɔnapɨa ɨkyɛmʉ yɛta ɓuto akʉʉ ɔ ɓakpata, ɨyɛ ɓakuku ngʉɓeso ɓa꞉ɓiomʉ adaa ngɨa ɓatʉmba-ɔɔ, nɔ gʉtʉ ta isu ɓʉɓʉnʉ. 11Yakamɛngana, isu tanɔ báya ɓɔ takɔnɨnɨanɨa nɔ ɓʉhɛa ngbanga kʉndʉ ɨɓɔ, ta akʉʉ ɔ ɨjɨɔ ngɨyɔ Makwɔɓɨɨ Yeso.»

12Ambaja ɔ ɓombi ɔ꞉gbaa ɓɔ woo, anʉka Balanaba nɔ Pɔlɔ. Ɓa꞉ɓio naɓɔ anʉngakɨa yaka akʉʉ ɔ ɓakɔkɔ ɓaɓomu, nɔ yaka yɛta kisoɓa ngɨyɛ Asɔɓɨɨ a꞉kɨa ɨhɔ naɓɔ, akʉʉ ɓombi ngʉɓa ɓangɔmʉ Ɓayuda. 13Ngbinga ngɨa ɓa꞉pipo-ɔɔ ngaka yaka ngɨyɛnɛnɨ, Yakɔɓɔ ɔ꞉pʉnga yaka ga ɨyɔ ɓɔ: «Inu ɓanduku ʉkeni-sɨ, 14Simoni ɔ꞉tʉngakɨɔ ɓɔ akɔnɨngwa akɔ mʉkpanganɨa, Asɔɓɨɨ a꞉pananiso ɓʉkʉnda ngʉɓangɔ tanɨ, akʉʉ ɔ ɓombi ngʉɓa ɓangɔmʉ Ɓayuda, nɔ, a꞉chwa ɨfananja ngɨangɔ ingainga, ta inani ati ɔ eɓo. 15Yaka ngɨyɛnɛnɨ, ya ngbanga ndʉ aka magbɛ ka꞉tɛndakɨa-ɔɔ amati ɔ mabii ɓɔ:

16‹Ambise ngɨananɨ, ɨmɨ Makwɔɓɨɨ na꞊tɔwa

anɨmaiso ɨkáá ngɨyɔ Dawidi, ɨyɛ yɛ꞉tɛyɔ,

kʉdɔ, na꞊ɨtuɓoko ɓata nɔ nayɔ anɨmaiso.

17Kʉdɔ, ɓombi ngaɓɔmɔ ɓaɓomu ɓa꞊hata sina Makwɔɓɨɨ,

nɔ lɨfananja liɓomu ngɨlɛ le꞉sokonio nɔ ino yɛsɛmɨ.

Ɨyɛnɛnɨ, ya monu ngʉkɔ Makwɔɓɨɨ.

18Ɨyɔ akɛ e꞉mbiiso yaka ngɨyɛnɛnɨ kʉ akɔ ɓʉpɛɨ.›#popoko Am 9:11-12

19Kʉdɔ, ɨmɨ Yakɔɓɔ, nɛnɔ iɗo ɓɔ akɔ ɓombi ngʉɓa ɓangɔmʉ Ɓayuda, ʉɓa, ɓa꞉necho-pɛ mɨtɨma akɔ Asɔɓɨɨ, ɓatɨɓʉhatakɨamʉ yaka. 20Yakamɛngana, ɓɨɓʉtɛndakɨa ta ʉbalʉa ɓɔ, ɓɨsɨa anɨdya anjɨɓɔ ɔ ɓanama ngʉɓa ɓaɓinjo a mutebii akɔ ɓamʉngʉ ɓɔ majɛjɛ, nɔ, ɓɨsɨa muso, nɔ, nɨdya menike nɔ anjɨɓɔ ɔ ɓanama ngʉɓa ɓaɓʉwa sɔkɔmʉ ɓɨɓʉkiyo ɨmɨyɔ. 21Anɨngwa kʉ ɨjɛnɛ, ɓakyɔɓɨakɨa mapanʉ ngʉka kɔ Musa, akɔ ɓagʉlʉ ɓaɓomu. Ɓɔkupopoko kʉɔ, akɔ maɓisi kɔ homuo maɓomu, amati ɔ lɨkáá lɔ nɨta ngɨlɔ Ɓayuda.»

