Mɨkyananakɨa 12

Ɓɔwɔ Yakɔɓɔ nɔ nɨfa Pɛtɛlɔ aboloko

1Angbinga ngɨananɨ, ngama Hɛlɔdɛ a꞉pʉnga tɨa kyananaka nganangana ɔ ɓombi ɓɔ kanisa. 2Ɔ꞉titio ɓɔ ɓɨwa Yakɔɓɔ, manye ɔ Yɔanɨ nɔ mapi. 3Ndʉ, ɛ꞉na ɓɔ yaka ngɨyɛnɛnɨ yɛ꞉kataɔ Ɓayuda, ɔ꞉titio ga ɓɨfa tɨa kʉ nɔ Pɛtɛlɔ. Ya꞉ɓio ɓisi ɓɔ ʉmbɔ wɔ mɨkatɨ ngɨyɛ yangɔmʉ nɔ ɓʉtɨ ɓɔta ɓufuise. 4Kʉdɔ, Hɛlɔdɛ ɔ꞉titio ga ɓɨfa Pɛtɛlɔ, nɔ, ɓɨ꞉mʉmaya aboloko. Ɛ꞉njo ʉpanʉ a ɓandiba ɓɔ ɓasʉda ɓɔgɨna, ndiba mʉngana nɔ ɓasʉda ɓɔgɨna, ɓɔ ɓiɓio nayɔ akanga iɗo. Ɔ꞉kwaisio ga a꞊kio mʉkɔmbʉ ngʉwangɔ apɛɨ ɔ ɓombi, ambise ɔ Ʉmbɔ wɔ chwɛya aɓubaya. 5Inani aboloko, ɓa꞉ɓio mesu tɨta akʉʉ ɔ Pɛtɛlɔ ɓɔ gbɛ. Yakamɛngana, ɓombi ɓɔ kanisa ɓa꞉ɓio nayɔ anɨtɨa Asɔɓɨɨ, sɔkɔmʉ nɔ bɔmbana.

Malaika ɔchwɛiso Pɛtɛlɔ aboloko

6Naɓutu ɔ ɓisi ngʉɓa Hɛlɔdɛ a꞉kwaisio-ɔɔ akio mʉkɔmbʉ ngʉwangɔ apɛɨ ɔ ɓombi, Pɛtɛlɔ a꞉kwaa ati ɔ ɓasʉda ɓapɨnɨ. A꞉ɓio mʉsangɛ nɔ ɓaselegeni kʉ ɓapɨnɨ. Ɓapɛmakɨa ɓa꞉ɓio ɨɓɔ, akɔpɛmakɨa umongu wɔ boloko. 7Ta ndʉ aka nasugo-ɔɔ aka, ga malaika wɔ Makwɔɓɨɨ nɔ ʉwanga mʉngana ajɛa inani amati ɔ ɨkáá ga ngbaiii! Malaika ɔ꞉mupoto akɔ banja, nɔ, ɔ꞉mʉjʉkaniso, nɔ, ɔ꞉musigio ɓɔ: «Ʉngwa ɨkʉʉ gagaa!» Ga ɓaselegeni ananɨ alɨkɔndɔ lɔ Pɛtɛlɔ ɓɔ ngbrueee. 8Kʉdɔ, malaika ɔ꞉musigio tɨa ɓɔ: «Namangana mʉkaɓa ngʉwɔsɔɔ, nɔ wɔpɛnɨa lɨkpakʉ.» Pɛtɛlɔ ɔ꞉kɨa ta ɓanɨ. Ga malaika ɓata nayɔ ɓɔ: «Pɛnɨa tɨa koti ngɨasɔɔ, wɔnakpata.» 9Pɛtɛlɔ ɔ꞉chwɛa amati ɔ ɨkáá yɔ boloko, ɨyɔ tɨta ambise ɔ malaika. Yaka ngɨyɛnɛnɨ malaika a꞉kɨa, ya꞉ɓio-sɨ nayɔ anɨnɨa ta ndʉ lɨwɔtɔ, sɔkɔmʉ ndʉ ingono. 10Ɓɔ꞉chana mukangi ngʉwɔ pɛɨ, nɔ ʉwɔ ɓepini, nɔ ɓɔ꞉ɓɔya aumongu wɔ uko, ʉwa wa꞉ɓio akɔkanga mesu nɔ gʉlʉ. Ananɨ apɛɨ eɓo, ga umongu ngʉwɔnanɨ ɓɔ ga, nɔ ɓɔ꞉chwɛa. Ɓɔ꞉pʉnga kpata mʉgyɛndɔ, nɔ ta gagaa ngɨananɨ, malaika wɔ꞉mʉsɨa Pɛtɛlɔ.

