Mɨkyananakɨa 11

Pɛtɛlɔ enjo masaʉ kɔ Kolonelio anɔ Yelusalɛma

1Ɓatitima nɔ ɓaklisito ngʉɓa ɓa꞉ɓio anɔ Yudɛa, ɓɔ꞉ka ɓɔ ɓombi ngʉɓa ɓangɔmʉ Ɓayuda ɓɔbayɔ ʉpanʉ wɔ Asɔɓɨɨ tɨa kʉ bayanɨ. 2Angbinga ngɨa Pɛtɛlɔ a꞉tɔwa-ɔɔ anɔ Yelusalɛma, Ɓayuda ngʉɓa ɓa꞉ɓio ɓɔ ɓɔbayeni Yeso ɓɔ꞉pʉnga ɗuɗuono naɓɔ 3akɔsugo ɓɔ: «Wa꞉kumonio pɛ ati ɔ ɓague ngʉɓa ɓa꞉kiisomʉ ɨgʉnɨ,#11:3 pɔ ɓɔ, ɓombi ngʉɓa ɓa aɓei ɔ ɨfananja ngɨyɔ Ɓayuda nɔ, wɔdyakaka ɨhɔ naɓɔ.»

4Kʉdɔ, Pɛtɛlɔ ɔ꞉pʉnga naɓɔ aɗetenekisio yaka ngɨyɛ ya꞉chana tinetine, ɓɔ: 5«Na꞉ɓio pɔngɔ agʉlʉ ɔ Yɔpa, nɔ ɨmɨ anɨta Asɔɓɨɨ. Kʉdɔ, ɨkyɛmʉ mɛngana yɔ꞉nɛkɨa ndʉ lɨwɔtɔ. Nɔ꞉tɛna ɨkyɛmʉ anujo akʉʉ ɔ ɓisi, ndʉ ɨbʉbʉ yɛta ɨja, nɔ ɨɓote akɔ lindu ɓɔgɨna, yɔɓieni nɛmɨ akɔnɨsɨnganɨa. 6Nɔ꞉kanga ɨbʉbʉ ngɨyɛnɛnɨ ɓɔ ngbee, nɔ, nɛ꞉na inani amati ɓanama ngʉɓɔ mɨtɨndɨ ɓɔgɨna ɓɔgɨna, nɔ ɓanama ngʉɓɔ iju, nɔ ɓanama ngʉɓa ɓaɗuɗuono akɔ ɛsɨ, nɔ ɓanoi. 7Nɔ꞉ka iso mɛngana nɛmɨ asigio ɓɔ: ‹Pɛtɛlɔ, ʉngwa ɨkʉʉ, ʉwa, nɔ wɔdya.› 8Kʉdɔ, nɔ꞉tosio ɓɔ: ‹Pɔ bele Makwasɛmɨ, dɔ ɨmɨ, na꞉ngɔdyamʉ sina ɨkyɛmʉ yɔ ɔpɛ, nɔ ɨyɛ yɔ mʉgwɛ!› 9Iso ngɨyɛnɛnɨ, yɔ꞉kanɨa ɓata machaa kapɨnɨ anɨngwa akʉʉ ɔ ɓisi ɓɔ: ‹Ʉwɛ, watɨkiisomʉ ɔpɛ akʉʉ ɨkyɛmʉ ngɨa Asɔɓɨɨ a꞉jaɓaka.› 10Yaka ngɨyɛnɛnɨ ya꞉kɨanɨa machaa kaatʉ, ambise ɔngɔ, iɓomu yɔ꞉tʉmbanɨa atɔa akʉʉ ɔ ɓisi. 11Ɨnadɔ, kʉ angbinga ngɨananɨ, ɓague ɓaatʉ ngʉɓa ɓa꞉natʉmɨa ɨɓɔ nɨngwa anɔ Kaisalia, ɓɔ꞉ɓɔya aɨkáá ngɨyɛ ta꞉ɓio-ɔɔ. 12Mʉtɨma wɔta Tu wɔ꞉nasigio ɓɔ tɨsa ɨhɔ naɓɔ sɔkɔmʉ nɔ ɓajatuoko. Ɓanduku mɛɗɨa amati ɔ báya, ngʉɓa tɛ꞉kɔ naɓɔ aka, ɓɔ꞉sa nɛmɨ anapɨa. Kʉdɔ, ga isu ɓaɓomu amati ɔ ɨkáá ngɨyɔ Kolonelio ɓɔ ngbuu.