Ɓɔtɛndakɨɔ ʉbalʉa akɔ ɓaklisito ngʉɓa ɓangɔmʉ Ɓayuda

22Ɓatitima nɔ ɓatataɓasie ɓɔ Kanisa, nɔ Kanisa muɓomu, ɓɔ꞉kwaisio anɨchwa ɓombi nganangana ati ɔ eɓo nɔ naɓɔ atʉma anɔ Atiokia, ɨhɔ nɔ atɨ Pɔlɔ nɔ Balanaba. Kʉdɔ, ɓɔ꞉mʉchwa Yuda ɨya ɓa꞉tɨmisoko kʉ ɓɔ Balasaba, nɔ Sila. Ɨɓɔ ɓapɨnɨ, ɓa꞉ɓio ɓombi ɓɔ ʉbɨba amati ɔ kanisa. 23Ɓɔ꞉ɓinjo ʉbalʉa ngʉwa ɓa꞉tɛndakɨa amati ɓɔ: «Isu ɓatitima nɔ ɓatataɓasie, nɔ ɓanduku ɓeno, tɔniɓokuo inu ɓanduku ɓeso ɓokuoni. Inu, ngʉɓa na꞉baya Yeso nɔ́ɓienimʉ Ɓayuda, inani anɔ Atiokia, nɔ Silia nɔ Kilikia. 24Tɔ꞉ka pɔngɔ ɓɔ ɓombi ngaɓɔmɔ, ɓa꞉ngwa iyani anɨsa inani andɛnɔ, sɔkɔmʉ nɔ ʉpanʉ weso. Kʉdɔ, ɓɔ꞉nibunjo pɔngɔ mʉtʉ nɔ yaka ngɨyeɓo, nɔ nenu, ambambaniso amati ɔ báya. 25Kʉɓanɨ, isu ɓaɓomu tɔ꞉kwaisio pɛngɛ anɨchwa ɓombi nɔ naɓɔ atʉma inani andɛnɔ. Ɓombi ngʉɓɔnanɨ, ɓanɨsa ɨhɔ nɔ ɓanduku ngʉɓeso ɓɔ ɓʉkʉnda, Balanaba nɔ Pɔlɔ, 26ʉɓa, ɓenjono uɓei ngʉweɓo uɓomu, akyananakɨa Makwɔɓɨɨ Yeso Klisito. 27Kʉdɔ, tɔ꞉ɓʉtʉmɔ atɨ Yuda nɔ Sila inani andɛnɔ, ɨɓɔ ingainga akɛ, ɓa꞊nʉngakɨa yaka ngɨyɛ tɔ꞉tɛndakɨɔ amati ɔ ʉbalʉa ngʉwa. 28Mʉtɨma wɔta Tu, ɨhɔ nesu, tɔ꞉kwaisio ɓɔ tatɨnɨnapɨamʉ ɓuɓuto ngaɓɔmɔ akʉʉ ɔ yaka ngɨyɛ nɔ́kwananɔ kɨa, 29akɔsugo ɓɔ: ‹Nátɨdyamʉ anjɨɓɔ ɔ ɓanama ngʉɓa ɓaɓinjo ndʉ mutebii, aɓamʉngʉ ɓɔ majɛjɛ. Nátɨdyenimʉ menike, nɔ, anjɨɓɔ ɔ nama ngɨa ɓamʉwa, ɓɔmukienimʉ ɨmɨɔ. Nɔ, nátɨkɨenimʉ muso kʉɓanɨ.› Nɔsɨeni akɨa yaka ngɨyɛnɛnɨ, ambɔ nɔkɨɔ iɗo. Ɓieni kʉ amajɨɔ.»

