Mɨkyananakɨa 14

Pɔlɔ nɔ Balanaba ɓaɓɨakɨa Ɨsaʉ anɔ Ikonio

1Inani anɔ ikonio, yaka ya꞉ɓio ɓata kʉndʉ ya꞉kɨanɨa anɔ Atiokia. Pɔlɔ nɔ Balanaba ɓa꞉sa aɨkáá yɔ nɨta ngɨyɔ Ɓayuda, kʉdɔ, ɓɔ꞉panɨa ʉpanʉ wɔ Asɔɓɨɨ adaa ngɨa ɓɔ Ɓayuda ɓaja, nɔ ɓombi nga ɓɔmɔ ɓɔ꞉baya Yeso. 2Yakamɛngana, Ɓayuda ngʉɓa ɓa꞉yaa akɔbaya Yeso, ɓɔ꞉pʉnga pɔpɨa ɓombi ngʉɓa ɓa꞉ɓiomʉ Ɓayuda aɓio nɔ mʉtɨma wɔta ɓɨɓɨ akʉʉ ɔ ɓombi ngʉɓa ɓa꞉baya. 3Pɔlɔ nɔ Balanaba ɓa꞉kwaa ananɨ anɔ Ikonio makwaa maja. Ɓɔ꞉panɨa ɨsaʉ yɔ Makwɔɓɨɨ sɔkɔmʉ nɔ ʉɓá. Dɔ, Makwɔɓɨɨ ɔ꞉pananiso ɓɔ Ɨsaʉ ngɨyɛ ɓa꞉ɓio aninjo akʉʉ ɔ ɨjɨɔ ngɨangɔ, ya ta ingono. Kʉdɔ, ɔ꞉ɓinjo angu akɨa yaka yɛta ɨmbangɛ, nɔ yaka yɛta kisoɓa. 4Ɓombi ɓɔ ɨkʉmbʉ ngɨyɛnɛnɨ ɓɔ꞉nagbonyonoko, ɓɔmɔ ɓa꞉ɓio nɔ ʉgbaa ngʉwɔ Ɓayuda, nɔ ɓɔmɔ nɔ ʉgbaa ngʉwɔ Ɓatitima. 5Kʉdɔ, ɓombi ngʉɓa ɓangɔmʉ Ɓayuda nɔ Ɓayuda, ɨhɔ nɔ ɓangama ngʉɓeɓo, ɓɔ꞉kwaisio akyananaka Pɔlɔ nɔ Balanaba, nɔ naɓɔ anɨwa nɔ bɛnda nɔ makopi. 6Yakamɛngana, ɨyɛ ndʉ atɨ Pɔlɔ nɔ Balanaba ɓɛ꞉mbɨa idimi ngɨyɛnɛnɨ, ɓɔ꞉sa bangʉ anɔ Lisutila nɔ Dɛlɛbɛ, ɓagʉlʉ ɓɔ ihoi yɔ Likonia, nɔ lihoi ngalɛmɔ amutii wɔngɔ. 7Inani ɓa꞉sa-ɛɛ, ɓɔ꞉ɓɨkɨa Ɨsaʉ yɛta Iɗo kʉ ɓɨakɨanɨ.