11Ndʉ Pɛtɛlɔ a꞉pʉnga tɨa pemiso ɓɔ yaka ngɨyɛ yɔkɨanɨɔ ya ta ingono, ga ɨyɔ ɓɔ: «Ɨtakɨtakɨ ngɨyɛ, nɛmbɨɔ tɨa ɓɔ Makwɔɓɨɨ ɔ꞉natʉmɨɔ malaika ngʉwangɔ nɛmɨ akɔɓwanakiso alɨkɔndɔ lɔ Hɛlɔdɛ, nɔ aɓʉɓɨɓɨ ɓuɓomu ngʉɓɔ Ɓayuda, ɓa꞉kwaisio pɔngɔ akʉʉ asɛmɨ.»

12Angbinga ngɨa ɛmbɨa-ɔɔ yaka ngɨyɛnɛnɨ tɨa iɗo, ɔ꞉sa tɨa aɨkáá ngɨyɔ Malɨa, inye ɔ Yɔanɨ ngɨa ɓa꞉tɨmisoko ɓɔ Malɨkɔ. Inani amati ɔ ɨkáá ngɨyɛnɛnɨ, ɓombi ɓaja ɓa꞉ɓio ɓamɔmanɨɛ anɨta Asɔɓɨɨ. 13Ndʉ Pɛtɛlɔ a꞉ɓɛnda umongu ngʉwɔ pɛɨ, mwana ata moi, mombi tɛa ɔngɔ ino ɓɔ Lɔda, ɛ꞉ka anitekio tinene anɔ umongu. 14Ngbinga ngɨa ɔ꞉ka-ɔɔ iso ngɨyɔ Pɛtɛlɔ, a꞉kwa ɨgyagya nɔgbɛ, sɔkɔmʉ ɨgana ɓata umongu. Yakamɛngana, ɔ꞉sa bangʉ tɨta ambɛnɨ, akɔɓɨa ɓɔ Pɛtɛlɔ a aɓei. 15Ga ɨɓɔ nayɔ ɓɔ: «Wɔkwɔ ɓamu?» Yakamɛngana, ɔ꞉tutuo akɔsugo ɓɔ ya ta ingono. Kʉdɔ, ɓɔ꞉sugo tɨa ɓɔ: «ya ndʉ malaika ngʉwangɔ.» 16Pɛtɛlɔ ɛ꞉sɨnganaka ta ɓɛnda umongu. Ɨyɛ ndʉ ɓa꞉gana umongu, nɔ ɓɔ꞉mɨna, yɔɓukiso ʉɓa nɔgbɛ. 17Ɔ꞉ɓʉgbɛma nɔ ɨkɔndɔ ɓɔ ɓɨgbaa. Ɔ꞉pʉnga naɓɔ anʉngakɨa yaka ngɨyɛ, Makwɔɓɨɨ ɔ꞉mʉchweiso-ɔɔ aboloko. Kʉdɔ, ɔ꞉ɓusigio ɓɔ: «Ɓɨeni Yakɔɓɔ, nɔ ɓanduku ngʉɓɔmɔ yaka ngɨyɛ ta ɓɨanɨ.» Ambise ngɨananɨ, ɔ꞉chwɛa nɔ ɔ꞉sa yangɔ aki a꞉sa-ɛɛ.