30Ambise ɔ naɓɔ aninjo kyɛnda, ɓombi ngʉɓananɨ ɓa꞉ɓʉtʉma, ɓɔ꞉sa anɔ Atiokia. Tɨa inani, ɓɔmɔma ambaja ɔ Ɓombi ngʉɓa ɓa꞉baya Yeso, nɔ, ɓɔ꞉ɓinjo ʉbalʉa ngʉwɔnanɨ. 31Ndʉ ɓapopoko ʉbalʉa ngʉwɔnanɨ, yaka yɔngɔ yɔ꞉ɓinjo iguegue, nɔ, ɓɔ꞉kwa ɨgyagya nɔgbɛ. 32Yuda nɔ Sila, ɨɓɔ ngʉɓa ɓa꞉ɓio kʉ magbɛ, ɓɔ꞉yakanaka nɔ ɓanduku ngʉɓɔnanɨ akɔ angbinga mʉta naɓɔ aninjo iguegue nɔ angu amati ɔ báya. 33Ndʉ ɓa꞉kwaa naɓɔ makwaa bele, kʉdɔ ɓanduku ngʉɓɔ Atiokia ɓɔ꞉ɓinjo kyɛnda ɓɔ ɓɨtɔwa kʉ nɔ majɨɔ, aki ɓombi ngʉɓa ɓa꞉ɓʉtʉma ɓa꞉ɓio-ɛɛ. [ 34Yakamɛngana, Sila a꞉kwaisio ɨyɔ akɔtukoo inani.] 35Pɔlɔ nɔ Balanaba ɓa꞉tukoo ɨɓɔ ta anɔ Atiokia. Ɨɓɔ, ɨhɔ tɨa kʉ nɔ ɓombi ngaɓɔmɔ ɓaja, ɓa꞉ɓio apanɨa ɓombi ngʉɓa ɓa꞉baya, nɔ, aɓɨakɨa mapanʉ kɔ Makwɔɓɨɨ.

Pɔlɔ nɔ Balanaba ɓɔnagbonyonoko akɔ kyɛnda yɔ ɓepini

36Ambise ɔ makwaa achana, Pɔlɔ ɔ꞉musigio Balanaba ɓɔ: «Tɨtɔa-sɨ akɔkangaka ɓombi ngʉɓa ɓa꞉baya Yeso, ʉɓa, ɓa aɓagʉlʉ ɓaɓomu ngʉɓa aki ta꞉ɓɨakɨa-ɛɛ mapanʉ ngʉkɔ Makwɔɓɨɨ, nɔ, nɨna ɓɔ ɓasɨnganaka tanɨ.» 37Balanaba a꞉ɓio akʉnda ɓɔ ɓɨsa ɨhɔ nɔ atɨ Yɔanɨ ngɨa ɓa꞉tɨmisoko ɓɔ Malɨkɔ. 38Yakamɛngana, Pɔlɔ a꞉kʉndamʉ anɨsa ɨhɔ nɔ Malɨkɔ, dɔ, a꞉ɓʉsɨa anɔ Pamufilia, nɔ, a꞉ɓio tii ɓata ɨhɔ naɓɔ aɓɔya aka ɓa꞉pipo-ɔɔ tɛa ngɨyeɓo. 39Kʉdɔ, ɗuɗuono yɛta ɨja ya꞉kwa ati eɓo, nɔ, ɓɔ꞉nagbonyoko. Balanaba ɔ꞉sɨka Malɨkɔ, ɓɔ꞉ɗeto masʉa wɔ mipo anɨsa anɔ Kipulo. 40Nɔ kʉdɔ, Pɔlɔ ɔ꞉mʉchwa tɨa Sila. Ɓombi ngʉɓa ɓa꞉baya, ɓɔ꞉mʉnapɨa Pɔlɔ alɨkɔndɔ lɔ majɨɔ ngɨlɔ Makwɔɓɨɨ, mbise ɔngɔ ɓɔ꞉sa. 41Amati ɔ kyɛnda ngɨyɛnɛnɨ, ɔ꞉chana akɔ ihoi ngɨyɔ Silia nɔ Kilikia, aninjo ɓakanisa angu amati ɔ báya.

Currently Selected:

Mɨkyananakɨa 15: buuN

Highlight

Compare

Copy