13Ɨyɔ, Kolonelio ɔ꞉tʉngakɨa ngbanga ndʉ aka, ɛ꞉na-ɔɔ Malaika ɓɛmaɛ andɔngɔ, nɔ nayɔ asigio ɓɔ: ‹Tʉma ɓombi anɔ Yɔpa anɨsoko Simoni ngɨa eno ɓɔ Pɛtɛlɔ. 14Ɨyɔ, Pɛtɛlɔ abinɔngakɨa yaka ngɨyɛ ya꞊naheiso ʉwɛ, nɔ ɨkáá ngɨyɛsɔɔ kʉ iɓomu.›

15Ɨmɨ, apʉnga ta yaka ɓɔ, Mʉtɨma wɔta Tu wɔ꞉ɓijeyo ɨɓɔ ngbanga kʉndʉ wa꞉tɨjeyo isu pɛɨ. 16Tunguo ngɨyɛsɛmɨ tɨa ɨyɛnɛnɨ, yaka ngɨyɛ Makwɔɓɨɨ a꞉sugo jɛnɛ ɓɔ: ‹Yɔanɨ a꞉nɨɓatiso amati ɔ mipo, yakamɛngana, ná꞊kwa suo tɨa uɓatiso ngʉwɔ Mʉtɨma wɔta Tu.›#popoko Kyan 1:5 17Kʉdɔ, yɛ꞉nɨanɨa tɨa aɓʉmba ɓɔ Asɔɓɨɨ a꞉ɓinjo ɨɓɔ Mʉtɨma wɔta Tu, ngbanga kʉndʉ a꞉tɨkɨa isu, ngbinga ngɨa ta꞉baya-ɔɔ Makwɔɓɨɨ Yeso Klisito. Ɨmɨ dɔ tɨa ndʉ anɨ, anɨchwa pasi nɔ Asɔɓɨɨ?»

18Ɨyɛ ndʉ ɓɔ꞉ka yaka ngɨyɛnɛnɨ, kʉdɔ, ga mʉtɨma naɓɔ ɓɔ dʉʉ, nɔ, ɓɔ꞉bibiso Asɔɓɨɨ akɔsugo ɓɔ: «Eeɓe, ineni aki Asɔɓɨɨ ɔ꞉ganɨa-ɛɛ ɓombi ngʉɓa ɓangɔmʉ Ɓayuda ɨngbaa anacho mʉtɨma, nɔ, asɨka ɓʉhɛa!»