18Ɨyɛ ɓisi ɓa꞉ya, ɓasʉda ɓɔ꞉kumonio amati ɔ mbambanio yɛta ɨja. Ɓɔ꞉pʉnga ɓokuono ɓɔ Pɛtɛlɔ ɔ꞉kɨɔ tanɨ. 19Hɛlɔdɛ e꞉njo ʉpanʉ nayɔ akɔhata. Yakamɛngana, sɔkɔmʉ ɓɔ꞉mɨna. Ɓɔ꞉ɓokwokiso ɓapɛmakɨa ɓɔ boloko, mbise ɔngɔ, e꞉njo ʉpanʉ naɓɔ akɔmaa. Kʉdɔ, Hɛlɔdɛ ɔ꞉ngwa anɔ Yudɛa, anɨsa akɔchaniso mwana ɔ angbinga anɔ Kaisalia.

Ingwo ngɨyɔ Hɛlɔdɛ

20Tɨa ananɨ, Hɛlɔdɛ ɔ꞉huo nɔ ʉnganga, akʉʉ ɔ ɓombi ngʉɓɔ Tilo, nɔ Sɨdɔna. Kʉdɔ, ɓombi ngʉɓɔnanɨ, ɓa꞉kɔnɔ akɔnɨka apɛɨ angɔ. Ɓa꞉pʉnga-sɨ akɔnɔ ta nɔ atɨ Balasɨtɔ ngɨa a꞉tɨpɛmakɨa ɨmbaa ngɨyɔ ngama, dɔ ɨɓʉsalɨa. Kʉdɔ, ɓɔ꞉sa tɨa atɨ Hɛlɔdɛ akɔnɨta majɨɔ, dɔ dyakaka ngɨyeɓo ya꞉tɨngwa aɨkʉmbʉ ngɨyɔ ngama. 21Tɨa akɔ ɓisi ngʉɓa ɓa꞉napɨa-ɔɔ mɨsɨ, Hɛlɔdɛ ɔ꞉pɛnɨa lɨpʉkʉ ngɨlangɔ lɔ ɓʉngama, nɔ ɔ꞉wolo akʉʉ ɔ kiti ngɨangɔ ɔ ɓʉngama, ɔ꞉pʉnga ndɔyakɨa ubuwa apɛɨ ɔ ɓombi. 22Ɓombi ɓɔ꞉natɨa ɓɔ: «Iso ngayɛ, ya ta iso yɔ mʉngʉ, yangɔmʉ ɨyɔ mombi!» 23Ta akɔ angbinga ngɨananɨ, malaika ngʉwɔ Makwɔɓɨɨ wɔ꞉mʉgbanga Hɛlɔdɛ nɔ kaɓu, dɔ ɨyɔ a꞉baya akɔsɨka ʉbɨba ngʉwa wɔsisekio nɔ Asɔɓɨɨ. Mɨsɔngɔɔ yɔ꞉mʉdya nɔ ɔ꞉wo ta pima.

24Gʉtʉ ɓanɨ, ʉpanʉ wɔ Asɔɓɨɨ wa꞉ɓio ta anadaa nɔ nɨsɨnganaka nɔ pɛɨ. 25Ndʉ, atɨ Balanaba nɔ Saulo ɓa꞉pipo tɛa ngɨyeɓo anɔ Yelusalɛma, ɓɔ꞉sɨka Yɔanɨ ngɨa ɓa꞉tɨmisoko ɓɔ Malɨkɔ ɨhɔ naɓɔ, nɔ ɓɔ꞉tɔwa.

Currently Selected:

Mɨkyananakɨa 12: buuN

Highlight

Compare

Copy