Ехъошуа 17
17
ЯпшӀыкӀублэнэрэ шъхьэр
1Юсыф ищыпэлъф Мынасэ илӀакъо мары къытефэгъэ унэе Ӏахьэр. Мынасэ ищыпэлъф Махыр къытекӀыгъэхэм ГъылыӀад, Бащан чӀыналъэхэр Иордан псыхъом итыгъэкъокӀыпӀэкӀэ ащаратыгъэхагъ. Махырхэр зэолӀ лӀыхъужъхэу щытыгъэх, ГъылыӀад лӀакъори Махыр къытекӀыгъ. 2Адрэ унагъохэу Мынасэ лӀакъом хэхьэхэрэм – АбиӀэзэр, Хъэлэкъ, Асриел, Щэхэм, Хъэфэр, ЩэмидаӀ – ахэми ячӀыгу Ӏахьэхэр Иордан псыхъом икъохьапӀэкӀэ щаратыгъэх. Мыхэр Юсыф ыкъо Мынасэ къытекӀыгъэ хъулъфыгъэхэр арых.
3Мынасэ ыкъо Махыр ыкъожьэу ГъылыӀад ыкъоу Хъэфэр ыкъожьэу Цэлэфхъад къо иӀагъэп, пшъашъэ щэхъу иӀагъэп. Ащ ыпхъухэм ацӀагъэр – Мэхъал, НоӀэ, Хъогъэл, Мылкъэ, Тырцэ. 4Ахэр къурмэнышӀэу ЕлыӀазар, Ныун ыкъо Ехъошуа, лъэпкъым ипащэхэм адэжь кӀохи, араӀуагъ:
– Тшыхэм афэдэу тэри чӀыгу къытитынэу Зиусхьаным Мосэ унашъо къыфишӀыгъ.
Арыти, Зиусхьаным унашъо зэришӀыгъэм фэдэу, Ехъошуа зэшыпхъухэм ятэшхэм афэдэу чӀыгу Ӏахьэхэр аритыгъэх. 5-6Джаущтэу Мынасэ лӀакъом ыпхъухэм ыкъохэм афэдэ къабзэу чӀыгу аратыгъэти, Мынасэ лӀакъом Иордан псыхъом икъокӀыпӀэ щыӀэ ГъылыӀадрэ Бащанрэ анэмыкӀэу чӀыгу ӀахьипшӀ къыӀукӀагъ. (ГъылыӀад чӀыналъэр Мынасэ адрэ къытекӀыгъэхэм яеу хъугъэ).
7Мынасэ чӀыналъэм игъунапкъэ Ащэр щыригъажьэти Щэхэм пэчӀынатӀэу щыт Мыхмытат екӀущтыгъэ, ащ икӀыти къыблэмкӀэ Ӏэн-Тапыуахъ щыпсэухэрэм адэжь нэсыщтыгъэ. 8(Тапыуахъ чӀыгур мынасэ лӀакъом къыӀукӀагъ, ау ежь, Тапыуахъ къалэр, гъунапкъэм тетыгъэти, ефраимхэм аратыгъ). 9ЕтӀанэ гъунапкъэр къыблэмкӀэ щыӀэ Къанэ псыхъомкӀэ кӀощтыгъэ. Ащ итыгъэ къалэхэр мынасэ икъалэхэм ахэтыгъэхэми, Ефраим лӀакъом иягъэх. АдыкӀэ Мынасэ игъунапкъэ псыхъом итемыр лъэныкъо рекӀокӀыти, хым дэжь щиухыщтыгъэ. 10КъыблэмкӀэ гъэзэгъэ чӀыгур Ефраим иягъ, темырымкӀэ гъэзагъэр – Мынасэ фэгъэзэгъагъ. Мынасэ ичӀыгухэр тыгъэкъохьапӀэмкӀэ хым нэсыщтыгъэх, темырымкӀэ Ащэр лӀакъом зы гъунапкъэ дыряӀагъ, къокӀыпӀэмкӀэ – Иссашхар чӀыгум еолӀэжьыщтыгъэх.
11Иссашхаррэ Ащэррэ ячӀыналъэхэм арыт къалэхэу яӀэгъо-блэгъу псэупӀэхэр ягъусэхэу Мынасэ къытекӀыгъэхэм яягъэхэр Бэтщан, ИблэӀам, Дор, Ӏэндор, ТаӀынахъ, Мэгъыдэ (ящэнэрэр Нафэт#17:11 Мыр зэхьылӀагъэр къалъытэрэ къалэхэм ящэнэрэу ахэт Дор къалэр арын фае зыфэгъэхьыгъэр. Еплъ: 11:2. ары).
12Ау Мынасэ лӀакъом а къалэхэр ыштэнхэ ылъэкӀыгъэхэпти, а чӀыгум къинагъэхэу къэнаӀанхэр щыпсэущтыгъэх. 13Ыужым израилхэм алъапсэ загъэпытэм, къэнаӀанхэр агъэпщылӀыгъэх нахь рафынхэу рафыгъэхэп.
14Зэгорэм Юсыф къыхэкӀыгъэхэм Ехъошуа:
– Тэ тылъэпкъышхоу, шъыпкъэ дэдэмкӀэ Зиусхьаным ынэшӀу къытщифагъэ пэтзэ, сыд пае о зы унэе Ӏахьэу, зы чӀыгу Ӏахь къытэптыгъ? – аӀуи раӀуагъ.
15Арыти:
– Шъо арэу шъулъэпкъышхомэ, Ефраим къушъхьалъэр шъорыкӀэ зэжъумэ, пэрыцхэмрэ рэфхэмрэ ячӀыгу шъукӀуи, ащ ит мэзхэм шъуахахьи, шъущыпсэунэу къэжъугъэкъабзэх, – ариӀожьыгъ ахэм Ехъошуа.
16Ащ ипэгъокӀэу:
– Къушъхьалъэр тэркӀэ макӀэ. Ау зэкӀэ къэнаӀанхэу кӀэим щыпсэухэрэр пӀомэ, ИзрыӀэл кӀэим щегъэжьагъэу Бэтщан къалэмрэ ащ иӀэгъо-блэгъу псэупӀэхэмрэ анэс гъучӀ купсынкӀэхэр яӀэх. – Юсыф къыхэкӀыгъэхэм джэуап къатыжьыгъ.
17Арыти, Юсыф къыхэкӀыгъэ лӀэкъуитӀум, Ефраимрэ Мынасэрэ, Ехъошуа ариӀуагъ:
– Шъо шъулъэпкъышху, ары, боу шъулъэш. Арышъ, зы чӀыгу Ӏахьэ закъоп шъуиӀэщтыр, 18мэзыр зытиз къушъхьалъэхэри шъуех. Ахэр жъугъэкъабзэхи, аужырэ гъунапкъэм нэс шъуиещтых. ШӀагъуа къэнаӀанхэм гъучӀ купсынкӀэхэр яӀэхэмэ, шӀагъуа лъэшыхэмэ – шъо ахэр ишъуфыщтых.
Currently Selected:
Ехъошуа 17: АдыТГ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