Mʉkpanganɨa wɔ Kanisa ngɨyɔ Atiokia

19Ɓʉkaɓʉkaɨ ngʉɓa ɓa꞉chwɛa mbise ngɨa ɓa꞉wa-ɔɔ Itieni, ɓa꞉panjaniso ɓombi ngʉɓa ɓabaya Yeso. Ɓɔmɔ ati eɓo, ɓa꞉sa akɔɓɔya anɔ Foiniki, nɔ anɔ Kipulo, nɔ anɔ Atiokia. Ɓa꞉ɓio aɓɨakɨa ʉpanʉ wɔ Asɔɓɨɨ sɨ ta akɔ Ɓayuda. 20Yakamɛngana, ɓɔmɔ ɓata ati eɓo, ʉɓa, ɓa꞉ɓio ɓombi ɓɔ Kipulo, nɔ Kɨlɛnɛ, ɓa꞉sa anɔ Atiokia, nɔ, ɓɔ꞉ɓɨakɨa kʉɔ Ɨsaʉ aɓombi ngʉɓa ɓangɔmʉ Ɓayuda, naɓɔ anʉngakɨa Ɨsaʉ yɛta Iɗo ngɨyɔ Makwɔɓɨɨ Yeso. 21Angu ɔ Makwɔɓɨɨ a꞉ɓio ɨhɔ naɓɔ, nɔ, ɓombi ɓaja ɓɔ꞉baya, nɔ, ɓɔ꞉natana akɔ Makwɔɓɨɨ. 22Ɨyɛ ɓombi ɓɔ kanisa ngɨyɔ Yelusalɛma, ɓɔ꞉ka yaka ngɨyɛnɛnɨ, ɓɔ꞉tɔtʉma tɨa Balanaba anɨsa inani anɔ Atiokia. 23Balanaba ɔ꞉ɓɔya, nɔ, ɛ꞉na ɓɔ Asɔɓɨɨ ɔ꞉kiokio ɓombi kʉ ingono. Kʉdɔ, a꞉kwa ɨgyagya, nɔ, ɔ꞉ɓinjo ɨɓɔ ɓaɓomu iguegue, akɔɓio nɔ kpekeɓu akɔkpata mapanʉ maɓomu ngʉkɔ Makwɔɓɨɨ. 24Balanaba a꞉ɓio mombi ata iɗo, muhue nɔ Mʉtɨma wɔta Tu nɔ báya. Kʉɓanɨ, ɓombi ɓaja ɓa꞉baya Makwɔɓɨɨ akʉʉ ɔ mapanʉ ngʉkangɔ.

25Ambise ngɨananɨ, Balanaba ɔ꞉sa akɔhata Saulo anɔ Talɨsɔ. 26Ndʉ a꞉mijeyo, ɔ꞉mʉsɨka anɨsa anɔ Atiokia. Ɨɓɔ ɓaɓomu ɓapɨnɨ, ɓa꞉kwaa akanisa ngɨananɨ ta igo iti, nɔ, ɓɔ꞉panɨa ambaja ɔ ɓombi mʉja nɔgbɛ. Ɓakpata ɓa꞉pʉnga nisokonio ɓɔ «ɓaklisito» anɔ Atiokia.

27Ngbinga ngɨananɨ, magbɛ kɔ Asɔɓɨɨ ka꞉ngwa anɔ Yelusalɛma akɔnɨsa anɔ Atiokia. 28Mʉngana ati eɓo ino ɓɔ Agaɓɔ, ɨhɔ nɔ angu ɔ Mʉtɨma wɔta Tu, a꞉kwa ɨgbɛ akɔsugo ɓɔ ayende ata mʉja a suo anɨkwa akɔ dɔdɔ muɓomu. Ayende ngɨananɨ, ɛ꞉ka ingainga tɨa angbinga ngɨa Kɔlɔdɛ a꞉ɓio-ɔɔ ngama ata mʉja ɔ Ɓalɔma. 29Kʉdɔ, ɓakpata ɓa꞉kwaisio ɓɔ mombi nangana nangana ati eɓo, akpatanakɨa nɔ angu ngɨa aɓio nayɔ, ɨtʉma lɨkyɛmʉ akɔsalɨa ɓombi ngʉɓa ɓa꞉baya Yeso, ʉɓa, ɓa anɔ Yudɛa. 30Ɓa꞉kɨa ta ɓanɨ, kʉdɔ, ɓɔ꞉tʉmɨa ɓatataɓasie ngʉɓɔ Kanisa ngɨyɔ Yudɛa, apɛpɛ ngɨananɨ, alɨkɔndɔ lɔ atɨ Balanaba nɔ Saulo.

Currently Selected:

Mɨkyananakɨa 11: buuN

Highlight

Compare

Copy