Pɔlɔ nɔ Balanaba ɓɔheiso mombi anɔ Lisutila

8Inani anɔ Lisutila, gue mʉngana a꞉ɓio jɨkɛsɨ anɨngwa ta nɔtanɨa. A꞉ɓio yangɔ ta ɓawele, sɔkɔmʉ aka akyɛndaka-ɔɔ. 9Ɓisi mʉngana, ɔ꞉ka ʉpanʉ wɔ Asɔɓɨɨ, ʉwa Pɔlɔ a꞉ɓio apanɨa. Pɔlɔ ɔ꞉mʉkanga ɓɔ ngbee, nɔ, ɛ꞉na ɓɔ anɔ báya, adaa ngɨa yamuheiso-ɔɔ. 10Kʉdɔ, ga ɨyɔ nayɔ nɔ iso yɛta ɓʉmʉ ɓɔ: «Ɨmaa nɔ mɨtɨndɨ ngɨyɛsɔɔ ɓɔ gba!» Ɨyɔ jɨkɛsɨ ngɨananɨ, ɛ꞉maa ga gba, ɔ꞉pʉnga kyɛndaka. 11Ambaja ɔ ɓombi ngʉɓa ɓɛ꞉na yaka ngɨyɛnɛnɨ Pɔlɔ a꞉kɨa, ɓɔ꞉pʉnga natɨa nɔ mʉyakɨa ngʉweɓo akɔsugo ɓɔ: «Ɓamʉngʉ ɓɔ꞉sɨkɔ ndʉtʉ ndʉ ɓombi, nɔ, ɓɛ꞉kɔ tɨa andɛsɔ aka!» 12Ɓɔ꞉sʉa Balanaba ino ɓɔ «Jeu#14:12 Jeu: ɨsɨ yɔngɔ ɓɔ ngama» nɔ Pɔlɔ ɓɔ «Hɛlɛmɛ#14:12 Hɛlɛmɛ: ɨsɨ yɔngɔ ɓɔ mombi ngɨa andɔakɨa ubua» dɔ ɨyɔ akɛ, a꞉ɓɨngaka yaka. 13Kʉdɔ ɨyɔ, kumukumu ngɨyɔ ɨkáá yɔ mʉngʉ ngɨyɛnɛnɨ yɔ Jeu, ɨyɛ ya꞉ɓio aɓei ɔ gʉlʉ, ɛ꞉ka nɔ ɓangɔmbɛ, ɨhɔ nɔ maʉa apɛɨ ɔ umongu wɔ gʉlʉ. Ɨyɔ nɔ ambaja ɔ ɓombi, ɓa꞉ɓio akʉnda aninjo mutebii akɔ Balanaba nɔ Pɔlɔ.

14Ndʉ ɓɛ꞉ka anʉngɨa Balanaba nɔ Pɔlɔ yaka ngɨyɛnɛnɨ, ɓɔ꞉nachokoko lɨpʉkʉ ngɨleɓo, ɓɔ꞉pʉnga tʉɓɨa nɔ nɨsa bangʉ aki ambaja ɔ ɓombi ngɨananɨ a꞉ɓio-ɛɛ, akɔsugo ɓɔ: 15«Inu ɓawai, Nákɔkɨa ɓanɨ, dɔtanɨ? Isu, ta ɓombi ngbanga kʉndʉ inu. Tanenu aɓɨakɨa Ɨsaʉ yɛta Iɗo, ambɔ sɨeni ɓamʉngʉ ɓɔ majɛjɛ ɓɔta yaya ngʉɓa. Kʉdɔ, nɔ́natanɨa tɨa Asɔɓɨɨ ngɨa, a꞉kɨa ɓisi, nɔ dɔdɔ, nɔ ɓanesini, nɔ ɓayaka ɓaɓomu ngʉɓɔ amati ɔngɔ. 16Akɔ angbinga ngɨa a꞉chana jɛnɛ, Asɔɓɨɨ a꞉sɨa lɨfananja liɓomu akɔkpata lɨngbaa ngɨleɓo ingainga. 17Yakamɛngana, masi maɓomu, Asɔɓɨɨ apananiso ɓɔ a kʉɔ ɨngbaa akɔ iɗo iɗo ngɨangɔ. Anɨneisio ʉgbaá anɨngwa akʉʉ ɔ ɓisi, nɔ, ninjo lɨjɔ lɔ madyo akɔ angbinga ɔngɔ, nɔ, ɔnɨhuso mɨtɨma ngɨyeno nɔ ɨgyagya.»

18Gʉtʉ ndʉ ɓatitima ɓa꞉sugo yaka ngɨyɛnɛnɨ, ya꞉ɓio ɓʉkaɨ agbɛma ambaja ɔ ɓombi ɓɔ ɓɨsɨa naɓɔ aninjo mutebii.

19Ananɨ ati eɓo, Ɓayuda nganangana ɓɛ꞉ka anɨngwa anɔ Atiokia, ɨkʉmbʉ mɛngana yɔ Pisidia, nɔ anɔ Ikonio. Ɓɔ꞉pɔpɨa ambaja ɔ ɓombi, abaya yaka ngɨyɛ ɓa꞉ɓio naɓɔ asigio. Kʉdɔ ɓɔ꞉ɓɛnda Pɔlɔ nɔ makopi tinene nayɔ anɨwa. Ɓɔ꞉muɗuɗuo aɓei ɔ gʉlʉ ga kpu kpu kpu, dɔ ɓa꞉ɓio aniyo ɓɔ ɔwo tɨa woni. 20Yakamɛngana, ɨyɛ ndʉ ɓakpata ɓa꞉mukunguo, ɔ꞉ngwa ɨkʉʉ nɔ ɔ꞉tɔwa agʉlʉ. Tɨa nekuɓa yɔngɔ, ɓɔ꞉sa nɔ Balanaba anɔ Dɛlɛbɛ.

Pɔlɔ nɔ Balanaba ɓɔtɔwɔ anɔ Atiokia

21Pɔlɔ nɔ Balanaba ɓɔ꞉ɓɨakɨa Ɨsaʉ yɛta Iɗo amati gʉlʉ ngɨananɨ, nɔ, ɓɛ꞉nianɨa nɔ ɓombi ɓaja aɓio ɓakpata. Kʉdɔ, ɓɔ꞉tɔwa anɔ Lisutila, nɔ anɔ Ikonio, nɔ anɔ Atiokia ɨkʉmbʉ mɛngana yɔ Pisidia. 22Ɓɛ꞉tatanakiso ɓakpata nɔ naɓɔ aninjo angu amati ɔ báya nɔ ɓɔ꞉ɓusigio ɓɔ: «Yɔkwananɔ isu achana amati ɓʉkaɓʉkaɨ ɓʉja, apɛɨ ngɨa takumonio-ɔɔ aɓʉngama ɓɔ Asɔɓɨɨ.» 23Atɨ Pɔlɔ nɔ Balanaba ɓa꞉chwa ɓatataɓasie amati kanisa nangana nangana. Ambise ɔ nɨta nɔ taa idyo akɔ angbinga, ɓɔ꞉napɨa ɓatataɓasie ngʉɓɔnanɨ alɨkɔndɔ lɔ Makwɔɓɨɨ ngɨa ɓa꞉mʉbaya.

24Ndʉ ɓa꞉chana ihoi ngɨyɔ Pisidia, ɓɔ꞉ɓɔya tɨa aihoi ngɨyɔ Pamufilia. 25Kʉdɔ, ɓa꞉ɓɨakɨa ʉpanʉ wɔ Asɔɓɨɨ anɔ Pɛlɛgamɔ, nɔ ɓɔ꞉sa tɨa anɔ Atalɨa. 26Anɨngwa ananɨ ɓɔ꞉ɗɛtɔ masʉa wɔ mipo, ɓɔ꞉sa anɔ Atiokia ɨkʉmbʉ mɛngana yɔ Sulia. Ya꞉ɓio jɛnɛ amati ɔ gʉlʉ ngɨananɨ, ɨyɛ kanisa a꞉ɓʉnapɨa-ɔɔ akɔ lɨkɔndɔ lɔ ɨjɨɔ ngɨyɔ Asɔɓɨɨ akʉʉ ɔ tɛa yɛta ɨja ngɨyɛ ɓa꞉ɓio ɓɔkieni. 27Akɔ angbinga ngɨa ɓa꞉ɓɔya-ɔɔ anɔ Atiokia, ɓɔ꞉mɔma ɓombi ɓɔ Kanisa nɔ ɓɔ꞉ɓʉngakɨa yaka iɓomu ngɨyɛ Asɔɓɨɨ a꞉kɨa naɓɔ, nɔ ngbanga ndʉ aka a꞉ganɨa-ɔɔ ɓombi ngʉɓa ɓangɔmʉ Ɓayuda ɨngbaa yɔ báya. 28Kʉdɔ, Pɔlɔ nɔ Balanaba ɓa꞉kwaa ananɨ makwaa maja, ɨhɔ nɔ ɓakpata.

Currently Selected:

Mɨkyananakɨa 14: buuN

Highlight

Compare

Copy